15/08/2026
সৰুপথাৰ সমজিলাত ৮০ সংখ্যক স্বাধীনতা দিৱস বৰ্ণাঢ্য কাৰ্যসূচীৰে উদযাপন
সৰুপথাৰ, ১৫ আগষ্ট, ২০২৬: সমগ্ৰ দেশৰ লগতে সমান্তৰালভাৱে সৰুপথাৰ সমজিলাতো আজি উলহ-মালহেৰে দেশৰ ৮০ সংখ্যক স্বাধীনতা দিৱস উদযাপন কৰা হয়। সমজিলাখনৰ কেন্দ্ৰীয় কাৰ্যসূচী সৰুপথাৰৰ সেৱাগুৰি খেলপথাৰত অনুষ্ঠিত হয়। উক্ত অনুষ্ঠানত সৰুপথাৰ সমজিলাৰ সমজিলা আয়ুক্ত শ্ৰীযুতা মিতালী লহকৰে মুখ্য অতিথি হিচাপে উপস্থিত থাকি আনুষ্ঠানিকভাৱে জাতীয় পতাকা উত্তোলন কৰে আৰু কুচ-কাৱাজৰ অভিবাদন গ্ৰহণ কৰি কাৰ্যসূচীৰ শুভাৰম্ভ কৰে।
উক্ত গাম্ভীৰ্যপূৰ্ণ অনুষ্ঠানত বিশিষ্ট অতিথি হিচাপে সৰুপথাৰ সমষ্টিৰ মাননীয় বিধায়ক শ্ৰী বিশ্বজিৎ ফুকন, সৰুপথাৰ সমজিলা প্ৰশাসনৰ বিষয়া সকল, সৰুপথাৰ আৰু বৰপথাৰ পৌৰসভাৰ পৌৰপতিদ্বয়, সমজিলা আৰক্ষী অধীক্ষক শ্ৰী দিপেন পাটৰ, স্বহীদ কুশল কোঁৱৰৰ পৰিয়ালবৰ্গৰ লগতে ৬১ গৰাকী স্বাধীনতা সংগ্ৰামীৰ পৰিয়ালবৰ্গ উপস্থিত থাকে। এইসকল সন্মানীয় ব্যক্তিৰ উপস্থিতিয়ে দিৱসটিৰ মৰ্যাদা আৰু অধিক বৃদ্ধি কৰে।
মুখ্য অতিথিগৰাকীয়ে তেখেতৰ বক্তব্যত ৰাজ্য চৰকাৰে সৰুপথাৰ সমজিলাৰ জনসাধাৰণৰ কল্যাণ তথা সামগ্ৰিক বিকাশৰ বাবে হাতত লোৱা বিভিন্ন উন্নয়নমূলক পদক্ষেপৰ এক খতিয়ান দাঙি ধৰে আৰু ৰাইজলৈ স্বাধনতা দিৱসৰ শুভেচ্ছা জ্ঞাপন কৰে। অনুষ্ঠানত স্থানীয় সাংস্কৃতিক দলসমূহে প্ৰদৰ্শন কৰা মনোৰম পৰম্পৰাগত আৰু দেশভক্তিমূলক নৃত্য-গীতে উপস্থিত ৰাইজক বিশেষভাৱে আপ্লুত কৰে।
প্ৰায় চাৰি হাজাৰ ৰাইজৰ স্বতঃস্ফূৰ্ত অংশগ্ৰহণেৰে সৰুপথাৰবাসীৰ দেশপ্ৰেম আৰু সম্প্ৰীতিৰ এক উজ্জ্বল নিদৰ্শন দাঙি ধৰা এই কাৰ্যসূচীৰ সফল সামৰণি পৰে। স্বাধীনতা দিৱসৰ লগত সংগতি ৰাখি সমজিলা প্ৰশাসনৰ উদ্যোগত সমজিলা প্ৰশাসন একাদশ আৰু সাংবাদিক একাদশৰ মাজত এখনি প্ৰীতি ফুটবল খেল অনুষ্ঠিত কৰা হয়।
