22/08/2026
നെഹ്രുട്രോഫി ജലമേളയ്ക്ക് ശേഷം നഗരസഭയുടെ നേതൃത്വത്തിൽ നഗര ശുചീകരണം നടത്തി. നഗരത്തിലും, നെഹ്രു പവലിയനിലും, റോസ് പവലിയന്, വിക്ടറി പവലിയനിലും കായലിലുമുള്ള വെള്ളക്കുപ്പികളും മറ്റ് മാലിന്യങ്ങളും നഗരസഭ ആരോഗ്യ വിഭാഗത്തിൻ്റെ നേതൃത്വത്തില് നീക്കം ചെയ്തു. മത്സര വിജയികളെ പ്രഖ്യാപിച്ചതിനു ശേഷം ഫിനിഷിംഗ് പോയിൻ്റിൽ നിന്നും ആരംഭിച്ച ശുചീകരണ യജ്ഞം ബഹു ആലപ്പുഴ എം.എൽ.എ ശ്രീ. എ.ഡി തോമസ് ഉദ്ഘാടനം ചെയ്തു.ആലൂക്കാസ് പാലം മുതല് കിഴക്കോട്ട് പുന്നമട ബോട്ട് ജെട്ടി വരെയും, ബോട്ട് ജെട്ടി പരിസരവും ഗ്രീന് സോണ് ആയി പ്രഖ്യാപിച്ച്, ഒറ്റത്തവണ ഉപയോഗിക്കുന്ന പ്ലാസ്റ്റിക് ഉല്പന്നങ്ങള് പൂര്ണ്ണമായും നിരോധിച്ചിരുന്നു. കുടിവെള്ള കുപ്പികള്, ഭക്ഷണപൊതികള് സ്നാക്സ് പാക്കറ്റ് എന്നിവയില് സ്റ്റിക്കറുകള് പതിച്ച് 20 രൂപ ഈടാക്കുകയും, ജലോത്സവം കഴിഞ്ഞ് സ്റ്റിക്കര് പതിച്ച കുപ്പികള്, പാക്കറ്റുകള് തിരികെ ഹാജരാക്കിയവര്ക്ക് തുക തിരികെ നല്കി.ഹരിതചട്ടം പാലിക്കുന്നതിന്റെ ഭാഗമായി ഗ്രീന് സോണ് മേഖലയില് മാലിന്യം തരംതിരിച്ച് നിക്ഷേപിക്കുന്നതിന് താല്ക്കാലിക ബിന്നുകള് സ്ഥാപിച്ച് ബിന്നുകള്ക്ക് സമീപം നഗരസഭ പ്രത്യേകം സജ്ജീകരിച്ചിട്ടുള്ള വാളന്റിയര്മാര്മാരുടെ സേവനം ഉറപ്പാക്കി.രാവിലെ 6 മണി മുതല് ഔട്ട് പോസ്റ്റ് പാലത്തിനു സമീപം, പുന്നമട ഫിനിഷിംഗ് പോയിന്റ്, മാതാ ജെട്ടി, അച്ചായന്സ് പാര്ക്ക്, എന്നിവിടങ്ങളില് ഗ്രീന് ചെക്ക് പോസ്റ്റുകള് സ്ഥാപിച്ച് ഹെല്ത്ത് ഇന്സ്പെക്ടര്മാരുടെ നേതൃത്വത്തില് ഹരിതചട്ടം പാലിക്കുന്നതിനു ആവശ്യമായ പരിശോധന കര്ശനമാക്കി. പ്രധാന കേന്ദ്രങ്ങളിലെല്ലാം താല്ക്കാലിക ബിന്നുകള് സ്ഥാപിച്ച് സന്നദ്ധ പ്രവര്ത്തകരുടെ സേവനം ഉറപ്പാക്കിയിരുന്നു.നഗരസഭയിലെ മുഴുവൻ ഹെൽത്ത് ഇൻസ്പെക്ടർമാരും ആരോഗ്യ വിഭാഗം ജീവനക്കാരും തൊഴിലാളികളും ഹരിത കർമ്മ സേനാംഗങ്ങളും, NSS വാളന്റിയര്മാരും ശുചീകരണ യജ്ഞത്തിൽ പങ്കെടുത്തു.
ULB code: 803299
ULB name: Alappuzha Municipality
