28/12/2022
గంట చదువయ్యాక తల వెనక్కి వాల్చి, కళ్ళ మీద తడి కర్ఛీఫ్ పెట్టుకోండి. ఎడమచేతి బొటనవేలితో కుడివైపు నాసిక మూసి గాఢంగా గాలి పీల్చoడి. తరువాత రివర్సులో మళ్ళీ అలాగే చెయ్యండి.
స్టీమ్ మిషన్ ఖరీదు మూడువoదలకన్నా ఎక్కువ ఉండదు. మూడు రోజుల కొకసారి పసుపు నీటితో స్టీమింగ్ చేసుకుంటే, ఏకాగ్రతతో పాటు మొహానికి నునుపుదనం కూడా పెరుగుతుంది. రెండు నిముషాలు అయ్యాక మొహాన్ని చల్లటి టవల్తో తుడుచుకుని కూర్చొని చదవండి. పసుపు వాసన ఎంత ఫ్రెష్గా ఉంటుందో మీకు మొదటి రోజే అర్థమవుతుంది.
గోడకి ఆనుకుని చదవద్దు. వెన్నెముక నిటారుగా పెట్టి కూర్చుని చదవటం మంచిది. అన్నిటికన్నా ముఖ్యమైన విషయం: చదివే స్థలాన్ని వెరైటి కోసం మార్చవద్దు. పక్క మీద పడుకొని అస్సలెప్పుడూ చదవొద్దు. మరీ మార్పు కావాలనుకుంటే మేడ పైకి వెళ్ళి గానీ, బాల్కనీలో గానీ కూర్చుని చదువుకోండి.
చదువుతున్న సబ్జెక్ట్ మీద ఇంట్రెస్ట్ లేకపోతే చదువు బోరు కొట్టి, ఆకలేసినట్టు అనిపిస్తుంది. వంటింట్లోకి వెళ్లి జంతికలో, చేగోడీలో నోట్లో వేసుకొని రావాలనిపిస్తుంది. నిజానికి ఇది ఆకలి కాదు. వైరస్లాంటి 'యావ'. అది అక్కడితో ఆగదు. వస్తూ వస్తూ పనిలో పనిగా హాల్లో టి.వీ కాసేపు చూసి, మధ్యలో ఛానెల్ మార్చి, తోబుట్టువుల్తో గొడవ పెట్టుకుని, అమ్మతో చివాట్లు తిని... ఇలా చేస్తే చదువు అటకెక్కుతుంది. చదువు బోరు కొట్టినప్పుడు గదిలోనే పచార్లు చేయండి. ‘నడవటంకన్నా చదవటమే బావుంది’ అని అనిపించినప్పుడు కూర్చొని చదవండి.
గది చీకటి చేసి, టేబిల్-లైట్ వెలుగులో చదవండి. మామూలు బల్బ్ కాకుండా ట్యూబ్ లైట్ ఉన్న టేబిల్ లైట్ అయితే మంచిది. గుమ్మం పక్కనా, కిటికీ ఎదురుగా కాకుండా గోడ వైపు తిరిగి చదువుకోండి. చుట్టూ చూస్తూ చదివితే గోడ మీద బల్లి, దగ్గరే తిరుగుతూన్న దోమా కనబడతాయి. దోమను బల్లి తింటుందా, తినదా అన్న ఆలోచనలో పడతారు. ఇంతలో చటుక్కున బల్లి దోమని పట్టుకుంటుంది. వెంటనే మీకు ‘మమ్మీ’ సినిమా గుర్తొస్తుంది. బల్లికీ, మమ్మీకీ సంబంధం ఏమిటా అని మీ అనుమానమా? మీరే ఆలోచించండి. దోమ మీదికి బల్లి నాలుక విసిరిన విధానం చూసి, రజినీకాంత్ నోట్లోకి సిగరెట్ విసరటం గుర్తొస్తుంది. రజినీకాంత్ గుర్తు రాగానే లకలక... దాంతో చంద్రముఖి... ఆ పై దెయ్యం... దెయ్యం గుర్తురాగానే రాoగోపాల్ వర్మ, వర్మ గుర్తు రాగానే మమ్మీ వరుసగా గుర్తొస్తాయి. అదీ బల్లికీ మమ్మీకి గల సంబంధం. పుస్తకం మీ దగ్గరే ఉంటుంది. మనసు ఎక్కడో ఉంటుంది. దాన్నే ఏకాగ్రత పోవటమoటారు.
మంచి ఆరోగ్యం, ప్రేమ, మీ స్కూల్లోనూ వీధిలోనూ కనీసం కొందరైనా గుర్తించేటంత కీర్తి, మంచి మంచి కలలు, జీవితం పట్ల ఉత్సాహం, జ్ఞానం... ఈ ఆరూ ఉండటమే గెలుపు. చిన్న వయసులోనే వీటిని తొందరగా సంపాదించటానికి ప్రయత్నం చెయ్యండి..
- యండమూరి వీరేంద్రనాథ్