05/06/2021
"ഇതെന്റെ മരിച്ചുപോയ അമ്മയുടെ ചിത്രമാണ് സുഹൃത്തുക്കളേ... ഈ ലോകത്ത് എന്റെ അമ്മയെ ഓര്ക്കാനുള്ള അവശേഷിക്കുന്ന ഏക ചിത്രം. ഇതൊന്നു കളറാക്കി തരാമോ...'
പഴമ പടര്ന്നു കയറിയൊരു ബ്ലാക്ക് ആന്ഡ് വൈറ്റ് ചിത്രം. അതിന് നിധിയെന്നു കൂടി അര്ത്ഥമുണ്ടായിരുന്നു. പൊടിക്കും ചിതലിനും കൊടുക്കാതെ ഒരു മകന് പൊന്നുപോലെ സൂക്ഷിച്ചു വച്ച നിധി... മരിച്ചു പോയ അമ്മയെ ഓര്മ്മിക്കാന് ആകെയുള്ള മാര്ഗം. ട്രോള് മലയാളം മീം എന്ന ഫെയ്സ്ബുക്ക് ഗ്രൂപ്പിലെ ഫൊട്ടോഷോപ്പ് ശിങ്കങ്ങള്ക്കു മുന്നിലേക്കാണ് ആ ചിത്രമെത്തിയത്. ഒപ്പം ചങ്കില് തൊടുന്നൊരു അപേക്ഷയും.
‘നിറമുള്ള ഓര്മ്മകള് സമ്മാനിച്ച അമ്മയുടെ ചിത്രവും നിറമുള്ളതാക്കി തരാമോ’ എന്ന് ആ മകന് കൊതിയോടെ കെഞ്ചുകയാണ്. കോഴിക്കോട് സ്വദേശിയായ നിഖിലെന്ന മകൻറെ ആവശ്യത്തിന് പകരം മാതൃസ്നേഹത്തിന്റെ ഏഴുവര്ണങ്ങള് പടര്ന്ന പൂക്കാലം തിരികെ കൊടുത്തിരിക്കുകയാണ് തിരുവനന്തപുരം സ്വദേശിയും ട്രോള് മലയാളം മീം ഫെയ്സ്ബുക്ക് ഗ്രൂപ്പ് അംഗവുമായ അഭിലാഷ് പിഎസ്.
കാലം പഴമയില് മുക്കിയ ബ്ലാക്ക് ആന്ഡ് വൈറ്റ് ചിത്രത്തെ കളറാക്കി മാറ്റി. തീര്ന്നില്ല, അമ്മയുടെ മുഖത്ത് ശ്രീത്വം വിളങ്ങുന്നൊരു ചിരി കൂടി ചേര്ത്തുവച്ചു ആ വിഷ്വല് എഡിറ്റര്. എല്ലായിടത്തു നിന്നും മനസു നിറയ്ക്കുന്ന കമന്റുകള് നിറഞ്ഞു. പക്ഷേ സോഷ്യൽ മീഡിയയുടെ ഹൃദയം നിറച്ചത് ആ മകന്റെ കമന്റാണ്. ജീവിച്ചിരുന്നപ്പോള് പോലും എന്റെ അമ്മ ഇത്രയും ചിരിച്ചിട്ടില്ലെന്ന് നിഖിൽ പറഞ്ഞപ്പോള് നമ്മളുടെ കണ്ണുകളും അറിയാതെ നിറഞ്ഞു.
സോഷ്യല് മീഡിയ ഹൃദയത്തിലേറ്റു വാങ്ങിയ ആ ചിത്രം സോഷ്യല് മീഡിയ ഇടനെഞ്ചില് ഫ്രെയിം ചെയ്ത് വയ്ക്കുമ്പോള് വൈറല് കലാകാരന് പറയുന്നു:
"ആ അമ്മയെക്കുറിച്ച് അധികം വിവരമൊന്നും എനിക്കറിയില്ല. പേര് സവിത എന്നുമാത്രം അറിയാം. പക്ഷേ ആ അമ്മ അകലെയിവിടെയോ മറഞ്ഞിരുന്ന് സന്തോഷിക്കുന്നുണ്ടാകാം. എന്നെയും മനസുനിറഞ്ഞ് അനുഗ്രഹിക്കുന്നുണ്ടാകാം"
