25/08/2026
महावितरणच्या विद्युत यंत्रणेवर होर्डिंग्ज, जाहिरात फलक, बॅनर व पोस्टर्स लावू नयेत--महावितरणचे आवाहन
महावितरण कंपनीच्या विद्युत खांब, रोहित्रे, वीजवाहिन्या, डीपी स्ट्रक्चर, फिडर पिलर, उपकेंद्र परिसर तसेच अन्य विद्युत यंत्रणेवर अनधिकृतपणे होर्डिंग्ज,जाहिरात फलक,बॅनर, पोस्टर्स, स्टिकर्स अथवा अन्य प्रचार साहित्य लावू नये, असे आवाहन महावितरणकडून करण्यात आले आहे.
विद्युत खांब, रोहित्रे व इतर वीज यंत्रणा जाहिरातींसाठी वापरणे धोकादायक व नियमबाह्य-
वीज खांब किंवा अन्य विद्युत यंत्रणेवर जाहिरात साहित्य लावण्यासाठी तार किंवा दोर बांधणे, लोखंडी फ्रेम बसविणे अथवा इतर कोणत्याही प्रकारे हस्तक्षेप केल्यास विद्युत यंत्रणेचे नुकसान होण्याची शक्यता असते. त्यामुळे वीजपुरवठा खंडित होण्याबरोबरच संबंधित व्यक्ती तसेच वीज कर्मचाऱ्यांच्या सुरक्षिततेलाही गंभीर धोका निर्माण होऊ शकतो. विशेषतः पावसाळ्यात बॅनर, पोस्टर्स किंवा फ्लेक्स वाऱ्यामुळे विद्युत वाहिन्यांच्या संपर्कात येण्याची शक्यता असते. अशा घटनांमुळे शॉर्टसर्किट, वीजपुरवठ्यातील व्यत्यय, विद्युत अपघात तसेच जीवितहानीचा धोका निर्माण होऊ शकतो. महावितरणच्या वीज यंत्रणेवर अनधिकृत जाहिरात साहित्य आढळल्यास ते संबंधित यंत्रणेच्या सुरक्षिततेच्या दृष्टीने हटविण्याची कार्यवाही करण्यात येऊ शकते.
विद्युत यंत्रणा ही जाहिरातीसाठीची जागा नाही
जाहिरातदार, संस्था, व्यावसायिक आस्थापना तसेच नागरिकांनी जाहिरात व प्रचारासाठी अधिकृत आणि सुरक्षित जागांचाच वापर करावा. विद्युत यंत्रणेवर कोणत्याही प्रकारचे साहित्य लावू नये तसेच असे साहित्य लावताना कोणी आढळल्यास नागरिकांनी संबंधित महावितरण कार्यालयास माहिती द्यावी. आपली सुरक्षितता हीच महावितरणची प्राथमिकता आहे. विद्युत यंत्रणेपासून सुरक्षित अंतर ठेवा आणि अनधिकृत जाहिरातींना आळा घाला.
कायदेशीर कारवाईचा इशारा
यापुढे महावितरणच्या विद्युत पायाभूत सुविधांवर अनधिकृतपणे होर्डिंग्ज, जाहिरात फलक, बॅनर, पोस्टर्स, स्टिकर्स अथवा अन्य प्रचार साहित्य लावल्याचे आढळून आल्यास संबंधितांविरुद्ध लागू कायदे, नियम व विनियमांनुसार आवश्यक ती कायदेशीर व प्रशासकीय कारवाई करण्यात येईल, असा इशाराही महावितरणने दिला आहे. ही सूचना विद्युत अधिनियम, 2003 तसेच केंद्रीय विद्युत प्राधिकरण (सुरक्षा व विद्युत पुरवठा संबंधीचे उपाय) विनियम, 2023 मधील विनियम क्र.14 यांच्या अनुषंगाने देण्यात येत आहे. नागरिक आणि विद्युत वितरण यंत्रणेची सुरक्षितता अबाधित ठेवण्यासाठी सर्व संबंधितांनी महावितरणला सहकार्य करावे, असे आवाहन करण्यात आले आहे.
----------------------------------------
