13/05/2026
Kawltangmai ciindan (water melon)
Kawltangmai pen a neulai tuamkep (piu) phot leng hoih pen hi. Plastic sungah lei koih ding hi. Tua a lei dingpen leihoih b**g 5, bawng ek b**g 1, buhvai b**g 3 la ding hi. Tuateng hoihtak hel dikdek ding hi. Tua leihoihteng helkhitciangin plastic ip sungah koih ding hi.
Kawltangmai mu pen nai 4 sung tuisungah diah phot ding hi. Tua khit ciangin plastic ip sungah kawltangmai tangh koih ding hi.
Plastic ip sungah a kikoihzawh ni 7 ciangin ki suanthei ta hi. Leitangh acre 1 sungah kung 1600 bang tathei hi.
Hih kawltangmai pen a kungkihalna pi 3-4 leh a gual kihalna pi 8 in tuh ding hi. Khuakkhat sungah tang 8-10 tuh ding hi. Khaici te leisungah letmat 1 (1”) a thuk in phum ding hi.
Lopa leh kiak te siangsak ding hi. Ek lei a deihmahmah ankungnam a hihmanin bawltawm ek lei te leh bawngek te tampi piak ding kisam hi. Khaici tuhma in a leisungah koihkholhsak thei leng hoih pen hi.
Nitang hoihtak a ngahna mun, leihoihna mun, leisungah tui a kivunglona mun ah hoih hi. Khualum deih a khuavotlua thuakzolo hi. Zogam ah i ciin sawmleh phalbi hunma in laktheih dingin ciinding kisam hi. Leitangh thukna alna 6-6.8ph kikal ah hoih penpen hi.
Hih water melon pen namkhen 1200 bang om hi. A namzui in a pumgihna pound 2-5 ciangbang phathei hi. Khualumna tawh kizui in khaici i tuhzawh ni 70-90 sungin lakhun ta hi.
A lawhhun ciangin a gahna guino hong keu ding hi. A pumtunglam a engmel pan in a naipak mel pian in hong kikhel ding hi. Damtak bengleng hong nging ding hi. Tuaciangin lakhunta cih kithei hi.
Natna le lungno
A teh a ne lungno pawlkhat om hi. A pak te zongh hong neksak thei hi. Tua lungno te na muhnak leh that lum pahpah lel in. Bawltawm zatui te leh meikhu tui te zangh lecin zongh kizo mahmah lel hi.
Natna a hihleh a tehtungah powder bangin a kang a malmal in omthei hi. Tuinel lua leh piangthei diak hi. Tuapen tuitampiakluat loh ding hiziau hi.
Ahizongin a tehtungah tui a tulo dingin tuipiak dingpen haksa mahmah ding hi. Tua a hihmanin tui i piakciangin zingsanglam in piakding kisam hi. Tuahileh sunkal in a tehte keukik man hi.
Water melon nekna le cidamna
Hih water melon sungah Vitamin C dat tampi kihel hi. Water Melon nekna in sikhum, zunkhum natna kiamsak thei hi. Water melon sungah tui 94% bang om hi. Water melon i nek leh pumpi sungah a kisam tui dat zong a kingah hipah hi.
Water melon in pumpi gihna hong kiamtuam sak hi. Thauluatna hong kiamsak thei hi. Water melon sungah Potassium dat zong om hi. Tua dat in ngaihsutna leh khuaknasepna te hong huh mahmah hi.
Ngaihsutna siangtheilo in lungzingin a omte in water melon tui haikhat bang dawnleh lungvakpah thei hi.
Water melon in gilpi nasepna zong huh hi. Gilsungah i nek an te thahatna a suahpah nadingin huh hi.
Kal nasepna ah thupitak in huh hi. Pumpi nosuahna leh lungsim nosuahna hong ngahsak hi.
A hoihna tampi om lakpan in tawm bek a at i hihi. Tua hiaa hih water melon pen ciin huai hi. Sumtawh lei in nek huai mahmah hi.
By
