26/06/2026
এজন সুদক্ষ অভিজ্ঞতাৰে পৰিপূৰ্ণ খঙাল প্ৰকৃতিৰ সাধাৰণ চাহ জনগোষ্ঠী ৰ জনেই হ'ল অসম চাহ জনজাতি ছাত্ৰ সন্থা ৰ প্ৰতিষ্ঠাপক সভাপতি প্ৰয়াত চাইমন সিং হ'ৰ ।যি গৰাকী ব্যক্তিয়ে চাহ জনজাতি ছাত্ৰ সন্থা ক আধাৰ হিচাপে লৈ সমাজখনৰ উন্নতিৰ বাবে সপোন ৰচিছিল।
হ'ৰৰ পূৰ্বপুৰুষ সকল ঝাড়খণ্ড ৰাজ্যৰ ৰাঁচীৰ পৰা বগা চাহাবৰ মজদুৰ চালানত অসমৰ চাহ বাগিচাত কাম কৰিবলৈ আহিছিল । সময়ত বাগিছাৰ কাম এৰি নিমাইগড় হাবি গাঁৱলৈ গৈ বসতি স্থাপন কৰি কৃষি কৰ্ম কৰিব ধৰে । তাতে ১৯২৯ চনত চাইমন সিং হ'ৰৰ জন্ম হয় । তেওঁৰ পিতৃৰ নাম মাচি প্ৰকাশ হ'ৰ আৰু মাতৃ চাৰা হ'ৰ । হ'ৰৰ জন্ম স্থান হাবি গাওঁ খন চহৰৰ পৰা দূৰত অৱস্থিত এখন ভিতৰুৱা গাঁও। গাঁৱৰ মানুহবোৰে দুবেলা দুমুঠি খাই জীয়াই থকাৰ কথাহে চিন্তা কৰিছিল । পঢ়া শুনাৰ কথা চিন্তা কৰিবলৈ কাৰো মানসিকতাও নাছিল । তাৰ মাজতে দেউতাকে পুত্ৰৰ কথা চিন্তা কৰি হ'ৰক সাত বছৰ বয়সত শিৱসাগৰত থকা মিছন স্কুলত নাম লগাই দি তাৰ হোষ্টেলতে ৰাখি থৈ আহে । প্ৰাথমিক শিক্ষা মিছন স্কুলত শেষ কৰাৰ পিছত শিৱসাগৰতে থকা পল মেমৰিয়েল স্কুলত নাম লগাই দিয়ে ।বেছি নহ'লেও কিছু অলপ লিখা পঢ়া শিকা দেউতাকে শিক্ষাৰ মূল্য সৌ তাহানিতেই বুজি উঠিছিল বাবেই পুত্ৰক ঘৰত ৰাখি আলাসৰ লাডু নকৰি মৰমসনা কঠোৰ শাসনৰ তলত ৰাখি ল'ৰা পঢ়া শুনা কৰি ডাঙৰ হওকঁ বুলি আৰ্থিক অৱস্থা বেয়া হোৱাৰ স্বত্তেও , চহৰত নি পঢ়ুৱাইছিল ।সৰুৰে পৰা পঢ়াত ধাউতি থকা হ'ৰই পৰাপক্ষত স্কুল গতি নকৰি বৰ মনোযোগেৰে পঢ়া শুনা কৰিছিল । পল মেমৰিয়েলৰ পৰা ১৯৪২ চনত এম .ই পাছ কৰি শিৱসাগৰ বেজবৰুৱা হাইস্কুলতৰ পৰা ১৯৪৬ চনত সুখ্যাতিৰে মেট্ৰিক পাছ কৰে । তাৰ পিছত শিৱসাগৰ এৰি যোৰহাটলৈ গৈ কলেজীয়া শিক্ষা তাত আৰম্ভ কৰে । যোৰহাট জে.বি . কলেজত পঢ়ি থাকোঁতে তেওঁৰ সহপাঠী আছিল মৰাণৰ সন্তোষ কুমাৰ তপ্ন । সেই সময়ত চাহ জনগোষ্ঠী সমাজৰ মাত্ৰ কেইজনমান ল'ৰাই হে কলেজত পঢ়িছিল । কলেজত পঢ়ি থাকোঁতে হ'ৰ আৰু তপ্ন বৰ নলেগলে লগা বন্ধু হৈ পৰিছিল । বন্ধুত্বৰ এনাজৰিডাল এনে নিকপকপীয়া হৈ পৰিছিল যে জীৱনৰ শেষ মূহুৰ্তলৈকে দুয়োৰে বন্ধুত্বৰ বান্দোনত ঘূণে ধৰা নাছিল । আন হাতেদি দুয়োৰে সংযোগ যেন মনিকাঞ্চনহে ।১৯৪৭ চনত জন্ম লাভ কৰা অসম চাহ জনজাতি ছাত্ৰ সন্থাৰ প্ৰতিষ্ঠাপক সভাপতি আৰু সাধাৰণ সম্পাদকৰূপে দুয়ো নিৰ্বাচিত হৈছিল । সভাপতি হৈছিল হ'ৰ আৰু সাধাৰণ সম্পাদক হৈছিল তপ্ন । তেওঁলোক পঢ়ি থকা কালত জে.বি. কলেজৰ অধ্যক্ষ আছিল পণ্ডিত প্ৰৱৰ কৃষ্ণকান্ত সন্দিকৈ । ১৯৪৮ চনত আই .এ পাচ কৰাৰ পিছত ঘৰুৱা অৱস্থা ভাল নোহোৱাৰ কাৰণে এক প্ৰকাৰ কলেজ এৰাৰ নিচিনাই হৈছিল । উচ্চ শিক্ষাৰ প্ৰতি ধাউতি থকাৰ কাৰণে বহু বাধা বিঘিনি কষ্টৰ মাজেৰে যাৰ তাৰ পৰা পুৰণি কিতাপ খুজি মেলি পঢ়ি ১৯৫৪ চনত সেইখন কলেজৰ পৰাই বি.এ পাছ কৰে । বি.এ পাছ কৰিয়েই তেওঁ কৰ্মজীৱনৰ পাতনি মেলে । সেই সময়ত শিক্ষাৰ পোহৰ নোপোৱা টেঙা পুখুৰীত এখন এম ই স্কুল পাতি ল'ৰা ছোৱালী পঢ়াবলৈ ধৰে ।তাৰ মাজতে ১৯৫৬ চনত সৰু পথাৰৰ এমলী হ'ৰক তেওঁ বিবাহ কৰাই ।এম ই স্কুলখনৰ প্ৰধান শিক্ষক হৈ থাকোঁতেই খুব কম দিনৰ ভিতৰতে স্কুলতখন চৰকাৰী কৰণ হয় । চৰকাৰীকৰণ হোৱাত বিনা বেতনে কাম কৰা শিক্ষক সকলে বেতন পোৱা হ'ল । বিনা বেতনে কাম কৰেআ হ'ৰই নিয়মিতভাৱে চৰকাৰী বেতন অলপদিন লোৱাৰ পিছতে কি ভাবি জানো , এই কৰি থকা চৰকাৰী স্কুলখনৰ প্ৰধান শিক্ষক পদবী এৰি ১৯৫৭ চনত বেতবাৰীলৈ গুচি যায় আৰু তাৰ এখন নতুনকৈ পতা ভেঞ্চাৰ হাইস্কুলতৰ শিক্ষকৰ চাকৰিত সোমায় । স্কুলখনৰ প্ৰধান শিক্ষকৰ পদবীত যোগাদান কৰা হ'ৰই অশেষ কষ্ট কৰি দুবছৰ ভিতৰতে স্কুলতখন চৰকাৰীকৰণ কৰোৱাৰ সফল হয় । এইখন স্কুলো চৰকাৰীকৰণ হোৱাৰ পিছতেই স্কুলখনৰ চাকৰি এৰি পুনৰ নিজৰ গাঁৱলৈ ঘুৰি আহে। গাঁৱলৈ আহি নতুনকৈ স্থাপন কৰা বেতবাৰী হাইস্কুলত প্ৰধান শিক্ষক হিচাপে যোগদান কৰে। এইখন স্কুলো বহুত খাটি মেলি চৰকাৰীকৰণ কৰে । চৰকাৰীকৰণ হোৱাৰ পিছত তাৰ প্ৰধান শিক্ষকৰ পদবী এদিন নতুনকৈ গঢ় লোৱা ৰহদৈ পুখুৰী এম. ই স্কুলত সোমায়। তাৰ প্ৰধান শিক্ষকৰ পদবীত অধিষ্ঠিত হৈ চৰকাৰৰ দুৱাৰে দুৱাৰে ঘুৰি স্কুলখন এদিন চৰকাৰী কৰণ কৰে । হ'ৰৰ এই কাৰ্য্যবোৰৰ পৰা দেখা যায় যে স্কুল এখনত সোমাই স্কুলখন চৰকাৰী কৰণ কৰাৰ পিছত স্কুলখনত থকা তেওঁৰ দায়িত্ব যেন শেষ হৈ পৰে। সেই নিজৰ দায়িত্ব আনক অৰ্পণ কৰি নিজে আন ভেঞ্চাৰ স্কুললৈ গতি কৰে । শিক্ষা জগতত তেওঁৰ বাবে এক ব্যতিক্ৰমধৰ্মী অৱদান বুলি কব পাৰি ।কোনো এখন স্কুলতে তেওঁ বেছিদিন চাকৰি কৰা নাছিল । ইখন স্কুলতৰ পৰা সিখন স্কুললৈ সদায় দৌৰি ফুৰিছিল । ১৯৬০ চনত চণ্টক হাইস্কুল প্ৰতিষ্ঠা কৰি তাৰ প্ৰধান শিক্ষক হয় আৰু খুব কম দিনৰ ভিতৰতে এই স্কুলখনো চৰকাৰীকৰণৰ তালিকাভূক্ত কৰে ।পিছপৰা ভিতৰুৱা অঞ্চলবোৰত স্কুল পাতি অশিক্ষিত চামক শিক্ষিত কৰাৰ মানসেৰে যি প্ৰচেষ্টাৰ কামত আগবাঢ়িছিল ই অতি প্ৰশংসনীয় । সমাজৰ শিক্ষা দিক্ষাৰ কৰা চিন্তা কৰাৰ লগে লগে ঐক্য- শান্তি আৰু প্ৰগতিৰ কথাও চিন্তা কৰি অন্যান্য সামাজিক দিশতো মনোনিৱেশ কৰা দেখা গৈছিল । তেওঁৰ প্ৰচেষ্টাত স্থানীয় অঞ্চলত ৰাস্তা নোহোৱা ঠাইত ৰাস্তা হৈছিল আৰু নিজৰ মাটিত পুখুৰী খন্দাই ৰাইজৰ পানীৰ অভাৱ দূৰ কৰিছিল । সেইদৰে নিজৰ মাটিত এখন স্কুল, এখন হাইস্কুল,এখন নামঘৰ আৰু এখন গীৰ্জা স্থাপন কৰাত অৰিহনা যোগাইছিল । তেওঁৰ চেষ্টাতে নিমাই গড় গাঁৱৰ ৰাইজে বিজুলী চাকিৰ পোহৰ পাইছিল । শিৱসাগৰ জিলা বেপ্টিষ্ট খ্ৰীষ্টিয়ান সভাৰ সভাপতি ৰূপে কাৰ্য্যনিৰ্বাহ কৰা হ'ৰ নিজে খ্ৰীষ্টান হৈয়ো হিন্দু নামঘৰ পতাত আগভাগ লৈ এক বহল মনৰ পৰিচয় দি ধৰ্ম নিৰপেক্ষতাৰ চানেকি দাঙি ধৰে।
এসময়ত ৰাজনীতিৰ পথাৰতো হ'ৰ দেৱে খোজ পেলাইছিল । ষাঠি দশকত অধুনালুপ্ত চাৰ্কোল চাহ শ্ৰমিক সংঘৰ জন্ম দিয়ে । একাধিক বাৰ ধোপাবৰ গাওঁ পঞ্চায়ত সমবায় সমিতিৰ সভাপতি হয় । এবাৰ জিলা পৰিষদ কাউন্সিলাৰো হয় ।১৯৭৭ চনত জনতা পাৰ্টীয়ে কেন্দ্ৰত শাসনভাৰ দখল কৰাৰ সময়ত কংগ্ৰেছ পাৰ্টী দুভাগ হৈ এভাগ ইন্দিৰা কংগ্ৰেছ আৰু আনভাগ ৰেড্ডী কংগ্ৰেছ হোৱাৰ হ'ৰৰ ইন্দিৰা কংগ্ৰেছত যোগদান কৰি নাজিৰা সমষ্টিৰ পৰা বিধানসভাৰ নিৰ্বাচনত প্ৰতিদ্বন্দিতা কৰে । সেইবাৰ ৰেড্ডী কংগ্ৰেছৰ পৰা হিতেশ্বৰ শইকীয়া তাত উঠিছিল । দুয়োৰে মাজত তুমুল প্ৰতিদ্বন্দিতা হৈছিল ।হ'ৰদেৱৰ হৈ নিৰ্বাচনী প্ৰচাৰ অভিযান সভাত ইন্দিৰা গান্ধীয়েও আহি ভাষণ দিছিল । সেই সময়ত অসমত ৰেড্ডী কংগ্ৰেছৰ প্ৰভাৱ বেছি থকাৰ কাৰণে তেওঁ নিৰ্বাচনৰ বৈতৰণী পাৰ হব নোৱাৰিলেও খুব কম সংখ্যক ভোটৰ ব্যৱধানত হে পৰাজয় বৰণ কৰিবলগীয়া হয় ।
অসম চৰকাৰে আগবঢ়োৱা উচ্চ পদৰ চৰকাৰী চাকৰি প্ৰত্যাখ্যান কৰি জনতাৰ মাজত থাকি জনতাৰ সেৱা কৰি যোৱা হ'ৰ জীৱনৰ বিয়লি বেলাত ৰোগাক্ৰান্ত হৈ পৰে। বহু চিকিৎসা কৰায়ো তাৰ কোনো ফল নাপালে। শেষত ১৯৭৯ চনৰ ২৬ জুনত ইহলীলা সম্বৰণ কৰে । মৃত্যুৰ সময়ত হ'ৰৰ পত্নী সহ দুগৰাকী পুত্ৰ আৰু পাঁচগৰাকী কন্যা এৰি থৈ যায়। হ'ৰৰ নশ্বৰ দেহ ত্যাগ কৰি আমাৰ মাজৰ পৰা আঁতৰি গলেও আটছাৰ এই প্ৰতিষ্ঠাপক সভাপতি গৰাকীক চাহ জনজাতি সমাজে সদায় স্মৰণ কৰি থাকিব ।
গোটেই জীৱন নিজৰ চাহ জনগোষ্ঠী সমাজৰ সকলো দিশত উন্নত কৰাৰ প্ৰচেষ্টাত নিজৰ জীৱন জাতি সেৱাত ব্ৰতী কৰি ইমান এক মহান আদৰ্শ হিচাপে যি কাম কৰি গ'ল তাৰ ব্যাখ্যা দিবলৈ শব্দৰ অভাৱ হ'ব। অৱশেষত আজিৰ এই দিনটোতে মৃত্যু বৰণ কৰা আমাৰ আদৰ্শ পুৰুষ অসম চাহ জনজাতি ছাত্ৰ সন্থাৰ প্ৰতিষ্ঠাপক সভাপতি ও সমাজ হিতৈষী হ'ৰদেৱৰ ৪৭ সংখ্যক মৃত্যু বাৰ্ষিকীত আন্তৰিক শতকোটি প্ৰণাম আৰু শ্ৰদ্ধাঞ্জলি অৰ্পণ কৰিছোঁ।❤️🙏
জয় আই অসম
#জয়তু_আটছা ✊❤️
অসম চাহ জনজাতি ছাত্ৰ সন্থা (ATTSA)
অসম চাহ জনজাতি ছাত্ৰ সন্থা
চাহ জনগোষ্ঠী ঐক্য মঞ্চ - Cha Janagusti Aikya Mancha
