06/08/2026
📍 यशवंतराव चव्हाण सेंटर, मुंबई
सहकार क्षेत्रातील प्रामाणिक, कर्तव्यदक्ष आणि लोकाभिमुख प्रशासनाचा आदर्श ठरलेले सहकारी संस्था, मुंबई (१) शहरचे जिल्हा उपनिबंधक श्री. नितीन पांडुरंग काळे यांच्या सेवानिवृत्तीनिमित्त आयोजित सत्कार समारंभास उपस्थित राहून त्यांचा सत्कार सन्मान केला व पुढील वाटचालीसाठी शुभेच्छा दिल्या.
आपल्या इंदापूर तालुक्यातील पळसदेव या गावातून सुरू झालेला त्यांचा प्रवास हा केवळ एका अधिकाऱ्याचा नाही, तर जिद्द, चिकाटी, सचोटी आणि कर्तव्यनिष्ठेच्या बळावर उंच भरारी घेणाऱ्या व्यक्तिमत्त्वाचा प्रेरणादायी प्रवास आहे. आपल्या कार्यकाळात त्यांनी सहकार क्षेत्रातील प्रशासन अधिक पारदर्शक, उत्तरदायी आणि लोकाभिमुख करण्यासाठी सातत्याने मोलाचे योगदान दिले.
शासकीय सेवेत अनेक महत्त्वपूर्ण जबाबदाऱ्या यशस्वीपणे पार पाडताना त्यांनी शेतकरी, सहकारी संस्था आणि सर्वसामान्य नागरिकांचा विश्वास संपादन केला. त्यांच्या निर्णयक्षमतेने, अभ्यासू वृत्तीने आणि सकारात्मक दृष्टिकोनाने सहकार विभागाला नवी दिशा देण्याचे कार्य केले.
आज त्यांच्या प्रदीर्घ, यशस्वी आणि उल्लेखनीय सेवेचे कौतुक करताना मन अभिमानाने भरून आले. त्यांचे कार्य, मूल्ये आणि सेवाभाव पुढील पिढ्यांसाठी निश्चितच प्रेरणादायी ठरतील.
श्री. नितीन काळे यांना निरोगी, आनंदी, समृद्ध आणि समाधानकारक निवृत्त जीवनासाठी मनःपूर्वक शुभेच्छा! त्यांच्या अनुभवाचा आणि मार्गदर्शनाचा लाभ समाजाला व सहकार क्षेत्राला पुढेही मिळत राहो, हीच सदिच्छा.
#सहकार
