19/08/2026
‘আৰোহণ’ৰ শিক্ষামূলক ভ্ৰমণে শিক্ষাৰ্থীৰ জ্ঞান, আত্মবিশ্বাস আৰু ভৱিষ্যৎ সপোনক নতুন দিশ দিব: জিলা আয়ুক্ত, হোজাই
অসম চৰকাৰৰ ধ্বজাবাহী আঁচনি ‘আৰোহণ’ৰ অধীনত শিক্ষাৰ্থীসকলৰ বাবে আয়োজন কৰা শিক্ষামূলক ভ্ৰমণৰ বাবে হোজাই সমগ্ৰ শিক্ষা অভিযানৰ উদ্যোগত নিৰ্বাচিত ৫৮ গৰাকী শিক্ষাৰ্থীৰ শিক্ষামূলক ভ্ৰমণৰ আজি শুভাৰম্ভ কৰা হয়।
হোজাই জিলা আয়ুক্ত শ্ৰী সঞ্জয় দত্তই আজি এগৰাকী ছাত্ৰীৰ দ্বাৰা জিলা আয়ুক্তৰ কাৰ্যালয় চৌহদৰ পৰা উক্ত শিক্ষামূলক ভ্ৰমণৰ আনুষ্ঠানিকভাৱে ফ্লেগ অফ কৰোৱাই যাত্ৰাৰ শুভাৰম্ভ কৰে।
নিৰ্বাচিত শিক্ষাৰ্থীসকলৰ শিক্ষামূলক ভ্ৰমণ সন্দৰ্ভত হোজাই জিলাৰ জিলা আয়ুক্ত শ্ৰী সঞ্জয় দত্তই উল্লেখ কৰে যে এই ভ্ৰমণ কাৰ্যসূচিত শিক্ষাৰ্থী সকলে গুৱাহাটীস্থিত আইআইটি, এইমছ আদিৰ দৰে অগ্ৰণী অনুষ্ঠান, প্ৰতিষ্ঠান ভ্ৰমণৰ লগতে আয়োজন কৰা বৃত্তিমুখী পৰামৰ্শদান কাৰ্যসূচীত অংশগ্ৰহণ কৰিব। তেওঁ আৰু কয় যে, এই ভ্ৰমণ কেৱল এক সাধাৰণ ভ্ৰমণ নহয়; ই শিক্ষাৰ্থীসকলৰ বাবে বাস্তৱ অভিজ্ঞতাৰ জৰিয়তে জ্ঞান আহৰণ, নতুন বিষয়ৰ সৈতে পৰিচয় অর্জন আৰু নিজৰ ভৱিষ্যৎ লক্ষ্য নিৰ্ধাৰণৰ এক গুৰুত্বপূৰ্ণ সুযোগ প্ৰদান কৰিব।
জিলা আয়ুক্তগৰাকীয়ে লগতে কয় যে শ্ৰেণীকোঠাৰ শিক্ষাৰ সমান্তৰালভাৱে শিক্ষাৰ্থীসকলে বিভিন্ন শিক্ষানুষ্ঠান, ঐতিহাসিক আৰু গুৰুত্বপূৰ্ণ স্থান পৰিদৰ্শনৰ জৰিয়তে মূল্যবান অভিজ্ঞতা লাভ কৰিব। এনে অভিজ্ঞতাই তেওঁলোকৰ চিন্তাধাৰা অধিক বিস্তৃত কৰাৰ লগতে আত্মবিশ্বাস বৃদ্ধিত সহায় কৰিব।
তেওঁ শিক্ষাৰ্থীসকলক ভ্ৰমণকালত নতুন বিষয়সমূহ জানিবলৈ আগ্ৰহী হোৱা, প্ৰশ্ন উত্থাপন কৰা আৰু প্ৰতিটো অভিজ্ঞতাৰ পৰা শিকিবলৈ আহ্বান জনায়। শিক্ষাৰ্থীসকলৰ প্ৰতিভা বিকাশ আৰু উচ্চ শিক্ষাৰ প্ৰতি আগ্ৰহ বৃদ্ধি কৰাৰ ক্ষেত্ৰত ‘আৰোহণ’ৰ দৰে পদক্ষেপে গুৰুত্বপূৰ্ণ ভূমিকা পালন কৰিব বুলি তেওঁ আশা প্ৰকাশ কৰে।
জিলা আয়ুক্ত শ্ৰী সঞ্জয় দত্তই লগতে উল্লেখ কৰে যে চৰকাৰে শিক্ষাৰ্থীসকলৰ সৰ্বাংগীন বিকাশৰ বাবে বিভিন্ন পদক্ষেপ গ্ৰহণ কৰি আহিছে আৰু এনে কাৰ্যসূচীৰ জৰিয়তে বিশেষভাৱে প্ৰতিভাশালী তথা সম্ভাৱনাপূৰ্ণ শিক্ষাৰ্থীসকলক আগুৱাই যোৱাৰ সুযোগ প্ৰদান কৰা হৈছে।
তেওঁ শিক্ষাৰ্থীসকলক এই সুযোগৰ সদব্যৱহাৰ কৰি নতুন অভিজ্ঞতা আৰু জ্ঞান আহৰণৰ জৰিয়তে নিজৰ ভৱিষ্যৎ অধিক উজ্জ্বল কৰি তুলিবলৈ উৎসাহিত কৰে।
Directorate of Information and Public Relations, Assam
Hojai District Administration
