04/07/2026
காயல்பட்டினம் நகராட்சி வார்டு
மறுவரையறை: தமிழ்நாடு மாநில தேர்தல் ஆணையருடன் சந்திப்பு!
தூத்துக்குடி மாவட்டம் காயல்பட்டினம் நகராட்சி வார்டு
மறுவரையறை தொடர்பாக அனைத்து அரசியல் கட்சிகள், பொதுநல அமைப்புகள் ஆலோசனைக் கூட்டத்தில் எடுக்கப்பட்ட முடிவின் அடிப்படையில்
இன்று 3.7. 2026 வெள்ளி மாலை தமிழ்நாடு மாநில தேர்தல் ஆணையர் திருமதி ஜோதி நிர்மலா சாமி ஐஏஎஸ் அவர்களை இந்திய யூனியன் முஸ்லிம் லீக் மாநில பொதுச் செயலாளர் கே. ஏ.எம் முகம்மது அபூபக்கர் எக்ஸ் எம்எல்ஏ தலைமையிலான குழுவினர் சந்தித்து கோரிக்கை மனு அளித்து உரையாடினர்.
காயல்பட்டினம் நகர அனைத்து அரசியல் கட்சிகள், அனைத்து பொது நல அமைப்புகள் கலந்து கொண்டு 29. 6. 2026 அன்று நிறைவேற்றிய தீர்மானத்தை தேர்தல் ஆணையரிடம் அளித்து விளக்கம் அளித்தனர்.
காயல்பட்டினம் நகராட்சியில் வார்டு எண்ணிக்கை பேரூராட்சியாக இருந்த காலம் தொட்டு 18 ஆக மட்டுமே இருந்து வருகிறது; மக்கள் தொகையும், வாக்காளர் எண்ணிக்கையும் அதிகரித்துள்ள நிலையிலும் இது மாற்றம் செய்யப்படவில்லை. இம்மாவட்டத்தின் பிற நகராட்சிகளில் வார்டு எண்ணிக்கை உயர்த்தப்பட்ட நிலையிலும் காயல்பட்டினத்தில் மட்டும் உயர்த்தப்படவில்லை.
சமீபத்தில் எடுக்கப்பட்ட எஸ் ஐ ஆர் என்ற வாக்காளர் சிறப்பு தீவிர திருத்தத்தின்படி 36540 வாக்காளர்கள் இருந்தும் காயல்பட்டினம் நகராட்சியின்வார்டுஎண்ணிக்கை மாற்றி அமைக்கப்படவில்லை. காயல்பட்டினம் நகராட்சியின் வார்டு எண்ணிக்கையை இன்றைய காலச் சூழ்நிலைக்கு ஏற்ப 36 வார்டுகளாக உயர்த்தி தர வேண்டும் என்ற கோரிக்கையை அப்போது அவர்கள் வலியுறுத்தினர்.
இதனைக் கேட்ட மாநிலத் தேர்தல் ஆணையர், நாட்டில் மக்கள் தொகை கணக்கெடுப்பு 2011 க்கு பிறகு மீண்டும் நடைபெற இருப்பதால் 31.12.2025க்குப்பின் வார்டு மறு வரையறை செய்யக்கூடாது என மத்திய அரசின் தடை உத்தரவு இருப்பதால் உங்கள் கோரிக்கையின் முந்தைய கோப்புகளை பார்த்து ஆவண செய்வதாக குறிப்பிட்டார் .
காயல்பட்டினத்தில் வார்டு எண்ணிக்கையை அதிகரிக்க வேண்டும் என உயர் நீதிமன்றத்தில் வழக்கு தொடுக்கப்பட்டு தமிழ்நாடு அரசின் உறுதிமொழியின் அடிப்படையில் உரிய உத்தரவு பெறப்பட்டுள்ளதை குழுவினர் சுட்டிக்காட்டினர். இதனை கவனமாக கேட்ட மாநில தேர்தல் ஆணையர் தமிழ்நாடு அரசின் நகராட்சி செயலாளரை தொடர்பு கொண்டு கலந்து ஆலோசித்து ஆவன செய்வதாக உறுதி அளித்தார்.
இந்த சந்திப்பின்போது இந்திய யூனியன் முஸ்லிம் லீக் மாநில செயலாளர் காயல் மகபூப், மாநில துணைச் செயலாளர் எஸ். ஏ. இப்ராஹிம் மக்கி, சமூக ஆர்வலர் ஏ.கே. முகம்மது யாசின் ஆகியோர் உடன் இருந்தனர். இக்குழுவினர் அடுத்து தமிழ்நாடு அரசு நகராட்சித்துறை செயலாளர் அவர்களை சந்தித்து பேச உள்ளனர் .
