05/08/2026
যোৰহাট জলসম্পদ সংমণ্ডলৰ অধীনত মথাউৰি মেৰামতিৰ কাৰ্যসূচীৰ শেহতীয়া স্থিতি:
জাঁজী মথাউৰিৰ ধনতোলাত চতুৰ্থটো জিঅ’ টিউব (Geo tube) স্থাপনৰ কাম প্ৰায় সম্পূৰ্ণ হৈ উঠিছে, য’ত বৰ্তমানলৈকে মুঠ ভৌতিক অগ্ৰগতি ৬৫ শতাংশ হৈছে। আনহাতে চৰাইপানী মথাউৰিৰ অন্তৰ্গত হল'গুৰিত দ্বিতীয়টো জিঅ’ টিউব বহুওৱাৰ কাম চলি থকাৰ সমান্তৰালভাৱে 'টাইপ-এ' আৰু 'টাইপ-বি' জিঅ’ বেগ স্থাপন কৰাৰ কামো আগবঢ়াই নিয়া হৈছে আৰু এই স্থানত কামৰ মুঠ অগ্ৰগতি ৭৫ শতাংশলৈ বৃদ্ধি পাইছে।
ভোগদৈ নদীৰ সোঁপাৰৰ পহুৰমৰাত চতুৰ্থটো জিঅ’ টিউব প্ৰতিস্থাপনৰ কাম ইতিমধ্যে সম্পূৰ্ণ হৈছে। যদিও ভোগদৈ নদীৰ পানীৰ স্তৰে বিপদসীমা অতিক্ৰম কৰিছে, তথাপিও কফাৰ বান্ধৰ (Coffer dam) ভিতৰত 'টাইপ-বি' জিঅ’ বেগ পেলোৱাৰ কাম অবিৰতভাৱে চলাই থকা হৈছে আৰু ইয়াত বৰ্তমানলৈকে ৪৫ শতাংশ কাম সম্পূৰ্ণ হৈছে। ইফালে কলাইচুকত 'টাইপ-বি' জিঅ’ বেগ পেলোৱাৰ কামেৰে ৮০ শতাংশ অগ্ৰগতি লাভ কৰাৰ বিপৰীতে, শ’লমৰাত প্ৰাথমিক ভেটি প্ৰস্তুতিৰ পিছত চতুৰ্থটো জিঅ’ টিউব বহুওৱাৰ কাম চলি আছে আৰু ইয়াৰ অগ্ৰগতি ৭৫ শতাংশ হৈছেগৈ। মজিয়াভেটিত ভেটি নিৰ্মাণৰ বাবে 'টাইপ-বি' জিঅ’ বেগ পেলোৱাৰ কাম অব্যাহত আছে, যাৰ মুঠ অগ্ৰগতি বৰ্তমান ৩৫ শতাংশ।
পূৰ্বে প্ৰকাশ কৰা অনুসৰি, কাকডোঙা মথাউৰিৰ ছিগা অংশ জিঅ’ টিউব প্ৰতিস্থাপনৰ জৰিয়তে ইতিমধ্যে সফলতাৰে বন্ধ কৰা হৈছে। একেদৰে চৰাইপানী মথাউৰিৰ মণ্ডল গাঁৱৰ ছিগা অংশত প্ৰথমতে 'টাইপ-বি' জিঅ’ বেগ আৰু পৰৱৰ্তী সময়ত মাটিৰ কামৰ জৰিয়তে পুনৰুদ্ধাৰ কৰা হৈছে।
প্ৰতিকূল বতৰ আৰু নদীসমূহৰ উচ্চ পানীৰ স্তৰ সত্ত্বেও যোৰহাট জলসম্পদ সংমণ্ডলৰ অধীনৰ সকলোবোৰ গুৰুত্বপূৰ্ণ স্থানতে মথাউৰি পুনৰুদ্ধাৰ তথা সুৰক্ষাৰ কাম পূৰ্ণগতিত চলি আছে। বাকী থকা কামসমূহ যিমান সোনকালে পৰা যায় সম্পূৰ্ণ কৰি তুলিবলৈ সংমণ্ডলে পৰ্যাপ্ত শ্ৰমিক, যন্ত্ৰপাতি আৰু প্ৰয়োজনীয় সামগ্ৰী নিয়োজিত কৰি সামূহিক প্ৰচেষ্টা অব্যাহত ৰাখিছে।
CMO Assam
National Disaster Management Authority, India
Directorate of Information and Public Relations, Assam
Assam State Disaster Management Authority-ASDMA
DIPRO Jorhat
