Citilinc Connecting Nashik, CITILINC Bhavan, Golf Club Ground, Trimbakeswar Road, Nashik (2026)

25/07/2026

नाशिक महानगर परिवहन महामंडळ लि. (सिटीलिंक) च्या वतीने सर्व प्रवाशांना आषाढी एकादशी निमित्त हार्दिक शुभेच्छा !

23/07/2026

सिंहस्थ कुंभमेळा २०२७ च्या पार्श्वभूमीवर नाशिकची सार्वजनिक वाहतूक व्यवस्था अधिक सक्षम, आधुनिक आणि पर्यावरणपूरक करण्यासाठी PM-eBus सेवा योजनेअंतर्गत नाशिक सिटी लिंक व JBM Ecolife Mobility यांच्यात १० वर्षांचा महत्त्वपूर्ण करार संपन्न झाला. नाशिक महानगर परिवहन महामंडळ लि. चे संचालक महापौर हिमगौरी आहेर (आडके), उपमहापौर विलास शिंदे, स्थायी समिती सभापती मच्छिंद्र सानप, सत्ताधारी पक्षाचे गटनेते श्याम बडोदे, विरोधी पक्षाचे गटनेते केशव पोरजे सिटी लिंकचे मुख्य कार्यकारी अधिकारी विजयकुमार मुंडे यांच्या प्रमुख उपस्थितीत सदर करार करण्यात आला.

08/07/2026

नाशिक महानगर परिवहन महामंडळ लि. (सिटीलिंक)च्या ५ व्या वर्धापन दिनानिमित्त प्रवाश्यांना गुलाबपुष्प व पेढेवाटप करण्यात आले..तसेच सिटीलिंक मुख्य कार्यालय याठिकाणी आकर्षक सजावट देखील करण्यात आली...

08/07/2026

सिटीलिंकच्या अभिमानाचा पाच वर्षांचा यशस्वी प्रवास! 🚌✨

सेवा, विश्वास आणि प्रगतीच्या बळावर सिटीलिंकने नाशिककरांच्या दैनंदिन प्रवासाला दिली नवी दिशा. आज ५४ सक्रिय मार्गांवरून २५० हून अधिक बसेसद्वारे दररोज १ लाखांहून अधिक प्रवाशांना सुरक्षित, सुलभ व विश्वासार्ह सेवा दिली जात आहे.

तंत्रज्ञानाधारित ITMS प्रणाली, UPI तिकीट सुविधा, GPS-आधारित माहिती व आगामी स्मार्ट सेवा यांच्या माध्यमातून सिटीलिंकचा प्रवास अधिक स्मार्ट आणि प्रवासी-केंद्रित होत आहे.

स्वच्छ, स्मार्ट, सुरक्षित आणि शाश्वत सार्वजनिक वाहतुकीसाठी सिटीलिंकची वचनबद्धता कायम!
धन्यवाद नाशिककर!

06/07/2026

अतिवृष्टीच्या इशाऱ्याच्या पार्श्वभूमीवर सिटीलिंक बससेवेत तात्पुरते बदल.

भारतीय हवामान विभागाने मंगळवार, दिनांक ७ जुलै २०२६ रोजी नाशिक जिल्ह्यासाठी रेड अलर्ट जारी करून अतिवृष्टीचा इशारा दिला आहे. सदर इशाऱ्याच्या पार्श्वभूमीवर त्र्यंबकेश्वर येथील मंदिरे बंद ठेवण्याचा निर्णय घेण्यात आला असून, नाशिक जिल्ह्यातील शाळांनाही सुट्टी जाहीर करण्यात आली आहे.

या पार्श्वभूमीवर नाशिक महानगर परिवहन महामंडळ लिमिटेड (सिटीलिंक) प्रशासनाने प्रवाशांची सुरक्षितता व संभाव्य परिस्थिती विचारात घेऊन दिनांक ७ जुलै २०२६ रोजी बससेवेचे तात्पुरते नियोजन करण्याचा निर्णय घेतला आहे. त्यानुसार काही मार्गांवरील बसफेऱ्यांची संख्या आवश्यकतेनुसार कमी करण्यात येणार आहे.

तथापि, प्रवाशांची संख्या, मार्गावरील परिस्थिती तसेच अत्यावश्यक गरज लक्षात घेऊन आवश्यक त्या ठिकाणी तात्काळ अतिरिक्त बसफेऱ्या उपलब्ध करून देण्यात येतील.

प्रवाशांनी दिनांक ७ जुलै २०२६ रोजी प्रवास करण्यापूर्वी संबंधित बसमार्ग, बसफेऱ्या व वेळापत्रकाबाबतची अद्ययावत माहिती घेऊनच प्रवासाचे नियोजन करावे, असे आवाहन सिटीलिंक प्रशासनाच्या वतीने करण्यात येत आहे.

तसेच अतिवृष्टीच्या पार्श्वभूमीवर नागरिकांनी अत्यावश्यक काम असल्यासच घराबाहेर पडावे व प्रशासनाने दिलेल्या सूचनांचे पालन करावे, असेही आवाहन नाशिक महानगर परिवहन महामंडळ लिमिटेडच्या वतीने करण्यात येत आहे.

25/06/2026

तिकीट काढतांना सुट्ट्या पैश्यांची कटकट संपली, सिटीलिंक प्रवाश्यांना करता येणार आता डिजिटल पेमेंट, महापौरांच्या हस्ते शुभारंभ.

नाशिक महानगर परिवहन महामंडळ लि. (सिटीलिंक) तर्फे प्रवाशांसाठी बसमधून प्रवास करताना डिजिटल पद्धतीने तिकीट काढण्याच्या सुविधेचा आज शुभारंभ करण्यात आला. या अत्याधुनिक यंत्रणेचा शुभारंभ मा. महापौर श्रीमती हिमगौरी आहेर व मा. उपमहापौर श्री. विलास शिंदे यांच्या हस्ते नाशिक महानगरपालिका येथील राजीव गांधी भवन बस स्टॉप येथे संपन्न झाला.

यावेळी महापौर हिमगौरी आहेर व उपमहापौर विलास शिंदे यांनी राजीव गांधी भवन बस स्टॉप ते कुलकर्णी गार्डन बस स्टॉप असा सिटीलिंक बसमधून प्रवास करत डिजिटल पद्धतीने तिकीट काढून या नव्या सुविधेचा प्रत्यक्ष अनुभव घेतला. यावेळी नागरिकांनी जास्तीत जास्त प्रमाणात या डिजिटल तिकीट सुविधेचा लाभ घ्यावा आणि सिटीलिंक बसमधून प्रवास करताना डिजिटल पद्धतीने तिकीट काढावे, असे आवाहन करण्यात आले.

सिटीलिंकच्या या नव्या सुविधेमुळे प्रवाशांना आता बसमध्येच कोणतेहीUPI, डेबिट कार्ड, क्रेडीट कार्ड अश्या डिजिटल माध्यमातून त्वरित, सुलभ आणि सुरक्षित पद्धतीने तिकीट उपलब्ध होणार आहे. यामुळे तिकीट वितरण प्रक्रिया अधिक वेगवान, अचूक आणि पारदर्शक होणार असून रोख व्यवहारांवरील अवलंबित्व कमी होण्यास मदत होणार आहे. तसेच प्रवासी आणि वाहक यांच्यात सुट्ट्या पैशांवरून होणारे वाद टाळण्यासही या यंत्रणेचा मोठा उपयोग होणार आहे.

या प्रसंगी सिटीलिंकचे मुख्य कार्यकारी अधिकारी श्री. विजयकुमार मुंडे यांनी सिटीलिंककडून प्रवाशांसाठी अधिकाधिक तंत्रज्ञानाधारित, स्मार्ट आणि प्रवाशाभिमुख सेवा उपलब्ध करून देण्याचा प्रयत्न सातत्याने सुरू असल्याचे सांगितले. डिजिटल तिकीट यंत्रणा ही त्या दिशेने उचललेले एक महत्त्वपूर्ण पाऊल असल्याचेही त्यांनी नमूद केले.

सदर कार्यक्रमाप्रसंगी मुख्य कार्यकारी अधिकारी विजयकुमार मुंडे, मुख्य महाव्यवस्थापक बाजीराव माळी, महाव्यवस्थापक (वाहतूक) राहुल तोरो, महाव्यवस्थापक (प्रशासन व तांत्रिकी) रघुनाथ कांबळे, उपमहाव्यवस्थापक (वाहतूक) संजय सुर्वे, उपमहाव्यवस्थापक (प्रशासन व तांत्रिकी) विकास जोशी, जनसंपर्क अधिकारी तथा प्रशासन व्यवस्थापक दिपाली घाटोळ, व्यवस्थापक (आयटी) दिनेश देसले, व्यवस्थापक स्वप्निल पवार, चिन्मय खैरनार, नितीन तांबे, स्वप्निल सांगळे, अजित बच्छाव यांच्यासह सिटीलिंकचे अधिकारी व कर्मचारी मोठ्या संख्येने उपस्थित होते.

नाशिक महानगर परिवहन महामंडळ लि. तर्फे नाशिककर नागरिकांनी या डिजिटल सुविधेचा अधिकाधिक लाभ घ्यावा, असे आवाहन नाशिक महानगर परिवहन महामंडळ लि. च्या वतीने करण्यात आले आहे.

24/06/2026

सिटीलिंकमध्ये प्रवाश्यांसाठी सर्व प्रकारचे UPI तसेच क्रेडिट व डेबिट कार्डद्वारे तिकीट देण्याच्या सुविधेचा शुभारंभ. दि. २५ जून रोजी महापौर हिमगौरी आहेर यांच्या हस्ते होणार शुभारंभ.

नाशिक महानगर परिवहन महामंडळ लि. (सिटीलिंक) प्रवाशांना अधिक वेगवान, पारदर्शक आणि आधुनिक सेवा देण्याच्या दिशेने आणखी एक महत्त्वपूर्ण पाऊल उचलत आहे. प्रवाशांना तिकीट वितरण अधिक सुलभ, अचूक व तंत्रज्ञानाधिष्ठित पद्धतीने उपलब्ध करून देण्यासाठी ETIM (Electronic Ticket Issuing Machine) या अत्याधुनिक यंत्रणेचा शुभारंभ गुरुवार, दिनांक २५ जून रोजी आयोजित करण्यात आला आहे.
सदर शुभारंभ मा. महापौर श्रीमती हिमगौरी आहेर यांच्या हस्ते पार पडणार असून मा. आयुक्त श्रीमती मनिषा खत्री व मा. उपमहापौर विलास शिंदे यांची प्रमुख उपस्थिती लाभणार आहे. या उपक्रमामुळे नाशिक सिटीलिंकच्या प्रवासी सेवेत आधुनिक तंत्रज्ञानाचा प्रभावी वापर होणार असून, दैनंदिन तिकीट प्रक्रियेत मोठ्या प्रमाणात सुसूत्रता येणार आहे.
ETIM मशीनच्या माध्यमातून बसमधील तिकीट वितरण प्रक्रिया UPI तसेच क्रेडिट व डेबिट कार्डद्वारे अधिक जलद, सुरक्षित आणि पारदर्शक होणार आहे. प्रवाशाला दिले जाणारे तिकीट डिजिटल प्रणालीद्वारे तत्काळ तयार होणार असल्याने तिकीट देण्यातील विलंब कमी होईल, तसेच प्रवासी व वाहक यांचेत सुट्टे पैश्यांवरून होणार वाद देखील आता कायमचे मिटणार आहे. तसेच तिकीट व्यवहारांची अचूक नोंद होण्यास मदत होईल. यामुळे महसूल व्यवस्थापन अधिक सक्षम होईल आणि प्रवाशांनाही अधिक विश्वासार्ह सेवा मिळेल.

ETIM मशीनचे प्रमुख फायदे :

१) जलद आणि अचूक तिकीट वितरण
ETIM मशीनमुळे वाहकाला तिकीट देण्याची प्रक्रिया अधिक वेगाने करता येणार आहे. भाडे, टप्पे, सवलती, मार्ग इत्यादींची नोंद प्रणालीमध्ये असल्यामुळे तिकीट देताना मानवी चुका होण्याची शक्यता कमी होईल.

२) रोख व्यवहारांवरील नियंत्रण
ETIM प्रणालीमुळे तिकीट विक्रीची संपूर्ण माहिती तत्काळ उपलब्ध होणार असल्याने रोख व्यवहारांवर अधिक प्रभावी नियंत्रण ठेवता येईल. तसेच ETIM प्रणालीमुळे कोणतेही UPI, डेबिट कार्ड, क्रेडीट कार्ड द्वारे पेमेंट करून तिकीट काढता येणार आहे. तसेच प्रवासी आणि वाहक यांचेत सुट्ट्यापैश्यांवरून होणारे वाद देखील मिटणार आहे.

३) प्रवाश्यांना अधिक विश्वासार्ह सेवा
प्रवाश्यांना स्पष्ट, व्यवस्थित आणि तत्काळ तिकीट मिळणार असल्याने सेवेत विश्वासार्हता वाढेल. तिकीट तपासणीच्या वेळीही प्रवाशांना अधिक सोयीचे ठरेल.

४) वाहकांच्या कामात सुलभता
वाहकांना तिकीट फाडणे, भाडे मोजणे, तिकीट नोंदी ठेवणे यासाठी लागणारा वेळ कमी होईल. त्यामुळे त्यांना प्रवासी व्यवस्थापनावर अधिक लक्ष केंद्रित करता येईल.

५) आधुनिक, स्मार्ट आणि प्रवासीकेंद्री सेवा
नाशिक सिटीलिंककडून स्मार्ट सिटी संकल्पनेला पूरक अशा आधुनिक सार्वजनिक वाहतूक सेवेकडे हा एक महत्त्वाचा टप्पा मानला जात आहे. ETIM मशीनमुळे तंत्रज्ञानाचा वापर करून नागरिकांना अधिक दर्जेदार सेवा देण्याचा महामंडळाचा प्रयत्न अधिक बळकट होणार आहे.

नाशिक महानगर परिवहन महामंडळ लि. हे सातत्याने प्रवाशाभिमुख, सुरक्षित आणि तंत्रज्ञानाधारित सेवा उपलब्ध करून देण्यासाठी प्रयत्नशील आहे. ETIM मशीनचा शुभारंभ हा त्याच दिशेने उचललेला एक महत्त्वाचा आणि दूरदृष्टीचा उपक्रम असून, यामुळे नाशिककर प्रवाशांना अधिक कार्यक्षम व सुलभ बससेवेचा लाभ मिळणार आहे.
नाशिककर नागरिकांनी या आधुनिक सुविधेचे स्वागत करून सिटीलिंकच्या सेवांचा अधिकाधिक लाभ घ्यावा, असे आवाहन नाशिक महानगर परिवहन महामंडळ लि. तर्फे करण्यात आले आहे.

20/06/2026

NEET परीक्षार्थ्यांसाठी सिटीलिंकची विशेष सुविधा; ९ अतिरिक्त बस धावणार

रविवार, दि. २१ जून २०२६ रोजी होणाऱ्या राष्ट्रीय पात्रता व प्रवेश परीक्षा (NEET) निमित्त परीक्षार्थी विद्यार्थी व त्यांच्या पालकांची गैरसोय होऊ नये यासाठी नाशिक महानगर परिवहन महामंडळ लि. (सिटीलिंक) मार्फत नियमित रविवारच्या बस फेऱ्यांव्यतिरिक्त ९ अतिरिक्त बसची विशेष व्यवस्था करण्यात आली आहे.
परीक्षेच्या दिवशी शहरातील विविध परीक्षा केंद्रांपर्यंत विद्यार्थ्यांना वेळेत व सुरक्षितपणे पोहोचता यावे यासाठी नाशिकरोड व तपोवन आगारातून खालीलप्रमाणे अतिरिक्त बस उपलब्ध करून देण्यात येणार आहेत.
नाशिकरोड आगारातून ५ अतिरिक्त बस :
• मार्ग क्र. २०२ : नाशिकरोड डेपो – बारदान फाटा मार्गे एचपीटी (३ बस)
• मार्ग क्र. २३१ : नाशिकरोड डेपो – जेआयटी कॉलेज मार्गे अशोकनगर, बारदान फाटा (१ बस)
• मार्ग क्र. २०८ : नाशिकरोड डेपो – ओझर टाऊनशिप मार्गे इंदिरानगर, मुंबई नाका (१ बस)
तपोवन आगारातून ४ अतिरिक्त बस :
• मार्ग क्र. १०४ : तपोवन – पाथर्डी गाव मार्गे साईनाथ नगर (२ बस)
• मार्ग क्र. १०६ : तपोवन – अमृतानगर मार्गे मुंबई नाका (१ बस)
• मार्ग क्र. १२९ : तपोवन – भगूर मार्गे जयभवानी रोड (१ बस)
NEET परीक्षेसाठी शहरातील विविध भागांतून परीक्षा केंद्रांवर जाणाऱ्या विद्यार्थ्यांनी तसेच नागरिकांनी सिटीलिंकच्या सुरक्षित, किफायतशीर व पर्यावरणपूरक बससेवेचा जास्तीत जास्त लाभ घ्यावा, असे आवाहन सिटीलिंक प्रशासनाच्या वतीने करण्यात आले आहे.

08/06/2026

सिटीलिंक बस चालकांसाठी रस्ता सुरक्षा प्रशिक्षण; पहिल्या सत्रात ४८ चालकांना प्रशिक्षण.

युनायटेड वे मुंबई, बॉश इंडिया, नाशिक शहर वाहतूक शाखा आणि नाशिक महानगर परिवहन महामंडळ लि. (सिटीलिंक) यांच्या संयुक्त विद्यमाने एसीपी कार्यालय, नाशिक येथे बस चालकांसाठी रस्ता सुरक्षा प्रशिक्षण कार्यक्रमाचे आयोजन करण्यात आले आहे. सिटीलिंकचे मुख्य कार्यकारी अधिकारी विजयकुमार मुंडे यांच्या मार्गदर्शनाखाली व महाव्यवस्थापक (वाहतूक) राहूल तोरो, उपमहाव्यवस्थापक (वाहतूक) संजय सुर्वे यांच्या पुढाकाराने या रस्ता सुरक्षा प्रशिक्षण कार्यक्रमाचे आयोजन करण्यात आले असून या उपक्रमांतर्गत टप्प्याटप्याने सिटीलिंकच्या सर्व चालकांना प्रशिक्षण देण्यात येणार आहे.
रविवार, दि. ७ जून रोजी पार पडलेल्या पहिल्या सत्रात तपोवन डेपोचे २७ व नाशिकरोड डेपोचे २१ अशा एकूण ४८ चालकांना प्रशिक्षण देण्यात आले.
प्रशिक्षणादरम्यान वाहतूक नियमांचे पालन, सुरक्षित वाहन चालविण्याच्या पद्धती, वाहनाचा वेग नियंत्रणात ठेवणे, सीट बेल्टचा वापर, वाहन चालविताना मोबाईल फोनचा वापर टाळणे, वाहनांची नियमित देखभाल तसेच मद्यपान करून वाहन चालविण्याचे दुष्परिणाम याबाबत सविस्तर मार्गदर्शन करण्यात आले. तसेच ट्रॅफिक सिग्नल, स्टॉप लाईन, झेब्रा क्रॉसिंग यांचे महत्त्व आणि रस्ते सुरक्षेसाठी आवश्यक बाबींची माहिती देण्यात आली.
याशिवाय प्रवाशांशी नम्र व सभ्य वर्तन ठेवणे, आपत्कालीन वाहनांना प्राधान्याने मार्ग देणे, वाढत्या अपघातांची कारणे व प्रतिबंधात्मक उपाययोजना याबाबत मार्गदर्शन करण्यात आले. गुड समॅरिटन (Good Samaritan) कायद्यांतर्गत अपघातग्रस्तांना मदत करणाऱ्या नागरिकांच्या संरक्षणासंदर्भातही माहिती देण्यात आली.
कार्यक्रमात सीट बेल्ट कन्व्हिन्सरद्वारे सीट बेल्ट न वापरल्यास होणारे गंभीर परिणाम दाखविण्यात आले. तसेच दुचाकी सिम्युलेटरच्या माध्यमातून वाहतूक नियमांचे उल्लंघन केल्यास उद्भवणाऱ्या धोक्यांची प्रात्यक्षिके सादर करण्यात आली. या उपक्रमामुळे चालकांना प्रत्यक्ष अनुभवातून रस्ता सुरक्षेचे महत्त्व अधिक प्रभावीपणे समजले.
या कार्यक्रमास युनायटेड वे मुंबई संस्थेचे प्रकल्प समन्वयक सदाशिव गणगे, रस्ता सुरक्षा प्रशिक्षक विक्की उबाळे, वैशाली नेवे, राकेश ढाकणे तसेच सिटी लिंकचे अधिकारी सुरेश कातकाडे, भगवान मुंडे, चंद्रकांत आव्हाड तसेच नाशिक डेपो चे सुपरवायझर सुदर्शन दराडे उपस्थित होते.

05/06/2026

🌍 जागतिक पर्यावरण दिनाच्या हार्दिक शुभेच्छा! 🌿

स्वच्छ, हरित आणि प्रदूषणमुक्त भविष्यासाठी आजच एक छोटा पण महत्त्वाचा संकल्प करूया.

🚌 दैनंदिन प्रवासासाठी CNG बससेवेचा वापर करून इंधन बचत, वायुप्रदूषण कमी करणे आणि पर्यावरण संवर्धनात आपला सहभाग नोंदवूया.

"सार्वजनिक वाहतूक – पर्यावरण संरक्षणाची प्रभावी वाट!"

चला, हरित उद्यासाठी आजच CNG बसचा पर्याय निवडूया. 🌱💚

Citilinc Connecting Nashik

25/07/2026

23/07/2026

08/07/2026

08/07/2026

06/07/2026

25/06/2026

24/06/2026

20/06/2026

08/06/2026

05/06/2026

Address

Telephone

Website

Alerts

Contact The Organization

Shortcuts

Share

Category

Listing takedown request