Zilla Parishad, Nandurbar

07/08/2026

७ ऑगस्ट - राष्ट्रीय हातमाग दिन.
राष्ट्रीय हातमाग दिन (National Handloom Day) दरवर्षी ७ ऑगस्ट रोजी भारताच्या समृद्ध हातमाग परंपरेचा सन्मान करण्यासाठी आणि कारागिरांना प्रोत्साहन देण्यासाठी साजरा केला जातो.
स्वदेशी चळवळीचे स्मरण: ७ ऑगस्ट १९०५ रोजी कोलकाता येथील टाउन हॉलमध्ये स्वदेशी चळवळीची औपचारिक सुरुवात झाली होती. परदेशी कपड्यांचा बहिष्कार करून स्वदेशी वस्तू आणि हातमाग उद्योगाला पाठिंबा देणे हा या आंदोलनाचा मुख्य उद्देश होता.
या ऐतिहासिक घटनेची आठवण म्हणून भारत सरकारने २०१५ मध्ये ७ ऑगस्ट हा दिवस 'राष्ट्रीय हातमाग दिन' म्हणून घोषित केला.
महत्त्व आणि वैशिष्ट्ये
• महिला सक्षमीकरण: भारतातील हातमाग क्षेत्रातील एकंदर कामगारांपैकी ७०% हून अधिक कामगार महिला आहेत.
• रोजगारनिर्मिती: कृषी क्षेत्रांनंतर ग्रामीण भागात सर्वाधिक शाश्वत रोजगार पुरवणारे हे महत्त्वाचे क्षेत्र आहे.
• सांस्कृतिक वारसा: महाराष्ट्रातील पैठणी असो वा दक्षिणेतील कांजीवरम किंवा बनारसी सिल्क, हातमाग भारताच्या पारंपरिक विविधतेचा कणा आहे.
शाश्वत परंपरा आणि कारागिरीचा गौरव!
आज ७ ऑगस्ट - राष्ट्रीय हातमाग दिन. आपल्या संस्कृतीचे रक्षण करणाऱ्या आणि हातांच्या कौशल्याने सुताला रंग रूप देणाऱ्या देशभरातील तमाम विणकर व कारागीर बंधू-भगिनींना मानाचा मुजरा!
स्वदेशीच्या तत्त्वाला जपण्यासाठी आणि स्थानिक कारागिरांना प्रोत्साहन देण्यासाठी 'व्होकल फॉर लोकल'चा (Vocal for Local) पुरस्कार करूया आणि हातमाग उत्पादनांचा अभिमानाने वापर करूया.

07/08/2026

जागतिक स्तनपान सप्ताह
१ ऑगस्ट ते ७ ऑगस्ट २०२६
निमित्ताने जाणून घेऊया...
स्तनपानाविषयीचे समज आणि गैरसमज

07/08/2026

ई-केवायसी मोहिमेला गती देण्याचे डॉ. ओमप्रकाश शेटे यांचे निर्देश: नंदुरबार जिल्ह्यात विशेष अभियान!
नंदुरबार जिल्ह्यातील दुर्गम, आदिवासी आणि पावसाळ्यात संपर्क तुटणाऱ्या भागातील एकही पात्र नागरिक महात्मा ज्योतिराव फुले जन आरोग्य योजना आणि आयुष्मान भारत प्रधानमंत्री जन आरोग्य योजनेच्या लाभापासून वंचित राहू नये, यासाठी आयुष्मान कार्ड ई-केवायसी (e-KYC) मोहिमेला अधिक गती देऊन गावात विशेष अभियान राबवावे, असे निर्देश आयुष्मान भारत मिशन महाराष्ट्र समितीचे अध्यक्ष डॉ. ओमप्रकाश स. शेटे यांनी दिले आहेत.
जिल्हा नियोजन समितीच्या सभागृहात आयोजित आढावा बैठकीत जिल्हाधिकारी डॉ. मित्ताली सेठी, जिल्हा परिषदेचे मुख्य कार्यकारी अधिकारी नमन गोयल, जिल्हा शल्य चिकित्सक डॉ. विनय सोनवणे आणि जिल्हा आरोग्य अधिकारी डॉ. रवींद्र सोनवणे यांच्या प्रमुख उपस्थितीत हा आढावा घेण्यात आला.
प्रमुख मुद्दे व अंमलबजावणी:
• कॅशलेस व मोफत उपचार: १ जुलै २०२४ पासून पात्र कुटुंबांना दरवर्षी ₹५ लाखांपर्यंत मोफत आरोग्य संरक्षण, चाचण्या, शस्त्रक्रिया व औषधे दिली जात आहेत. यामध्ये २,३१९ हून अधिक आजार व शस्त्रक्रियांचा समावेश आहे.
• आरोग्य यंत्रणेची स्थिती: जिल्ह्यात १ वैद्यकीय महाविद्यालय व जिल्हा रुग्णालय, २ महिला रुग्णालये, २ उपजिल्हा रुग्णालये, १२ ग्रामीण रुग्णालये, ६४ प्राथमिक आरोग्य केंद्रे, २९३ आयुष्मान आरोग्य मंदिरे, ४० भरारी पथके, ९ नागरी आरोग्यवर्धिनी केंद्रे व ५ हिंदुहृदयसम्राट बाळासाहेब ठाकरे आपला दवाखाने कार्यरत आहेत.
• ई-केवायसी प्रगती: आयुष्मान भारत गोल्डन कार्ड अभियानात १४,८३,३७२ लक्षित लाभार्थ्यांपैकी ७,४६,३७२ नागरिकांची (५०.३५%) ई-केवायसी पूर्ण झाली आहे. तसेच, ७६,१४६ लक्षित ज्येष्ठ नागरिकांपैकी २५,४१० नागरिकांची 'आयुष्मान वय वंदना कार्ड' अंतर्गत ई-केवायसी पूर्ण झाली आहे.
• विशेष मोहिमेचे नियोजन: ई-केवायसीला गती देण्यासाठी ३१० आशा सेविका, ६२३ सीएससी केंद्रे आणि २२९ रास्त धान्य दुकाने मिळून एकूण १,१६२ लॉगिन आयडी पुन्हा सक्रिय करण्यात आले आहेत. शहादा, नवापूर आणि तळोदा तालुक्यांनी यात लक्षणीय प्रगती नोंदवली आहे.
बैठकीच्या शेवटी, दुर्गम भागात प्रतिकूल परिस्थितीतही नागरिकांपर्यंत आरोग्य सेवा पोहोचवणाऱ्या आरोग्य कर्मचारी आणि आशा सेविकांच्या कामाचे डॉ. शेटे यांनी विशेष कौतुक केले.
प्रलंबित ई-केवायसी तातडीने पूर्ण करून सर्व पात्र नागरिकांना दर्जेदार व वेळेत कॅशलेस उपचार उपलब्ध करून देण्याच्या सूचना सर्व संबंधित यंत्रणांना देण्यात आल्या आहेत.

06/08/2026

जिल्हा परिषद नंदुरबार: स्वयं सहाय्यता गटांचे बँक लिंकेज, कर्जपुरवठा व NPA नियंत्रणासाठी मुख्य कार्यकारी अधिकाऱी, नमन गोयल(भाप्रसे) यांच्या अध्यक्षतेखाली जिल्हास्तरीयय आढावा बैठक संपन्न!
महाराष्ट्र राज्य ग्रामीण जीवनोन्नती अभियान (MSRLM - उमेद) अंतर्गत स्वयं सहाय्यता गटांचे (SHGs) बँक लिंकेज, वित्तीय समावेशन आणि वैयक्तिक उद्योग-व्यवसाय कर्जपुरवठ्याला गती देण्यासाठी आज (०५ ऑगस्ट २०२६) जिल्हा परिषद, नंदुरबार येथे महत्त्वपूर्ण आढावा बैठक पार पडली.
ग्रामीण भागातील महिलांना आर्थिकदृष्ट्या सक्षम करण्यासाठी बँकिंग समन्वय आणि कर्जपुरवठा अधिक प्रभावी करण्यावर या बैठकीत भर देण्यात आला.
बैठकीतील महत्त्वाचे विषय व दिलेले निर्देश:
• पतपुरवठा व बँकिंग समन्वय: स्वयं सहाय्यता गटांना वेळेवर व पुरेसा पतपुरवठा उपलब्ध करून देण्यासाठी बँकांनी अधिक सकारात्मक व समन्वयाची भूमिका घेण्याचे निर्देश देण्यात आले.
• NPA नियंत्रण व उपाययोजना: थकीत कर्जांच्या (NPA) समस्येवर सविस्तर चर्चा करण्यात आली. बँकांनी थकीत कर्ज कमी करण्यासाठी ठोस उपाययोजना कराव्यात, अशा सूचना देण्यात आल्या.
• CBRM कमिटीची स्थापना: एनपीए वर प्रभावी नियंत्रण ठेवण्यासाठी बँकस्तरावर 'सीबीआरएम (CBRM) कमिटी' स्थापन करून नियमित बैठका आयोजित करण्याचे निश्चित करण्यात आले.
• प्रलंबित बँक खाती उघडणे: स्वयं सहाय्यता समूह, ग्रामसंघ आणि प्रभाग संघांची बँकांमध्ये प्रलंबित असलेली सर्व खाती तात्काळ उघडण्याची कारवाई पूर्ण करण्याचे निर्देश दिले.
• वैयक्तिक उद्योग कर्जपुरवठा: वैयक्तिक उद्योग-व्यवसायासाठी सादर केलेल्या सर्व कर्ज प्रस्तावांवर बँकांनी त्वरित निर्णय घेऊन पात्र लाभार्थ्यांना कर्ज वितरण पूर्ण करावे.
• प्रलंबित प्रस्ताव शून्य करणे: बँकांकडे प्रलंबित असलेल्या सर्व प्रस्तावांची संख्या वेळेच्या मर्यादेत शून्यावर आणण्याचे स्पष्ट निर्देश यावेळी देण्यात आले.
बैठकीस उपस्थित अधिकारी व कर्मचारी :-
या महत्त्वपूर्ण बैठकीस जिल्हा ग्रामीण विकास यंत्रणेचे प्रकल्प संचालक श्री. परमेश्वर राऊत, जिल्हा बँकांचे जिल्हा समन्वयक, उमेद अभियानाचे जिल्हा अभियान व्यवस्थापक श्री. यशवंत ठाकूर, जिल्हा व्यवस्थापक (आर्थिक समावेशन) श्री. उमेश अहिरराव, उमेद कक्षाचे कर्मचारी तसेच नंदुरबार जिल्ह्यातील सहाही तालुक्यांचे तालुका व्यवस्थापक (आर्थिक समावेशन) उपस्थित होते.

06/08/2026

NEET/JEE/MHT-CET ची तयारी करू इच्छिणाऱ्या अनुसूचित जमातीच्या विद्यार्थ्यांसाठी ही सुवर्णसंधी आहे.

NEET / JEE / MHT-CET ची तयारी करू इच्छिणाऱ्या अनुसूचित जमातीच्या विद्यार्थ्यांसाठी सुवर्णसंधी!

अनुसूचित जमाती (ST) प्रवर्गातील गुणवंत विद्यार्थ्यांना NEET, JEE आणि MHT-CET या स्पर्धा परीक्षांच्या दर्जेदार तयारीसाठी विशेष मार्गदर्शनाची संधी उपलब्ध झाली आहे.

तज्ज्ञ शिक्षकांचे मार्गदर्शन
स्पर्धा परीक्षांवर आधारित दर्जेदार प्रशिक्षण
उज्ज्वल शैक्षणिक व करिअर घडविण्याची उत्तम संधी
गुणवत्तापूर्ण शिक्षणाद्वारे यशाची वाट

डॉक्टर, अभियंता किंवा इतर व्यावसायिक क्षेत्रात करिअर करण्याचे स्वप्न पाहणाऱ्या अनुसूचित जमातीच्या विद्यार्थ्यांनी या संधीचा लाभ घ्यावा.

अधिक माहितीसाठी संबंधित एकात्मिक आदिवासी विकास प्रकल्प कार्यालय किंवा आदिवासी विकास विभागाशी संपर्क साधावा.

04/08/2026

सिंगल वर्किंग वुमन्स डे: कार्यक्षेत्रातील अविवाहित महिलांचे कष्ट, स्वावलंबन आणि त्यांच्या योगदानाचा गौरव करणारा दिवस.

04/08/2026

02/08/2026

🤱 जागतिक स्तनपान सप्ताह: सशक्त माता, सुदृढ बाळ!
दरवर्षी १ ऑगस्ट ते ७ ऑगस्ट दरम्यान जगभरात 'जागतिक स्तनपान सप्ताह' (World Breastfeeding Week) साजरा केला जातो. जागतिक आरोग्य संघटना (WHO) आणि युनिसेफ (UNICEF) द्वारे बाळाच्या आरोग्यासाठी, सुरक्षेसाठी आणि योग्य वाढीसाठी स्तनपानाचे महत्त्व पटवून देणे हा या सप्ताहाचा मुख्य उद्देश आहे.
🌟 स्तनपान का महत्त्वाचे आहे?
आईचे दूध हे नवजात बालकासाठी सर्वोत्तम आणि पूर्ण अन्न मानले जाते.
• बाळासाठी फायदे:
o पहिली नैसर्गिक लस: बाळाच्या जन्मानंतर येणारे पहिले घट्ट, पिवळसर दूध (चिकाचे दूध / Colostrum) बाळासाठी पहिल्या डोसप्रमाणे किंवा लसीप्रमाणे काम करते.
o पूर्ण पोषण: पहिल्या ६ महिन्यांपर्यंत बाळाला आवश्यक असणारे सर्व पोषक घटक आणि पाणी आईच्या दुधातूनच मिळते. या काळात वरचे पाणी किंवा इतर काहीही देण्याची गरज नसते.
o आजारांपासून संरक्षण: बाळाची रोगप्रतिकारक शक्ती वाढते; त्यामुळे जुलाब, न्यूमोनिया, ॲलर्जी आणि इन्फेक्शन यांसारख्या आजारांचा धोका कमी होतो.
o मानसिक व शारीरिक विकास: बाळाच्या मेंदूचा विकास वेगाने होतो आणि आईसोबतचे भावनिक नाते घट्ट होते.
• मातांसाठी फायदे:
o आरोग्याचे रक्षण: स्तनपान करणाऱ्या महिलांमध्ये कर्करोग (Breast & Ovarian Cancer), टाईप-२ मधुमेह आणि बाळंतपणानंतरचा ताण-तणाव (Postpartum Depression) कमी होण्यास मदत होते.
o जलद पुनर्प्राप्ती: बाळंतपणानंतर गर्भाशय मूळ आकारात येण्यास मदत होते.
📌 आरोग्य तज्ज्ञांचा महत्त्वाचा सल्ला
1. लवकरात लवकर सुरुवात: बाळ जन्माला आल्यावर अर्ध्या ते एका तासाच्या आत त्याला स्तनपान सुरू करावे.
2. ६ महिने निव्वळ स्तनपान: पहिल्या ६ महिन्यांपर्यंत बाळाला फक्त आणि फक्त आईचेच दूध द्यावे (वरचे पाणी, मध, किंवा घुटी देऊ नये).
3. सतत स्तनपान: ६ महिने पूर्ण झाल्यानंतर बाळाला योग्य ते पूरक अन्न (सात्विक आहार) सुरू करून, सोबतच २ वर्षे किंवा त्याहून अधिक काळ स्तनपान सुरू ठेवावे.
🤝 कुटुंब आणि समाजाची साथ आवश्यक
स्तनपान ही केवळ आईची एकटीची जबाबदारी नाही, तर संपूर्ण कुटुंबाचे आणि समाजाचे कर्तव्य आहे:
• कुटुंबाची साथ: घरातील कामांत मदत करून आईला पुरेसा आराम व प्रोत्साहन देणे.
• कामाच्या ठिकाणी सोयी: नोकरी करणाऱ्या महिलांसाठी मातृत्व रजा (Maternity Leave) आणि कामाच्या ठिकाणी स्तनपानासाठी स्वतंत्र व सुरक्षित जागा असणे गरजेचे आहे.

#जागतिकस्तनपानसप्ताह #आईचेदूध #आरोग्यसल्ला #बालसंगोपन #स्तनपानसप्ताह

02/08/2026

थोर समाजसेवक, साहित्यरत्न, लोकशाहीर अण्णाभाऊ साठे यांना जयंती दिनी विनम्र अभिवादन.