08/08/2026
അടിസ്ഥാന ജനവിഭാഗങ്ങളെ കൈയ്യൊഴിയുന്ന നിലപാടില് നിന്ന് യുഡിഎഫ് സര്ക്കാര് അടിയന്തിരമായി പിന്മാറണം. മത്സ്യത്തൊഴിലാളികളോടും, കര്ഷക തൊഴിലാളികളോടും നിഷേധാത്മകമായ നിലപാടാണ് യുഡിഎഫ് സര്ക്കാര് സ്വീകരിച്ചത്. സ്ത്രീകളെ അപമാനിക്കുന്ന തരത്തിലുള്ള പ്രസ്താവന മന്ത്രി തന്നെ നടത്തുകയും ചെയ്തു.
മുതലപ്പൊഴിയിലും, വിഴിഞ്ഞത്തും, നീണ്ടകരയിലും കടലില് കാണാതായ മത്സ്യത്തൊഴിലാളികളെ കണ്ടെത്താന് വൈകുന്നത് മൂലം കുടുംബങ്ങള് അനുഭവിക്കുന്ന ദുഃഖവും, നാട്ടിലെ രോഷവും സര്ക്കാര് കാണുന്നില്ല. ഉറ്റവരും, നാട്ടുകാരും പലവട്ടം പ്രതിഷേധം പ്രകടിപ്പിച്ചിട്ടും കണ്ണുതുറക്കാന് സര്ക്കാര് തയ്യാറാകുന്നില്ല. ഫിഷറീസ് മന്ത്രി എവിടെയെന്ന് ചോദിക്കേണ്ട ഗതികേടിലാണ് മത്സ്യത്തൊഴിലാളികള്.
കടലില് പല അപകടങ്ങളിലായി മുന്പും തൊഴിലാളികളെ കാണാതായിട്ടുണ്ട്. എന്നാല്, അത്തരം സന്ദര്ഭങ്ങളിലൊക്കെ സര്ക്കാര് എന്ത് നിലപാടെടുത്തു എന്നതാണ് പ്രധാനം. ശാശ്വതമായ പരിഹാര നടപടികള് ദീര്ഘകാലാടിസ്ഥാനത്തില് നടപ്പാക്കുകയും അടിയന്തിര നടപടികള് ഒരു നിമിഷം വൈകാതെ ചെയ്യുകയുമാണ് വേണ്ടത്. എട്ട് ദിവസം പിന്നിട്ടിട്ടും ഈ മൂന്നു പ്രദേശത്തും മത്സ്യത്തൊഴിലാളികളുടെ കുടുംബങ്ങളുടെ പരാതി പരിഹരിക്കാന് സര്ക്കാരിനായിട്ടില്ല.
ഏറ്റവും താഴേത്തട്ടിലുള്ള കര്ഷക തൊഴിലാളികളടങ്ങുന്ന സമൂഹത്തിന്റെ നെഞ്ചില് തീ കോരിയിടുന്ന തീരുമാനമാണ് ക്ഷേമ പെന്ഷന് വീട്ടിലെത്തിക്കുന്നത് നിര്ത്തിയെന്നത്. ഒരാളുടെ സഹായമില്ലാതെ ബാങ്കില് പോകാനോ പുറത്തിറങ്ങാനോ സാധിക്കാത്ത ലക്ഷക്കണക്കിന് പേര്ക്ക് വലിയ ആശ്വാസമായിരുന്നു വീട്ടില് പെന്ഷന് എത്തിക്കുന്ന നടപടി. അവരുടെ കഷ്ടപ്പാട് കണ്ടാണ് എല്ഡിഎഫ് സര്ക്കാര് ഈ സംവിധാനം തന്നെ ഏര്പ്പെടുത്തിയത്. ഇപ്പോള് അവരെ തെരുവിലേക്ക് വലിച്ചെറിയുകയാണ്. ക്ഷേമ പെന്ഷനടക്കമുള്ള ആനുകൂല്യങ്ങളെല്ലാം അവരുടെ അവകാശമാണെന്ന നിലപാടാണ് എല്.ഡി.എഫിനുള്ളത്. പാവപ്പെട്ടവരെ പ്രതിസന്ധിയിലാക്കുന്ന തീരുമാനത്തില് നിന്ന് പിന്മാറണം.
സ്ത്രീകളോട് ഈ സര്ക്കാര് എന്ത് തരം സമീപനമാണ് സ്വീകരിക്കുന്നതെന്നതിന് ഉത്തമ ഉദാഹരണമാണ് കെഎസ്ആര്ടിസി ബസിലെ സൗജന്യ യാത്രയുമായി ബന്ധപ്പെടുത്തി മന്ത്രി സി പി ജോണ് നടത്തിയ അധിക്ഷേപകരമായ പരാമര്ശം. യുഡിഎഫ് തന്നെ വാഗ്ദാനം ചെയ്ത പദ്ധതിയാണ് സൗജന്യ യാത്ര. എന്താണോ പ്രഖ്യാപിച്ചത് അതല്ല നടപ്പാക്കിയത്. മുഴുവന് ബസിലും സൗജന്യ യാത്ര ലഭിക്കുമെന്ന് പ്രതീക്ഷീച്ച സ്ത്രീകള്ക്ക് നിശ്ചയിക്കപ്പെട്ട ഓര്ഡിനറി ബസില് മാത്രമാക്കി യാത്ര ചുരുക്കി. ഇപ്പോള് അതിയറി യാത്ര ചെയ്യുന്നതിനേയും അധിക്ഷേപിക്കുകയാണ്
