10/04/2026
കൊടുവള്ളി അസംബ്ലി നിയോജകമണ്ഡലത്തിൽ മത്സരിച്ച സ്ഥാനാർത്ഥി എന്ന നിലയിൽ ഊഷ്മളമായ അനുഭവമാണ് എനിക്ക് സമ്മാനിച്ചത്. കഴിഞ്ഞ 42 വർഷമായി ഞാൻ പ്രവർത്തിച്ചുവരുന്ന പാർട്ടിക്ക് ലഭിച്ച ഏതെങ്കിലും സീറ്റുകളിൽ എന്നെ പരിഗണിക്കും എന്നായിരുന്നു ഞാൻ കരുതിയിരുന്നത്. അപ്രതീക്ഷിതമായാണ് പിന്നീട് കൊടുവള്ളി നിയോജക മണ്ഡലത്തിൽ മത്സരിക്കാനുള്ള നിയോഗം ലഭിച്ചത്. സ്വന്തം നാട്ടിൽ മത്സരിക്കാൻ അവസരം ലഭിക്കുക എന്നത് ഏതൊരു പൊതുപ്രവർത്തകനെ സംബന്ധിച്ചിടത്തോളവും അഭിമാനകരമാണ്.
കഴിഞ്ഞ ത്രിതല പഞ്ചായത്ത് തിരഞ്ഞെടുപ്പിൽ 25000 ൽ ഏറെ വോട്ടിന് യുഡിഎഫ് മുന്നിട്ട് നിൽക്കുന്ന ഒരു നിയോജകമണ്ഡലത്തിലാണ് ആത്മവിശ്വാസത്തോടെ ഞാൻ മത്സരിച്ചത്.
ഇടതുപക്ഷ ജനാധിപത്യമുന്നണിയുടെ കർമ്മ ധീരരായ പ്രവർത്തകരും പൊതുജനങ്ങളും വിവിധ സാമൂഹ്യ സാംസ്കാരിക സംഘടനകളും എൻറെ ബന്ധുമിത്രാദികളും സഹപ്രവർത്തകരും ശിഷ്യന്മാരും എല്ലാവരും കൈകോർത്ത് പിടിച്ച് എൻറെ വിജയത്തിനായി കഠിനപ്രയത്നം നടത്തിയിട്ടുണ്ട്. മെയ് നാലിന് റിസൾട്ട് വരുമ്പോൾ അവരുടെയൊക്കെ പ്രവർത്തനത്തിന് ഫലം ഉണ്ടാകുമെന്നാണ് ഞാൻ വിശ്വസിക്കുന്നത്.
എൻറെ തെരഞ്ഞെടുപ്പ് പ്രവർത്തനത്തിന് വലിയ സാമ്പത്തിക ഞെരുക്കം അനുഭവപ്പെട്ടിട്ടും അതൊന്നും എന്നെ അറിയിക്കാതെ മുന്നോട്ടു കൊണ്ടുപോയ തെരഞ്ഞെടുപ്പ് കമ്മിറ്റി ഭാരവാഹികളോട് പ്രത്യേകം നന്ദി അറിയിക്കുന്നു. എൻറെ വിജയത്തിനായി പ്രവർത്തിച്ച എല്ലാവരോടും ഹൃദയത്തിന്റെ അടിത്തട്ടിൽ നിന്ന് ഒരിക്കൽ കൂടെ നന്ദി അറിയിക്കുന്നു.
