29/10/2026
தமிழறிஞர் மு. அருணாசலம் பிறந்தநாள் இன்று
மயிலாடுதுறை அருகேயுள்ள திருச்சிற்றம்பலம் என்ற கிராமத்தில் பிறந்தவர் மு. அருணாசலம். ஊர் ஊராகத் தேடியலைந்து ஓலைச்சுவடிகளையும் அரிய நூல்களையும் திரட்டி விரிவான ஆய்வுகள் செய்து 9ஆம் நூற்றாண்டு தொடங்கி 17ஆம் நூற்றாண்டு வரையிலான தமிழ் இலக்கியங்களின் வரலாற்றை 15 தொகுதிகளாக 5,404 பக்கங்களில் பதிவுசெய்தார்.
1992இல் அவர் காலமான பிறகு, அவரது மகன் சிதம்பரநாதன், தன் வீட்டின் ஒரு பகுதியை நூலகமாக்கி, தந்தை தேடித்தேடி சேகரித்த பத்தாயிரத்துக்கும் மேற்பட்ட அரிய நூல்களைக் காட்சிப்படுத்தி ஆய்வு மாணவர்களுக்குப் பயன்படும்படிச் செய்தார். அவை ஒட்டுமொத்த தமிழ்ச் சமூகமும் பயன்கொள்ளும் வகையில் ரோஜா முத்தையா ஆராய்ச்சி நூலகத்துக்கு வந்துசேர்ந்த கதை சொல்கிறார் நூலகத்தின் இயக்குநர் முனைவர் சுந்தர் கணேசன்.
-
தமிழ்நாட்டில் அலமாரிக்குள் இருக்கிற, சிலரின் பார்வைக்கு மட்டுமே புலப்படுகிற அரிய நூல் சேகரிப்புகளை ஒரு குடையின் கீழ் திரட்டி ஆய்வுலகை விரிவுசெய்யும் நோக்கத்தில் தமிழ்நாடு முழுவதும் தேடித் திரிந்தோம். திருப்பனந்தாள், தர்மபுரம் மடங்களுக்கெல்லாம் சென்று எங்கள் நோக்கத்தைத் தெரிவித்து நூல் கொடை கோரினோம். அப்படியொரு பயணத்தில் தான் மு. அருணாசலனாரின் வீட்டில் அரிய நூல்கள் இருப்பதை அறிந்தோம். அவற்றைப் பெரும் பரப்புக்குக் கொண்டுசெல்லும் நோக்கில் அவரது வீட்டுக்குச் சென்றோம். இரண்டு முறை சென்றும் சிதம்பரநாதன் அய்யாவைச் சந்திக்க முடியவில்லை. பிறகு அவருக்கு விரிவாக ஒரு கடிதம் எழுதினோம். காந்தியவாதியான சிதம்பரநாதன், ஒரு கடிதத்தை எப்படி எழுதவேண்டும் என்று அழகாக எளிய நடையில் சுட்டிக்காட்டி பதில் எழுதினார். காந்தியைப் படிக்கச்சொன்னார். அப்போது நூல்களைத் தர இசையவில்லை. பத்தாண்டுகள் ஓடின.
ஒருநாள் அவர் ரோஜா முத்தையா நூலகத்துக்கு வந்தார். இங்கு நடந்த பணிகளையெல்லாம் பார்த்தார். “உங்கள் தந்தையின் சேகரிப்புகளைத் தாருங்கள். இங்கே பாதுகாக்கிறோம்” என்று கேட்டேன். அவர் பதில் சொல்லவில்லை. “நீங்கள் நேரில் வந்து ஒருமுறை நூல்களைப் பாருங்கள்” என்றார். கிளம்பிப் போய் நூல்களையெல்லாம் பார்த்தோம். எல்லாம் அபூர்வ பொக்கிஷங்கள். அப்போது அவர், “இந்த நூல்களை ஏன் நான் உங்களுக்குத் தரவேண்டும்? ஒரே ஒரு காரணம் சொல்லுங்கள்” என்றார். “இந்த அரிய நூல்களை தமிழ்ச்சமூகப் பேராய்வுகளுக்கு பயன்படுத்தும் வகையில் சென்னையில் இருந்தால் அதன் பயன்பாடு மிகவும் அதிகரிக்கும் என்ற காரணத்திற்காக நாங்கள் இந்த நூல்களைக் கேட்கிறோம்” என்றேன். நிமிர்ந்து பார்த்து சிரித்துவிட்டு, “சரி எடுத்துக்கொள்ளுங்கள்” என்று கூறிவிட்டார்.
உடனடியாக நாங்கள் செயலில் இறங்கினோம். புத்தகங்களைப் பாதிப்பில்லாமல் பேக்கிங் செய்வது ஒரு கலை. அதற்கு நாங்கள் முறையான பயிற்சி பெற்றிருக்கிறோம். எங்களிடம் அந்தப் பயிற்சியைப் பெறுவற்காக நேபாளத்தில் இருந்து மதன் புரஸ்கார் நூலகத்தினர் நூலகத்துக்கு வந்திருந்தார்கள். அவர்களையும் அழைத்துச்சென்று மிகுந்த பொறுப்போடு பேக்கிங் செய்து பாதுகாப்பாக சென்னைக்கு எடுத்து வந்தோம். மொத்தம் 9,990 புத்தகங்கள். நாங்கள் பேக்கிங் செய்யக் காட்டிய முனைப்பைப் பார்த்து வியந்த சிதம்பரநாதன், “நிச்சயம் இந்த நூல்களை நீங்கள் பாதுகாப்பீர்கள்” என்று அணைத்துக்கொண்டார். எங்கள் எல்லோருக்கும் அறுசுவை விருந்தும் வைத்து அனுப்பினார்.
அந்த நூல்களைப் பிரித்து கேட்லாக் செய்யும்போது அருணாசலனாரின் உழைப்பு மீது மிகப்பெரும் மரியாதை வந்தது. அதுமட்டுமல்ல, அற்புதமான ஒரு பொக்கிஷமும் அதில் கிடைத்தது. அதுதான் 1812இல் முதன்முதலில் அச்சிடப்பட்ட திருக்குறள் நூல். அதை நாங்கள் 2016இல் மறுமதிப்பு செய்தோம்.
ரோஜா முத்தையாவின் சேகரிப்புக்குப் பிறகு மிக முக்கியமான தனிநபர் நூல் சேகரிப்பு மு.அருணாசலத்தினுடையதுதான். இதைவைத்து ஏராளமானோர் ஆய்வு செய்திருக்கிறார்கள். அருணாசலத்தின் நூல் சேகரிப்புகள் பற்றியே பலர் ஆய்வு செய்து முனைவர் பட்டம் பெற்றுள்ளனர்.
மு. அருணாசலத்தின் சேகரிப்புகளைப் பாதுகாத்து அடுத்தடுத்த தலைமுறைகளுக்குக் கொண்டுசேர்ப்பதில் ரோஜா முத்தையா ஆராய்ச்சி நூலகம் பெருமை கொள்கிறது.