04/11/2024
'ভিক্ষা'
কোন ক'ত আছ জনমভূমিৰ
ভকত সন্তান
আজি আইৰ পূজা হ'ব
আহ লৈ আহ
কোনে কি কৰিবি দান।
যাৰ আছে সোণ যাৰ আছে ৰূপ
আঁজলি ভৰাই আন,
যাৰ একো নাই দিয়ক মাথোন
ব্যথিত হৃদয় দান।
(কবি - নবীনচন্দ্ৰ বৰদলৈ)
'অসমৰ মুকুটবিহীন ৰজা' কর্মবীৰ নবীনচন্দ্ৰ বৰদলৈ ডাঙৰীয়া ভাৰতৰ স্বাধীনতা আন্দোলনৰ এগৰাকী প্রধান হোতা, নিভাঁজ দেশপ্রেমিক, আৰু নির্ভীক সেনানী হিচাপেই বিশেষভাৱে পৰিচিত। পৰাধীন ভাৰত জননীক বিদেশী শাসকৰ কবলৰপৰা মুক্ত কৰাই তেওঁৰ জীৱনৰ প্ৰধান লক্ষ্য আছিল যদিও সাহিত্য-সঙ্গীতৰ প্ৰতিও তেওঁৰ আছিল গভীৰ অনুৰাগ। সেয়েহে ব্যস্ততাময় ৰাজনৈতিক জীৱনৰ মাজতো যেতিয়াই আজৰি পাইছিল, তেতিয়াই সাহিত্য-সঙ্গীত চর্চা কৰিছিল। ছাত্র অৱস্থাৰপৰা তেওঁ অসমীয়া, বঙালী, হিন্দী, ইংৰাজী, উর্দু আদি ভাষাৰ বিভিন্ন গ্রন্থ পঢ়িছিল আৰু সময়ে সময়ে অসমীয়া কবিতা, নাটক আদি ৰচনাত মনোনিবেশ কৰিছিল। বৰদলৈক অসমীয়া সামাজিক নাটকৰ প্ৰৱৰ্তক বুলিবও পাৰি। তেওঁৰ তেনে নাটক হ'ল 'গৃহলক্ষ্মী' (১৯১১)। ইয়াৰ উপৰি তেওঁ পৌৰাণিক নাটক 'কৃষ্ণলীলা' (১৯৩৩), ঐতিহাসিক নাটক 'জয়মতী' আৰু উপন্যাস 'প্রশান্ত-শান্তি' ৰচনা কৰিছিল। তেখেতে ভালেমান দেশপ্রেমমূলক গীত আৰু কবিতাও ৰচনা কৰিছিল।
বৰদলৈ দেৱৰ ভাষা - সাহিত্যৰ চৰ্চাই অসমীয়া ভাষাটোক সমৃদ্ধ কৰাত যথেষ্ট অৰিহণা আগবঢ়াইছে।
অসমীয়া ভাষাই ধ্ৰুপদী ভাষা হিচাপে স্বীকৃতি পোৱাৰ এই মধু ক্ষণত তেখেতক শ্ৰদ্ধাৰে সুঁৱৰিছো।
