05/09/2026
*তৈল খেজুৰৰ বৈজ্ঞানিক কৃষি পদ্ধতিৰ সন্দৰ্ভত মৰিগাঁও জিলা কৃষি বিভাগৰ বিশেষ প্ৰশিক্ষণ*
মৰিগাঁও জিলাত তৈল খেজুৰ খেতিৰ সম্প্ৰসাৰণৰ লক্ষ্যৰে ৰাষ্ট্ৰীয় ভোজ্য তেল অভিযান–তৈলবীজ (National Mission on Edible Oils–Oilseeds: NMEO–OP)-ৰ অধীনত মৰিগাঁও জিলা কৃষি বিভাগৰ উদ্যোগত আজি জিলা কৃষি বিষয়াৰ কাৰ্যালয়ৰ সভাকক্ষত এক বিশেষ প্ৰশিক্ষণ তথা সজাগতা কাৰ্যসূচী অনুষ্ঠিত হয়। জিলা কৃষি বিষয়া দিলীপ কুমাৰ বৰাৰ সঞ্চালনাত অনুষ্ঠিত এই কাৰ্যসূচীৰ জৰিয়তে বিষয়া কৰ্মচাৰী সকলক তৈলখেজুৰ বৈজ্ঞানিক কৃষি পদ্ধতি আৰু আধুনিক কৃষি প্ৰযুক্তিৰ বিষয়ে বিস্তৃতভাৱে প্ৰশিক্ষণ প্ৰদান কৰা হয়। প্ৰশিক্ষণ কাৰ্যসূচীত তৈল খেজুৰ খেতিৰ ব্যৱস্থাপনা, উন্নত জাতৰ বীজ নিৰ্বাচন, বীজ সিঁচা তথা ৰোপণৰ উপযুক্ত পদ্ধতি, সুষম সাৰ প্ৰয়োগ, শস্যৰ উপযুক্ত পৰিচৰ্যা আদি বিষয়ত ব্যৱহাৰিক জ্ঞান প্ৰদান কৰা হয়। অসম কৃষি সঞ্চালকালয়ৰ বিষয়া তথা আঁচনি খনৰ ৰাজ্যিক ন'ডেল বিষয়া কল্পনা বৰ্মন সমল ব্যক্তি হিচাপে উপস্থিত থকা অনুষ্ঠানত তৈল খেজুৰ শস্যৰ উৎপাদন আৰু উৎপাদনশীলতা বৃদ্ধিৰ ক্ষেত্ৰত বৈজ্ঞানিক কৃষি পদ্ধতি গ্ৰহণৰ গুৰুত্ব সম্পৰ্কেও বিষদভাৱে অৱগত কৰাৰ লগতে আঁচনি খন কৃষক সকলৰ কাষলৈ লৈ যাবলৈ দিহা পৰামৰ্শ আগবঢ়ায়। ইয়াৰ উপৰি তৈল খেজুৰ খেতিত দেখা দিব পৰা বিভিন্ন ৰোগ আৰু কীট-পতংগৰ আক্ৰমণ নিয়ন্ত্ৰণৰ বাবে সমন্বিত ৰোগ ব্যৱস্থাপনা (Integrated Disease Management–IDM) আৰু সমন্বিত কীট-পতংগ ব্যৱস্থাপনা (Integrated Pest Management–IPM) সম্পৰ্কে কৃষকসকলক সজাগ কৰা হয়। কৃষকসকলৰ উৎপাদন ব্যয় হ্ৰাস, উৎপাদনশীলতা বৃদ্ধি আৰু তৈলজাত শস্যৰ খেতিৰ জৰিয়তে অধিক উপাৰ্জনৰ সুযোগ সৃষ্টি কৰাৰ লক্ষ্যৰে আধুনিক আৰু বৈজ্ঞানিক কৃষি পদ্ধতি গ্ৰহণ কৰিবলৈ উৎসাহিত কৰা হয়। উক্ত অনুষ্ঠানত মহকুমা কৃষি বিষয়া মূছাহীদ ফাৰুকী, আঁচনি খনৰ জিলা ন'ডেল বিষয়া কিশোৰ কুমাৰ কলিতা, জিলা কৃষি তথ্য বিষয়া গৌতম নাথ, কৃষি উন্নয়ন বিষয়া সকল, কৃষি পৰিদৰ্শক, BTM, ATM, কৃষি সম্প্ৰসাৰণৰ সহায়ককে প্ৰমূখ্যে সংশ্লিষ্ট বিষয়া কৰ্মচাৰী সকল উপস্থিত থাকে।
Pijush Hazarika
CMO Assam
Morigaon District Administration
Department of Agriculture, Assam
