ZPM Southern Headquarters, Lunglei, Venglai, Lunglei (2026)

03/09/2026

NEWS ITEM

Vawiin khan Pu T. Lalhlimpuia, Lunglei West bialtu MLA chuan Christian Education Center (CEC) Teachers’ Day an lawmna chu Khuallian ni in a hmanpui

Christian Education Centre Teachers’ Day 2026 Celebration hi UPC Conference Hall, Chanmari, Lungleiah hlung taka hman a ni a. Zai leh lam, hnam lam te entirna te neiin, zirlai naupang ten an zirtirtute chawimawina hun an nei a ni.

PC. Zothanzuala Teacher CEC inkhawm kaihhruaina hnuaiah hian Pu T. Lalhlimpuia MLA chuan, dawhtheihna leh hmangaihna nena zirlai naupangte zirna pek hi thil tangkai ber pakhat a ni a, kan hnam rohlu zirlai naupang enkawl kawngah nun uluk tak leh Pathian tihna kan neih a tul hle a. Zirtirtute hi chu sum tam tak kawla, hausa tura duan kan ni lo nachungin kan thinlunga awm thatna leh kan thiamna te hi mi hausa kan nih tilangtu a ni a ti bawk.

Pu Mahlima chuan, Zirlaite tihmakmawh chu thiamna min petu kan Zirtirtute zah leh chawimawi hi a ni a ti a. CEC naupang ten an Zirtirtute an chawimawi dan chu thil hlu tak a ni ti in chhunzawm zel tlak a tih thu a sawi a. Pathian tih hi finna bul a ni a, ruihhlo laka fihlim chunga zirna hi kan beih tauh tauh a tul a ni a ti bawk.

Kan ram damna kengtu turte innih avangin taihmakna kawngah inthlahdah lova, nuam ti taka lehkha zir hi a tha hle ani tiin Pu Mahlima MLA chuan, mahni tan theuh zir inni mai lo chhungkua, ram leh hnam tan pur inchaw mek ani tih hre nawn fo ula, Insum theihna nei tlat chungin nasa zawka lehkha inzir zel a tul. A thiam ber an din chang hran lo a taima leh teirei peih apiangte hian hlawhtlinna par mawi tak an chang thin a ni a ti bawk.

Vawiin hun hmannaah hian Pu T. Lalhlimpuia MLA chuan CEC school te tan hian Table Tennis Board chu a pe bawk a ni.

CEC Teachers’ Day 2026 Celebration hi District Official, UPC Lunglei District thenkhat te pawhin an tawiawm a ni.

03/09/2026

CARDIOLOGY CAMP

Lung ṭha lo zai ngai te tan thu lawmawm

Health Minister, Pi Lalrinpuii hmalakna in -
Sri Ramachandra Institute of Higher Education & Research leh Mizoram Sorkar ṭangkawp chuan, Golden Card hmangtute tan, a thlawnin Lung Zai ngai damlo te tana inentirna, Zoram Medical College & Hospital-ah buatsaih a ni dawn a, he Camp aṭanga zai ngai hmuhchhuah te chu a thlawn in phaiah zai an ni ang.

Camp neih hun: 18th & 19th September, 2026
Registration tih hun: 14th - 19th September, 2026. 10:00AM - 2:00PM
Registration tihna hmun: OPD Counter, ZMC&H.
Golden Card ken ngei ngei tur a ni.

31/08/2026

*ZORAM PEOPLE’S MOVEMENT(ZPM)*
_Southern Hqrs : Lunglei – 796701._

*PRESS RELEASE NO 90 OF 2024-2026.*

*INTHLAN LEH HUN THLIR A TLIN DUHNA AVANG ATHIL DIKLO TAK TIH HI KAN RILRU ANI LOVA, HETIANG VANG A KA TLING NAWN TAWHLO ANIH PAWHIN PAWI KA TILO*
-Lalramliana Papuia MLA
Lunglei South.

31st.Aug.2026 ( Thawhtanni) : Vawiin chawhma dar 11:00am khan ZPM Southern Hqrs., Lunglei chuan an Party Office Venglai, Lunglei-ah Chhung Inkhawm leh Political Session hun an hmang a,Pu.Vanlalchhawna President, ZPM Unit, Electric Veng, Lunglei chuan kaihruaiin, Hunserh Pu TC Lalchhandama Adviser, ZPM Southern Hqrs, Lunglei chuan a hmang a, Political Session hunah Pu Lalramliana Papuia MLA, 33-Lunglei South Constituency chuan thu a sawi.

Pu Lalramliana Papuia MLA, Lunglei South chuan thusawiin, tunhnaia Mizoram State Legislative Assembly Session hlawhtling taka neih a ni chu lawmawm tih thu sawiin, kan Chief Minister Pu Lalduhoma leh a thawhpui, kan hotuten chunglam Pathian hruaina an chang nia a hriat thu leh kan Sorkar leh kan Party min do a min beitute lakah Pathianin Dawhkan min buatsaih sak nia a hriat thu leh kha Session khan kan Sorkar nihna leh dinhmun bakah ZPM Party nihphung chiang taka a tarlan thu sawiin, Session neih zawh tak kha a hlawhtling tha hle a ni a ti a, kan Speaker Pu Lalbiakzama pawh Session a kaihhruaina kawngah fakin Pu Lalramliana Papuia MLA chuan lai takin Session a kaihruaia, keini ZPM lam MLA tan phei chuan min tan lo deuh emaw ni tih theih hial a ni a, mahse chutiang nilovin ram rorelna khawlah ram leh hnam tana rilru a pekna leh Session a kaihhruai dan chu fak phu anih thu a sawi bawk.

Pu Papuia MLA chuan hmasawnna nasa tak Sorkarin a kalpui mek a, k*m hnih chuang kan Sorkar mekah hian Party mipui lam hi kan in en let ve a pawimawh a, kan tihloh tur kan tihna thinah mimal kan intichhe thei, ram rawngbawlna hna thawhna kawngah hian ram hruaitute leh hruaitute hian thil tha zawng zawng kan ti seng lova, Party anga kan chhiat theihna fo-ah hian kan tihloh tur thil te laka kan fihlim ngam a pawimawh a ni tiin, kan hotuten intiamna an neih angin kan eiru lovang an ti a, heng thil te avang hian mipuite min beiseina leh min thlanna pawh a ni a, heng bakah hian thil dang dang pawh min ngaihzawnna tam tak awmin, chung avang chuan tun dinhmunah hian hlankai kan ni a, thil tha tin reng hi kan ti seng dawn lo, chutih lai chuan kan tihloh tur hi kan thliar thiam a tul a ni Lunglei South Bialtu MLA chuan a ti.

He kan Sorkar ah hian Kuthnathawktute hamthatna, Healthcare ah leh Sorkar hnalak thlengin dik tak leh felfai takin mipuite tan hmalak a ni a,Sorkar hnathawk hlawh a hun taka lak a nih theihna tur te Pension hlawh leh thil hrang hranga Sorkar hmalaknate hi a lawmawm a, mipuite pawh an lawm thawkhat hle Pu Papuia MLA chuan tiin, kan Sorkarah hian MLA te leh Party hruaitute pawh kan inenfiah zel a tul a, Lunglei a kan MLA te lakah hian Lunglei mipuite an thikthu a chhia a, Lunglei Pa ni turin min duh. Aizawla inbenbel tum te lakah pawh an rilru a chiang thin. He min beiseina anga Lunglei Pa ni tura tan kan lak zel a tul a ni ti in, inthlan leh hun thlir a tlin duhna avang athil diklo tak tih hi kan rilru ani lova, hetiang vang a ka tling nawn tawhlo anih pawhin pawi atilo tih sawiin, Pathian pawm tlak hi a pawimawh in, dikna hi kan ngaih pawimawh zel a tul zawk a ni a ti bawk.

Pu Papuia MLA, Lunglei South Bialtu chuan lawmna thinlung neih hi Pathian rilrem zawng a nih avangin Sorkar leh Party hruaitute lakah Party workers te kan lawm thiam zel a pawimawh a, mahni hma chauh leh mahni tanghma chauh ngaihtuah lova, ram leh mipui thlir a rilru kan siam a pawimawh a kan hotute-ah hian mahni tanghma ai a ram economy leh hmasawnna tur vei hi kan awm a, kan Policy Matter leh ram hmakhua veitu kan nei te hi a hlu a, a lawmawm hle a ni a ti bawk.

ZPM Party inrelbawlna chungchang sawiin Pu Papuia MLA chuan, kan Party hmangaihtute hi midang nilovin kan hotute leh keimahni hi kan ni a, ZPM Gen Hqrs hruaitu inthlan chungchangah tute emaw min duhsak tak tak lotu leh min beitu zawk ten thu hla tam tak neiin Social Media lamah te hmuh tur a awm a, kan Party kal dan turah hian kan Party hmangaihtu ber kan hotuten an ngaihtuah a, vawiin a kan hotu sang leh Committee sang te rel leh ngaihtuahna hi kan inlungrualna a ni a, kan kal dan tur chu kan Party hmakhua ngaituten an rel fel mai thin a ti.

Lunglei South Bialtu MLA chuan ZPM Southern Hqrs, Lungleiah pawh kan thawhhona tha leh inlungrualna hi kan chakna a ni a, hei hi kalpui zel ila,tlinlohna lai nei thei theuh kan nihnaah zawldawhna nen insiam thatna tur kawng zawng tlanga hmala zel turin Party mipuite a sawm nghal a ni.

ZPM Southern Hqrs Lunglei Chhung Inkhawm leh Political Session hun hmanah hian Lunglei West Bailtu MLA Pu T Lalhlimpuia pawhin Power Supply chungchanga harsatna tawh meka hmalakna thenkhat te sawiin, ATL Road siam meka hmalakna bakah a bial chhung Buarpuiah Lunglei West Block-I & II Joint Conference ni 25th.September.2026 a neih turah Party Worker te tel turin a sawm bawk. Tin, Pu Lalduhawma President, ZPM Southern Hqrs, Lunglei pawhin ZPM Gen Hqrs Executive Committee Aizawla neih thu report a pe bawk.

*Kalphung thar, Mipui sorkar.*

*No. ZPM-02/ZPM/SL/MEDIA/2024-26/90*

Sd/-
(C. LALRAMROPUIA)
Secretary
Media, Information & Publicity.
ZPM Southern Hqrs, Lunglei.
Dated Lunglei : 31st Aug 2026(Thawhtanni).

24/08/2026

ZORAM PEOPLE’S MOVEMENT (ZPM)
Southern Hqrs : Lunglei – 796701. Mizoram.

Issue no 106 of 24-26.

24th. Aug. 2026 (Monday) : Vawiin khan ZPM Southern Hqrs. Lunglei Chhung inkhawm neih a ni a. Chhung inkhawm hi Pu K. Lalhmangaihzauva , LC Member, Lunglawn in a kaihruai a. Lunglei South Block – I Treasurer Rbt. P. Lalhriatrenga’n Hunserh a hmang . Lunglei Municipal Ward No - II Councillor Pi Lalmuanpuii’n Political Session hunah thu a sawi bawk.

Political Session- a thusawitu Pi Lalmuanpuii chuan, ZPM hi kan chakna leh theihna te, thiamna leh finna avanga sawrkar kan ni lo a, Pathian hun ruatah ram rawngbawltu ni turin amahin min hung chhuak a ni tih kan hriat nawn fo a tul hle a. Kan thiltih engkimah Pathian rawn chung zela hma kan lak a tha hle a ni, a ti a. Miten min chhiarin min thlir renga kan awmdan Krista Chanchin tha nena inmawi nithei zel se, a duhawm hle a ni , a tibawk.

Pi Lalmuanpuii chuan, a Ward chhung hna thawh dan sawi langin, Ward Committee remruat anga, langtlang taka hnathawh anih thu sawiin, Local Council te, Unit hruaitute leh NGO hrang hrang te Ward Committee-ah awmin, Veng chhung tana thil tangkai leh pawimawh siam ngai leh thawm that ngai, lei ngai ang chi te, Ward Fund lokal ang angin, Kan siamin, kan lei a, a hma-a awm ngai lo Lena Stadium thlengin PHE tui Connection hian a thleng tawh a ni, a tibawk.

Ward No. II Councillor chuan, Vote tam dan a zirin k*m khata grant an dawn thin chu, a inang lo zung a. Keini Ward pawh vote tam zawk te grant dawn ang kan pha meuh lo -a k*m khatah hian nuai 20 kan dawng tling lo a ni a ti a, an sum dawn ang ang te felfai leh thianghlim taka an hman thin avangin, Khawtlang mipui ten ward fund lokal te an tangkai pui hle a ni , a tibawk.

Party Chhung inkhawmna-ah hian Southern Hqrs. President Pu Lalduhawma pawhin thu a sawi a. Party inlungrual leh thawkho tha tak mai kan ni thei zel hi a lawmawm em em a, in hruaitute hi a fing ber leh fel ber ni lo mah ila, Party mipui te leh kan hotute thurawn kan la ve reng a, inmi thawhhopuina leh duhsakna kan chan zawng zawngah kan lawm em em a, Kan CM pawhin Southern Hqrs. hi ka hahdamna inni a tihial a ni, a ti a. Party mipui te hotute zahngai thiam tak chunga thawkho zel turin a sawm a, thurawn engtiklai pawhin an dawng thei reng a, thawhhona tha nei chhunzawm zel turin, i insangmar zel ang u, a tibawk a ni.

Kalphung thar, Mipui Sorkar.

Issued by :
Media, Information & Publicity
ZPM Southern Hqrs. Lunglei
Issue No. 106 of 24-26.
Dated Lunglei : the 24th. Aug 2026 (Thawhtanni).

22/08/2026

Pu K.Lalrinawma LMC Vice Chairman in Mualthuam N H. Ramdinpuii chu ralna hun a hmang.

Pu Awmtea’n ralna hun a hmanna ah hian thusawiin Dindini nu leh pa chhungte tawrhna chu Lunglei mipui leh Mizoram mipui ten an tawrhpui takzet tih a sawi a, Pu Opa te chhungin an chunga thil thleng chungchanga an nunphung lantir dan chu ropui a tih thu leh Mualthuam N mipuite thil tha chhuak tura an insumna chu khawdang leh veng dangte entawn tlak a ni a ti.

He chhiat tawhna hi sorkar a hriat tirh atanga theihtawp chhuahin a buaipui nghala, Mizoram Police te chet dan chu a smart takzet a, Lunglei SP leh a team te fak tlak an ni a ti.

Pu Awmtea chuan hetiang thil thleng duhawm lo tak a thlen changin thil tha zawk chhuak tur ni si lova, haw haw leh in rikrapna lam zawnga chetna a thleng thin chutih rualin Mualthuam N mipui ten boruak tha tak an lan tluan tir tih a sawia, social media lama demna lo chhuak chu a taka hrechiangtu ten an khaw entawn tlakna an hmu tih a sawi bawk.

He chhiat tawh chungchanga Mualthuam N khawtlang fakawm a tih rualin Sub Hqrs. YMA Lunglei leh MHIP Sub.Hqrs Lunglei te chet lak dan pawh a mawiin a tha takzet a ti bawk.

He hunah hian Rev. R.Zohmingliana’n tawngtaina leh fuihna thu sawiin Mualthuam VC, NGO hruaitute leh khawtlang nu leh pa an tel a ni.

21/08/2026

Dated 21 Aug 2026:
Ward IV Councillor Pu R. Lalramzauva chuan Venghluna School hrang hrang te tlawhin, Zirtirtute nen inkawmhona an nei a, thawhhona tha neih hlutzia leh Staff te nena an lo sawiho tawhna atanga hmalakna tur sawiin hun an hmang.

Gov't Middle School hian Oct Ni 18-a Golden Jubilee an hman tur pualin school bang Cement plastering leh water cooler te an mamawh thu an lo thlen tawh a, councillor chuan jubille hmaa tihpuitlin anih tur thu a hrilh a ni.

Gov't M/S staff te hian a tul anga mahni sum senga an lo thawhkhawm thin dan te Councillor hi lo hrilh in, hna vanga mahni inchan ngamna hmun dangah hetiang thawhhona an la neih zen zen loh thu an sawi a, puih an ngaihnaah tlanchhe lova thawhhona tha nei zel turin an sawm a ni.

Smart class neihna tur IEC Set up an dawn vanga an lawmthu sawiin, a hman dan tur chungchangah erawh harsatna an la neih vangin, a tul ang te Councillor chuan bawhzui sak a tum a ni.

Govt Primary school Venghlun chu Councillor hian tlawh bawkin, zirtirtute thahnemngaihna avangin naupang an nei tha hle a, zirna piah lamah co-curricular activities tha tak a neihpuiin, puantah,hnangtah leh k*t themthiamna chi hrang hrang te zirtir an ni bawk.

Councillor hianVenghlun High School chu tlawh bawkin, thuamthat a ngaihna lai te thlir ho a ni a, school bul leimin, school kawt tual diak leh varandah nal lutuk te thuamthat chu hna hmasa a neih a ngaih thu a sawi a ni.

Ward Councillor hi Southern Hqrs. thalai leh Venghlun Unit te chuan an tawiawm a ni.

21/08/2026

ZORAM PEOPLE’S MOVEMENT (ZPM)
Southern Hqrs : Lunglei – 796701. Mizoram.

Issue no 105 of 24-26.

ZPM SOUTHERN HQRS LUNGLEIIN MIZORAM CHHUNG HMUN 12 A LOCAL COUNCIL LEH VC BY-ELECTION NEIH A HMUN 8 A HNEHNA AN CHANAH LAWMTHU A SAWI

21st.Aug.2026 ( Friday) : Vawiin chawhma dar 11:00 khan ZPM Southern Hqrs Lunglei chuan an Party Office ah tunhnaia Mizoram chhunga Local Council by-election leh VC by-election Seat 12 neih zawh taka hnehna changa seat 8 lai mai an la chu Pathian hnenah lawmthu sawina hun an hmang a, he lawmthu sawina Inkhawm hi Pu C Fakzuala Senior Vice President ZPM Southern Hqrs Lunglei chuan a kaihruai a, lawmthu sawina tawngtai Pu TC Lalchhandama Adviser, ZPM Southern Hqrs Lunglei chuan a hmang bawk. Pathian hnen a Lawmthu sawina Inkhawm hi Pu C. Lalnunnema Vice President, ZPM General Hqrs, Aizawl chuan hmanpuiin, Party hruaitute leh Worker te bakah LMC a Councillor engemawzat he hun hmanah hian an tel a ni.

Pu Lalduhawma President, ZPM Southern Hqrs Lunglei chuan thusawiin, Local Council leh VC by-election neih zawh taka Pathian hruaina leh a malsawmna changa vanneihna an chang chu lawmawm a tih thu leh he hnehna an chanah hian inthlanna neihna hmuna mipui ten an Party official candidate an vote tlinnaah lawmthu a sawi a, Party worker te inpekna chu chhuanawm a tih thu sawiin, lawmthu a sawi bawk.

He hun hmanpuitu, Pu C Lalnunnema Vice President, ZPM General Hqrs, Aizawl chuan thusawiin, ZPM Southern Hqrs Lungleia thawhhona tha tak a awm chu lawmawm a tih thu leh kan Party hi pawn lam atanga min beitu ten tihchhiat tumin hma an la thin mahse Pathian hruaina kan chang zel a ni a ti a, Aizawl leh Lunglei a Local Council by-election leh VC by-election neih zawh taka hmun 8 lai maia chakna an chang thei chu Pathian malsawmna leh Party worker te thawhhona tha tak rahchhuah a ni a ti.

Pu Nemte-a chuan he by-election neih zawh takah hian Thorang bial chhung Bunghmun leh Lunglei North bial chhung Zotlang, Lunglei a ZPM Party official candidate ten hnehna an chan chungchangah pawh heng khua leh veng chhung mipuite k*tthlakna leh kan Party worker te thawhrimnaah lawmthu a sawi a, Politics ah hian inthlan chu a pawimawh ber lai a ni a, vawiinah hian hlawhtlinna chang thei a kan awm hi Pathian hruaina kan chan vang a ni a ti.

Pathianin ram rorelna vuan turin Mizoramah Pu Lalduhoma kaihhruai ZPM Party Sorkar min pe a, ‘Mipui Sorkar din chu kan Policy a nih angin theih tawpin kan Chief Minister leh Minister te bakah kan MLA ten hma an la a, Pathian hruaina kan chang a k*m 2 leh thla 9 vel kan Sorkarah hian ram rorelnaah Pathian ram tundin mek a niin kan hotuten theih tawpin hna an thawk zel a, kan hotute tha tichak turin kan Party worker leh ram mipuiten ke i pen zel ang u, tiin a sawm bawk.

Pu Nemtea Vice President, ZPM General Hqrs chuan Chhungkuaah ngaihdan in an loh chang a awm thin angin ram kaihhruaina kawngah pawh Party chhungkua leh roreltuteah ngaihdan inpersan a awm thin a, chu chu thahnemngaihna a ni fo thin a, hei hi roreltute leh kan Party ah pawh awm ve thin a ni a, mahse hei hian chhiatphahna leh inlungrual lohna min thlen lova, ‘Kalphung thar, Mipui Sorkar’ a kal zel theih nana hma min lak thar tirtuah kan Chief Minister leh kan hotuten an hmang a, kan thil tumah hian kan hotute an chiang a ni a ti.

Policy kan duan angin kan hotuten hma an la zel tih Pu Nemte-a chuan sawiin, ram sum leh pai dinhmun siam tha turin sum awm ang ang te dik tak leh tha takin kan hotuten an hmang a, system mumal tak nen hna an thawk a ni a ti. Lunglei hmasawnna tur atan kan Sorkar hotuten theih tawp an chhuah zel thu leh tunah pawh Lunglei By-Pass Road tur kan Chief Minister hmalakna atangin ruahman mek a ni a, tute pawhin hmasawnna chu an ta anih theih nan Sorkarin Mizoramah hma ala mek zel a, ruahmanna thar pawh a siam zel bawk. Kan Policy ah tihhlawhtlin tam tak kan nei tawh a, kan ram tan theih tawp chhuah zel a ni Pu Nemte-a chuan a ti.

Mizoramin inthlanpui kan hmachhawn leh turah ZPM Party chuan Sorkarna chelh thei leh turin hma ala a, k*m 20 tal a chhe berah kan ram siam that nan kan Sorkar a tul a,hemi atan hian mipuite thawhpuiah sawmin ZPM Worker te pawh theih tawp chhuah zel turin a chah bawk.

Politics khelh dan thianghlim hi ZPM Party chuan kan hmanruaah i hmang zel ang u, Pu Nemte-a chuan tiin, thil tha dang tih tum belh zelin, inpumkhatna leh thawhhona tha nen ke i pen zel ang u, tiin, Politics khelh dan thianghlim chu kan innghahna atan i hmang zel ila, kan Sakhaw Puithiam ten thu min fah thin a, hei hian kan Party kal dan leh nihphung te insiam thatna atan kan hman zel a tul a ni, ati bawk. Ram rorelnaah Pathian ram tung ding a, ram hluizia tha lo kalsanin kan lawmna chu Pathianah nise, Pathianah lawmthu sawi zelin ram kaihhruaina kawngah ke i pen zel ang tiin Pu C Lalnunnema Vice President, ZPM General Hqrs Aizawl chuan kalkhawm te leh mipuite a sawm a ni.

He lawmthusawina Inkhawmah hian Local Council leh VC by-election a hnehna chan lawmna atan thingpui leh a hmeh ruai kalkhawm ten an kilho ngha a ni a, Pi Lalhruaitluangi Executive Councillor LMC bakah LC Zotlang a ṭang a tling thar Pu Lalrampana te chuan lawmthu sawina an nei bawk a ni.

Kalphung thar, Mipui Sorkar.

Issued by :
Media, Information & Publicity
ZPM Southern Hqrs. Lunglei
Issue No. 105 of 24-26.
Dated Lunglei : the 21st. Aug 2026 (Ningani).

19/08/2026

Chief Minister hnenah Impact Study Committee on KMMTTP and Railway Link between Bairabi and Sairang ten Final Draft Report an thehlut
1856/2026-2027

Dated Aizawl, the 19th August, 2026: Vawiin khan Impact Study Committee on KMMTTP and Railway Link between Bairabi and Sairang-te chuan Chief Minister Pu Lalduhoma hnenah an zir thil chianna Final Draft Report an thehlut.

Chief Minister hian Impact Study Committee-te chu lawmthu lo hrilhin, thla 12 chhunga report thehlut tura tih in nih laiin thla 10-ah in rawn inpeih thei a. In thawkrim tih a chiang hlein ka hria. Bawhzui ngaite sorkarin a bawhzuina kawngah study team-te thawhpuina hi kan mamawh zui zel dawn a ni, tiin lawmthu a lo hrilh a, sorkar an thawhpui zel a tul thu a hrilh.

An report tlangpui (Situational Analysis and Field Study) sawihona an nei zui a. Mizoram leh Myanmar border-a insumdawn tawnna kal dan leh kal zel dan tur nia lang te, Mizoram sawrkarin a lo hlawkpui ve theih nana dan anga chhiah lak dan kalpui dan turte leh Mizoram tharchhuah ram danga hlawk zawka thawn chhuah dan turte an sawi a. Tunah pawh hian Mizorama sumdawngte leh lirtheia eizawng (logistic service) ten an hlawkpui hle a, Mizo sumdawngte hian Zakhai Tawng emaw Kawl tawng an hman theih phei chuan tun aiin an hlawkpui lehzual ngei ang, an ti. Khawtlang himna leh dan zawm kawngah mipuite inzirtir uar a tul hle niin an tarlang bawk. KMMTTP hi k*m 2027-a hawn a nih dawn chuan chak taka hmalakna tur a tam hle niin an ngai a. Tuna Zochachhuah leh Salachhuaha sumdawngten an mamawh an sawi tam ber chu Godown a ni a. Zokhawthar lama mite sawi langsar ber chu Indo - Myanmar - Thailand Corridor tihhlawhtlin a ni, an ti.

Mizoramin Rel service a neih hnua a nghawng (impact) an zirnaah ILP tha taka kenkawh a tul thu an tarlang a. Mizoram chhunga rel kawngin a paltlang khuaten hlawk zawka rel an chhawr theih nan rel station tinte approach road tha neih a tul an ti bawk. Sairang leh Aizawl inkar Taxi chuan man to lutuk avanga mi tam takin rel an chhawr tangkai tawk loh thu pawh an sawi a ni.

Study Committee-te hian Arunachal Pradesh, Nagaland leh West Bengal te an tlawh a. Nagaland an kalnaah phei chuan thla rei lote relin Mizoram a tlawh hnua Impact Study Team Mizoram sorkarin din nachang a hria chu entawntlak an tih thu an lo hrilh a ni.

Study Committee hi an Chairman Pu T. Lalhlimpuia, MLA chuan a ho va, Pu Zomuana, Member Secretary leh member dangte an tel a. An report kimchang hi a buin an siam a, an zirchianna tinah rawtna an siam zel a, a taka bawhzui kawngah pawh sorkar an thawhpui zui zel dawn a ni.

19/08/2026

*ZORAM PEOPLE’S MOVEMENT (ZPM)*
_Southern Hqrs : Lunglei – 796701. Mizoram._

*Issue no 104 of 24-26.*

*ZPM ZAWM THAR MI 125 Pu C. LALNUNNEMA'N A LAWMLUT*

*Thiltih nilovin, ka thlarau zawk in le, titu Pathian khawngaihna kan chang zel a ni*
-C. Lalnunnema
Vice President
General Hqrs, ZPM.

Dated Lunglei: the 19th August 2026 (Nilaini) Vawiin hian Pu C. Lalnunnema ZPM General Hqrs. Vice President chuan Thorang bial fan chhunzawm lehin Pu C. Lalnunnema ZPM Vice President chuan Thorang bial khaw 4 atangin ZPM zawm thar mi 91 a lawmlut.

Pu C. Lalnunnema Vice President General Hqrs. Aizawl chuan, Bolia, Zawlpui, Putlungasih leh Belthei te a fang kual a.

Hemi hunah hian Pu Nemtea chuan thusawiin, thangtharte thudik tak hrilhhre thin CM - Pu Lalduhoma kan nei hi kan vannei hle, a ti a. Mizo tlangval huaisen tak tak ram tana martar huam te khan ram zelen kan nih theih nan, an theih nazawng zawng an lo hlan a, chutihlaiin an hruaitu thenkhat ten zalenna an sual tak tak hauh lo tih alang ta mai kha, thangtharte hian kan hre chho zel a ni, a ti a.

Thangthar lo awm leh zel tur te thudik hrilh Ngam CM kan nei hi a lawmawm hle a ni, a tibawk.

Pu Nemtea chuan ZPM sawrkarin kawng a ngai pawimawh hle tih sawiin Zawlpui tlangdung kawng siam mekah pawh a chhawrtu mipui ten, contractor te pawh inlo enpui a, inlo thawhpjui thiam a tul hle a ni, a ti a. Ram hmasawnna thleng tur hian kawngpui tha kan neih a tul, a tibawk.

ZPM Party leh kan CM hi miten lo bei thin mahse, thudik tarlanna hmanrua an lo chhawpchhuak a ni zawk mah a. Thudik tak hre tuten kan CM Pu Lalduhoma zui hi an thlang ta mawlh mawlh mai hi, a lawmawm tak zet a, Thorang bial mipuite kan harh chho zel hi ka lawm em em a, mithar kan ni tawh lo a, ZPM Party mi leh sa kan ni tawh tih kan inhriat nawn fo a tha hle a, inthlahrunna Party inbel a ni lo a, mipui sawrkar dintu Party inbel a ni tih inhriat ka duh hle a ni, a ti bawk.

Chakna ni lovin, Thiltihtheihna ni lovin ka thlarau zawkin le, titu Pathian khawngaihna kan chang chho zel hi a lawmawm em em a ni, a tibawk.

Pu C. Lalnunnema, General Hqrs. Vice President-in, tunkar nithum chhunga Thorang bial a fan kualnaah hian mithar 125 lai a lawmlut a.
MNF atangin 70
Congress atangin 42
BJP atangin 10
Neutral atangin 3.

Zawlpui tlangdung, Thorang bial Pu Nemtea'n a fan kualnaah hian Southern Hqrs. hruaitu thenkhat ten an tawiawm a ni.

*Kalphung thar, Mipui Sorkar.*

Issued by :
Media, Information & Publicity
ZPM Southern Hqrs. Lunglei
Issue No. 104 of 24-26.
Dated Lunglei : the 19th Aug 2026 (Nilaini).

18/08/2026

*ZORAM PEOPLE’S MOVEMENT (ZPM)*
_Southern Hqrs : Lunglei – 796701. Mizoram._

*Issue no 103 of 24-26.*

*ZPM ZAWM THAR MI 34 LAWMLUHNA HUN HMAN A NI.*
*Kalphung thar, mipui sawrkarah, ZPM nih a nuam hle.*
-C. Lalnunnema
Vice President
General Hqrs, ZPM.

Dated Lunglei: the 18th August 2026 (Thawhlehni) Vawiin hian Pu C. Lalnunnema ZPM General Hqrs. Vice President leh Pu V. Malsawmtluanga Vice Chairman HPC/MLA Lunglei North te chuan Thorang bial khaw ṭhenkhat fan chhunzawm lehin Pu C. Lalnunnema ZPM Vice President chuan Thorang bial khaw hnih atangin ZPM zawm thar mi 36 lawmluhna hun a hmang.

Vawiin hian Bunghmunah mithar lawmluhna programme ZPM unit Bunghmun te buatsaih chu hmanpui in, Pu C. Lalnunnema Vice President General Hqrs. Aizawl chuan thu a sawi a, Kalphung thar mipui sawrkarah ZPM nih a nuam hle a ni ti in, Party naupang te ni mah ila, kan sawrkar Pu Lalduhoma kaihhruai-ah hian, system dikin kan kal chho zel a. Party-ah senior han tih em em tur pawh kan la awm hman lo, nitin mi tha tak takin min lo zawm zel a. A neitu chanchangtu anni mai zel a, inpawh tlang takin ram tan ke kan pen ho zel thei hi a hlu-in a lawmawm em em a ni a ti.

Pu Nemte-a chuan, Thorang bial chhul chhuak anih thu sawiin, MLA inthlanah tling zo lo mahse Thorang bial hmasawnna turin a theih ang ang a hma a lak nasat thu a sawi a, Thorang bial hmasawnna tura min duhsaktu kan CM, Minister te leh HPC Vice Chairman te chungah pawh hian ka lawm em em a ni, a ti bawk.

Mithar tha tak tak nei tura Unit thawhrimna fakawm a tih thu Pu Nemtea chuan sawi langin, Bunghmun Village Council By-election naktip maia neih turah pawh kawi kawm thin ang thapa ZPM unit member zawng zawng te ṭangrual a ṭan la theuh turin a sawm a. Rulling tha chakna thuam chaka, khawtlang hmasawnna tur, hna hrang hrang sawi chhuak turin Bunghmun khawtlangah ZPM sawrkar a pian ngei a tul a ni a ti bawk.

Mithar lawmluh inkhawmah hian Pu V. Malsawmtluanga pawhin thusawi in Kan CM, mahni Policy tihlawhtling tura theihtawp chhuah thin kan nei a ni a ti a, ZPM sawrkar hian ZPM Party-ah mi tha tak tak a hip khawm zel chu lawmawm a tih thu sawi in, Bunghmun khawtlang leh Thorang bial hmasawnna tura Pu Nemtea inpekna fakawm a tih thu leh, inthlan leh hunah rulling MLA an neih ngei theih nan, Thorang bial mipui te harhthar zel turin a sawm a. Party Policy, mirethei thleng phak hmasawnna kengtu ZPM Party ah mipuiin rinna an nghat lian chho zel a. A ni telin kan pung mek zel a ni a ti bawk.

Pu Msta Vice Chairman HPC chuan, sawrkar ngheng thiam khua an vannei zel thin tih sawi langin, VC by-election lo awm turah pawh ZPM party mipui te theihtawp chhuaha tan la turin a fuih bawk a ni.

Pu C. Lalnunnema Vice President ZPM General Hqrs. Aizawl in Thorang bial khaw 2 atanga mithar a lawmluh te hi

Changpui-ah, MNF - 5, neutral 3
Bunghmun-ah, MNF - 18, Congress - 8
An vaiin mi 34 a lawmlut a ni.

Bunghmuna lawmluh inkhawmah hian Thorang bial block IV president Pu B. Laldawngliana'n inkhawm hi a kaihruai a, Unit President Pu J. Lalrinsanga'n Lawmthu sawina a nei bawk.

Pu C. Lalnunnema hi Southern Hqrs. hruaitu thenkhat ten an tawiawm bawk a ni.

*Kalphung thar, Mipui Sorkar.*

Issued by :
Media, Information & Publicity
ZPM Southern Hqrs. Lunglei
Issue No. 103 of 24-26.
Dated Lunglei : the 18th Aug 2026 (Thawhlehni).

ZPM Southern Headquarters, Lunglei

03/09/2026

03/09/2026

31/08/2026

24/08/2026

22/08/2026

21/08/2026

21/08/2026

19/08/2026

19/08/2026

18/08/2026

Address

Website

Alerts

Shortcuts

Share

Category

Listing takedown request