12/09/2026
#বিৰোধী ঐক্য বৰ্তমান পৰিস্থিতিৰ দাবী-চিপিআই (এম-এল ) #
গুৱাহাটী, ১০ ছেপ্টেম্বৰ, ২০২৬ : চিপিআই (এম-এল ) অসম ৰাজ্যিক সমিতিয়ে বৰ্তমান বিৰোধী ঐক্য সন্দৰ্ভত নিম্নোক্ত বক্তব্য দাঙি ধৰিছেঃ
দেশ আৰু জনসাধাৰণৰ ওচৰত যেতিয়া বিজেপি প্ৰধান বিপদ হিচাপে থিয় দিছে যিটো অখিল গগৈ ডাঙৰীয়াই নিজেই বিধান সভা নিৰ্বাচনৰ পূৰ্বে বাৰে বাৰে কৈ আহিছিল আৰু কংগ্ৰেছৰ লগত ঐক্যবদ্ধ মৰ্চাৰ পোষকতা কৰিছিল তেনে ক্ষেত্ৰত এতিয়া প্ৰশ্নটো হ'ল যে এই ১৩ মাহত পৰিস্থিতিৰ এনে কি পৰিৱৰ্তন হ'ল যে কংগ্ৰেছ দল আৰু বিজেপি, সমান শত্ৰুৰ শাৰীত উপনীত হ'ল ? নগাও লোকসভা সমষ্টিৰ উপ-নিৰ্বাচনৰ ঠিক আগমুহুৰ্তত ৰাইজৰ দলে লোৱা এই স্থিতিয়ে বিজেপিৰ বিৰুদ্ধে ঐক্যবদ্ধ প্ৰতিদণ্ডিতা কৰাত ব্যাঘাট যে জন্মাব সেয়া নিশ্চিত। কংগ্ৰেছৰ লগত এটা দল থাকিব নে নাই সেয়া এটা দলৰ সম্পূৰ্ণ নিজা সিদ্ধান্ত আৰু আম আদমী পাৰ্টি, AIUDFৰ দৰে কেইবাটাও বিৰোধী দল কংগ্ৰেছৰ লগত মিত্ৰতা বা বুজাবুজিত থকা নাই। কিন্ত আমি দৃঢ়তাৰে বিশ্বাস কৰো যে বিজপি-বিৰোধী শক্তিসমূহৰ মাজত ঐক্য অতি জৰুৰী আৰু দেশৰ অৰ্থনৈতিক পৰিস্থিতি, দিল্লীৰ আন্দোলন আৰু উজনিৰ বান পৰিস্থিতিয়ে এই প্ৰয়োজনীয়তাক বেছি গুৰুত্বসহকাৰে তুলি ধৰিছে।
কংগ্ৰেছৰ প্ৰতি সমালোচনা থকা আৰু কংগ্ৰেছক বিজেপিৰ সমানে আক্ৰমণৰ লক্ষ্য হিচাপে লোৱা কথাটো একে নহয়। কিয়নো বিজেপিয়ে ১২ বছৰ শাসন কৰাৰ পাছতো তেওলোকৰ সকলো ব্যৰ্থতাৰ বাবে কংগ্ৰেছক দায়ী কৰিব বিচাৰে আৰু বিৰোধী ঐক্যত বিভাজন আনিব বিচাৰে।
অসমত প্ৰকৃততে বিৰোধী মৰ্চা গঢ়ি উঠা নাছিল, নিৰ্বাচনত আসন বুজাবুজিহে হৈছিল৷ তাকো বহু কচৰৎৰ পিছত৷ এই কথাও সত্য যে কংগ্ৰেছ আজিও শক্তিশালী বিৰোধী দল গতিকে কংগ্ৰেছ বাদদি বিৰোধী ঐক্যৰ ওজনেই নাথাকিব৷আনটো হৈছে , নগাঁৱৰ সংসদীয় উপনিৰ্বাচনত ৰাইজৰ দলে নিজে নেখেলিলেও কাক সমৰ্থন দিব সেই স্থিতি স্পষ্ট নহয় অথচ সেই সমষ্টিৰ অন্তৰ্গত এজন বিধায়ক ৰাইজৰ দলৰ আছে যিটো ৰাজনৈতিক ভাৱে আটাইতকৈ তাৎপৰ্যপূৰ্ণ। চিপিআই (এম-এল) দলে পূৰ্ণাংগ অৰ্থত এক বিৰোধী মৰ্চা বিচাৰে য'ত দীৰ্ঘকালীন লক্ষ্য আৰু এজেণ্ডাৰে দলসমুহ দায়ৱদ্ধতাৰে বান্ধ খাই থাকিব। চিপিআই (এম-এল) দলে এইটোও বিচাৰে যে এনে মৰ্চাত কোনোবা দল নেথাকিলেও যাতে সমন্বয় আৰু সুসম্পৰ্ক থাকে সেইটো নিশ্চিত কৰিব লাগে। চিপিআই (এম-এল) দলে ভাবে যে বিজেপি দলক পৰাস্ত কৰাৰ স্বাৰ্থ প্ৰথম প্ৰাধান্য দিলেহে দেশ তথা জাতিৰ মংগল হ'ব।
স্বা : বিবেক দাস
সম্পাদক
অসম ৰাজ্যিক সমিতি
চিপিআই (এম-এল)
