30/06/2015
ഇന്ന് ഘടികാരങ്ങള് നിലയ്ക്കും ഒരു സെക്കന്ഡ് നേരത്തേക്ക്.....
ഭൂമിയുടെ ഭ്രമണമാണ് പ്രശ്നം, അത് മെല്ലെയാകുന്നു. ഘടികാരങ്ങള് പുനക്രമീകരിച്ച് വേണം ഭൂമിയെ ഒപ്പമെത്തിക്കാന്. അതിനായി ജൂണ് 30 ന് ക്ലോക്കുകള് ഒരു സെക്കന്ഡ് വിശ്രമിക്കും.
അതീവകൃത്യതയോടെ ചലിക്കുന്ന ആറ്റമിക് ക്ലോക്കുകളാണ് പുനക്രമീകരണത്തിന് വിധേയമാവുക. അതുവഴി 2015 ഒരു സെക്കന്ഡ് അധികദൈര്ഘ്യമുള്ള വര്ഷമാകും!
2012 ലാണ് ഇതിനുമുമ്പ് ഒരു സെക്കന്ഡ് നേരത്തെ വിശ്രമം ക്ലോക്കുകള്ക്ക് വേണ്ടിവന്നത്. അന്ന് ഇന്ര്നെറ്റിലാകമാനം പ്രശ്നങ്ങള് ഉടലെടുത്തിരുന്നു. ഇത്തവണയും അത്തരത്തില് പ്രശ്നങ്ങള് ഉണ്ടാകാമെന്ന് ടെക് വിദഗ്ധര് മുന്നറിയിപ്പ് നല്കുന്നു.
പാരിസ് ആസ്ഥാനമായുള്ള 'ഇന്റര്നാഷണല് എര്ത്ത് റൊട്ടേഷന് സര്വീസ്' എന്ന സ്ഥാപനമാണ് സമയത്തെ പൊന്നുപോലെ കാക്കുന്നത്. അവരാണ്, 2015 ജൂണ് 30 ന് ഒരു സെക്കന്ഡ് അധികമായിരിക്കുമെന്ന് പ്രഖ്യാപിച്ചത്.
ദിവസവും ഭൂമിയുടെ ഭ്രമണം ഒരു സെക്കന്ഡിന്റെ രണ്ടായിരത്തിലൊന്ന് വീതം കുറയുന്നു എന്നതാണ് പ്രശ്നം. ഭൂഭ്രമണം സസൂക്ഷ്മം നിരീക്ഷിച്ച്, ആറ്റമിക് ക്ലോക്കുകളില് അതിന്പ്രകാരം മാറ്റംവരുത്താനുള്ള ചുമതല പാരീസിലെ എര്ത്ത് റൊട്ടേഷന് സര്വീസിലെ ഗവേഷകര്ക്കാണ്.
സാധാരണ ഒരു ദിവസമെന്നത് 86,400 സെക്കന്ഡാണ്. 'ഈ ദിവസം (ജൂണ് 30) 86,400 ന് പകരം 86,401 സെക്കന്ഡുകളുണ്ടാകും' - യു.എസ്. നേവല് ഒബ്സര്വേറ്ററിയില് എര്ത്ത് ഓറിയന്റല് പരാമീറ്റേഴ്സിന്റെ മേധാവി നിക്ക് സ്റ്റമാറ്റകോസ് പറഞ്ഞു.
1972 ന് ശേഷം ഇതിനകം 25 തവണ അധികസെക്കന്ഡുകള് അവര് ചേര്ത്തു. ഇപ്പോള് ചേര്ക്കുന്ന സെക്കന്ഡ് കൂടിയായാല്, 1972 ന് ശേഷം 26 സെക്കന്ഡ് വര്ധിപ്പിച്ചു.
ഇക്കാലത്തിനിടെ, മനുഷ്യന് കൂടുതലായി കമ്പ്യൂട്ടറുകളെയും ജി.പി.എസ്.സംവിധാനങ്ങളെയും ആശ്രയിക്കാന് തുടങ്ങി. അറ്റോമിക് ഘടികാരങ്ങളുമായി ചേര്ന്ന് പോകത്തക്ക വിധമുള്ള 'നെറ്റ്വര്ക്ക് ടൈം പ്രോട്ടോക്കോള്' ( എന്.ടി.പി) ആണ് കമ്പ്യൂട്ടറുകള് പിന്തുടരുന്നത്.
ഒരേ സെക്കന്ഡ് രണ്ടുതവണ കാണേണ്ടി വരുന്ന കമ്പ്യൂട്ടറിന് എന്തോ പ്രശ്നമുള്ളതായി അനുഭവപ്പെടും. അത് ശരിയാക്കാന് കമ്പ്യൂട്ടര് ശ്രമിക്കും. സംഗതി പ്രശ്നമാകും. 2012 ല് ഒരു അധികസെക്കന്ഡ് ചേര്ത്തപ്പോള് മോസില്ല, യെല്പ്പ്, റെഡ്ഡിറ്റ്, ഫോര്സ്ക്വയര്, ലിങ്കഡ്ഇന്, സ്റ്റമ്പിള്അപ്പോണ് തുടങ്ങി ഒട്ടേറെ ഇന്റര്നെറ്റ് സര്വീസുകള് പ്രവര്ത്തനരഹിതമായി.
ഈ പ്രശ്നം പരിഹരിക്കാന് ഗൂഗിള് ഒരു പ്രത്യേക സങ്കേതം രൂപപ്പെടുത്തിയിട്ടുണ്ട്. 'ലീപ്പ് സ്മിയര്' ( leap smear ) എന്നാണതിന്റെ പേര്. സിസ്റ്റം ക്ലോക്കുകളിലേക്ക് മില്ലിസെക്കന്ഡുകള് ചേര്ത്ത് ചേര്ത്ത്, ഔദ്യോഗികമായി അധികസെക്കന്ഡ് പ്രഖ്യാപിക്കുമ്പോഴേക്കും കമ്പ്യൂട്ടര് സംവിധാനങ്ങളെ അതിന് തയ്യാറെടുപ്പിക്കുന്ന വിദ്യായാണിത്.
ഇത്തരത്തില് അധികസെക്കന്ഡ് ചേര്ക്കുന്നതിനെ വിമര്ശിക്കുന്നവരുണ്ട്. എന്നാല്, അത് ചെയ്തില്ലെങ്കില് ദിവസം എന്ന സങ്കല്പ്പം തന്നെ അപ്രസക്തമായിപ്പോകുമെന്ന് ഗവേഷകര് പറയുന്നു. ഭൂമി ഒരു തവണ സ്വയംഭ്രമണം പൂര്ത്തിയാക്കാനെടുക്കുന്ന സമയത്തിനാണല്ലോ ഒരു ദിവസം എന്ന് പറയുന്നത്.
