20/08/2026
കുറച്ച് നീളമുള്ള കുറിപ്പാണ് താല്പര്യമുള്ളവർ മാത്രം വായിക്കുക ...
ഇന്ന് ആഗസ്റ്റ് 18 .. യു ഡി എഫ് സർക്കാർ അധികാരമേറ്റിട്ട് 3 മാസങ്ങൾ പൂർത്തിയാകുന്നു ... ഈ 3 മാസത്തിനുള്ളിൽ മതേതര കേരളത്തിൽ എത്രത്തോളം RSS അജണ്ടകൾ പ്രയോഗികമായി എന്നതിനെ കുറിച്ചുള്ള ഒരു വിശകലനമാണിത് ... ഈ വിശകലനത്തിൽ എന്തെങ്കിലും വസ്തുത വിരുദ്ധമായ കാര്യങ്ങൾ ഉണ്ടെങ്കിൽ ആർക്കും ജനാധിപത്യ മര്യാദയുടെ ഭാഷയിൽ ചൂണ്ടിക്കാണിക്കാം .. വിഷയത്തിൽ നിന്ന് കൊണ്ട് സംവദിക്കാം .. തോന്ന്യാസം വിളിച്ച് പറഞ്ഞ് വാ പൂട്ടിക്കാം എന്ന് ആരും കരുതരുത് ....
ഈ 3 മാസത്തിനുള്ളിൽ എന്റെ ഓർമ്മയിലുള്ള കാര്യങ്ങളാണ് പറഞ്ഞിട്ടുള്ളത് .. ആർക്കും കൂട്ടി ചേർക്കാവുന്നതാണ് ...
മൂന്ന് മാസം - ഒരു മതേതര സർക്കാരിന്റെ മേൽ കാവി നിഴൽ പടരുമ്പോൾ ...
മേയ് 18.
കേരളത്തിൽ ഒരു പുതിയ സർക്കാർ അധികാരമേറ്റ ദിവസം.
പുതിയ മുഖ്യമന്ത്രിയായി വി ഡി സതീശൻ, വടശ്ശേരി ദാമോദരൻ മേനോൻ സതീശൻ എന്ന പേരിൽ സത്യ പ്രതിജ്ഞ ചെയ്തു.
ജനങ്ങൾ പ്രതീക്ഷിച്ചത് ഒരു പുതിയ ഭരണത്തിന്റെ രാഷ്ട്രീയ പ്രഖ്യാപനമായിരുന്നു.
പക്ഷേ, ആ ചടങ്ങിന്റെ പശ്ചാത്തലത്തിൽ ഉയർന്നുവന്ന ആദ്യത്തെ വലിയ രാഷ്ട്രീയ ചോദ്യം മറ്റൊന്നായിരുന്നു ...
കേരളത്തിന്റെ മതനിരപേക്ഷ രാഷ്ട്രീയ പാരമ്പര്യത്തിലേക്ക് സംഘപരിവാർ പ്രത്യയശാസ്ത്രത്തിന്റെ ചില അടയാളങ്ങൾ ഇത്ര വേഗം കടന്നുവരുന്നതെന്തുകൊണ്ട്?
സത്യപ്രതിജ്ഞാ വേദിയിൽ കേരളത്തിന്റെ ചരിത്രത്തിലാദ്യമായി വന്ദേമാതരത്തിന്റെ ആറ് ചരണങ്ങളും ആലപിക്കപ്പെട്ടു. പിന്നീട് മുഖ്യമന്ത്രി അത് ലോക് ഭവന്റെ തീരുമാനമായിരുന്നുവെന്നും താനും സഹമന്ത്രിമാരും മുൻകൂട്ടി അറിഞ്ഞിരുന്നില്ലെന്നും വിശദീകരിച്ചു.
എന്നാൽ രാഷ്ട്രീയത്തിൽ ചിലപ്പോൾ വിശദീകരണത്തേക്കാൾ പ്രധാനമാണ് ആദ്യത്തെ ചിത്രം.
ആ ചിത്രം എന്തായിരുന്നു?
അവിടെ നിന്നു കൊണ്ടാണ് കഴിഞ്ഞ മൂന്ന് മാസത്തെ ചില തീരുമാനങ്ങളിലേക്ക് തിരിഞ്ഞുനോക്കേണ്ടത്.
1. സത്യപ്രതിജ്ഞയിൽ പൂർണ്ണ വന്ദേമാതരം ..
സാധാരണ ഔദ്യോഗികമായി ആലപിക്കപ്പെടുന്ന ആദ്യ രണ്ട് ചരണങ്ങൾക്കപ്പുറം, മതപരമായ പ്രതീകങ്ങളുമായി ബന്ധപ്പെട്ട ഭാഗങ്ങളും ഉൾപ്പെടുന്ന പൂർണ്ണ രൂപമാണ് സത്യപ്രതിജ്ഞാ ചടങ്ങിൽ ആലപിക്കപ്പെട്ടത്.
ഇത് യാദൃശ്ചികമായ ഒരു സംഗീതപരിപാടി മാത്രമെന്ന് പറഞ്ഞ് രാഷ്ട്രീയ ചോദ്യത്തെ അവസാനിപ്പിക്കാനാവില്ല.
കാരണം, അതേ കാലത്ത് രാജ്യത്ത് ദേശീയഗാനം, ദേശീയഗീതം, ദേശസ്നേഹം എന്നിവയെ ഒരു പ്രത്യേക രാഷ്ട്രീയ - സാംസ്കാരിക ചട്ടക്കൂടിലേക്ക് കൊണ്ടുവരാനുള്ള സംഘപരിവാർ ശ്രമങ്ങളെക്കുറിച്ച് ശക്തമായ ചർച്ചകൾ നടക്കുകയായിരുന്നു.
അതിനാൽ കേരളത്തിന്റെ പുതിയ സർക്കാരിന്റെ ആദ്യ ഔദ്യോഗിക ചടങ്ങിൽ തന്നെ ആ പൂർണ്ണരൂപം പ്രത്യക്ഷപ്പെട്ടത് സ്വാഭാവികമായും ചോദ്യങ്ങൾ ഉയർത്തും .
2. അധികാരത്തിൽ എത്തും വരെ 'സംഘപരിവാർ അജണ്ട' എന്ന് പറഞ്ഞ പി എം ശ്രി പദ്ധതി നടപ്പാക്കാൻ തയ്യാറായ യു ഡി എഫ് സർക്കാർ ...
കൃത്യമായി പറഞ്ഞാൽ ഏറ്റവും വ്യക്തമായ രാഷ്ട്രീയ മലക്കം മറിച്ചിൽ.
പ്രതിപക്ഷത്തായിരുന്നപ്പോൾ UDF തന്നെ പി എം ശ്രി പദ്ധതിയെ വിമർശിച്ചിരുന്നു. കേന്ദ്രത്തിന്റെ വിദ്യാഭ്യാസ നയത്തിലൂടെ സ്കൂൾ വിദ്യാഭ്യാസത്തിന്റെ കാവി വൽക്കരണം നടക്കുമെന്നായിരുന്നു അന്നത്തെ വിമർശനം.
അധികാരത്തിലെത്തിയപ്പോൾ
“പദ്ധതിയിൽ നിന്ന് പിന്മാറാൻ കഴിയില്ല ” എന്ന നിലപാടിലേക്ക് സർക്കാർ മാറി.
ജൂൺ 17 ന് സർക്കാർ പി എം ശ്രി പദ്ധതിയിൽ തുടരുമെന്ന് മുഖ്യമന്ത്രി വ്യക്തമാക്കി. പിന്നീട് ജൂലൈ 30 ന് UDF ഔദ്യോഗികമായി പദ്ധതിയുമായി മുന്നോട്ടുപോകാൻ തീരുമാനിക്കുകയും ചെയ്തു.
കാരണം പറഞ്ഞത്
കേന്ദ്ര ഫണ്ട് നഷ്ടപ്പെടും.
പക്ഷേ ചോദ്യം അതല്ല.
പണം കിട്ടാൻ വേണ്ടി ഒരു പദ്ധതി സ്വീകരിക്കുമ്പോൾ, അധികാരത്തിലെത്തുന്നതിന് മുമ്പ് അതേ പദ്ധതിയെ സംഘപരിവാർ വിദ്യാഭ്യാസ അജണ്ട എന്ന് വിശേഷിപ്പിച്ചിരുന്ന രാഷ്ട്രീയ നിലപാടിന് എന്ത് സംഭവിച്ചു?
ഇതിനെതിരെ യു ഡി എഫിനകത്ത് നിന്ന് മാത്രമല്ല കോൺഗ്രസിനകത്ത് നിന്ന് പോലും വിമർശനം ഉയർന്നു . കോൺഗ്രസ് ദേശീയ നേതൃത്വം പോലും പി എം ശ്രി സംബന്ധിച്ച് ആശങ്ക പ്രകടിപ്പിച്ചതായി റിപ്പോർട്ടുകൾ പുറത്തുവന്നു.
സമസ്ത ഉൾപ്പെടെയുള്ള മുസ്ലിം സംഘടനകൾ പദ്ധതി RSS അജണ്ടയുടെ ഭാഗമാണെന്നാരോപിച്ച് മുഖ്യമന്ത്രിയെ സമീപിക്കുകയും ചെയ്തു.
ചോദ്യം ലളിതമാണ് ...
പ്രതിപക്ഷത്തിരിക്കുമ്പോൾ സംഘപരിവാർ അജണ്ടയായിരുന്ന ഒന്ന് അധികാരത്തിലെത്തിയപ്പോൾ കേന്ദ്രഫണ്ടായി മാറിയതെങ്ങനെ ?
3. ഉന്നത വിദ്യാഭ്യാസത്തിൽ ഉയർന്ന 'കാവിവൽക്കരണ' ആരോപണം ..
യു ഡി എഫ് സർക്കാർ
അധികാരമേറ്റതിന് പിന്നാലെ കേരളത്തിലെ സർവ്വ കലാശാലകളിലെ നിയമനങ്ങൾ വീണ്ടും രാഷ്ട്രീയ വിവാദമായി.
എം ജി സർവകലാശാലയിലെ വൈസ് ചാൻസലർ നിയമനവും, സെനറ്റ് അംഗങ്ങളുടെ നിയമനവും സംബന്ധിച്ച് സംഘപരിവാർ ബന്ധമുള്ളവരെ ഗവർണ്ണർ ഉയർത്തിക്കൊണ്ട് വരുന്നു എന്ന ആരോപണം ഉയർന്നു.
30 അംഗ സെനറ്റിൽ 19 പേർക്ക് വരെ സംഘപരിവാർ ബന്ധമുണ്ടെന്ന ആരോപണം പോലും ഉയർന്നു.
മുഖ്യമന്ത്രി വടശ്ശേരി ദാമോദരൻ മേനോൻ സതീശൻ ആരോപണം നേരിട്ട് അംഗീകരിച്ചില്ല.
പക്ഷേ ശ്രദ്ധിക്കേണ്ടത് മറ്റൊന്നാണ്.
മുഖ്യമന്ത്രി പറഞ്ഞത് പ്രധാനമായും —
“ഇത് മുൻ സർക്കാരിന്റെ കാലത്തും നടന്ന കാര്യമാണ്.”
എന്നാണ്
ചോദ്യം വന്നു ..
“നിങ്ങൾ അത് തിരുത്തുമോ?”
സർക്കാരിന്റെ മറുപടി
നിയമപരമായി സാധിക്കുന്നതെല്ലാം പരിശോധിക്കാം എന്നായിരുന്നു ..
അതേസമയം, മുൻ ഉന്നത വിദ്യാഭ്യാസ മന്ത്രി ആർ ബിന്ദു മുഖ്യമന്ത്രിയുടെ വിശദീകരണം തള്ളി ... ഗവർണറുടെ ശുപാർശയായിരുന്നു നിയമനങ്ങൾക്ക് അടിസ്ഥാനമെന്നും മുൻ സർക്കാർ അത്തരമൊരു പാനൽ നൽകിയിട്ടില്ലെന്നും അവർ ആരോപിച്ചു.
അതിനാൽ ഇവിടെ ആരോപണം മാത്രം അല്ല, നിയമനങ്ങളെക്കുറിച്ചുള്ള സർക്കാരിന്റെ രാഷ്ട്രീയ ഉത്തരവാദിത്തം തന്നെയാണ് ചോദ്യം.
ഗവർണർ ചാൻസലറായി നടത്തിയ നാമനിർദ്ദേശങ്ങളിൽ 19 പേർക്ക് സംഘപരിവാർ/ ബി ജെ പി ബന്ധമുണ്ടെന്ന ആരോപണം ഉയർന്നപ്പോൾ, ആ നാമനിർദ്ദേശങ്ങളെ യു ഡി എഫ് സർക്കാർ എങ്ങനെ നേരിട്ടു? നിയമപരമായി ചോദ്യം ചെയ്യാനുള്ള സാധ്യത സർക്കാർ പരിശോധിച്ചോ? കേരളത്തിന്റെ ഉന്നത വിദ്യാഭ്യാസ സ്ഥാപനങ്ങളിൽ ഇത്തരം രാഷ്ട്രീയ ഇടപെടലുകൾക്കെതിരെ സർക്കാർ എന്ത് നിലപാടെടുത്തു?
4. ജാജു ബാബുവിന്റെ നിയമനം - നിയമത്തിന്റെ കസേരയിലും കാവി ..
യു ഡി എഫ് സർക്കാർ അധികാരമേറ്റ ദിവസം തന്നെ അഡ്വക്കറ്റ് ജനറലായി ജാജു ബാബുവിനെ നിയമിച്ചു.
കേരളത്തിൽ കൃത്യമായ ആർ എസ് എസ് അജണ്ട നടപ്പിലാക്കാൻ പെടാപ്പാട് പെട്ട മുൻ ഗവർണർ ആരിഫ് മുഹമ്മദ് ഖാന്റെ നിയമോപദേശകനായി പ്രവർത്തിച്ച വ്യക്തിയാണ് അഡ്വ ജാജു ബാബു എന്നോർക്കണം .
ഒരു രാഷ്ട്രീയ സർക്കാരിന്റെ ഏറ്റവും പ്രധാന നിയമ പദവികളിലൊന്നിലേക്ക്, ബിജെപി ഭരണകാലത്തെ ഗവർണറുടെ നിയമോപദേശകനായിരുന്ന വ്യക്തിയെ നിയമിക്കുന്നത് ഒട്ടും നിഷ്കളങ്കമല്ല
പ്രത്യേകിച്ച് കേരളത്തിൽ ഗവർണർ - സംഘപരിവാർ രാഷ്ട്രീയത്തെക്കുറിച്ച് കഴിഞ്ഞ വർഷങ്ങളിൽ ഇത്രയും ശക്തമായ പോരാട്ടം നടന്ന സാഹചര്യത്തിൽ.
5. ദേവസ്വം നിയമനം - വന്നതും പോയതുമായ ഒരു വിവാദം
സർക്കാർ ദേവസ്വം വകുപ്പിന്റെ സ്പെഷ്യൽ ഗവൺമെന്റ് പ്ലീഡറായി നമ്പർ വൺ സംഘിയായ കെ ബി പ്രദീപിനെ നിയമിച്ചു.
പിന്നീട് പുറത്തുവന്നത് അയാൾ ശബരിമല സ്വർണക്കേസുമായി ബന്ധപ്പെട്ട ഒരു പ്രതിയുടെ അഭിഭാഷകനായി ഹാജരായിരുന്നുവെന്നതാണ്.
വിവാദം ശക്തമായതോടെ മുഖ്യമന്ത്രിക്ക് അയാളോട് രാജി ആവശ്യപ്പെടേണ്ടി വന്നു .. ജൂൺ 13 ന് അയാൾ രാജിവച്ചു.
6 സർക്കാർ നിയമനങ്ങളിലെ RSS ബന്ധം
ജൂലൈയിൽ സർക്കാർ പ്ലീഡർമാരുടെ നിയമനത്തെച്ചൊല്ലി കോൺഗ്രസിന്റെ വിദ്യാർത്ഥി സംഘടനയായ KSU പോലും രംഗത്തെത്തി.
സംഘപരിവാർ ബന്ധമുള്ളവരെ സർക്കാർ സംവിധാനത്തിലേക്ക് കൊണ്ടുവരുന്നു എന്ന ആരോപണം ആവർത്തിച്ച് ഉയരുന്നത് എന്തുകൊണ്ടാണ്?
7 ആർ എസ് എസ് വേദികളിലെ വി സിമാർ - വിമർശനം മാത്രം മതിയോ?
ഒരു സർവകലാശാലാ വൈസ് ചാൻസലർ ഒരു ആർ എസ് എസ് പരിപാടിയിൽ പങ്കെടുക്കുന്നത് ഒരു സാധാരണ വ്യക്തിയുടെ രാഷ്ട്രീയ - സാമൂഹിക തെരെഞ്ഞെടുപ്പായി മാത്രം കാണാനാവില്ല. കാരണം അദ്ദേഹം ഒരു രാഷ്ട്രീയ സംഘടനയുടെ പ്രവർത്തകനെന്ന നിലയിൽ അല്ല, ഒരു സർവകലാശാലയുടെ പരമാധികാര അക്കാദമിക് പദവി വഹിക്കുന്ന വ്യക്തിയായാണ് പൊതുവേദിയിൽ പ്രത്യക്ഷപ്പെടുന്നത്. ഇക്കഴിഞ്ഞ ജൂൺ 13 ന് ആർ എസ് എസ് മേധാവി മോഹൻ ഭാഗവത് പങ്കെടുത്ത പരിപാടിയിൽ കേരള സർവകലാശാലാ വി സി മോഹനൻ കുന്നുമ്മൽ, എം.ജി. സർവകലാശാലാ വി സി മാവൂത്ത് ഡി, മലയാള സർവകലാശാലാ വി സി സി ആർ പ്രസാദ് എന്നിവർ പങ്കെടുത്തപ്പോൾ മുഖ്യമന്ത്രി തന്നെ അതിനെ “ഗുരുതരമായ വീഴ്ച” എന്നും വി സി മാരുടെ പദവിക്ക് യോജിക്കാത്ത നടപടിയെന്നും വിശേഷിപ്പിച്ചിരുന്നു. അവർ കേരളത്തോട് മാപ്പുപറയണമെന്നും മുഖ്യമന്ത്രി ആവശ്യപ്പെട്ടു.
പക്ഷേ അവിടെ ഒരു രാഷ്ട്രീയ ചോദ്യം ബാക്കിയാകുന്നു — മാപ്പ് ആവശ്യപ്പെടുന്നതിനപ്പുറം സർക്കാർ എന്ത് ചെയ്തു?
കുറഞ്ഞത് ഔദ്യോഗിക വിശദീകരണം തേടുകയെങ്കിലും സർക്കാരിന് ചെയ്യാമായിരുന്നു ചെയ്തിരുന്നോ?
വി സിമാരുടെ നടപടി ബന്ധപ്പെട്ട സർവകലാശാലാ നിയമങ്ങളുടേയും, സ്റ്റാറ്റ്യൂട്ടുകളുടേയും, പെരുമാറ്റച്ചട്ടങ്ങളുടേയും ലംഘനമാണോ എന്ന് പരിശോധിക്കാമായിരുന്നു. പരിശോധിച്ചിരുന്നോ?
അത്തരം ലംഘനം കണ്ടെത്തിയാൽ, നിയമം അനുവദിക്കുന്ന പരിധിയിൽ അച്ചടക്കനടപടിക്ക് തുടക്കം കുറിക്കുകയോ, വി സി നിയമനാധികാരിയായ ചാൻസലറുടെ ശ്രദ്ധയിൽ വിഷയം കൊണ്ടുവരികയോ ചെയ്യാമായിരുന്നു.
പ്രത്യേകിച്ച് മുഖ്യമന്ത്രി തന്നെ നടപടി “ഗുരുതരമായ വീഴ്ച” എന്ന് വിശേഷിപ്പിച്ച സാഹചര്യത്തിൽ, ആ വാക്കിന് പിന്നാലെ ഒരു ഔദ്യോഗിക നടപടിക്രമം ഉണ്ടായിരുന്നോ എന്നതാണ് പ്രസക്തമായ ചോദ്യം.
ഇതിനെ കൂടുതൽ ഗൗരവമുള്ളതാക്കുന്നത് മോഹനൻ കുന്നുമ്മലിന്റെ തുടർ നടപടിയാണ്. ജൂണിലെ വിവാദത്തിന് ശേഷം അതേ വി സി ഓഗസ്റ്റ് 15 ന് വീണ്ടും ആർ എസ് എസ് സംഘടിപ്പിച്ച “സങ്കൽപ് 2026” പരിപാടിയിൽ പങ്കെടുത്തു. ഇത്തവണ അദ്ദേഹം ഒരു സാധാരണ അതിഥിയായി മാത്രം എത്തിയതല്ല; പരിപാടിയിൽ സംസാരിക്കുകയും വന്ദേമാതരത്തെക്കുറിച്ച് രാഷ്ട്രീയ വിവാദത്തിന് വഴിവച്ച പരാമർശങ്ങൾ നടത്തുകയും ചെയ്തു.
ചോദ്യം കൂടുതൽ നേരിട്ടുള്ളതാണ് ...
ജൂണിൽ മുഖ്യമന്ത്രിക്ക് അത് “ഗുരുതരമായ വീഴ്ച” ആയിരുന്നെങ്കിൽ, അതേ വി സി രണ്ടുമാസം കഴിഞ്ഞ് വീണ്ടും ആർ എസ് എസ് വേദിയിലെത്തിയപ്പോൾ സർക്കാരിന്റെ ഔദ്യോഗിക നിലപാട് എന്തായിരുന്നു?
ആദ്യ സംഭവത്തിൽ തന്നെ സർക്കാർ വിശദീകരണം തേടിയിരുന്നെങ്കിൽ, രണ്ടാമത്തെ സംഭവം ആ വിശദീകരണത്തിന്റെ തുടർച്ചയായി പരിശോധിക്കാമായിരുന്നു. സർവകലാശാലാ ചട്ടങ്ങൾ ബാധകമാണെങ്കിൽ നടപടി സ്വീകരിക്കാമായിരുന്നു. ചാൻസലറുടെ പരിധിയിലുള്ള വിഷയമാണെങ്കിൽ, ചാൻസലറോട് ഇടപെടൽ ആവശ്യപ്പെടാമായിരുന്നു. നിയമപരമായ തടസ്സമുണ്ടെങ്കിൽ അതും ജനങ്ങളോട് വ്യക്തമാക്കാമായിരുന്നു.
വിമർശിക്കാൻ കഴിയുന്ന സർക്കാർ,പരിശോധിക്കാനും കഴിയണം. പരിശോധിച്ച സർക്കാരിന് , നിയമം അനുവദിക്കുന്നിടത്ത് നടപടിയെടുക്കാനും കഴിയണം.
അല്ലെങ്കിൽ “ഗുരുതരമായ വീഴ്ച” എന്ന മുഖ്യമന്ത്രിയുടെ വാക്ക് ഒടുവിൽ ഒരു രാഷ്ട്രീയ പ്രസ്താവന മാത്രമായി ചുരുങ്ങും.
ചോദ്യം ഇതാണ് ....
മുഖ്യമന്ത്രി തന്നെ ഗുരുതരമായ വീഴ്ചയെന്ന് വിശേഷിപ്പിച്ച ഒരു നടപടിയെ നിയമപരമായി പരിശോധിക്കാൻ സർക്കാർ എന്താണ് ചെയ്തത്?
കാരണം ഒരു ജനാധിപത്യ സർക്കാരിന്റെ ശക്തി വിമർശനത്തിൽ മാത്രമല്ല.
വിമർശനത്തെ ഭരണനടപടിയാക്കി മാറ്റാനുള്ള രാഷ്ട്രീയ ഇച്ഛാശക്തിയിലാണ്.
8 വഖഫ് നിലപാട് മാറിയോ?
വടശ്ശേരി ദാമോദരൻ മേനോൻ സതീശൻ സർക്കാരിന്റെ ആദ്യ മൂന്ന് മാസത്തിലെ ഏറ്റവും ശക്തമായ രാഷ്ട്രീയ വിവാദങ്ങളിൽ ഒന്നാണ് വഖഫ് ബോർഡിന്റെ പുനഃസംഘടന. കേന്ദ്രത്തിലെ ഭേദഗതി നിയമപ്രകാരം വഖഫ് ബോർഡിൽ രണ്ട് അമുസ്ലിം അംഗങ്ങളെ ഉൾപ്പെടുത്തണമെന്ന വ്യവസ്ഥ നിലവിലുണ്ട്. കേരളത്തിൽ 2026 ഫെബ്രുവരിയിൽ രൂപീകരിച്ച വഖഫ് ബോർഡിൽ ഒമ്പത് മുസ്ലിം അംഗങ്ങളെ ഉൾപ്പെടുത്തി രണ്ട് സ്ഥാനങ്ങൾ ഒഴിച്ചിട്ടിരുന്നു. പിന്നീട് ഈ ഘടന ചോദ്യം ചെയ്യപ്പെട്ടപ്പോൾ കേരള ഹൈക്കോടതി ഇടപെടുകയും, രണ്ട് അമുസ്ലിം അംഗങ്ങളുടെ അഭാവം ചൂണ്ടിക്കാട്ടി ബോർഡിന്റെ പ്രധാന തീരുമാനങ്ങൾക്ക് നിയന്ത്രണം ഏർപ്പെടുത്തുകയും ചെയ്തു.
ഇവിടെയാണ് സതീശൻ സർക്കാരിന്റെ നിലപാട് രാഷ്ട്രീയമായി ചോദ്യം ചെയ്യപ്പെട്ടത്. അമുസ്ലിം അംഗങ്ങളെ ഉൾപ്പെടുത്തുന്നതിന് സർക്കാർ തയ്യാറാണെന്നും, കേന്ദ്ര വഖഫ് ഭേദഗതി നിയമത്തിലെ വ്യവസ്ഥകൾ അനുസരിക്കുന്ന നിലപാടാണ് കോടതിയിൽ സർക്കാർ സ്വീകരിച്ചതെന്നും റിപ്പോർട്ടുകൾ പുറത്തുവന്നു.
ജൂലൈ 22-ന് ഹൈക്കോടതിയിലും സർക്കാർ ഇതേ നിലപാട് ആവർത്തിച്ചു ...
ഇതിനെതിരെ പ്രതിപക്ഷവും സമസ്തയിലെ വിവിധ വിഭാഗങ്ങളും ശക്തമായി രംഗത്തെത്തി. വഖഫ് ബോർഡിൽ അമുസ്ലിം അംഗങ്ങളെ ഉൾപ്പെടുത്താനുള്ള കേന്ദ്ര നിയമത്തിലെ വ്യവസ്ഥ തന്നെ സംഘപരിവാർ അജണ്ടയുടെ ഭാഗമാണെന്നും, അതിനെതിരെ നിയമപരമായി പോരാടേണ്ടതിന് പകരം സംസ്ഥാന സർക്കാർ അതിനോട് അനുകൂല നിലപാട് സ്വീകരിക്കുകയാണെന്നും വിമർശനം ഉയർന്നു.
ചോദ്യം ഇതാണ് ...
കേന്ദ്രത്തിന്റെ വിവാദ വഖഫ് ഭേദഗതിക്കെതിരെ ശക്തമായ നിയമപോരാട്ടം നടത്തുമെന്ന നിലപാടിൽ നിന്ന്, അതിലെ അമുസ്ലിം അംഗത്വ വ്യവസ്ഥ അംഗീകരിക്കുന്ന നിലപാടിലേക്ക് കേരള സർക്കാർ മാറിയതെന്ത് കൊണ്ടാണ് ?
ഇവിടെ പ്രശ്നം രണ്ട് അമുസ്ലിം അംഗങ്ങളെ നിയമിക്കുന്നതിൽ മാത്രം ഒതുങ്ങുന്നില്ല. കേന്ദ്രത്തിലെ സംഘപരിവാർ സർക്കാർ കൊണ്ടുവന്ന നിയമഭേദഗതിയെക്കുറിച്ച് കേരളം എന്ത് നിലപാടാണ് സ്വീകരിക്കുന്നത് എന്നതാണ് രാഷ്ട്രീയ ചോദ്യം. അതുകൊണ്ടുതന്നെ വഖഫ് വിഷയം ഈ മൂന്ന് മാസത്തെ ഭരണത്തിന്റെ മതനിരപേക്ഷതാ പരീക്ഷണങ്ങളിൽ ഒന്നായി മാറുന്നു.
കേന്ദ്രം നിർബന്ധിക്കുന്നതെല്ലാം കേരളം അനുസരിക്കുമോ, അതോ കേരളത്തിന്റെ മതനിരപേക്ഷ പാരമ്പര്യത്തിനും ഭരണഘടനാ മൂല്യങ്ങൾക്കും അനുസരിച്ച് അതിനെ ചോദ്യം ചെയ്യുമോ?
ഈ ചോദ്യം വഖഫ് ബോർഡിന്റെ വാതിൽക്കൽ മാത്രമല്ല — വടശ്ശേരി ദാമോദരൻ മേനോൻ സതീശൻ സർക്കാരിന്റെ രാഷ്ട്രീയ നിലപാടിന്റെ വാതിൽക്കൽ തന്നെയാണ് ..
1 വന്ദേമാതരം
2 പി എം ശ്രി
3 സർവകലാശാല നിയമനങ്ങൾ.
4 ഗവർണറുടെ മുൻ നിയമോപദേശകന്റെ AG നിയമനം.
5 ദേവസ്വം നിയമനവും രാജിയും
6 വിവാദ നിയമനങ്ങൾ.
7 RSS വേദികളിലെ വി സി മാരുടെ സാന്നിധ്യം
8 വഖഫ് ബോർഡ്
ഇവയെല്ലാം കൂട്ടി വായിച്ചാൽ ഒരു രാഷ്ട്രീയ ചിത്രം രൂപപ്പെടുന്നുണ്ട്. ആ ചിത്രത്തിന്റെ നിറം കാവിയാണ് .. വെറും മൂന്നേ മൂന്ന് മാസങ്ങൾ കൊണ്ട് വടശ്ശേരി ദാമോദരൻ മേനോൻ സതീശൻ സർക്കാരിന്റെ തണലിൽ പടർന്ന കാവി നിറം ....
കേരളത്തിന്റെ മതനിരപേക്ഷ രാഷ്ട്രീയ അതിരുകൾ എവിടെയാണ്?
കേരളം ഇതുവരെ ഇങ്ങനെ ആയിരുന്നോ?
കേരളത്തിന്റെ രാഷ്ട്രീയ ചരിത്രത്തിൽ കോൺഗ്രസും ഇടതുപക്ഷവും തമ്മിൽ കടുത്ത പോരാട്ടങ്ങളുണ്ടായിരുന്നു.
പക്ഷേ ആ പോരാട്ടങ്ങൾക്കിടയിലും കേരളത്തിന്റെ പൊതുസമൂഹത്തെ രൂപപ്പെടുത്തിയ ഒരു അടിസ്ഥാന ധാരണ ഉണ്ടായിരുന്നു:
രാജ്യം മതത്തിന്റേതല്ല.
ഭരണം മതത്തിന്റേതല്ല.
വിദ്യാഭ്യാസം മതത്തിന്റെ പരീക്ഷണശാലയല്ല.
സർവകലാശാലകൾ ഒരു രാഷ്ട്രീയ സംഘടനയുടേയും വിപുലീകരണമല്ല.
അതാണ് കേരളത്തിന്റെ മതനിരപേക്ഷ പാരമ്പര്യം.
അതുകൊണ്ടാണ് ഇന്നത്തെ ചോദ്യവും പ്രസക്തമാകുന്നത്.
ഒരു സർക്കാർ സംഘപരിവാറിനോട് ഔദ്യോഗികമായി ചേർന്നോ എന്നതല്ല ചോദ്യം.
അതിനേക്കാൾ അപകടകരമായ മറ്റൊരു ചോദ്യം ഉണ്ട്
സംഘപരിവാർ ഉയർത്തിക്കൊണ്ടുവന്ന ചില രാഷ്ട്രീയ - സാംസ്കാരിക മാനദണ്ഡങ്ങൾ കേരളത്തിന്റെ ഭരണ ഭാഷയിലേക്ക് പതുക്കെ സാധാരണവൽക്കരിക്കപ്പെടുന്നുണ്ടോ?
അതിന് ഉത്തരം തേടേണ്ടത് ഇന്നാണ്.
കാരണം മൂന്ന് മാസം മാത്രമാണ് കഴിഞ്ഞത്.
മൂന്ന് മാസം കഴിഞ്ഞപ്പോൾ തന്നെ ഇത്രയും ചോദ്യങ്ങളുണ്ടെങ്കിൽ,
അഞ്ചുവർഷം കഴിയുമ്പോൾ കേരളത്തിന്റെ രാഷ്ട്രീയ - സാംസ്കാരിക ഭൂപടം എങ്ങനെയായിരിക്കും?
വടശ്ശേരി ദാമോദരൻ മേനോൻ സതീശൻ സർക്കാരിനെ വിലയിരുത്തേണ്ടത് അതുകൊണ്ട് തന്നെ ഒരു കസേരയുടെ വിജയപരാജയമായി മാത്രം അല്ല.
കേരളം ഏത് ദിശയിലേക്കാണ് പോകുന്നത് എന്ന ചോദ്യമായാണ്.
കാരണം അധികാരം മാറുന്നത് ജനാധിപത്യത്തിന്റെ സ്വാഭാവിക പ്രക്രിയയാണ്.
പക്ഷേ—
ഒരു സമൂഹത്തിന്റെ മതനിരപേക്ഷ അതിരുകൾ മാറിത്തുടങ്ങുന്നത് അത്ര സ്വാഭാവികമല്ല.
അത് ചോദ്യം ചെയ്യേണ്ടത് പ്രതിപക്ഷത്തിന്റെ മാത്രം കടമയല്ല.
കേരളത്തിന്റെ കടമയാണ്.ഓരോ മതേതര വിശ്വാസിയുടേയും കടമയാണ് ...
ശ്രീജ നെയ്യാറ്റിൻകര
