27/09/2025
മലപ്പുറം ജില്ലയിൽ ദേശീയപാത 66 നിർമ്മാണം ഏകദേശം പൂർത്തിയായിരിക്കുന്ന ഈ വേളയിൽ മലപ്പുറം എംപി, എംഎൽഎ, മുനിസിപ്പൽ ചെയർമാൻ, മലപ്പുറത്തെ മുതിർന്ന രാഷ്ട്രീയ സാംസ്കാരിക സാമൂഹിക നേതാക്കളുടെ ശ്രദ്ധയിലേക്ക്,
മലപ്പുറം നഗരത്തിൽ നിന്ന് 13 മുതൽ 15 കിലോമീറ്റർ ദൂരത്തിൽ മാത്രമാണ് പ്രസ്തുത ഹൈവേ പോകുന്നത്. നഗരസഭ ബോർഡറിൽ കാരാത്തോട് നിന്ന് നോക്കിയാൽ അത് വീണ്ടും കുറയും. സമാനമായി നോക്കിയാൽ കോഴിക്കോട് KSRTC സ്റ്റാൻഡിൽ നിന്ന് പന്തീരാങ്കാവ് ഒക്കെ പോകുന്ന ദൂരം മാത്രം ( കോഴിക്കോട് നഗരത്തിൽ നിന്ന് ഹൈവേയിലേക് ഉള്ള വിവിധ റോഡുകൾ നാലു വരിയാക്കാൻ നിലവിൽ തന്നെ അവിടെയുള്ള ജനപ്രതിനിധികൾ മുഖേന പദ്ധതികൾ തയ്യാറായിട്ടുള്ള കാര്യം കൂട്ടിവായിക്കുക), അതായത് ഹൈവേയിൽ നിന്ന് മലപ്പുറത്തേക്ക് നാലുവരി പാത നിർമിക്കാൻ മാത്രം ഉളള ദൂരം. ഒരു ജില്ലാ ആസ്ഥാനത്തിന്റെ CBD യിൽ നിന്ന് വിവിധ സംസ്ഥാനങ്ങളിലൂടെ കടന്നു പോകുന്ന സുപ്രധാന ഹൈവേയിലേക്ക് ഇത്ര കുറഞ്ഞ ദൂരം ഉള്ളത് വലിയ നേട്ടമാണ്. എന്നാൽ ആ നേട്ടം ഉപകാരമാകണമെങ്കിൽ നഗരത്തിൽ നിന്ന് നേരിട്ടുള്ള നാലു വരി പാത ഹൈവേയിലേക്ക് വേണം.
മലപ്പുറത്തു നിന്ന് ചുരുങ്ങിയ പക്ഷം മൂന്ന് ഭാഗങ്ങളിലേക്ക് ഇങ്ങനെ ആക്സസ് റോഡ്നു സാധ്യത ഉണ്ട്. അത് ബ്രൗൺഫീൽഡ് ആയും (അതായത് നിലവിൽ ഉള്ള റോഡ് നാലു വരി ആക്കുക) ഗ്രീൻഫീൽഡ് ആയും (പുതിയ ഭൂമി ഏറ്റെടുത്ത് നാലു വരി സ്ഥാപിക്കുക) അല്ലെങ്കിൽ സമ്മിശ്രമായും (നിലവിൽ ഉള്ളവയും ട്രാഫിക് കൂടിയ ഭാഗങ്ങളിൽ ബൈപാസ് നിർമിച്ചു കൊണ്ടും) സാധ്യമാണ്. മലപ്പുറം തിരൂർ റോഡ് മുതൽ കോട്ടക്കൽ ടൌൺ ബന്ധപ്പെടാതെ പുത്തൂർ -ചെനക്കൽ ബൈപാസ് വഴി ആണ് ഒരു സാധ്യതയുള്ള റൂട്ട്, മറ്റൊന്ന് മലപ്പുറത്തു നിന്ന് കാടാമ്പുഴ വഴി വളാഞ്ചേരി ഭാഗത്തേക്ക് ചെറിയ റോഡുകൾ ഉള്ളവ ചേർത്ത് നാലു വരി പാതയാക്കി നിർമിക്കുക എന്നതാണ്. ഇതേ പദ്ധതി മുമ്പ് ലെൻസ്ഫെഡ് ജില്ലാ കമ്മിറ്റി പ്രൊപ്പോസ് ചെയ്തിരുന്നു. മൂന്നാമതായി ഉള്ളത് മലപ്പുറം പരപ്പനങ്ങാടി റോഡ് വികസിപ്പിച്ച് വേങ്ങര എത്തുന്നതിനു മുമ്പ് ബൈപാസ് നിർമിച്ച് കൂരിയാട് ഭാഗത്തു ഹൈവേയിലേക്ക് ബന്ധിപ്പിക്കുക എന്നതാണ്. താരതമ്യേനെ ബിൽറ്റ് അപ്പ് കുറഞ്ഞ പ്രദേശങ്ങൾ ഈ റൂട്ടിൽ ലഭിക്കും എന്നതിനാൽ മലപ്പുറം - കൂരിയാട് കണക്ടിവിറ്റി കൂടുതൽ ഗ്രീൻഫീൽഡ് ആയി, സെമി ആക്സസ് കൺട്രോൾഡ് ആയിട്ട് പോലും ചെയ്യുക സാധ്യമാണ്.
നിലവിൽ തന്നെ NH 66ലേക്ക് മലപ്പുറം വഴി വയനാട് - മുക്കം ഭാഗത്ത് നിന്നുള്ള സ്വകാര്യ വാഹനങ്ങൾ വരുന്നുണ്ട്. ഹൈവേ പൂർണ്ണമായും തുറക്കുന്ന മുറയ്ക്ക് അത്തരം ട്രാഫിക് മലപ്പുറം വഴി കൂടും. മലപ്പുറത്തു നിന്ന് നാലു വരി ഉണ്ടാവുന്ന പക്ഷം അത് നഗരത്തിനും നഗരം വഴിയുള്ള ട്രാഫിക്കിനും ഒരുപോലെ ഗുണം ചെയ്യും. മലപ്പുറം നഗരത്തിൽ ഉള്ള ജില്ലയിലെ തന്നെ ഏറ്റവും വലിയ വ്യവസായ മേഖലയായ ഇൻകെൽ സിറ്റിയിലേക്ക് നിലവിൽ തന്നെ കണ്ടയ്നറുകളും ലോജിസ്റ്റിക്സ് ട്രാൻസ്പോർട്ടേഷനും ദിവസവും നടക്കുന്നുണ്ട്. കൂരിയാട് നിന്ന് ഉള്ള നാലുവരി പാത ഇൻകെൽ മേഖലക്കും വലിയ ഗുണം ചെയ്യും. സമീപ ഭാവിയിൽ തന്നെ ഇൻകെൽ കേന്ദ്രീകരിച്ച് കൂടുതൽ ദേശീയ തലത്തിൽ ഉള്ള ഇൻവെസ്റ്റ്മെന്റസും, IT പാർക്ക് പോലെയുള്ളവയ്ക്കും വാതിലുകൾ തുറക്കാവുന്നതാണ്.
കാലങ്ങളായി വളരെയേറെ അവഗണ സർക്കാർ പദ്ധതികളുടെ കാര്യത്തിൽ മലപ്പുറം നഗരം ഏറ്റുവാങ്ങിയിട്ടുണ്ടെങ്കിലും, സ്വകാര്യ വാണിജ്യ മേഖലയിലെ മാറ്റം ഇന്ന് നഗരത്തിൽ പ്രകടമാണ്. രാജ്യത്തെ തന്നെ 7ആമത് ടാറ്റ ഇ.വി സ്റ്റോർ നഗരത്തിൽ കോഴിക്കോട് റോഡിൽ തുറന്നത് ഈയടുത്താണ്. 20 നിലകളിലായി 144 യൂണിറ്റുകളുമായി ജില്ലയിലെ ഏറ്റവും വലിയ അപാർട്മെന്റ് സമുച്ചയമായ ഹോസറ്റഡ് റിവെറൈൻ മലപ്പുറം പട്ടർകടവിൽ നിർമാണത്തിന്റെ ആവസാനഘട്ടത്തിൽ ആണ്. നഗരത്തിൽ കാവുങ്ങൽ ബൈപാസിൽ ജില്ലയിലെ ഏറ്റവും വലിയ സ്റ്റാർ ഹോട്ടലായ വൂഡ്ബൈൻ ഫോളിയേജ് അവരുടെ ബിൽറ്റ്അപ്പ് ഏരിയയിലേക്ക് മറ്റൊരു സ്ട്രക്ച്ചർ കൂടി ചേർക്കുന്നതിന്റെ പണിയും നടക്കുന്നു. മലപ്പുറം കൊളായി ഹില്ലിൽ നിർമാണം പാതിവഴിയിലായിരുന്ന അബീർ സൂപ്പർ സ്പെഷ്യാലിറ്റി ഹോസ്പിറ്റൽ വൈകാതെ പ്രവൃത്തി പുനരാരംഭിച്ചേക്കും എന്ന് ബന്ധപ്പെട്ടവർ പങ്കുവെക്കുന്നു.
ഇതിനെല്ലാം പുറമെ ഹൈലൈറ്റ് പോലെയുള്ള ഗ്രൂപ്പിന്റെ വൻകിട പദ്ധതികളും മലപ്പുറം നഗരത്തിൽ തിരൂർ റോഡിൽ വരുന്നുണ്ട്.
ചുരുക്കി പറഞ്ഞാൽ ഇനിയും ഒരുപാട് വളരാൻ ഉള്ള മലപ്പുറം അതിന്റെ ചെറിയ ചുവടുവെപ്പുകൾ മെല്ലെ മെല്ലെ നടത്തുന്ന സമയമാണ് ഇപ്പോൾ. ജനപ്രതിനിതികളുടെയും നേതാക്കളുടെയും ദീർഘവീക്ഷണമില്ലായ്മയും ജില്ലാ ആസ്ഥാന കേന്ദ്രീകൃത വികസന കാഴ്ചപ്പാട് ഇല്ലായ്മയും കാരണം മലപ്പുറം നഗരത്തിനു ഇത് വരെ ഉണ്ടായ നഷ്ടങ്ങൾ ചില്ലറയല്ല. അത് ഇനിയെങ്കിലും തിരുത്താനുള്ള അവസരങ്ങളാണ് ഉപയോഗപ്പെടുത്തേണ്ടത്. അത്തരത്തിൽ ഒന്നാണ് NH66ലേക്ക് ഉള്ള മലപ്പുറത്തു നിന്നുള്ള സെമി ആക്സസ് കൺട്രോൾഡ് നാലു വരി പാതകൾ. ഇത് വേണോ എന്ന് ഇനിയും ചിന്തിക്കുന്നവർ ഒരു പത്ത് വർഷം പിറകിൽ നിന്ന്, അടുത്ത പത്ത് വർഷം മുന്നോട്ട് കാണാവുന്ന തരത്തിൽ സ്വന്തം ചിന്തകൾ കൊണ്ട് വരണം. ഈ ആവശ്യം കേവലം ആഗ്രഹം എന്നതിൽ കവിഞ്ഞ് യാഥാർഥ്യമാകാൻ തന്നാൽ കഴിയുന്ന ഇടപെടൽ മലപ്പുറത്തെ ഓരോ മേഖലയിലെയും നേതൃത്വങ്ങൾ ചെയ്താൽ, ഇത് തീർച്ചയായും സംഭവിക്കും, മലപ്പുറത്തെ ഭാവി തലമുറ നിങ്ങളോട് ദീർഘവീക്ഷണത്തോടെ നടപ്പാക്കിയ ഈ ഹൈവേ ആക്സസ് റോഡിന് പിൽകാലത്ത് നന്ദി പറയും.
നഗരത്തിന്റെ മറ്റൊരു വികസന വിഷയവുമായി വരുന്നത് വരെ, നന്ദി.
-മലപ്പുറം ഡെവലപ്മെന്റ് ഫോറം
