Chess club

12/04/2025

നമ്മുടെ താഴെ ചന്തക്കുന്ന് - നെടുമുണ്ടക്കുന്ന് റോഡിന്റെ day/night ചിത്രങ്ങളാണ് ഇതോടൊപ്പം ചേർത്തിരിക്കുന്നത്. 'ഒരാൺതുണ'യില്ലാതെ നമ്മുടെ അമ്മ-പെങ്ങന്മാർക്കും കുട്ടികൾക്കും രാത്രികാലങ്ങളിൽ ഇതുവഴി സഞ്ചരിക്കാൻ പറ്റാത്ത അവസ്ഥ. ഏറെ പരിതാപകരം തന്നെ.!! ടൗണിലെ പല സ്ഥാപനങ്ങളിലും ജോലി ചെയ്ത് വൈകിയെത്തുന്ന അനേകം സ്ത്രീകൾ കൂരിരുട്ടിന്റെ ഭീകരാന്തരീക്ഷം ഭേദിച്ചുവേണം വീടുകളിലെത്താൻ.

മാത്രമല്ല നിലവിൽ സമാധാന സ്വഭാവമുള്ള ഈ പ്രദേശത്തെ ഈ അന്ധകാര സാഹചര്യം സാമൂഹ്യ വിരുദ്ധ പ്രവർത്തനങ്ങൾക്ക് കുടപിടിക്കും മുൻപ് തന്നെ പരിഹരിക്കപ്പെടുക എന്നത് അത്യാവശ്യമാണ്. മാത്രമല്ല നിലവിൽ രാത്രികാലങ്ങളിൽ പലരും 'വേസ്റ്റുകൾ' ഇവിടത്തെ തോട്ടിലും റോഡ് സൈഡിലും നിക്ഷേപിക്കുന്നതും, അത് ഭക്ഷിക്കാൻ പന്നികൾ കൂട്ടം കൂടുന്നതും ശ്രദ്ധയിൽപ്പെട്ടിട്ടുണ്ട്. ഇത് മറ്റൊരു അപകട സാധ്യതയിലേക്ക് നയിക്കും മുൻപ് ഇവിടം പ്രകാശിക്കുക എന്നതല്ലാതെ മറ്റൊരു പരിഹാരമില്ല.

ഒരു സ്ട്രീറ്റ് ലൈറ്റ് സംവിധാനം സ്വന്തം ഡിവിഷനിലെ ജനങ്ങൾക്കുവേണ്ടി അതേ ഡിവിഷനിൽ കൊണ്ടുവരാൻ കൗൺസിലറായ ശ്രീ. എരഞ്ഞിക്കൽ ഇസ്മായീലിന് കഴിയില്ലേ എന്ന ചോദ്യം തെളിഞ്ഞുവരുന്ന ഈ സാഹചര്യത്തിൽ അദ്ദേഹത്തിന്റെ 'മറുപടി/നടപടി ' എത്രയും പെട്ടന്ന് തന്നെ വ്യക്തമാക്കേണ്ടതുണ്ട്.

അതിനായി നമ്മുടെ ആവശ്യം ക്ലബ്ബിന്റെ നേതൃത്വത്തിൽ ഡിവിഷൻ കൗൺസിലറുമായി അടുത്ത ദിവസം തന്നെ ചർച്ച ചെയ്യാൻ തീരുമാനിച്ചിട്ടുണ്ട്.

Posting: 12-04-2025, 11.03 pm

05/04/2025

ഒരു പ്രാദേശിക യുവജന ക്ലബ്ബിന് സമൂഹത്തിൽ എത്രമാത്രം നല്ല ചലനങ്ങൾ സൃഷ്ടിക്കുവാൻ സാധ്യമാണോ അത്രത്തോളം സമൂഹത്തോട് ഉത്തരവാദിത്വമുള്ള വ്യക്തിത്വങ്ങളും ആശയങ്ങളും ചാലനാത്മകമായി നിലകൊള്ളേണ്ടതുണ്ട്.

ചെസ്സ് ക്ലബ്ബിനെ അടുത്ത ഒരു വർഷം ഇവർ നയിക്കും. ആശംസകൾ. ❣️

30/03/2025

കിണറ്റിങ്ങൽ അജീസ് ചികിത്സാ സഹായ ധനത്തിലേക്ക് ചെസ്സ് ക്ലബ്ബിന്റെ എളിയ സഹായം കൈമാറി.! !
പ്രിയ അജീസ്, താങ്കൾ ഒറ്റക്കല്ല, ഞങ്ങളെല്ലാം കൂടെയുണ്ടെന്ന്മാത്രം ഈയവസരത്തിൽ അടിവരയിട്ടുപറയാനാഗ്രഹിക്കുന്നു. കൂടെത്തന്നെ ഈ ധനസമാഹരണത്തിലേക്ക് കയ്യഴിഞ്ഞു സഹായിച്ച ഓരോ കൂടപ്പിറപ്പുകളോടും മറ്റു ക്ലബ്ബുകളോടുമുള്ള ആദരവും രേഖപ്പെടുത്തുന്നു.
ധന കൈമാറ്റ വേളയിൽ ചെസ്സ് ക്ലബ്ബിനെ പ്രതിനിധീകരിച്ചുകൊണ്ട് സെക്രട്ടറി പ്രവീൺ , പ്രസിഡന്റ് നിഷാദ്, ട്രഷറർ റംഷീദ് മറ്റു എകിസ്ക്യൂട്ടീവ് മെബേർസ് ആയിട്ടുള്ള ഇബിനു സാദിഖ്, ഫിർഷാദ്, ഷമീം, ക്ലബ്‌ മെമ്പർ റെനീഷ് എന്നിവർ സാന്നിധ്യമറിയിച്ചു.

01/03/2025

ചെസ്സ് ക്ലബ്ബും യുവജന കൂട്ടായ്മയും ചേർന്ന് സംഘടിപ്പിക്കുന്ന യൂണിറ്റി കപ്പ് 2025 ഒരുങ്ങുന്നു..!!

ബ്രിടീഷുകാരൻ തൊടുത്തുവിട്ട വായു നിറച്ചൊരു ഗോളം മലപ്പുറത്തുകാരന്റെ നെഞ്ചിൽ വന്ന് പതിച്ചത് പതിറ്റാണ്ടുകൾക്ക് മുൻപാണ്...കാലം വെള്ളക്കാരനെ തുരത്തിയോടിച്ചപ്പോഴും മലപ്പുറംകാരൻ അവരിൽനിന്ന് കടംകൊണ്ടത് നെഞ്ചിലേറ്റ കാൽപ്പന്തുകളിയുടെ മാന്ത്രികലഹരി മാത്രമാണ്. നാളിതുവരെയും ആ ഫുട്ബോൾ ലഹരിവീര്യം സന്തുലിതമാക്കുന്നതിൽ പ്രധാനി മലപ്പുറത്തിന്റെ കായികബോധത്തിന്റെ ആത്മാവിനെ തൊട്ടറിഞ്ഞ പ്രാദേശിക ക്ലബ്ബുകൾ തന്നെയാണ്. മലപ്പുറത്തെ ഫുട്ബോൾ മൈതാനികളെ പുളകം കൊള്ളിച്ച ഒട്ടനേകം പ്രതിഭകൾ പിന്നീട് ദേശീയ -രാജ്യാന്തര തലത്തിൽ മിന്നും പ്രകടനം കാഴ്ചവെച്ചപ്പോഴും 'സെവെൻസ് ഫുട്ബോളെന്നെ' മലപ്പുറം 'വേർഷൻ' പതിവുപോലെ പുതിയ താരങ്ങളെ വാർത്തെടുക്കുന്ന തിരക്കിലായിരുന്നു. ചെസ്സ് ക്ലബ്ബ്പോലെ, മറ്റു അനേകം പ്രാദേശിക ക്ലബ്ബ്കളിലൂടെ പുതിയ താരങ്ങൾ ജനിച്ചുകൊണ്ടേയിരിക്കും, മലപ്പുറത്തിന്റെ ഫുട്ബോൾ പ്രേമം അവർക്കൊക്കെ ഊർജംനൽകിക്കൊണ്ടേയിരിക്കും. പ്രാദേശിക ഫുട്ബോൾ ടൂർണമെന്റുകൾ ആ ഊർജത്തിന്റെ ഗതി നിർണയിക്കുംവിധം പ്രവർത്തിക്കും. ഫലമായി മലപ്പുറം കാൽപ്പന്തുകളിയുടെ 'കേരളാ മോഡലായി' എന്നും നിലകൊള്ളും.
ഇപ്പോഴിതാ നിലമ്പൂരിന്റെ ഫുട്ബോൾ പ്രേമത്തിന് മാറ്റ് കൂട്ടാൻ ചെസ്സ് ക്ലബ്ബും യുവജന കൂട്ടായ്മയും ചേർന്ന് സംഘടിപ്പിക്കുന്ന യൂണിറ്റി കപ്പ്‌ 2025 ഏപ്രിൽ ആദ്യവാരം കോടിയേറാൻ പോകുന്നു. മലപ്പുറം ജില്ലയിലെ ഇരുപതിലേറെ ക്ലബ്ബുകളെ ഉൾപ്പെടുത്തിക്കൊണ്ടുള്ള യൂണിറ്റി കപ്പ്‌ 2025 ആവേശോജ്വലമാക്കാൻ നമുക്കൊന്നിക്കാം.

02/02/2025

നിലമ്പൂരിന്റെ ചിരകാല സ്വപ്നത്തിന് 30 വയസ്സ് പിന്നിട്ടിരിക്കുന്നു. കടലാസ്സിൽ മാത്രമൊതുങ്ങിയ ഒരു ബൈപാസ് ഉണ്ട് നിലമ്പൂരിന്, വാഗ്ദാനലംഘനത്തിന്റെയും,അധികാര നിഷ്‌ക്രിയത്വത്തിന്റെയും, ജനാധിപത്യവിരുദ്ധതയുടെയും മുഖചിത്രമായി തുടരുന്നൊരു ബൈപാസ്, ഇന്ന് ഒരുപാട് സാധു മനുഷ്യരുടെ സ്വത്തിനും വീടിനും ബാങ്കുപോലും നാലണ കൽപ്പിക്കാത്തവിധം മൂല്യച്യൂതിയിലേക്ക് തള്ളിവിട്ടൊരു ബൈപാസ്. നാടിന്റെ വികസനത്തെ പുഞ്ചിരിയോടെ വരവേറ്റ ഒരുപറ്റം സാധു മനുഷ്യർ ഇന്ന് നീതിക്കുവേണ്ടി തെരുവിലിറങ്ങുന്നു, ഓരോ നിലമ്പുർക്കാരനും ഐക്യദാർഢ്യം പ്രഖ്യാപിക്കേണ്ട സമയമാണിത്. നീതി സാധ്യമായില്ലെങ്കിൽ വരും തവണ സമ്മതിദായകാവകാശബഹിഷ്‌കരണത്തിന്റെ രൂപത്തിൽ പ്രതിഷേധം അറിയിക്കും എന്നതാണ് ചെസ്സ് ക്ലബ്ബിന്റെ നിലപാട്. നിരാഹാര സമരത്തിന് ഐക്യദാർഢ്യം. .!

02/12/2024

02/12/2024

ഒരു നാടിന്റെ വളർച്ചയെ അടയാളപ്പെടുത്തുന്ന അടിസ്ഥാന വികസനങ്ങളിൽ ഒന്നായ റോഡ് നവീകരണ പ്രവർത്തനങ്ങളിൽ തുരങ്കം സൃഷ്ടിക്കുന്നത് തീർച്ചയായും സമൂഹത്തിനോട് ചെയ്യുന്ന ക്രൂരത തന്നെയാണ്. അത്തരം പ്രവണതകൾക്കെതിരെ ഏതറ്റം വരെയും സന്ധിയില്ലാ പോരാട്ടത്തിന് ചെസ്സ് ക്ലബ്ബ് മുന്നിട്ടിറങ്ങും എന്ന ആമുഖത്തോടെ തന്നെ പറയട്ടെ, താഴെ ചന്തക്കുന്ന് ജംഗ്ഷനിൽ റോഡ് വീതി കൂട്ടുന്ന പ്രവർത്തനങ്ങളുമായി ബന്ധപ്പെട്ട് ചില ക്രമക്കേടുകൾ ശ്രദ്ധയിൽപ്പെടുകയും അതിനെ തുടർന്ന് ക്ലബ്ബിലെ മെമ്പേഴ്സ് പ്രതിഷേധാത്മകമായി ജോലി നിർത്തിവെപ്പിക്കുകയും ചെയ്തിരുന്നു. സി എൻ ജി റോഡിലെ തിരക്കേറിയ പ്രദേശങ്ങളിൽ ഒന്നാണ് താഴെ ചന്തക്കുന്ന്-കരുളായി റോഡ് ജംഗ്ഷൻ. എന്നാൽ ഇപ്പോൾ നടന്നുകൊണ്ടിരിക്കുന്ന റോഡ് വീതി കൂട്ടുന്ന പ്രവർത്തനങ്ങൾക്കായി ആദ്യം ഡിമാർക്ക് ചെയ്തിരുന്ന അത്രതന്നെ ഏരിയ പണി പുരോഗമിക്കുമ്പോൾ റോഡിനു പ്രായോഗികമായ രീതിയിൽ ലഭ്യമായിട്ടില്ല. സ്കൂൾ സമയങ്ങളിലും ഫൈറിലാൻഡ് തീയറ്ററിൽ സിനിമ കഴിഞ്ഞു ആളുകൾ പുറത്തിറങ്ങുന്ന സമയങ്ങളിലും ഈ ജംഗ്ഷനിലെ തിരക്ക് നാട്ടുകാരായ ഞങ്ങൾക്ക് സ്ഥിരം കാഴ്ചയാണ്. ഗതാഗത തിരക്കിൽ വീർപ്പുമുട്ടിയ , തുടരെത്തുടരെ അപകടങ്ങൾ അരങ്ങേറിയതുമായ ഒരുപാട് കഥകൾ പറയാനുള്ള ഒരു പ്രദേശമാണിത്. ഒരുപാട് വർഷത്തിനുശേഷം ഇനിയും ഒരുപാട് വർഷങ്ങൾക്കു വേണ്ടി നാട് അർഹിക്കുന്ന ഒരു റോഡ് വികസന പ്രവർത്തി സാധ്യമാകുന്ന സമയം അതിന്റെ പൂർണ്ണതയ്ക്ക് തടസ്സം സൃഷ്ടിക്കുന്നത് ഏത് സ്വാർത്ഥ താല്പര്യങ്ങൾ ആണെങ്കിലും അത് പൊളിച്ചെഴുതപ്പെടേണ്ടത് തന്നെയാണ്. മുൻ നിശ്ചയിച്ച പ്രകാരം റോഡിന് വീതി ലഭിക്കേണ്ടത് ഈ നാടിന്റെ അവകാശമാണ്. ഈ അനിവാര്യമായ ആവശ്യകത നടപ്പിലാക്കുന്നത് വരെ വ്യക്തമായ നിലപാടോടെ അതിർവരമ്പുകൾ ഇല്ലാതെ നിലകൊള്ളാൻ ചെസ്സ് ക്ലബ് തീരുമാനിച്ചിരിക്കുകയാണ്. നിലവിൽ ശ്രീ എരഞ്ഞിക്കൽ ഇസ്മായിൽ കൗൺസിലർ ആയിരിക്കുന്ന വാർഡിലാണ് മാർക്ക്‌ ചെയ്ത അത്രതന്നെ സ്ഥലം റോഡിനായി വിനിയോഗിക്കപ്പെടാതിരിക്കുന്നതായി കാണപ്പെടുന്നത്. അതിനാൽ അടിയന്തിരമായി അദ്ദേഹത്തിന്റെ ശ്രദ്ധയും ക്ഷണിക്കുന്നു.
പ്രസ്തുത സ്ഥലം MLA ശ്രീ പിവി അൻവറിന്റെയും PWD എഞ്ചിനീയർ ശ്രീ മുഹ്സിന്റെയും നേതൃത്വത്തിൽ (31-11-2024) പരിശോധിച്ചിരുന്നു. തുടർനടപടികൾ അതിവേഗം സാധ്യമാകുമെന്ന് പ്രതീക്ഷിക്കുന്നു.