19/04/2023
ലോക പൈതൃക ദിനാഘോഷങ്ങൾക്ക് നിറവേകി "എർത്ത്ലോർ" ഗോത്ര പൈതൃക ശിൽപശാല.
ലോക പൈതൃക ദിനാഘോഷത്തിന്റെ ഭാഗമായി പഴശ്ശിരാജാ മ്യൂസിയം എർത്ത്ലോർ ഗോത്രപൈതൃക ശിൽപ്പശാല സംഘടിപ്പിച്ചു. കാട്ടുനായ്ക്ക ഗോത്രത്തിന്റെ ഭാഷ, പാട്ടുകൾ, കഥകൾ, ഭക്ഷണരീതികൾ എന്നിവ പരിചയപ്പെടാനുള്ള വേദിയായി ഈ ശിൽപശാല മാറി. സംഗീത-നൃത്ത അവതരണങ്ങളും ശിൽപ്പശാലയുടെ ഭാഗമായി നടന്നു.
കാട്ടുനായ്ക്ക ഗോത്രവിഭാഗത്തിന്റെ പൈതൃകമായ രീതികളെയും വ്യത്യസ്ത സംസ്കാരങ്ങളെയും അടുത്തറിയാൻ കൂടി വേണ്ടിയാണ് പൈതൃക ദിനത്തിന്റെ ഭാഗമായി ശിൽപ്പശാല സംഘടിപ്പിച്ചത്. സംസ്ഥാന പുരാവസ്തു വകുപ്പ്, ഈസ്റ്റ്ഹിൽ പഴശ്ശിരാജ പുരാവസ്തു മ്യൂസിയം, ആർക്കൈവൽ ആന്റ് റിസർച്ച് പ്രൊജക്ട് എന്നിവയുടെ ആഭിമുഖ്യത്തിലാണ് ശിൽപ്പശാല നടത്തിയത്.
തിരുനെല്ലി കാട്ടിക്കുളം അംബേദ്കർ കോളനിയിലെ വിജയൻ വി, നിധിൻ ജെ ആർ, വാസു, ഉണ്ണി, കുമാർ, ശ്രീജേഷ്, സുജിത്ത്, രവിൻ സഞ്ജയ്, ഗിരിജ, രഘു എം തുടങ്ങിയവരാണ് ഗോത്ര കലകൾ അവതരിപ്പിച്ചത്.
ജില്ലാ വികസന ഓഫീസർ എം.എസ് മാധവിക്കുട്ടി ഐ.എ.എസ്., ഇൻടാക് കോഴിക്കോട് ചാപ്റ്റർ കൺവീനർ ശ്രീമതി അർച്ചന കമ്മത്ത് എന്നിവർ ഗോത്രകലാകാരർക്കൊപ്പം നൃത്തം ചെയ്തത് ആവേശമുണർത്തി.
പഴശ്ശിരാജ മ്യൂസിയം ചാർജോഫീസർ കൃഷ്ണരാജ്, ആർപോ എക്സിക്യൂട്ടീവ് ഡയറക്ടർ ശ്രുതിൻ ലാൽ, ആർട്ട് ഗ്യാലറി മ്യൂസിയം സൂപ്രണ്ട് പ്രിയരാജൻ തുടങ്ങിയവർ സംസാരിച്ചു.
