28/07/2022
മക്കളുടെ ചികിൽസയ്ക്കായി കരുവന്നൂര് സര്വീസ് സഹകരണ ബാങ്ക് അധികൃതരുടെ കാരുണ്യം കാത്ത് ഒരു കുടുംബം കൂടി; മാപ്രാണം സ്വദേശി ജോസഫ് നിക്ഷേപിച്ചത് 12 ലക്ഷം; പണത്തിനായി ചെല്ലുമ്പോൾ ധാർഷ്ട്യം നിറഞ്ഞ പ്രതികരണമെന്ന് ജോസഫ്..
ഇരിങ്ങാലക്കുട: കോടികളുടെ തട്ടിപ്പ് നടന്ന കരുവന്നൂര് സര്വീസ് സഹകരണ ബാങ്കില് ലക്ഷങ്ങള് നിക്ഷേപിച്ച് ചികിത്സക്കും കുടുംബാവശ്യങ്ങള്ക്കുമായി ദിവസവും ബാങ്കിന്റെ പടികള് കയറിയിറങ്ങുന്ന ഹതഭാഗ്യവാന്മാരുടെ നീണ്ടപട്ടികയിൽ ഒരാൾ കൂടി . മാപ്രാണം പള്ളിക്ക് അടുത്തു താമസിക്കുന്ന തെങ്ങോലപറമ്പില് വീട്ടിൽ 68 വയസ്സുള്ള ജോസഫും കുടുംബവും. ഭാര്യയും മൂന്നു മക്കളും ഉള്ള ജോസഫ് ഗള്ഫില് ഡ്രൈവറായിരുന്നു.നീണ്ട കാലത്തെ പ്രവാസി ജീവതത്തിന് ശേഷം അവിടെ നിന്ന് ചോര നീരാക്കി കിട്ടിയ സമ്പാദ്യവുമായി നാട്ടില് എത്തിയ ജോസഫ് കുറച്ചു കടം ഉളളത് വീട്ടിയും ബാക്കിയുളള 12 ലക്ഷം രൂപ കരുവന്നൂര് സര്വീസ് സഹകരണബാങ്കില് നിക്ഷേപിക്കുകയുമായിരുന്നു. ജോസഫിന് മൂന്ന് ആണ്മക്കളാണ് ഉളളത്. ഒരു പ്രസവത്തില് ഉണ്ടായവരാണ് എബിന്, വിപിന്, സിബിന് എന്നിവര്. ഇപ്പോള് 28 വയസു പ്രായമുളള ഈ മക്കളില് എബിനും സിബിനും സെറിബ്രല് പാള്സി രോഗത്തിൻ്റെ പിടിയിലാണ്. അതുകൊണ്ട് ഒരാള്ക്കു നടക്കുവാന് പരസഹായം ആവശ്യമാണ്. മറ്റൊരാള്ക്ക് സംസാരിക്കുവാനും പ്രയാസമാണ്. മൂന്നു പേരില് വിപിന് ഇപ്പോള് ഗള്ഫിലാണ്. കിഡ്നി രോഗത്തിന്റെ ചികിത്സയിലാണ് ജോസഫ്. ഭാര്യ റാണിയും അസുഖബാധിതയാണ്. വീട്ടുചെലവിനും തന്റെയും ഭാര്യയുടെയും മക്കളുടെയും ചികിത്സക്കായി ബാങ്കിനെ സമീപിക്കുമ്പോള് തികച്ചും മോശമായ പ്രതികരണമാണ് ഉണ്ടാകുന്നതെന്നാണ് ജോസഫ് പറയുന്നു വീട്ടിലുണ്ടായിരുന്ന സ്വര്ണാഭരണങ്ങള് മുഴുവന് വിറ്റു. ആറു മാസം മുന്പ് 30,000 രൂപയുടെ ബോണ്ട് മാറിയെടുക്കുവാന് ബാങ്കില് കൊടുത്തിട്ട് പതിനായിരം രൂപ മാത്രമാണ് കിട്ടിയത്. ബാക്കിയുളള 20,000 രൂപയ്ക്കു വേണ്ടി ബാങ്കില് ചെല്ലുമ്പോള് ഉദ്യോഗസ്ഥരുടെ ഭാഗത്തു നിന്നുള്ള ധാർഷ്ട്യം നിറഞ്ഞ പെരുമാറ്റം കാരണം താന് ഇപ്പോള് ബാങ്കിലേക്ക് പോകുന്നില്ലെന്നും ജോസഫ് വേദനയോടെ പറയുന്നു . ജീവിതമാര്ഗം മുട്ടി നില്ക്കുന്ന താന് എന്താണ് ചെയ്യേണ്ടതെന്നു ചോദ്യമാണ് ജോസഫ് ഉയർത്തുന്നത്.
