29/06/2026
ആര് രാജഗോപാലിന്റെ പാസ്പോര്ട്ട് തടഞ്ഞ കേന്ദ്ര നടപടി ക്രൂരവും ജനാധിപത്യ വിരുദ്ധവും: കെ കെ അബ്ദുല് ജബ്ബാര്
തിരുവനന്തപുരം: പ്രമുഖ മാധ്യമപ്രവര്ത്തകനും 'ദി ടെലഗ്രാഫ്' മുന് എഡിറ്ററുമായ ആര് രാജഗോപാലിന്റെ വോട്ടവകാശം നിഷേധിച്ചതിന് പിന്നാലെ, അദ്ദേഹത്തിന്റെ പാസ്പോര്ട്ട് തടഞ്ഞുവെച്ച കേന്ദ്ര സര്ക്കാര് നടപടി തികച്ചും ജനാധിപത്യവിരുദ്ധവും പ്രതിഷേധാര്ഹവുമാണെന്ന് എസ്ഡിപിഐ സംസ്ഥാന ജനറല് സെക്രട്ടറി കെ കെ അബ്ദുല് ജബ്ബാര്.
എസ്.ഐ.ആര് പ്രക്രിയയുടെ മറവില് 2002-ലെ വോട്ടര്പട്ടികയില് പേര് കണ്ടെത്താനായില്ലെന്ന സാങ്കേതികത്വം പറഞ്ഞാണ് രാജ്യത്തെ മുതിര്ന്ന മാധ്യമപ്രവര്ത്തകന്റെ മൗലികാവകാശങ്ങള് കേന്ദ്രം ധ്വംസിച്ചിരിക്കുന്നത്. ആവശ്യമായ എല്ലാ രേഖകളും സമര്പ്പിച്ചിട്ടും കൊല്ക്കത്ത പോലിസ് നല്കിയ പ്രതികൂല റിപോര്ട്ടിന്റെ അടിസ്ഥാനത്തില് പാസ്പോര്ട്ട് തടഞ്ഞതുമൂലം യു.എസില് വെച്ചുനടന്ന സ്വന്തം മകളുടെ വിവാഹച്ചടങ്ങില് പോലും പങ്കെടുക്കാന് അദ്ദേഹത്തിന് സാധിച്ചില്ല എന്നത് മനുഷ്യത്വരഹിതമാണ്.
കേരളത്തിലെ ഗാന്ധി സ്മാരക നിധിയുടെ മുന് സംസ്ഥാന സെക്രട്ടറിയും റിട്ടയേര്ഡ് പ്രൊഫസറുമായിരുന്ന ഒരു ഗാന്ധിയന്റെ മകനാണ് ഈ ദുരവസ്ഥ നേരിടേണ്ടി വന്നിരിക്കുന്നത്. രാജ്യത്ത് അറിയപ്പെടുന്ന ഒരു മാധ്യമപ്രവര്ത്തകന് പോലും തന്റെ പൗരത്വം തെളിയിക്കാന് കോടതി കയറേണ്ടി വരുന്നു എന്നത് നിലവിലെ വ്യവസ്ഥിതിയുടെ ഭീകരതയെയാണ് കാണിക്കുന്നത്. ഇത് കേവലം ഒരു വ്യക്തിയുടെ പ്രശ്നമല്ല, മറിച്ച് രാജ്യത്തെ ദശലക്ഷക്കണക്കിന് സാധാരണക്കാരായ പൗരന്മാര് വരും ദിവസങ്ങളില് നേരിടാന് പോകുന്ന വലിയൊരു പൗരത്വ പ്രതിസന്ധിയുടെ വ്യക്തമായ സൂചനയാണ്.
ഭരണഘടന ഉറപ്പുനല്കുന്ന സഞ്ചാര സ്വാതന്ത്ര്യവും വോട്ടവകാശവും നിഷേധിച്ച് ജനങ്ങളെ ഭയപ്പെടുത്താനുള്ള ഇത്തരം നീക്കങ്ങളില് നിന്ന് കേന്ദ്ര അധികാരികള് അടിയന്തരമായി പിന്മാറണം. ആര് രാജഗോപാലിന്റെ പാസ്പോര്ട്ട് തടഞ്ഞുവെച്ച നടപടി പിന്വലിക്കാന് സര്ക്കാര് തയ്യാറാകണം. ജനാധിപത്യ വിശ്വാസികളും മാധ്യമസമൂഹവും ഒന്നടങ്കം ഈ വേട്ടയാടലിനെതിരെ ശക്തമായി രംഗത്തുവരണമെന്നും അദ്ദേഹം ആവശ്യപ്പെട്ടു.
