നവകേരള സദസ്സ് ചേലക്കര

28/08/2026

28/08/2026

അസമത്വങ്ങൾക്കും അടിച്ചമർത്തലുകൾക്കും എതിരെ വിട്ടുവീഴ്ചയില്ലാതെ പൊരുതിയ നവോത്ഥാന നായകൻ മഹാത്മാ അയ്യങ്കാളി..

വില്ലുവണ്ടി കയറി സഞ്ചാരസ്വാതന്ത്ര്യം വെട്ടിപ്പിടിച്ചും,
അക്ഷരം നിഷേധിച്ച വ്യവസ്ഥിതിക്ക് മുന്നിൽ പഞ്ചമിയുടെ കൈപിടിച്ച് നടത്തിയ ചരിത്രപ്രവേശവും ഇന്നും പോരാട്ടങ്ങൾക്ക് പ്രചോദനമാണ്.

നീതിയും സമത്വവും പുലരുന്ന സമൂഹത്തിനായുള്ള മുന്നേറ്റങ്ങളിൽ അയ്യങ്കാളിയുടെ സ്മരണകൾ കരുത്താകട്ടെ.

22/08/2026

പാലക്കാട് റെയിൽവേ ഡിവിഷനെ തകർക്കാൻ ബോധപൂർവമായ നീക്കം

പാലക്കാട് ഡിവിഷന്റെ ജീവനാഡിയായ മംഗലാപുരം മേഖലയെ വെട്ടിമാറ്റി സൗത്ത് വെസ്റ്റേൺ റെയിൽവേയുടെ മൈസൂരു ഡിവിഷന് നൽകാനുള്ള കേന്ദ്ര റെയിൽവേ ബോർഡിന്റെ തികച്ചും അന്യായമായ വിജ്ഞാപനം അടിയന്തരമായി പിൻവലിക്കണമെന്ന് ആവശ്യപ്പെട്ട് കേന്ദ്ര റെയിൽവേ മന്ത്രി അശ്വിനി വൈഷ്ണവിന് കത്തയച്ചു. കേരളത്തിലെ റെയിൽവേ വികസനത്തെയും യാത്രാസൗകര്യങ്ങളെയും പൂർണ്ണമായി തകർക്കുന്ന ഈ തീരുമാനത്തിനെതിരെ ശക്തമായ പ്രതിഷേധം രേഖപ്പെടുത്തിയിട്ടുണ്ട്. പാലക്കാട് ഡിവിഷന്റെ പ്രധാന വരുമാന മാർഗ്ഗങ്ങളായ മംഗലാപുരം പോർട്ട്, മംഗലാപുരം സെൻട്രൽ, മംഗലാപുരം ജംഗ്ഷൻ എന്നീ സ്റ്റേഷനുകൾ നഷ്ടപ്പെടുന്നതോടെ ഡിവിഷൻ കടുത്ത സാമ്പത്തിക പ്രതിസന്ധിയിലാവുകയും, ഭാവിയിൽ ലാഭകരമല്ലെന്ന കാരണം പറഞ്ഞ് പാലക്കാട് ഡിവിഷന്റെ നിലനിൽപ്പ് തന്നെ അപകടത്തിലാവുകയും ചെയ്യും. മംഗലാപുരം കേന്ദ്രീകരിച്ച് സർവീസ് നടത്തുന്ന കേരളത്തിലെ ട്രെയിൻ ശൃംഖലയെ ഇത് ബാധിക്കുമെന്നതിനാൽ മലബാറിലേക്ക് പുതിയ സർവീസുകൾ ആരംഭിക്കുന്നതിനും നിലവിലുള്ളവ നീട്ടുന്നതിനുമുള്ള സാധ്യതകൾ പൂർണ്ണമായും അടയും. കൂടാതെ, മേഖലയിലെ വികസന മുൻഗണനകൾ കർണാടകയിലേക്ക് മാറ്റപ്പെടുകയും കേരള അതിർത്തി വരെയുള്ള പാത ഇരട്ടിപ്പിക്കൽ മന്ദഗതിയിലാവുകയും ചെയ്യും. തിരുവനന്തപുരവും പാലക്കാടും കോർത്തിണക്കി കേരളത്തിന് ഒരു പ്രത്യേക റെയിൽവേ സോൺ വേണമെന്ന പതിറ്റാണ്ടുകളുടെ ന്യായമായ ആവശ്യത്തെയും ജീവനക്കാരുടെ തൊഴിൽ സുരക്ഷിതത്വത്തെയും സീനിയോറിറ്റിയെയും ഈ തീരുമാനം പ്രതികൂലമായി ബാധിക്കും. 2026 ഒക്ടോബർ 1 മുതൽ നിലവിൽ വരുന്ന ഈ ഉത്തരവ് അടിയന്തരമായി പിൻവലിക്കാനും, പാലക്കാട് ഡിവിഷന്റെ പൂർണ്ണരൂപം നിലനിർത്താനും കേന്ദ്ര സർക്കാർ തയ്യാറാകണം.

15/08/2026

ഉത്തർപ്രദേശിലെ നാല് സർക്കാർ മെഡിക്കൽ കോളേജുകളിൽ (കനൗജ്, ജലൗൺ, അംബേദ്കർ നഗർ, സഹാറൻപൂർ) പട്ടികജാതി-പട്ടികവർഗ്ഗ വിഭാഗങ്ങൾക്ക് നൽകിയിരുന്ന 70% പ്രത്യേക സംവരണം റദ്ദാക്കിയ നടപടിയിൽ ശക്തമായ പ്രതിഷേധം അറിയിക്കുന്നു.

പിന്നോക്ക വിഭാഗത്തിൽപ്പെട്ട വിദ്യാർത്ഥികൾ ഉന്നത വൈദ്യശാസ്ത്ര വിദ്യാഭ്യാസരംഗത്തേക്ക് കടന്നുവരുന്നത് പ്രോത്സാഹിപ്പിക്കുന്നതിന് പകരം അവരെ കൂടുതൽ പിന്നോട്ടടിക്കുന്ന നിഷേധാത്മക നിലപാടാണ് യുപിയിലെ ബിജെപി സർക്കാർ സ്വീകരിക്കുന്നത്. പട്ടികജാതി/പട്ടികവർഗ്ഗ വിഭാഗങ്ങൾക്കായി നീക്കിവെച്ച ഫണ്ട് ഉപയോഗിച്ചാണ് ഈ മെഡിക്കൽ കോളേജുകൾ നിർമ്മിച്ചിരിക്കുന്നത്. അതിനാൽ തന്നെ അവിടത്തെ സീറ്റുകൾ ഈ വിഭാഗത്തിൽപ്പെട്ട കുട്ടികൾക്ക് അവകാശപ്പെട്ടതാണ്.
മുൻപ് കേരളത്തിൽ മെഡിക്കൽ വിദ്യാഭ്യാസരംഗത്ത് എസ്‌സി/എസ്ടി സംവരണവുമായി ബന്ധപ്പെട്ട് സമാനമായ നീതിന്യായ തടസ്സങ്ങൾ ഉണ്ടായപ്പോൾ, അന്നത്തെ എൽ.ഡി.എഫ് സർക്കാർ ശക്തമായ നിയമപോരാട്ടത്തിലൂടെ സംവരണം സംരക്ഷിച്ച അനുഭവമുണ്ട്. അതേ മാതൃകയിൽ യുപി സർക്കാരും സുപ്രീം കോടതിയിലടക്കം സർവ്വ സജ്ജമായി നിയമനടപടികൾ സ്വീകരിച്ച് സംവരണം പുനഃസ്ഥാപിക്കാൻ തയ്യാറാകണം.

യുപിയിൽ SFI യുടെ നേതൃത്വത്തിൽ ശക്തമായ സമരം ഏറ്റെടുത്തിട്ടുണ്ട്.ഈ വിഷയത്തിൽ അടിയന്തരമായി ഇടപെട്ട് സാമൂഹിക നീതി ഉറപ്പാക്കണമെന്ന് ആവശ്യപ്പെട്ട് യുപി മുഖ്യമന്ത്രി യോഗി ആദിത്യനാഥ്, കേന്ദ്ര വിദ്യാഭ്യാസ മന്ത്രി പ്രഹ്ലാദ് ജോഷി, ആരോഗ്യ മന്ത്രി ജെ.പി നദ്ദ,സമാജ്‌വാദി പാർട്ടി അധ്യക്ഷൻ അഖിലേഷ് യാദവ് എന്നിവർക്ക് കത്തയച്ചു. പാർശ്വവൽക്കരിക്കപ്പെട്ട വിദ്യാർത്ഥികളുടെ അവകാശ പോരാട്ടങ്ങൾക്കൊപ്പം ഉറച്ചുനിൽക്കും.

12/08/2026

വിദ്യാർത്ഥി പ്രക്ഷോഭങ്ങൾക്ക് നേരെയുണ്ടായ അതിക്രമങ്ങളെക്കുറിച്ച് ചോദ്യങ്ങളുയരുമ്പോൾ ഈ മൺസൂൺ സമ്മേളനത്തിൽ പാർലമെന്റിൽ ആഭ്യന്തരമന്ത്രി അമിത് ഷായുടെ സീറ്റ് എന്നും കാലിയാണ്..
ചോദ്യങ്ങളിൽ നിന്ന് എത്രനാൾ ഓടിയൊളിക്കും? മറുപടി നൽകിയേ തീരൂ..

06/08/2026

കേന്ദ്ര ഉപരിതല ഗതാഗത മന്ത്രി നിതിൻ ഗഡ്കരിയുമായി കൂടിക്കാഴ്ച നടത്തി. ദേശീയപാത 544-ലെ നിർമ്മാണ പ്രവർത്തനങ്ങൾ വേഗത്തിലാക്കണമെന്ന് ആവശ്യപ്പെട്ടു.

സ്വാതി ജംഗ്ഷൻ, വാണിയമ്പാറ മേൽപ്പാലങ്ങളുടെ നിർമ്മാണ പ്രവർത്തനങ്ങൾ വേഗത്തിൽ പൂർത്തിയാക്കുക, വടക്കഞ്ചേരി മേൽപ്പാലത്തിന്റെ അറ്റകുറ്റപ്പണികൾ 15 ദിവസത്തിനകം തീർക്കുക, സർവീസ് റോഡുകൾ, ബസ് ബേ സ്ഥാപിക്കൽ, ദേശീയ പാതയിലെ വിവിധയിടങ്ങളിലെ വെള്ളക്കെട്ട് പരിഹാരം, തെരുവ് വിളക്കുകൾ സ്ഥാപിക്കൽ എന്നിവ അടിയന്തരമായി നടപ്പാക്കണമെന്നും ആവശ്യപ്പെട്ടു.

ദേശീയപാത 544 ലെ വിവിധ നിർമ്മാണ പ്രവർത്തനങ്ങൾ വേഗത്തിലാക്കാൻ NHAIയ്ക്ക് കർശന നിർദേശം നൽകുമെന്ന് കേന്ദ്രമന്ത്രി ഉറപ്പുനൽകി.