12/01/2014
കല്ലൂര് കുടിവെള്ളപ്രശ്നം:അടിയന്തരനടപടി സ്വീകരിക്കും കളക്ടര്
Posted on: 12 Jan 2014
പത്തിരിപ്പാല: കുടിവെള്ളപ്രശ്നം രൂക്ഷമായ കല്ലൂരില് ജലവിതരണം നടത്താന് നടപടി സ്വീകരിക്കുമെന്ന് കളക്ടര് കെ. രാമചന്ദ്രന് പറഞ്ഞു. മങ്കര പഞ്ചായത്ത് ഞാവളിന്കടവ് എന്.സി.പി.സി. കുടിവെള്ളപദ്ധതി കര്മസമിതിയുടെ നേതൃത്വത്തില് നല്കിയ പരാതി പരിശോധിച്ചതിനുശേഷമാണ് ഉറപ്പുനല്കിയത്.അടുത്ത താലൂക്ക് വികസനസമിതിയോഗത്തില് കല്ലൂരിലെ കുടിവെള്ളപ്രശ്നം അവതരിപ്പിക്കുമെന്നും കളക്ടര് പറഞ്ഞതായി കര്മസമിതി കണ്വീനര് പി.കെ. സെയ്തലവി, എസ്. ശശികുമാര്, എ.എ. ഉമ്മര് എന്നിവര് പറഞ്ഞു.കുടിവെള്ളപദ്ധതി നോക്കുകുത്തിയായ കല്ലൂരില്നിന്ന് വീട്ടമ്മമാരടക്കം 150 ലധികം പേര് ജലവിതരണം നടത്തണമെന്നാവശ്യപ്പെട്ട് രാവിലെ കളക്ടറേറ്റ് പടിക്കല് കുടംനിരത്തി ധര്ണ നടത്തിയശേഷമാണ് കര്മസമിതി നേതാക്കള് കളക്ടറെ ചേംബറില് ചെന്നുകണ്ടത്.2010ല് ഭാരതപ്പുഴയിലെ അതൃക്കാട് ഞാവളിന്കടവില് ജലഅതോറിറ്റിയാണ് രണ്ടരക്കോടി ചെലവിട്ട് സമഗ്ര കുടിവെള്ളപദ്ധതിയായ എന്.സി.പി.സി. പദ്ധതി നിര്മിച്ചത്. 19,500 ലധികം പൊതുഗാര്ഹിക ടാപ്പുകള്വഴി കുടിവെള്ളവിതരണം നടത്താമെന്ന വാഗ്ദാനം നല്കി നിര്മിച്ച പദ്ധതിയിലൂടെ ഒരുതുള്ളി വെള്ളംപോലും കിട്ടാതായതോടെയാണ് ജലസംഭരണിക്കുകീഴെ വസിക്കുന്ന കല്ലൂരുകാര് സമരത്തിനിറങ്ങിയത്. സമഗ്ര കുടിവെള്ളപദ്ധതി നിര്മിച്ച ജലഅതോറിറ്റി പിന്നീടത് പഞ്ചായത്തിന് കൈമാറിയെങ്കിലും ജലവിതരണം നടത്താനാവാതെ പഞ്ചായത്തും കൈയൊഴിഞ്ഞു. ജലഅതോറിറ്റിയും പഞ്ചായത്തും കൈമലര്ത്തിയതോടെ നട്ടംതിരിഞ്ഞത് നാട്ടുകാരാണ്.
