മാവൂർ ഗ്രാമപഞ്ചായത്ത്

03/08/2026

കാലവർഷം കനത്തു; മാവൂരിൽ പ്രളയബാധിത പ്രദേശങ്ങളിൽ എം.എൽ.എയുടെയും ജനപ്രതിനിധികളുടെയും സന്ദർശനം

​പ്രതിരോധ പ്രവർത്തനങ്ങളും സജ്ജീകരണങ്ങളും പൂർണമെന്ന് ഗ്രാമപഞ്ചായത്ത്

​മാവൂർ: കാലവർഷം കനത്തതോടെ വെള്ളപ്പൊക്ക ഭീഷണിയിലായ മാവൂർ ഗ്രാമപഞ്ചായത്തിലെ വിവിധ പ്രദേശങ്ങളിൽ കുന്ദമംഗലം എം.എൽ.എ എം.എ. റസാഖ് മാസ്റ്ററുടെ നേതൃത്വത്തിൽ ജനപ്രതിനിധികൾ സന്ദർശനം നടത്തി. ഗ്രാമപഞ്ചായത്ത് പ്രസിഡന്റ് മുന്നിറത്ത് ടീച്ചറും മറ്റു പഞ്ചായത്ത് ഭരണസമിതി അംഗങ്ങളും എം.എൽ.എയ്‌ക്കൊപ്പം വെള്ളം കയറിയ പ്രദേശങ്ങളിലെത്തി സ്ഥിതിഗതികൾ നേരിട്ട് വിലയിരുത്തി.

​കോഴിക്കോട് ജില്ലയിൽ തന്നെ കാലവർഷത്തിൽ ഏറ്റവും കൂടുതൽ പ്രളയം ബാധിക്കുന്ന പഞ്ചായത്തുകളിലൊന്നാണ് മാവൂർ. എന്നാൽ മുൻവർഷങ്ങളിലേതുപോലെ കൃത്യവും ആസൂത്രിതവുമായ ഇടപെടലുകളിലൂടെ നിലവിലെ പ്രതിസന്ധിയെ നേരിടാനുള്ള തയ്യാറെടുപ്പുകൾ പഞ്ചായത്ത് ഇതിനോടകം പൂർത്തിയാക്കിയിട്ടുണ്ട്. ദുരന്ത നിവാരണ സേന, ഫയർഫോഴ്സ്, പോലീസ്, ആരോഗ്യ പ്രവർത്തകർ എന്നിവരെ ഏകോപിപ്പിച്ച് പഴുതടച്ച പ്രതിരോധ പ്രവർത്തനങ്ങളാണ് ഗ്രാമപഞ്ചായത്തിന്റെ നേതൃത്വത്തിൽ ഇപ്പോൾ നടപ്പിലാക്കിവരുന്നത്.

​വെള്ളപ്പൊക്ക ഭീഷണി നേരിടുന്നവർക്കും ദുരിതബാധിതർക്കും സുരക്ഷിതരായിരിക്കാൻ ആവശ്യമായ എല്ലാ അടിയന്തര നടപടികളും സഹായങ്ങളും ഉറപ്പാക്കിയിട്ടുണ്ടെന്ന് അധികൃതർ വ്യക്തമാക്കി. പ്രദേശത്ത് ഗ്രാമപഞ്ചായത്ത് അതീവ ജാഗ്രതാ നിർദേശം നൽകിയിട്ടുണ്ട്. ജനങ്ങൾ ആശങ്കപ്പെടേണ്ടതില്ലെന്നും കൂട്ടായ പ്രവർത്തനങ്ങളിലൂടെ ഈ പ്രതിസന്ധിയെയും മാവൂർ ഒറ്റക്കെട്ടായി അതിജീവിക്കുമെന്നും ജനപ്രതിനിധികൾ അറിയിച്ചു.

✳✳✳✳✳✳✳✳✳✳
👇👇Follow Us On. 👇👇
WhatsApp https://chat.whatsapp.com/BQ8ngikC3Kl0nEihcGdkpm
Facebook https://www.facebook.com/MavoorGramaPanchayath

16/07/2026

⚽🏆 മാവൂർ ഗ്രാമ പഞ്ചായത്ത് ഒരുക്കുന്ന വേൾഡ് കപ്പ് പ്രവചന മത്സരം! 🏆⚽

ലോകകപ്പ് ഫുട്ബോൾ ആവേശം കൊടുമുടി കയറുമ്പോൾ, മാവൂരിലെ ഫുട്ബോൾ പ്രേമികൾക്കായി ഇതാ ഒരു സുവർണ്ണാവസരം! ശരിയുത്തരം പ്രവചിക്കൂ... സമ്മാനങ്ങൾ നേടൂ! 🎁

👇 നിങ്ങൾ പ്രവചിക്കേണ്ടത് ഇത്രമാത്രം:
1️⃣ വിന്നേഴ്സ്🏆
2️⃣ റണ്ണേഴ്സ് 🥈
3️⃣ ഫൈനൽ സ്കോർ? 🔢
4️⃣ ആദ്യം ഗോൾ നേടുന്ന ടീം ഏത്? 🥅

⏳ പ്രവചിക്കാൻ അവസരം:

2026 ജൂലൈ 18, വൈകിട്ട് 7 മണി വരെ മാത്രം!

📌 ശ്രദ്ധിക്കേണ്ട കാര്യങ്ങൾ (നിബന്ധനകൾ):
🔸 മാവൂർ പഞ്ചായത്തിൽ താമസിക്കുന്നവർക്ക് മാത്രമാണ് അവസരം.
🔸മാവൂർ ഗ്രാമ പഞ്ചായത്ത്‌ ഒഫീഷ്യൽ ഫേസ്ബുക്ക് പേജിലും പ്രസിഡന്റിന്റെ ഇൻസ്റ്റാഗ്രാം അക്കൗണ്ടിലും ഷെയർ ചെയ്ത പോസ്റ്റിന് താഴെ കമന്റ് ആയാണ് പ്രവചനം രേഖപ്പെടുത്തേണ്ടത്.

🔸 പ്രവചനത്തിനൊപ്പം നിങ്ങളുടെ പേരും ഫോൺ നമ്പറും നൽകാൻ മറക്കരുത്!
🔸 ഒന്നിൽ കൂടുതൽ പേർ ശരിയുത്തരം നൽകിയാൽ നറുക്കെടുപ്പിലൂടെ ഭാഗ്യശാലിയെ കണ്ടെത്തും.

പ്രവചനത്തിൽ പങ്കെടുക്കാൻ താഴെ കാണുന്ന ലിങ്കിൽ ക്ലിക്ക് ചെയ്യുക

ഫേസ്ബുക്ക്

https://www.facebook.com/MavoorGramaPanchayath

ഇൻസ്റ്റാഗ്രാം
https://www.instagram.com/c_muneerath?igsh=MXM3MnppeWw5ZnlmYw==

⚽എല്ലാവർക്കും വിജയാശംസകൾ! ✨

20/05/2026

*വിദ്യാഭ്യാസ രംഗത്ത് പുത്തൻ ചുവടുവെപ്പുമായി മാവൂർ ഗ്രാമപഞ്ചായത്ത്*

മാവൂർ: വിദ്യാർത്ഥികളുടെ വിദ്യാഭ്യാസ ഭാവി കൂടുതൽ കരുത്തുറ്റതാക്കാൻ ലക്ഷ്യമിട്ട് മാവൂർ ഗ്രാമപഞ്ചായത്തിന്റെ ആഭിമുഖ്യത്തിൽ മെഗാ ഓറിയന്റേഷൻ ക്ലാസ് സംഘടിപ്പിച്ചു. 2026-27 അധ്യയന വർഷത്തിൽ യു.എസ്.എസ്, എൻ.എം.എം.എസ് പരീക്ഷകൾക്ക് തയ്യാറെടുക്കുന്ന ഏഴ്, എട്ട് ക്ലാസുകളിലെ വിദ്യാർത്ഥികൾക്കായാണ് രാജീവ് ഗാന്ധി കൺവെൻഷൻ സെന്ററിൽ വെച്ച് പ്രത്യേക ക്യാമ്പ് ഒരുക്കിയത്.

പരിപാടിയുടെ ഉദ്ഘാടനം ഗ്രാമപഞ്ചായത്ത് പ്രസിഡന്റ് ശ്രീമതി. മുനീറത്ത് ടീച്ചർ നിർവ്വഹിച്ചു. ചെറുപ്രായത്തിൽ തന്നെ ഇത്തരം മത്സരപ്പരീക്ഷകളെ അഭിമുഖീകരിക്കുന്നത് കുട്ടികളിലെ ഭയം ഇല്ലാതാക്കുമെന്നും, പി.എസ്.സി, യു.പി.എസ്.സി പോലുള്ള ഉന്നത പരീക്ഷകളെ ആത്മവിശ്വാസത്തോടെ നേരിടാൻ ഇത് മികച്ചൊരു അടിത്തറയാകുമെന്നും അവർ പറഞ്ഞു. സാമ്പത്തിക സഹായത്തിനപ്പുറം കുട്ടികളുടെ ബൗദ്ധിക നിലവാരം ഉയർത്താൻ ഇത്തരം സ്കോളർഷിപ്പുകൾ വലിയ മുതൽക്കൂട്ടാണെന്നും പ്രസിഡന്റ് കൂട്ടിച്ചേർത്തു.

തുടർന്ന് നടന്ന സയന്റിഫിക് ലേണിംഗ് സെഷന് 'സ്മാർട്ട് പ്ലസ് അക്കാദമി' ഡയറക്ടർ താജു നേതൃത്വം നൽകി. പരീക്ഷകളുടെ സിലബസ്, എളുപ്പത്തിൽ പഠിച്ചെടുക്കാവുന്ന തന്ത്രങ്ങൾ, സമയക്രമീകരണം എന്നിവയെക്കുറിച്ച് അദ്ദേഹം വിദ്യാർത്ഥികൾക്കും രക്ഷിതാക്കൾക്കും ലളിതമായ രീതിയിൽ മാർഗ്ഗനിർദ്ദേശം നൽകി.
വൈസ് പ്രസിഡന്റ് സി.പി. കൃഷ്ണൻ ചടങ്ങിൽ അധ്യക്ഷത വഹിച്ചു. സ്റ്റാന്റിംഗ് കമ്മിറ്റി അദ്ധ്യക്ഷന്‍മാരായ ഉമാദേവി, എൻ.പി. അഹമ്മദ്, വിവിധ ജനപ്രതിനിധികള്‍ എന്നിവര്‍ സംസാരിച്ചു.
✳✳✳✳✳✳✳✳✳✳
👇👇Follow Us On. 👇👇
Web: https://mavoorpanchayat.lsgkerala.gov.in
WhatsApp https://chat.whatsapp.com/BQ8ngikC3Kl0nEihcGdkpm
Facebook https://www.facebook.com/MavoorGramaPanchayath

08/05/2026

08/05/2026

സ്കൂളുകളിൽ അഗ്നിസുരക്ഷയും പ്രഥമശുശ്രൂഷയും. മാവൂർ പഞ്ചായത്ത് അധ്യാപകർക്കും പി.ടി.എ പ്രതിനിധികൾക്കും പരിശീലനം നൽകി

മാവൂർ: മാവൂർ ഗ്രാമപഞ്ചായത്ത് പി.ഇ.സി യുടെ നേതൃത്വത്തിൽ പഞ്ചായത്ത് പരിധിയിലെ എൽ.പി, യു.പി, ഹൈസ്‌കൂൾ, ഹയർ സെക്കൻഡറി അധ്യാപകർക്കും പി.ടി.എ, എസ്.എം.സി, എം.പി.ടി.എ പ്രതിനിധികൾക്കുമായി പരിശീലന പരിപാടി സംഘടിപ്പിച്ചു. പഞ്ചായത്ത് പ്രസിഡന്റ് മുനീറത്ത് ടീച്ചർ ഉദ്ഘാടനം നിർവ്വഹിച്ചു. വൈസ് പ്രസിഡന്റ് സി.പി. കൃഷ്ണൻ അധ്യക്ഷത വഹിച്ചു.

സ്കൂൾ അന്തരീക്ഷത്തിൽ ഉണ്ടായേക്കാവുന്ന അപകടങ്ങൾ നേരിടുന്നതിനായി 'അഗ്നിസുരക്ഷയും പ്രഥമശുശ്രൂഷയും' എന്ന വിഷയത്തിൽ മാവൂർ ഫയർ സ്റ്റേഷനിലെ സീനിയർ ഫയർ ആൻഡ് റെസ്ക്യൂ ഓഫീസർ ഷിജു കൂത്താളി ക്ലാസെടുത്തു. തീപിടുത്തം തടയുന്നതിനുള്ള പ്രായോഗിക രീതികളും അടിയന്തര സാഹചര്യങ്ങളിൽ നൽകേണ്ട പ്രഥമശുശ്രൂഷയും അദ്ദേഹം വിശദീകരിച്ചു.

പരിപാടിയിൽ ഗ്രാമപഞ്ചായത്ത് സ്ഥിരം സമിതി അധ്യക്ഷരായ ഉമാദേവി കുഴിപ്പള്ളി, ഗീതാമണി പുലിയപ്പുറം, വാർഡ് മെമ്പർ കെ. ഉസ്മാൻ, പഞ്ചായത്ത് സെക്രട്ടറി വിനോദ് കുമാർ ടി.എം, ഹെഡ്മാസ്റ്റർ ഉണ്ണി മാഷ് എന്നിവർ സംസാരിച്ചു. വരാനിരിക്കുന്ന ആദ്യ ടേമിലേക്കുള്ള അക്കാദമിക ആസൂത്രണവും ചടങ്ങിന്റെ ഭാഗമായി അധ്യാപകർ പൂർത്തിയാക്കി. പഞ്ചായത്ത് പരിധിയിലെ വിവിധ വിദ്യാലയങ്ങളിൽ നിന്നുള്ള പ്രതിനിധികൾ ചടങ്ങിൽ സജീവമായി പങ്കെടുത്തു.

✳✳✳✳✳✳✳✳✳✳
👇👇Follow Us On. 👇👇
WhatsApp https://chat.whatsapp.com/BQ8ngikC3Kl0nEihcGdkpm
Facebook https://www.facebook.com/MavoorGramaPanchayath

29/04/2026

📢📢📢📢📢📢

മഞ്ഞപ്പിത്തം: ജാഗ്രത വേണമെന്ന് മാവൂര്‍ ഗ്രാമപഞ്ചായത്ത് പ്രസിഡന്റ്

മാവൂർ: മഞ്ഞപ്പിത്തം പടർന്നുപിടിക്കുന്ന സാഹചര്യത്തിൽ പൊതുജനങ്ങൾ അതീവ ജാഗ്രത പാലിക്കണമെന്ന് ഗ്രാമപഞ്ചായത്ത് പ്രസിഡന്റ് മുനീറത്ത് ടീച്ചർ അറിയിച്ചു. രോഗവ്യാപനം നിയന്ത്രിക്കുന്നതിനായി ആരോഗ്യവകുപ്പുമായി ചേർന്ന് പഞ്ചായത്ത് കർശനമായ പ്രതിരോധ നടപടികൾ സ്വീകരിച്ചു വരികയാണ്. വിവാഹങ്ങൾ, മറ്റ് സാമൂഹിക ഒത്തുചേരലുകൾ എന്നിവടങ്ങളിൽ വിതരണം ചെയ്യുന്ന കുടിവെള്ളം ശുദ്ധമാണെന്നും തിളപ്പിച്ചതാണെന്നും സംഘാടകർ ഉറപ്പുവരുത്തണം. ഇത്തരം ചടങ്ങുകളിൽ ഉപയോഗിക്കുന്ന ഐസ്, ശീതളപാനീയങ്ങൾ എന്നിവയുടെ ഗുണനിലവാരവും പരിശോധിക്കണം. പുറത്തുനിന്നുള്ള ആഹാരവും പാനീയങ്ങളും കഴിക്കുമ്പോൾ പ്രത്യേക ശ്രദ്ധ പുലർത്തണം. വ്യക്തിശുചിത്വം പാലിക്കുന്നതിനൊപ്പം ഭക്ഷണത്തിന് മുമ്പും മലവിസർജ്ജനത്തിന് ശേഷവും കൈകൾ സോപ്പിട്ട് കഴുകുന്നത് ശീലമാക്കണമെന്നും ആരോഗ്യവകുപ്പ് നിർദ്ദേശിച്ചു.

രോഗം റിപ്പോർട്ട് ചെയ്യപ്പെട്ട പ്രദേശങ്ങളില്‍ ഗ്രാമപഞ്ചായത്ത് ജനപ്രതിനിധികളും ആരോഗ്യവകുപ്പ് ഉദ്യോഗസ്ഥരും നേരിട്ട് സന്ദർശനം നടത്തി സ്ഥിതിഗതികൾ വിലയിരുത്തി. പ്രദേശത്തെ കിണറുകളും മറ്റ് പൊതു ജലസ്രോതസ്സുകളും സൂപ്പർ ക്ലോറിനേഷൻ നടത്തുന്നതിനുള്ള നടപടികൾ പൂർത്തിയായി വരികയാണ്. ആരോഗ്യപ്രവർത്തകരുടെ ഗൃഹസന്ദർശനം നടത്തിയും ബോധവൽക്കരണ പ്രവർത്തനങ്ങൾ ഊർജ്ജിതമാക്കിയിട്ടുണ്ട്.പനി, കടുത്ത ക്ഷീണം, കണ്ണിലെ മഞ്ഞനിറം, മൂത്രത്തിന് നിറവ്യത്യാസം, വിശപ്പില്ലായ്മ തുടങ്ങിയ ലക്ഷണങ്ങൾ കണ്ടാൽ ഒട്ടും വൈകാതെ ആശുപത്രിയില്‍ ചികിത്സ തേടണം. സ്വയം ചികിത്സ അപകടകരമാണെന്നും ആരോഗ്യപ്രവർത്തകർ നൽകുന്ന നിർദ്ദേശങ്ങൾ കർശനമായി പാലിക്കണമെന്നും പഞ്ചായത്ത് പ്രസിഡന്റ് വാർത്താക്കുറിപ്പിൽ അറിയിച്ചു.

✳✳✳✳✳✳✳✳✳✳
👇👇Follow Us On. 👇👇
WhatsApp https://chat.whatsapp.com/BQ8ngikC3Kl0nEihcGdkpm
Facebook https://www.facebook.com/MavoorGramaPanchayath

WhatsApp Group Invite

03/03/2026

📢📢📢📢📢📢

*മാവൂർ പഞ്ചായത്തിൽ 36.76 കോടിയുടെ വികസന ബജറ്റ്*

​മാവൂർ: മാവൂർ ഗ്രാമപഞ്ചായത്തിന്റെ 2026-27 സാമ്പത്തിക വർഷത്തേക്കുള്ള വാർഷിക ബജറ്റ് അവതരിപ്പിച്ചു. 36,76,08,249 രൂപ വരവും 36,19,63,500 രൂപ ചിലവും പ്രതീക്ഷിക്കുന്ന ബജറ്റിൽ 56,44,749 രൂപയുടെ മിച്ചമാണുള്ളത്. ഗ്രാമപഞ്ചായത്ത് ഹാളിൽ നടന്ന ചടങ്ങിൽ വൈസ് പ്രസിഡന്റ് സി.പി. കൃഷ്ണൻ ബജറ്റ് അവതരിപ്പിച്ചു. ഗ്രാമവനം ടൂറിസം പദ്ധതി, വയോജനങ്ങൾക്കായി 'നാലുമണിപ്പൂവ്' തുടങ്ങിയ ആകർഷകമായ പദ്ധതികൾ ഇത്തവണത്തെ ബജറ്റിന്റെ പ്രത്യേകതയാണ്.

​കാർഷിക മേഖലയ്ക്ക് പദ്ധതി വിഹിതത്തിന്റെ 30 ശതമാനത്തിലധികം തുക നീക്കിവെച്ചുകൊണ്ട് ഭക്ഷ്യ സ്വയംപര്യാപ്തതയ്ക്ക് ബജറ്റ് ഊന്നൽ നൽകുന്നു. ക്ഷീരവികസനം, മൃഗസംരക്ഷണം എന്നിവയ്ക്ക് പുറമെ ആരോഗ്യ മേഖലയിൽ സൗജന്യ മരുന്ന് വിതരണവും ലാബ് സൗകര്യങ്ങളും ഉറപ്പാക്കും. വിദ്യാഭ്യാസ രംഗത്ത് കുട്ടികളുടെ പഠനനിലവാരം മെച്ചപ്പെടുത്താൻ 'ഒന്നാംതരം ഒന്നാമത്' എന്ന നൂതന പദ്ധതിയും വിഭാവനം ചെയ്തിട്ടുണ്ട്. ഭൗതിക സാഹചര്യങ്ങളുടെ വികസനം, റോഡ് നിർമ്മാണം, തെരുവ് വിളക്കുകളുടെ അറ്റകുറ്റപ്പണി എന്നിവയ്ക്കും മതിയായ തുക വകയിരുത്തി.

​മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയിലൂടെ 5.75 കോടി രൂപയുടെ പ്രവർത്തനങ്ങളും 82,000 തൊഴിൽ ദിനങ്ങളും സൃഷ്ടിക്കാനാണ് പഞ്ചായത്ത് ലക്ഷ്യമിടുന്നത്. ഹരിതകർമ്മസേനയുടെ പ്രവർത്തനം, കുടുംബശ്രീ വഴിയുള്ള വനിതാ വികസനം എന്നിവയ്ക്കും ബജറ്റിൽ പ്രത്യേക പരിഗണനയുണ്ട്.

ഗ്രാമപഞ്ചായത്ത് പ്രസിഡന്റ് മുനീറത്ത് ടീച്ചർ അധ്യക്ഷത വഹിച്ചു. സ്ഥിരം സമിതി അധ്യക്ഷന്മാരായ ഗീതാമണി, ഉമാ ദേവി കുഴിപ്പള്ളി, എൻ.പി. അഹമ്മദ്, വിവിധ വാർഡ് മെമ്പർമാർ തുടങ്ങിയവർ സംസാരിച്ചു..

✳✳✳✳✳✳✳✳✳✳

👇👇Follow Us On. 👇👇

WhatsApp https://chat.whatsapp.com/BQ8ngikC3Kl0nEihcGdkpm

Facebook https://www.facebook.com/MavoorGramaPanchayath

20/02/2026

ചേർത്ത് നിർത്തലിന്റെ മാവൂർ മാതൃക
ഭൂരഹിതർക്ക് ഭൂമി കൈമാറി മാവൂർ ഗ്രാമപഞ്ചായത്ത്

മാവൂർ: ഭൂരഹിതർക്കായി ഗ്രാമപഞ്ചായത്ത് നടപ്പിലാക്കുന്ന ഭൂവിതരണ പദ്ധതിയുടെ ഭാഗമായി 18 കുടുംബങ്ങൾക്ക് ഭൂമി കൈമാറി. വർഷങ്ങളായി സ്വന്തമായി ഭൂമിയില്ലാതെ ദുരിതമനുഭവിച്ചിരുന്ന കുടുംബങ്ങൾക്കാണ് പഞ്ചായത്തിന്റെ അധീനതയിലുള്ള സ്ഥലം വീതിച്ചു നൽകിയത്.

ഒന്നാം വാർഡിലെ മലപ്രം, പതിനെട്ടാം വാർഡിലെ പുനത്തിൽ മേത്തൽ എന്നീ പ്രദേശങ്ങളിലായാണ് ഗുണഭോക്താക്കൾക്ക് ഭൂമി അനുവദിച്ചത്. ഭൂമിയുടെ രേഖാ കൈമാറ്റവും അനുബന്ധ ചടങ്ങുകളും ജനപ്രതിനിധികളുടെയും ഉദ്യോഗസ്ഥരുടെയും സാന്നിധ്യത്തിൽ ഗ്രാമപഞ്ചായത്ത് പ്രസിഡന്റ് സി. മുനീറത്ത് ചടങ്ങ് ഉദ്ഘാടനം ചെയ്തു

വൈസ് പ്രസിഡന്റ് സി.പി. കൃഷ്ണൻ അധ്യക്ഷത വഹിച്ചു. സ്റ്റാൻന്റിഗ് കമ്മിറ്റി ചെയർമാൻമാരായ എൻ.പി. അഹമ്മദ്, ഗീതാമണി പുലിയപ്പുറം, ഉമാദേവി കുഴിപ്പള്ളി എന്നിവരും വാർഡ് മെമ്പർമാരായ കെ. ഉസ്മാൻ, ജയശ്രീ ദിവ്യപ്രകാശ്, ശ്രീജ ആറ്റാഞ്ചേരിമേത്തൽ, അനസ് പി.സി., ഉണ്ണി രാജൻ എന്നിവരും സംസാരിച്ചു.

മുൻ ഗ്രാമപഞ്ചായത്ത് മെമ്പർമാർ, വി.ഇ.ഒ. ആഷിഖ്, എം.ജി.എന്‍.ആര്‍.ജി.എസ് ഓവർസിയർ ഷിജു എ.പി. തുടങ്ങിയവർ പങ്കെടുത്തു. അർഹരായ മുഴുവൻ ആളുകൾക്കും തലചായ്ക്കാൻ ഒരിടം ഉറപ്പാക്കുകയാണ് ഈ പദ്ധതിയിലൂടെ പഞ്ചായത്ത് ലക്ഷ്യമിടുന്നത്.
✳✳✳✳✳✳✳✳✳✳


👇👇Follow Us On. 👇👇

WhatsApp https://chat.whatsapp.com/BQ8ngikC3Kl0nEihcGdkpm

Facebook https://www.facebook.com/MavoorGramaPanchayath

13/02/2026

📢📢📢📢📢📢
ജനകീയ വികസനത്തിന് പുത്തൻ കുതിപ്പ്: മാവൂർ പഞ്ചായത്ത് വികസന സെമിനാർ ആവേശമായി
മാവൂർ: നാടിന്റെ വികസന സ്വപ്നങ്ങൾക്ക് കരുത്തുപകരാൻ ജനകീയ നിർദ്ദേശങ്ങളുമായി മാവൂർ ഗ്രാമപഞ്ചായത്ത് വികസന സെമിനാർ സംഘടിപ്പിച്ചു. വെള്ളിയാഴ്ച രാവിലെ രാജീവ് ഗാന്ധി കൺവെൻഷൻ സെന്ററിൽ വെച്ച് നടന്ന ചടങ്ങ് ഗ്രാമപഞ്ചായത്ത് പ്രസിഡണ്ട് മുനീറത്ത് ടീച്ചർ ഉദ്ഘാടനം ചെയ്തു. പഞ്ചായത്തിന്റെ വിഭവശേഷി പരമാവധി പ്രയോജനപ്പെടുത്തിക്കൊണ്ട് നടപ്പിലാക്കാവുന്ന ജനകീയ പദ്ധതികൾ വരും വർഷം പഞ്ചായത്തിന് പുത്തൻ മുഖച്ഛായ നൽകുമെന്ന് പ്രസിഡണ്ട് പറഞ്ഞു. അടുത്ത സാമ്പത്തിക വർഷത്തേക്കുള്ള പഞ്ചായത്തിന്റെ കർമ്മപദ്ധതികൾക്ക് സെമിനാർ അന്തിമരൂപം നൽകി.

ഗ്രാമസഭകളിൽ നിന്ന് ഉയർന്നുവന്ന താഴേത്തട്ടിലുള്ള ആവശ്യങ്ങളെ ക്രോഡീകരിച്ചാണ് പദ്ധതികൾ തയ്യാറാക്കിയിരിക്കുന്നത്. കൃഷി, കുടിവെള്ളം, ആരോഗ്യം, വിദ്യാഭ്യാസം എന്നീ മേഖലകൾക്ക് പുറമെ പ്രാദേശിക സാമ്പത്തിക വികസനത്തിന് ഊന്നൽ നൽകുന്ന ഒട്ടേറെ പുതിയ പദ്ധതികൾക്കും സെമിനാറിൽ അംഗീകാരമായി. ഗ്രാസിം ഭൂമി, തെങ്ങിലക്കടവ് ക്യാൻസർ സെന്റർ, ഗ്രാമ വനം തുടങ്ങിയ പദ്ധതികൾക്ക് സെമിനാറിൽ പ്രത്യേക ഊന്നൽ നൽകി.

വിവിധ വർക്കിംഗ് ഗ്രൂപ്പുകൾ തയ്യാറാക്കിയ റിപ്പോർട്ടുകൾ സെമിനാറിൽ അവതരിപ്പിച്ചു. ഉദ്യോഗസ്ഥരും ആസൂത്രണ സമിതി അംഗങ്ങളും ജനപ്രതിനിധികളും പദ്ധതികളുടെ പ്രായോഗിക വശങ്ങളെക്കുറിച്ച് വിശദമായ ചർച്ചകൾ നടത്തി.

ഗ്രാമപഞ്ചായത്ത് വൈസ് പ്രസിഡണ്ട് സി പി കൃഷ്ണൻ അദ്ധ്യക്ഷത വഹിച്ച ചടങ്ങില്‍ സ്ഥിരം സമിതി അദ്ധ്യക്ഷൻമാരായ ഗീതാമണി, ഉമാദേവി കുഴിപ്പള്ളി, , എൻ.പി. അഹമ്മദ്, ആസൂത്രസമിതി ഉപാദ്ധ്യക്ഷന്‍ വിഎസ് രജ്ഞിത്ത്, മങ്ങാട്ട് അബ്ദുറസാക്ക്, കെ എം അപ്പുകുഞ്ഞന്‍, കെ പി രാജഷേഖരന്‍, ഇ എന്‍ പ്രേമനാഥന്‍, കെ ഉസ്മാന്‍, കെ പി ചന്ദ്രന്‍ എന്നിവര്‍ സംസാരിച്ചു. സെക്രട്ടറി വിനോദ് കുമാര്‍ ടി എം നന്ദി പറഞ്ഞു.

ഭരണസമിതി അംഗങ്ങൾ, നിര്‍വ്വഹണ ഉദ്ദ്യോഗസ്ഥര്‍, രാഷ്ട്രീയ പാർട്ടി പ്രതിനിധികൾ, സാമൂഹിക പ്രവർത്തകർ തുടങ്ങിയവർ സെമിനാറിൽ സജീവമായി പങ്കെടുത്തു. നാടിന്റെ വികസനരേഖ കൃത്യമായി ആസൂത്രണം ചെയ്ത സംതൃപ്തിയോടെയാണ് സെമിനാർ സമാപിച്ചത്.
✳✳✳✳✳✳✳✳✳✳


👇👇Follow Us On. 👇👇

WhatsApp https://chat.whatsapp.com/BQ8ngikC3Kl0nEihcGdkpm

Facebook https://www.facebook.com/MavoorGramaPanchayath

10/02/2026

📢📢📢📢📢📢
*മാവൂരിൽ കാരുണ്യത്തിന്റെ തണൽവിരിച്ച് 'ഒപ്പം' പാലിയേറ്റീവ് കുടുംബസംഗമം; ഒത്തുചേരൽ സ്നേഹനിർഭരമായി*
മാവൂർ: രോഗക്കിടക്കയിൽ കഴിയുന്നവർക്കും അവർക്ക് തുണയായി നിൽക്കുന്ന കുടുംബങ്ങൾക്കും സാന്ത്വനമേകി മാവൂർ ഗ്രാമപഞ്ചായത്ത് എം.സി.എച്ച് യൂണിറ്റ് ചെറുപ്പയുടെ നേതൃത്വത്തിൽ 'ഒപ്പം' പാലിയേറ്റീവ് കുടുംബസംഗമം സംഘടിപ്പിച്ചു. മാവൂർ കൺവെൻഷൻ സെന്ററിൽ നടന്ന പരിപാടി സ്നേഹത്തിന്റെയും ഐക്യദാർഢ്യത്തിന്റെയും വേറിട്ട വേദിയായി മാറി.
ഗ്രാമപഞ്ചായത്ത് പ്രസിഡന്റ് ശ്രീമതി സി. മുനീറത്ത് ടീച്ചർ സംഗമം ഉദ്ഘാടനം ചെയ്തു. പാലിയേറ്റീവ് രോഗികൾക്ക് വൈദ്യസഹായത്തോടൊപ്പം തന്നെ സമൂഹത്തിന്റെ കരുതലും പരിഗണനയും അനിവാര്യമാണെന്ന് അവർ പറഞ്ഞു. "പരിചരണം അയൽപക്ക കൂട്ടായ്മകളിലൂടെ" എന്ന സന്ദേശം പ്രാവർത്തികമാക്കാൻ ഓരോ വാർഡിലും വിപുലമായ പ്രവർത്തനങ്ങളാണ് പഞ്ചായത്ത് ആസൂത്രണം ചെയ്യുന്നതെന്നും അവർ കൂട്ടിച്ചേർത്തു.
ഗ്രാമപഞ്ചായത്ത് വൈസ് പ്രസിഡന്റ് ശ്രീ സി.പി. കൃഷ്ണൻ ചടങ്ങിൽ അധ്യക്ഷത വഹിച്ചു. രോഗാവസ്ഥ മൂലം വീടിനുള്ളിൽ ഒതുങ്ങിപ്പോയവർക്ക് പുറംലോകവുമായി സംവദിക്കാനും സന്തോഷം പങ്കിടാനുമുള്ള അവസരമാണ് ഇതിലൂടെ ഒരുക്കിയതെന്ന് അദ്ദേഹം പറഞ്ഞു.
സംഗമത്തിൽ മുഖ്യാതിഥികളായി എത്തിയ സോഷ്യൽ മീഡിയ ഇൻഫ്ലുവൻസർ റസീന ഫറോക്ക്, കലാകാരൻ കലാഭവൻ ഷമൽ എന്നിവർ തങ്ങളുടെ സാന്നിധ്യം കൊണ്ട് പരിപാടിയെ കൂടുതൽ ഊർജ്ജസ്വലമാക്കി. ഷമലിന്റെ നേതൃത്വത്തിൽ നടന്ന കലാപരിപാടികൾ പങ്കെടുത്തവർക്ക് വലിയ ആവേശമായി.
ജില്ലാ പഞ്ചായത്ത് സ്ഥിരം സമിതി അദ്ധ്യക്ഷ ബല്‍ക്കീസ് ടീച്ചര്‍, ഗ്രാമപഞ്ചായത്ത് സ്ഥിരം സമിതി അധ്യക്ഷന്മാരായ ഉമാദേവി കുഴിപ്പള്ളി, ഗീതാമണി, എൻ.പി. അഹമ്മദ്, ഡോ ബിന്ദു, ഡോ. സ്മിത, ബ്ലോക്ക് മെമ്പര്‍മാരായ വളപ്പില്‍ റസാക്ക്, ഉമ്മര്‍ തൊണ്ടിയേരി എന്നിവര്‍ സംസാരിച്ചു.
വിവിധ വാര്‍ഡ് മെമ്പര്‍മാര്‍, പാലിയേറ്റീവ് മേഖലയിൽ പ്രവർത്തിക്കുന്ന സന്നദ്ധ പ്രവർത്തകർ, ആശാ വർക്കർമാർ തുടങ്ങിയവർ ചടങ്ങിൽ സംബന്ധിച്ചു. കുടുംബാംഗങ്ങൾക്കായി വിവിധ മാനസിക ഉല്ലാസ പരിപാടികളും ഭക്ഷണവും ക്രമീകരിച്ചിരുന്നു. രോഗത്തിന്റെ വേദനകൾ മറന്ന് പുഞ്ചിരിയോടെ മടങ്ങിയ ഓരോരുത്തരും ഈ ഒത്തുചേരലിന്റെ വിജയത്തിന് സാക്ഷ്യം വഹിച്ചു.

👇👇Follow Us On. 👇👇

WhatsApp https://chat.whatsapp.com/BQ8ngikC3Kl0nEihcGdkpm

Facebook https://www.facebook.com/MavoorGramaPanchayath