16/08/2026
ഇരിണാവ് ഡാം പാലത്തിലെ അപകടക്കെണി ഒഴിവാക്കാൻ അധികൃതർ അടിയന്തരമായി ഇടപെടണം: എസ്.ഡി.പി.ഐ
മാട്ടൂൽ: ഇരിണാവ് ഡാം പാലവും റോഡും ചേരുന്ന ഭാഗത്തെ ഗുരുതരമായ അശാസ്ത്രീയ നിർമ്മാണവും അപകടക്കെണിയും കണ്ടില്ലെന്ന് നടിക്കുന്ന ഭരണകൂടത്തിന്റെയും ജനപ്രതിനിധികളുടെയും ജനവിരുദ്ധ നയത്തിനെതിരെ ശക്തമായ പ്രതിഷേധവുമായി എസ്.ഡി.പി.ഐ മാട്ടൂൽ പഞ്ചായത്ത് കമ്മിറ്റി
മാട്ടൂലിന്റെ സമഗ്രവികസനത്തെക്കുറിച്ചും ടൂറിസം സാധ്യതകളെക്കുറിച്ചും വാചാലരാകുന്ന ഭരണാധികാരികൾ, നിത്യേന നൂറുകണക്കിന് സാധാരണക്കാരും വിനോദസഞ്ചാരികളും ആശ്രയിക്കുന്ന പ്രധാന പാതയിലെ ഈ മരണക്കെണി കണ്ടില്ലെന്ന് നടിക്കുന്നത് കടുത്ത വഞ്ചനയാണ്. വർഷങ്ങളായി തുടരുന്ന ഈ അശാസ്ത്രീയമായ നിർമ്മാണപ്പിഴവ് പരിഹരിക്കാൻ ഒരു നടപടിയും സ്വീകരിക്കാത്തത് പൊതുമരാമത്ത് വകുപ്പിന്റെയും പ്രദേശത്തെ ജനപ്രതിനിധികളുടെയും തികഞ്ഞ കെടുകാര്യസ്ഥതയാണ് കാണിക്കുന്നത്
വഴിയെക്കുറിച്ച് കൃത്യമായ ധാരണയില്ലാത്ത യാത്രികരുടെയും വിനോദസഞ്ചാരികളുടെയും വാഹനങ്ങൾ ഇവിടെ അപകടത്തിൽപ്പെടുന്നത് പതിവായിട്ടും ഭരണകൂടം കുറ്റകരമായ മൗനത്തിലാണ്. അടുത്തിടെ ടൂറിസ്റ്റ് ബസിന്റെ അടിഭാഗം ഇടിച്ച് ഓയിൽ ടാങ്ക് പൊട്ടിയുണ്ടായ ഗുരുതര സാഹചര്യം പോലും അധികാരികളുടെ കണ്ണ് തുറപ്പിച്ചില്ല. ഇരുചക്ര വാഹന യാത്രികർ തെറിച്ചുവീണ് പരിക്കേൽക്കുന്നതും പതിവാണ്. ഒരു വലിയ ജീവഹാനി ഉണ്ടായതിനു ശേഷം മാത്രം ഉണർന്നു പ്രവർത്തിക്കുന്ന ഉദ്യോഗസ്ഥ-ഭരണകൂട ധാർഷ്ട്യം അംഗീകരിക്കാനാവില്ല
റോഡിന്റെ ഭാഗം ആവശ്യമായ ഉയരത്തിൽ പുനർനിർമ്മിച്ച് ശാശ്വത പരിഹാരം കാണാൻ പൊതുമരാമത്ത് വകുപ്പ് ഉടൻ തയ്യാറാകണം. അല്ലാത്തപക്ഷം, പ്രദേശവാസികളെയും യാത്രക്കാരെയും അണിനിരത്തി പൊതുമരാമത്ത് ഓഫീസുകളിലേക്കും ബന്ധപ്പെട്ട അധികാരികൾക്കെതിരെയും ശക്തമായ പ്രക്ഷോഭ പരിപാടികൾക്ക് എസ്.ഡി.പി.ഐ നേതൃത്വം നൽകുമെന്ന് പഞ്ചായത്ത് കമ്മിറ്റി മുന്നറിയിപ്പ് നൽകി.
