28/07/2026
চলিত বৰ্ষৰ ২৬ জুলাই ২০২৬, ৰবিবাৰে গ্ৰামীণ বিকাশ সংস্থা, বৰভাগ, আৰিকুছিৰ উদ্যোগত আৰু বন্যবন্ধুৰ সহযোগত নলবাৰী জিলাৰ আৰিকুছি অঞ্চলৰ নন্দন কানন শিশু নিকেতন প্ৰাংগণত "সৰ্পদংশন আৰু ইয়াৰ প্ৰতিকাৰ" শীৰ্ষক এক সজাগতা অনুষ্ঠান অনুষ্ঠিত কৰা হয়। উক্ত অনুষ্ঠানটো মূলত সাপ মানুহৰ সংঘাত আৰু সৰ্পদংশনৰ দুৰ্ঘটনা প্ৰশমনৰ স্বাৰ্থত ৰাইজৰ মাজত সজাগতা বৃদ্ধিৰ উদ্দেশ্যে আয়োজন কৰা হৈছিল। উক্ত অনুষ্ঠানত সমল ব্যক্তি হিচাপে উপস্থিত থাকি পৰিৱেশ কৰ্মী প্ৰসন্ন কলিতাই উপস্থিত আটাইৰে মাজত স্থানীয় সাপৰ চিনাক্তকৰণ, পৰিৱেশত সাপৰ গুৰুত্ব আৰু সংৰক্ষণৰ প্ৰয়োজনীয়তা, মানৱ জীৱনত সাপৰ প্ৰভাৱ, সাপ সম্পৰ্কীয় বিভিন্ন ভ্ৰান্ত ধাৰণা, অন্ধবিশ্বাস আৰু তাৰ আঁৰৰ সত্যতা, সৰ্পদংশনৰ দুৰ্ঘটনা উপশমৰ বাবে লবলগীয়া সাৱধানতা, সৰ্পদংশনৰ ক্ষেত্ৰত কৰিবলগীয়া আৰু নকৰিবলগীয়া আদি প্ৰতিটো বিষয়ে বিতংভাৱে আলোচনা কৰে।
আশাকৰো উক্ত অনুষ্ঠানটোৱে উপস্থিত আটাইৰে মাজত সাপ সম্পৰ্কে সজাগতা বৃদ্ধি কৰিব আৰু ইয়ে সাপ আৰু ইয়াৰ বাসস্থান সংৰক্ষণৰ লগতে সৰ্পদংশনৰ দুৰ্ঘটনা আৰু সাপ মানুহৰ সংঘাত প্ৰশমনৰ ক্ষেত্ৰত ৰাইজৰ মাজত সামৰ্থ বৃদ্ধি কৰাত সহায় কৰিব।
উক্ত অনুষ্ঠানত গ্ৰামীণ বিকাশ সংস্থা, বৰভাগ, আৰিকুছি আৰু নলবাৰী আঞ্চলিক ছাত্ৰ সন্থাৰ তৰফৰ পৰা সমল ব্যক্তি প্ৰসন্ন কলিতা আৰু দ্যা গ্ৰীণ গ্লোভৰ সম্পাদক ৰাজেশ দত্ত বৰুৱাক সম্বৰ্ধনা জনোৱা হয়। পৰিৱেশ কৰ্মী ৰাজেশ দত্ত বৰুৱাই উপস্থিত ৰাইজক উদ্দেশ্যি পৰিৱেশ প্ৰকৃতি সংৰক্ষণৰ স্বাৰ্থত চমুকৈ বক্তব্য প্ৰদান কৰে।
বিষয়ৰ গুৰুত্ব বুজি অনুষ্ঠানটো অনুষ্ঠিত কৰিবলৈ আগবাঢ়ি অহা আৰিকুছি অঞ্চলৰ সচেতন নাগৰিক জুপিকা চক্ৰৱৰ্তী প্ৰমুখ্যে গ্ৰামীণ বিকাশ সংস্থা, বৰভাগ, আৰিকুছিৰ সমূহ বিষয়ববীয়া, প্ৰতিজন সহযোগী আৰু উপস্থিত আটাইলৈ 'বন্যবন্ধু' পৰিয়ালৰ তৰফৰ পৰা আন্তৰিক ধন্যবাদ আৰু কৃতজ্ঞতা জ্ঞাপন কৰিলোঁ।
