06/06/2026
सावित्रीबाई फुले पुणे विद्यापीठाचा अपमान करणाऱ्या उच्च शिक्षण मंत्री चंद्रकांत पाटील यांचा विद्यापीठाचा पीएच.डी. संशोधक विद्यार्थी म्हणून आणि युवक काँग्रेसकडून तीव्र निषेध
महाराष्ट्राचे उच्च व तंत्रशिक्षण मंत्री चंद्रकांत पाटील यांनी "सावित्रीबाई फुले पुणे विद्यापीठाने समाजासाठी काय भरीव संशोधन केले?" असा सवाल उपस्थित करून महाराष्ट्राच्या शैक्षणिक परंपरेचा आणि लाखो विद्यार्थ्यांच्या भावनांचा अवमान केला आहे. मी युवक काँग्रेस काँग्रेसच्या आणि पीएचडी संशोधक विद्यार्थी म्हणून त्यांच्या या वक्तव्याचा तीव्र शब्दांत निषेध करते.
देशातील नामांकित विद्यापीठांमध्ये गणना होणारे सावित्रीबाई फुले पुणे विद्यापीठ हे केवळ शैक्षणिक संस्था नसून महाराष्ट्राच्या वैचारिक, वैज्ञानिक आणि सामाजिक प्रगतीचे केंद्र राहिले आहे. या विद्यापीठाने हजारो संशोधक, वैज्ञानिक, प्रशासकीय अधिकारी, उद्योजक आणि सामाजिक नेतृत्व घडवले आहे. राष्ट्रीय आणि आंतरराष्ट्रीय स्तरावर मान्यता प्राप्त संशोधन या विद्यापीठातून सातत्याने होत आहे.
विशेष बाब म्हणजे, राज्य सरकारच्या अखत्यारीतील विद्यापीठाबाबत अशी अवमानकारक भाषा वापरण्याचे धाडस राज्याच्या उच्च शिक्षण मंत्र्यांनी एका खाजगी विद्यापीठाच्या व्यासपीठावरून केले. हे सार्वजनिक शिक्षण व्यवस्थेला कमकुवत करून खाजगीकरणाला प्रोत्साहन देण्याचे संकेत आहेत का, असा प्रश्न आता राज्यातील विद्यार्थी, शिक्षक आणि पालक विचारत आहेत.
आज राज्यातील विद्यापीठांना निधीची कमतरता, रिक्त शिक्षक पदे, संशोधनासाठी अपुरा आर्थिक पाठिंबा आणि विद्यार्थ्यांच्या विविध समस्या भेडसावत आहेत. या प्रश्नांवर उत्तर देण्याऐवजी स्वतःच्या अखत्यारीतील विद्यापीठांची बदनामी करणे हे मंत्रीपदाच्या जबाबदारीला न शोभणारे आहे.
युवक काँग्रेसची मागणी आहे की, चंद्रकांत पाटील यांनी आपल्या वक्तव्याबद्दल तात्काळ स्पष्टीकरण द्यावे आणि सावित्रीबाई फुले पुणे विद्यापीठाचे विद्यार्थी, संशोधक, प्राध्यापक आणि माजी विद्यार्थ्यांची जाहीर माफी मागावी. सार्वजनिक शिक्षण संस्थांचा अपमान सहन केला जाणार नाही. सावित्रीबाई फुले पुणे विद्यापीठाचा गौरव हा महाराष्ट्राचा गौरव आहे.
