NWCMC

06/08/2026

03/08/2026

महापालिकेकडून इदगाह कमान रोड ते बोंढार बायपास रस्त्यावरील अतिक्रमणे जमीनदोस्त;

शहरातील विविध भागांतही धडक कारवाई
मंजुर विकास आराखड्यातील रस्ता रुंदीकरणात अडथळा ठरणाऱ्या इदगाह कमान ते बोंढार बायपासकडे जाणारा रस्ता अतिक्रमणमुक्त करण्यासाठी नांदेड-वाघाळा शहर महानगरपालिकेच्या वतीने दि.०३ ऑगस्ट २०२६ रोजी एक मोठी आणि धडक मोहीम हाती घेण्यात आली. मनपा आयुक्त डॉ.महेशकुमार डोईफोडे आणि पोलीस अधिक्षक डॉ.निलभ रोहन यांच्या संयुक्त मार्गदर्शनाखाली, शहरातील मुख्य मार्ग असलेल्या इदगाह कमान रोड ते बोंढार बायपास रोडवरील अनेक वर्षांचे पक्के व कच्चे अतिक्रमण मनपाच्या पथकाने जे.सी.बी.च्या साहाय्याने पूर्णपणे जमीनदोस्त केले आहे.

इदगाह कमान ते बोंढार बायपास हा मंजुर विकास आराखड्यानुसार ६० फुटाचा रस्ता करण्याचे काम सार्वजनिक बांधकाम विभाग मार्फत करण्यात येत होते. परंतु येथील अतिक्रमणामुळे मागील दोन वर्षापासुन सदरील रस्त्याचे काम प्रलंबित होते. रस्ता रुंदीकरणाच्या जागेत स्थानिक नागरिकांनी आपली घरे ३३ फुटा पर्यंत रस्त्यावर अतिक्रमण करत मोठ्या प्रमाणावर बेकायदेशीर ताबा मिळवला होता. यामुळे या रस्त्याच्या रुंदीकरणाच्या कामात अडथळा निर्माण होत असल्याने सार्वजनिक बांधकाम विभागाने महापालिकेस केलेल्या पत्रव्यवहारानुसार आज मनपाच्या अतिक्रमण हटाव पथकाने या संपूर्ण मार्गावरील १० ते १५ घरांची पक्की बांधकामे, अनधिकृत शेड्स, आणि दुकानांचे वाढीव भाग हटवून अतिक्रमित भाग पूर्णपणे मोकळा केला आहे.

03/08/2026

महानगरपालिकेत “क्रांतीसिंह नाना पाटील” यांना अभिवादन

भारतीय स्वातंत्र्यलढ्यातील अग्रणी नेते, प्रतिसरकारचे संस्थापक आणि थोर स्वातंत्र्यसेनानी क्रांतीसिंह नाना पाटील यांच्या जयंती निमित्त दि.०३ ऑगस्ट २०२६ रोजी सकाळी ११.०० वाजता नांदेड वाघाळा शहर महानगरपालिकेच्या मुख्य प्रशासकीय इमारतीमध्ये त्यांच्या प्रतिमेस मनपा आयुक्त डॉ.महेशकुमार डोईफोडे यांच्या हस्ते पुष्पहार अर्पण करुन अभिवादन करण्यात आले. त्याचप्रमाणे दि.०३ ऑगस्ट हा भारतीय अवयवदान दिन म्हणुन साजरा करण्यात येत असल्याने यावेळी अवयवदानाच्या प्रतिज्ञेचे सामुहिक वाचन करण्यात आले.

क्रांतीसिंह नाना पाटील हे भारतीय स्वातंत्र्यलढ्यातील एक अतुलनीय आणि झुंझार स्वातंत्र्यसेनानी, क्रांतिकारक व समाजसुधारक होते. ब्रिटिश राजवटीला समांतर अशी 'प्रतिसरकार' यंत्रणा यशस्वीपणे राबवून त्यांनी सातारा-सांगली भागात इंग्रज सत्तेला मोठा हादरा दिला होता. गोरगरीब, शेतकरी आणि कष्टकऱ्यांच्या हक्कासाठी त्यांनी आयुष्यभर संघर्ष केला. त्यांचा हाच क्रांतीचा आणि समाजसेवेचा वारसा आजच्या पिढीसाठी अत्यंत प्रेरणादायी आहे.

याप्रसंगी महिला बाल कल्याण सभापती सदिच्छा सोनी पाटील, अतिरिक्त आयुक्त गिरीश कदम, उपायुक्त स.अजितपालसिंघ संधु, उपायुक्त गंगाधर ईरलोड, सहाय्यक आयुक्त मनिषा नरसाळे, मालमत्ता व्यवस्थापक पद्माकर कावळे, जनसंपर्क अधिकारी सुमेध बनसोडे, स्विय सहाय्यक महेश आसणे, वरिष्ठ लिपीक शुभांगी चौधरी, प्रदिप फुलारी, सोमेश्वर तांबोळी यांच्यासह इतर कर्मचारी मोठ्या संख्येने उपस्थित होते.

02/08/2026

नांदेडमध्ये पर्यावरण संवर्धनाचे मोठे पाऊल;हरित नांदेड अभियानाला वेग:

पावडेवाडी नाका ते छत्रपती चौक मार्गावर ट्री गार्डसह १५० वृक्षांची लागवड

नांदेड वाघाळा शहर महानगरपालिका, गुरुद्वारा लंगर सहीब व वृक्ष मित्र फाउंडेशन यांच्या संयुक्त पुढाकाराने हरित नांदेड अभियानाला शहरात उत्स्फूर्त प्रतिसाद मिळत असून, महानगरपालिकेच्या क्षेत्रिय कार्यालय क्रमांक ३ शिवाजी नगर यांच्या वतीने दिनांक ०२.०८.२०२६ रोजी पावडेवाडी नाका ते छत्रपती चौक या मुख्य मार्गावर ट्री गार्डसह तब्बल १५० मोठ्या वृक्षांची लागवड करण्यात आली.

लोकप्रतिनिधी, महानगरपालिका प्रशासन, वृक्षमित्र फाउंडेशन, विविध सामाजिक संस्था, एनसीसी विद्यार्थी आणि नागरिकांच्या उत्स्फूर्त सहभागामुळे हा उपक्रम पर्यावरण संवर्धनाच्या दिशेने एक महत्त्वाचे पाऊल ठरला. या कार्यक्रमास *महापौर सौ.कविता संतोष मुळे, मनपा आयुक्त डॉ.महेशकुमार डोईफोडे, उपमहापौर दिपकसिंह रावत, विधानपरिषद आमदार अमर राजुरकर, माजी सभापती किशोर स्वामी, माजी महापौर शिला किशोर भवरे, नगरसेवक सतीश देशमुख, अभिषेक सौदे, राजेश यन्नम, मिलिंद देशमुख,अमृता बजरंगसिंह ठाकुर, सत्यपाल सावंत* यांची प्रमुख उपस्थिती होती

कार्यक्रमाच्या प्रारंभी मुख्य उद्यान अधीक्षक डॉ.मिर्झा फरहतुल्ला बेग यांनी अभियानाची माहिती देताना शहरात १० हजार वृक्षांची लागवड करण्याचे उद्दिष्ट असल्याचे सांगितले. प्रत्येक क्षेत्रीय कार्यालयामार्फत वॉर्डनिहाय नियोजन करून हे अभियान प्रभावीपणे राबविण्यात येत असल्याचे त्यांनी नमूद केले. *महापौर सौ.कविता संतोष मुळे* यांनी जागतिक मैत्री दिनाचे औचित्य साधत "वृक्षांशी मैत्री करा" असा संदेश दिला. वृक्ष लागवडी बरोबरच त्यांचे संगोपन आणि संवर्धन ही प्रत्येकाची सामूहिक जबाबदारी असल्याचे त्यांनी सांगितले. त्याचप्रमाणे महानगरपालिका *आयुक्त डॉ.महेशकुमार डोईफोडे* यांनी शहरात सध्या ३.१७ लाख वृक्ष असून शहराचे वृक्षाच्छादन ८.५ टक्के असल्याची माहिती दिली. लोकसहभागातून वृक्ष लागवड व संगोपन झाल्यास पर्यावरण संवर्धनाला मोठी चालना मिळेल, असे सांगत त्यांनी नागरिकांना अभियानात सहभागी होण्याचे आवाहन केले.

वृक्षमित्र फाउंडेशनचे अध्यक्ष संतोष मुगटकर यांनी गेल्या सात वर्षांपासून महानगरपालिका, लोकप्रतिनिधी आणि विविध सेवाभावी संस्थांच्या सहकार्याने राबविण्यात आलेल्या वृक्षसंवर्धन उपक्रमांचा आढावा घेतला. आगामी काळात शालेय विद्यार्थी, महिला, पर्यावरणप्रेमी नागरिक आणि सामाजिक संस्थांचा सहभाग आणखी वाढवून हरित नांदेड अभियान अधिक व्यापक करण्याचा संकल्प त्यांनी व्यक्त केला. हरित, स्वच्छ आणि पर्यावरणपूरक नांदेड घडविण्याच्या दिशेने हा उपक्रम महत्त्वाचा टप्पा ठरत असून, लोकसहभागातून वृक्षसंवर्धनाची चळवळ अधिक बळकट होत असल्याचे यावेळी अधोरेखित करण्यात आले.

01/08/2026

महानगरपालिकेच्या वतीने “साहित्यरत्न अण्णाभाऊ साठे’ यांना अभिवादन

नांदेड वाघाळा शहर महानगरपालिकेतर्फे दि.०१ ऑगस्ट २०२६ रोजी सकाळी १०.०० वाजता *‘साहित्यरत्न अण्णाभाऊ साठे”* यांच्या जयंती निमित्त त्यांच्या विद्युत भवन, नांदेड येथील पूर्णकृती पुतळ्यास महापौर सौ.कविता संतोष मुळे आणि मनपा आयुक्त डॉ.महेशकुमार डोईफोडे यांच्या हस्ते पुष्पहार अर्पण करुन अभिवादन करण्यात आले.

साहित्यरत्न अण्णाभाऊ साठे हे महाराष्ट्राचे एक महान समाजसुधारक, लोकशाहीर आणि प्रसिद्ध लेखक होते. त्यांनी अनेक कादंबऱ्या, कथा आणि पोवाड्यांच्या माध्यमातून वंचितांच्या वेदनांना वाचा फोडली.'फकिरा' ही त्यांची गाजलेली कादंबरी असून, तिला १९६१ मध्ये राज्य सरकारचा उत्कृष्ट कादंबरीचा पुरस्कार मिळाला. संयुक्त महाराष्ट्राच्या लढ्यात त्यांनी आपल्या शाहिरी व लेखणीने मोलाचे योगदान दिले.

याप्रसंगी माजी राज्यमंत्री डी.पी. सावंत, विधानपरिषद आमदार अमर राजुरकर, महापालिकेचे स्थायी समिती सभापती विरेंद्रसिंग गाडीवाले, महिला बाल कल्याण सभापती सदिच्छा सोनी पाटील, माजी सभापती किशोर स्वामी, भाजपा महिला आघाडीच्या प्रणिताताई चिखलीकर, प्रविण साले, नगरसेवक साहेबराव गायकवाड, उमेश पवळे, सुमित मुथा, अतिरिक्त आयुक्त गिरीश कदम,निलेश सुंकेवार, उपायुक्त स.अजितपालसिंग संधु, अभिजीत वायकोस, नितीन गाढवे, गंगाधर ईरलोड उपअभियंता प्रकाश कांबळे, संतोषभाऊ मुळे, विजय येवणकर, संघरत्न कांबळे, यांच्यासह मनपाचे कर्मचारी व शहरातील नागरीकांची मोठ्या संख्येने उपस्थिती होती.

31/07/2026

महानगरपालिकेत आयुक्त डॉ.महेशकुमार डोईफोडे यांच्याकडून 'SIR' विशेष सखोल पुनर्निरीक्षणाचा अंतिम टप्याचा आढावा;

पात्र मतदारांची नोंदणी तात्काळ पूर्ण करण्याचे निर्देश

भारतीय निवडणूक आयोगाच्या आदेशानुसार नांदेड-वाघाळा शहर महानगरपालिका क्षेत्रात सध्या मतदार यादी अद्ययावत करण्यासाठी 'SIR' (विशेष सखोल पुनर्निरीक्षण) अभियान वेगाने राबवले जात आहे. या मोहिमेच्या अंतिम टप्प्यातील प्रगतीचा आणि प्रभागनिहाय कामाचा सविस्तर आढावा घेण्यासाठी शुक्रवार दि.३१ जुलै २०२६ रोजी मनपा मुख्यालयात एक महत्त्वपूर्ण बैठक पार पडली. ही बैठक *मनपा आयुक्त तथा अतिरिक्त जिल्हा निवडणूक अधिकारी डॉ.महेशकुमार डोईफोडे* यांच्या अध्यक्षतेखाली संपन्न झाली.

या बैठकीला अतिरिक्त आयुक्त गिरीश कदम, उपायुक्त अभिजित वायकोस, अजितपालसिंघ संधु, नितीन गाढवे यांच्यासह संबंधित तहसीलदार, क्षेत्रिय अधिकारी, सहाय्यक मतदार नोंदणी अधिकारी आणि निवडणूक शाखेचे प्रमुख अधिकारी उपस्थित होते.

31/07/2026

नांदेड वाघाळा शहर महानगरपालिका मालकीचे बंजार हॉस्टेल येथील- दुकाने/गाळे व दोन हॉल भाडेपट्टीवर द्यावयाचे आहेत

31/07/2026

नेताजी सुभाषचंद्र बोस महाविद्यालयासमोरील खाजगी रस्ता खचला;
मनपाची तत्काळ धाव, अडकलेली कार सुरक्षित बाहेर

शहरातील नेताजी सुभाषचंद्र बोस महाविद्यालया समोरील मुख्य रस्त्याचा काही भाग अचानक खचल्याची घटना गुरुवार दिनांक ३० जुलै २०२६ रोजी घडली. या खचलेल्या भागात एक चारचाकी कार अडकल्याने परिसरातील वाहतुकीस अडथळा निर्माण झाला होता. मात्र, घटनेची माहिती मिळताच नांदेड वाघाळा शहर महानगरपालिकेची आपत्कालीन यंत्रणा तातडीने घटनास्थळी दाखल झाली आणि युद्धपातळीवर उपाययोजना करून परिस्थिती नियंत्रणात आणली.

गुरुवारी दुपारच्या सुमारास नेताजी सुभाषचंद्र बोस महाविद्यालया समोरील खाजगी रस्त्याचा एक हिस्सा अचानक खचला. त्याच वेळी तिथून जाणाऱ्या एका कारचे चाक या खचलेल्या भागात अडकले. सदरील रस्ता हा महाविद्यालयाने एका खाजगी जागेतून महाविद्यालयात ये-जा करण्यासाठी स्वतःहून निर्माण केला होता. घटनेचे गांभीर्य ओळखून स्थानिक नागरिकांनी मनपा प्रशासनाला तात्काळ सूचित केले. मनपा आयुक्त डॉ. महेशकुमार डोईफोडे आणि उपमहापौर दीपकसिंह रावत यांच्या निर्देशानुसार, मनपाचे आपत्कालीन पथक, अग्निशामक दल आणि बांधकाम विभागाचे कर्मचारी जेसीबी व आवश्यक यंत्रसामग्रीसह काही मिनिटांतच घटनास्थळी पोहोचले. घटनास्थळी मनपा कर्मचाऱ्यांनी क्रेन आणि जेसीबीच्या साहाय्याने अडकलेली कार अत्यंत काळजीपूर्वक आणि सुरक्षितपणे खचलेल्या भागातून बाहेर काढली. सुदैवाने या घटनेत कोणालाही दुखापत झाली नाही. कार बाहेर काढल्यानंतर पुढील अपघात टाळण्यासाठी तात्काळ बॅरिकेड्स लावून तो भाग सुरक्षित करण्यात आला.

सदरील खाजगी रस्ता खचल्या नंतर विद्यार्थ्यांच्या सुरक्षिततेसाठी खचलेला भाग तातडीने मुरूम आणि खडी टाकून बुजवण्यात आला असून, उद्यापर्यंत हा रस्ता वाहतुकीसाठी पूर्णपणे पूर्ववत करण्यात येईल,अशी माहिती मनपाचे अतिरिक्त आयुक्त गिरीश कदम व कार्यकारी अभियंता दिलीप टाकळीकर यांनी दिली आहे. तसेच या रस्त्या संदर्भात व्ही.व्ही.आय.पी. दौऱ्याच्या वेळी महाविद्यालयाकडे जानारा सदरील रस्ता करण्यासाठी महाविद्यालय प्रशासनाने वेळोवेळी महापलिकेकडे विनंती केली होती. परंतु खाजगी मालमत्ता धारकाने सदरील रस्त्याच्या बंधकामास विरोध केला होता. हा रस्ता होण्यासाठी वारंवार जिल्हाधिकारी कार्यालयात बैठका होऊन सुद्धा खाजगी मालमत्ता धारकाने या रस्त्याच्या बांधकामास विरोध दर्शविला असल्याने आजतागायत सदरील रस्त्याचे काम महापालिके मार्फत होऊ शकले नाही, ही पार्श्वभूमि सुद्धा यावेळी पालिकेचे अतिरिक्त गिरीश कदम यांनी विशद केली. घटनास्थळी उपाययोजना चालू असताना प्रभाग क्रमांक १७ मधील सर्व नगरसेवकांची उपस्थिती होती. नागरिकांच्या सुरक्षेसाठी महानगरपालिका सदैव तत्पर असून, अशा आपत्कालीन परिस्थितीत नागरिकांनी प्रशासनाला सहकार्य करावे, असे आवाहन नांदेड महानगरपालिकेच्या वतीने करण्यात आले आहे.

31/07/2026

आपत्कालीन सेवा