06/08/2026
শিক্ষাই হৈছে এটা জাতিৰ প্ৰগতি, স্বাৱলম্বিতা আৰু আত্মমৰ্যাদাৰ মূল ভেটি।
মাননীয় মুখ্যমন্ত্ৰী ড° হিমন্ত বিশ্ব শৰ্মা ডাঙৰীয়াৰ দূৰদৰ্শী নেতৃত্বত অসম চৰকাৰে গ্ৰহণ কৰা ‘মুখ্যমন্ত্ৰীৰ নিযুত মইনা আঁচনি'খনে কন্যা সন্তানৰ শৈক্ষিক উত্তৰণ, আত্মবিশ্বাস বৃদ্ধি আৰু সামাজিক সুৰক্ষা সুনিশ্চিত কৰাৰ ক্ষেত্ৰত এক যুগান্তকাৰী পদক্ষেপ হিচাপে ইতিমধ্যে প্ৰতিষ্ঠা লাভ কৰিছে। অকল ‘নিযুত মইনা’ই নহয়, আমাৰ ছাত্ৰসকলকো উচ্চ শিক্ষাৰ প্ৰতি অধিক আগ্ৰহী আৰু উৎসাহিত কৰি তুলিবলৈ ‘মুখ্যমন্ত্ৰীৰ নিযুত বাবু আঁচনি’ৰ জৰিয়তে আৰ্থিকভাৱে দুৰ্বল শ্ৰেণীৰ শিক্ষাৰ্থীসকলৰ সবলীকৰণত গুৰুত্ব আৰোপ কৰা হৈছে।
আজি মাননীয় মুখ্যমন্ত্ৰী ডাঙৰীয়াই গুৱাহাটীৰ শ্ৰীমন্ত শংকৰদেৱ কলাক্ষেত্ৰত আয়োজিত ৰাজ্যিক পৰ্যায়ৰ অনুষ্ঠানত ‘মুখ্যমন্ত্ৰীৰ নিযুত মইনা’ আৰু ‘মুখ্যমন্ত্ৰীৰ নিযুত বাবু’ আঁচনিৰ ২০২৬-২৭ শিক্ষাবৰ্ষৰ আবেদন-পত্ৰ বিতৰণ কাৰ্যৰ আনুষ্ঠানিকভাৱে শুভাৰম্ভ কৰে।
আজি বোকাখাতৰ জে ডি এছ জি মহাবিদ্যালয়ৰপৰা এই অনুষ্ঠানত মাননীয় মন্ত্ৰী তথা বোকাখাত সমষ্টি বিধায়ক শ্ৰী অতুল বৰা ডাঙৰীয়া ভাৰ্চুৱেলী সংযুক্ত হয় আৰু মহাবিদ্যালয়খনৰ শিক্ষাৰ্থীসকলৰ বাবে আঁচনি দুখনৰ আবেদন-পত্ৰ বিতৰণৰ আনুষ্ঠানিক শুভাৰম্ভণি কৰে।
'মুখ্যমন্ত্ৰীৰ নিযুত মইনা আঁচনি'ৰ অধীনত বোকাখাত সমষ্টিৰ মুঠ ১১খন শিক্ষানুষ্ঠানৰ ৩,৪২৪ গৰাকী শিক্ষাৰ্থীয়ে সুবিধা লাভ কৰিব। একেদৰে, 'নিযুত বাবু আঁচনি'ৰ অধীনত ৪খন শিক্ষানুষ্ঠানৰ ১,১০৪ গৰাকী শিক্ষাৰ্থীয়ে সুবিধা লাভ কৰিব।
এই দুয়োখন আঁচনিয়ে শিক্ষাৰ পোহৰ বিলাই আমাৰ যুৱ সমাজক আত্মবিশ্বাসী, দক্ষ আৰু স্বাৱলম্বী ভৱিষ্যতৰ দিশে আগুৱাই নিয়াত নিশ্চিতভাৱে গুৰুত্বপূৰ্ণ ভূমিকা পালন কৰিব। আমাৰ প্ৰতিগৰাকী শিক্ষাৰ্থীয়ে যাতে আৰ্থিক অসুবিধাৰ বাবে শিক্ষাৰপৰা বঞ্চিত নহয়, সেই লক্ষ্যৰ দিশে এই আঁচনিদ্বয়ে এক শক্তিশালী ভেটি গঢ়ি তুলিছে।
এই সুদূৰপ্ৰসাৰী আৰু জনকল্যাণমুখী পদক্ষেপৰ বাবে মাননীয় মুখ্যমন্ত্ৰী ড° হিমন্ত বিশ্ব শৰ্মা ডাঙৰীয়াক মাননীয় মন্ত্ৰী অতুল বৰা ডাঙৰীয়াই আন্তৰিক ধন্যবাদ আৰু কৃতজ্ঞতা জ্ঞাপন জনাই ।
মাননীয় মুখ্যমন্ত্ৰী ডাঙৰীয়াই গুৱাহাটীৰ অনুষ্ঠানটিত বানপীড়িত শিৱসাগৰ, চৰাইদেউ, যোৰহাট আৰু গোলাঘাট জিলাৰ ৭৯৩খন বিদ্যালয়লৈ প্ৰত্যক্ষ লাভ হস্তান্তৰৰ জৰিয়তে ১৫.৮৬ কোটি টকাৰ আৰ্থিক সাহায্য আনুষ্ঠানিকভাৱে মুকলি কৰে। লগতে, শিৱসাগৰ আৰু চৰাইদেউ জিলাৰ ২১,০২৫ গৰাকী শিক্ষাৰ্থীৰ শিক্ষা সামগ্ৰী ক্ৰয়ৰ বাবে মুখ্যমন্ত্ৰীৰ সাহায্য পুঁজিৰ পৰা ৪.২৬ কোটিতকৈ অধিক টকাৰ সাহায্য বিতৰণৰো শুভাৰম্ভ কৰে।
বোকাখাতৰ অনুষ্ঠানটিত বোকাখাত সমজিলাৰ সমজিলা আয়ুক্ত শ্ৰীমতী সুজাতা গগৈ, জে ডি এছ জি মহাবিদ্যালয়ৰ অধ্যক্ষ ড° জয়ন্ত গগৈ প্ৰমুখ্যে মহাবিদ্যালয়ৰ উপাধ্যক্ষ, অন্যান্য বিশিষ্ট ব্যক্তিসকল, সংশ্লিষ্ট বিভাগৰ বিষয়া, শিক্ষক-শিক্ষয়িত্ৰী আৰু শিক্ষাৰ্থীসকল উপস্থিত থাকে।
