14/06/2020
ZAČARANI DVOR
Na bregu v Čepelovcu leži, kak bi službeno rekli, kurija Barnagor. Ali to je itak za turiste. Ja sam ga upoznal kakti - dvor Barnagor. To je malo bolje poetično, lepše, rimuje se. I dok sam prvi put bil tam, me je Božica prepelala po zdanju, po širini i po visini, gde god da je duh viteza Petra spal, mi smo mu sigurno vanjkuša zameknuli.
Barnagor je začarani dvor. Dok jemput prejdeš njegovu tešku kovanu lesu, on ju za tobom zapre i ti si tam kak doma. On te zalegne v senku od breze, zaslepi te z tapetom od listja, zaplete te med klasje trave, od sakoga poljskoga cveta ti donese duhu, a med starim steblima te čuva od sakoga zla kaj živi z vun lese. Barnagorski pevci i sove te pratiju na saki stopi, javori ti pokažeju lisnatu reviju, smreke ti držiju kroha pod nebom. V barnagorskim sobama slike i knjige govoriju, peči grejeju i dišiju po friškim cepanicama, a v kuli se vu vitezovi lovački sobi lovci kartaju i pijeju konjak. V “sobi” v levom krilu, kaj ju je vitez negda mel za stan svojim rasnim konjima, je mesto gde je kojekakva dečja i staračka roka ostavila svojega traga, komad zaigrane duše vu figurici, slikariji, pismu... I koju god pogledaš, saka te dotekne z oni kaj vu nji živi, saka ti reče svoju priču. Barnagor jih čuva kak blago. Verna i vredna Barnagorova službenica čuti saku njegovu sreču i žalost, pa mu hrpta podene, a srce mu celo da.
Rekel bi da je v Barnagoru muk, kajti stari vitez ne straši, niti stare grede škripaju. Ali če bolje poslušaš, on šepče z vetrom, popeva z ftičekima, šumi z listjem, a čuje se i cucek v daljini, sitni dečji smeh, zacvili drvena štenga pod terhom…
Stari Barnagor je još itekek živ. Saki put me stisne k sebi, spomina se z menom, a dok me pusti nazaj čez lesu, jen komad mene ostane tam na bregu pod smrekom, da se imam za kaj vrnuti. Tak valjda ti stari dvori funkcioneraju. Ali ja bi se itak vrnul, če je prilika, i još koga sobom dopelal. Saki put.
(A. Horvat, 2020)
