08/06/2025
एका तरुणाचं स्वप्न आणि “अहद ऑस्ट्रेलिया तहद कॅनडा” ची जादू
*पार्टी ट्रस्ट* या समूहाच्या वतीने दरवर्षी मित्रमेळावा या कार्यक्रमाचे आयोजन केले जाते. सोशल मिडियावरील दोन-अडीच हजार युवक एकत्र जमतात. ते एकत्र जेवतात, एकत्रितपणे सामाजिक कार्य करतात, एकत्र मनोरंजन, धमाल, गप्पा गोष्टी करतात.
ऑक्टोबर २०२३ मध्ये सांगोला याठिकाणी हा कार्यक्रम होता. त्यामुळे मीही सर्वांशी संवाद साधण्यासाठी आवर्जून या कार्यक्रमाला गेलो होतो. याप्रसंगी कार्यक्रमातील हजारो तरुणांशी संवाद साधता आला.
मी संभाजी ब्रिगेडच्या *“अहद ऑस्ट्रेलिया तहद कॅनडा, अवघा मुलुख आपला”* या संकल्पनेवर बोललो. त्यातून परदेशातील शिक्षण, व्यवसाय, नोकरी याबद्दल मार्गदर्शन केलं. तरुणांनी परदेशात जाऊन अर्थकारण करावे, त्यासाठी संभाजी ब्रिगेडच्या वतीने मार्गदर्शन करण्यात येईल असे सांगितले होते.
त्यावेळी एक तरुण भेटला... विशाल काटे.
सांगोल्याजवळच्या यलमर मंगेवाडी गावचा. घरची फारच हलाखीची परिस्थिती, शेती नाही, काम नाही, आई दुसऱ्याच्या शेतात काम करत होती, वडील मिळेल ते गवंडी काम करायचे, विशाल सांगत होता की ६ वर्षे एका संस्थेत नोकरी मिळायच्या अपेक्षेने वेगवेगळ्या नेत्यांसोबत काम करत होतो परंतु संधी आल्यावर पैशाची मागणी झाली आणि फुकट राबलेली ६ वर्षे डोळ्यासमोर वाया जाताना दिसली. डोक्यावर असलेल्या जबाबदाऱ्यांमुळे व आपल्याला चांगले भविष्य नाही अशा विचाराने मनात सतत आत्महत्येचे विचार घोळत होते.
पार्टी ट्रस्ट कार्यक्रमात माझं बोलणं ऐकून तो थांबला, भेटला, आणि विचारलं — *“मलाही परदेशात काम मिळू शकेल का?”*
मी त्याला आमच्या “अहद ॲास्ट्रेलिया तहद कॅनडा” अभियानाचे समन्वयक संभाजी ब्रिगेड चे प्रदेश संघटक *अजयसिंह सावंत* यांच्याशी जोडून दिलं.
…आणि मी पुढे हे सगळं विसरलो.
मागच्या आठवड्यात अचानक एका संध्याकाळी मला अजयसिंहचा फोन आला. *“विशाल काटे हा सांगोल्याचा तरूण पुण्यात आलाय, आणि आपल्याला भेटल्याशिवाय जाणार नाही,”* असं त्याने सांगितलं. भेटीचं आयोजन झालं. विशाल आला आणि सतत पायाला स्पर्श करायचा प्रयत्न करू लागला, मी त्याला गळाभेट दिली आणि तो गळ्यात पडून रडू लागला. मी त्याला शांत करत विचारलं आणि मग त्याने त्याची कहाणी सांगायला सुरुवात केली, ती ऐकताना माझ्या डोळ्यांतही पाणी तरळलं.
तो म्हणाला…
“सर, तुमच्या संकल्पनेने माझ्या आयुष्यात काय बदल घडून आला आहे ते मी शब्दात व्यक्त करू शकत नाही. सांगोल्यातील *पार्टी ट्रस्ट* च्या कार्यक्रमात मी सहभागी होतो, त्या कार्यक्रमात मी पूर्ण खचलेलो होतो. पण तुमचं भाषण माझ्या आयुष्यासाठी वळणबिंदू ठरलं. अजयसिंह सावंत यांनी मला *”अहद ऑस्ट्रेलिया तहद कॅनडा”* मोहिमेची सविस्तर माहिती दिली. त्यांनी मला ग्रुपमध्ये जोडलं आणि ग्रुपच्या मार्गदर्शनातून मला परदेशात नोकरी मिळाली. मी आज *आफ्रिकेतील काँगो रिपब्लिकमध्ये जॉब करतोय.* ५० हजार पगार मिळतो. आणि २० हजार रुपये इतर खर्च मिळतो आहे. सध्या सुट्टीसाठी भारतात आलोय, त्याच्या डोळ्यांत आता निराशेची जागा अभिमानाने आणि आनंदाने भरली होती. तो सांगत होता की मी आता माझे गावचे घर देखील दुरुस्त करू शकलो. पहिल्यांदाच माझ्या आईसाठी *सोन्याची बोरमाळ* आणि नवीन *साडी* घेतलीय. ती आनंदाने खूप रडली आणि तिने मला सांगितलं आहे की ज्यांच्यामुळे आपले जीवन सुधारले आहे त्यांना भेटायला जा आणि त्यांचे आभार मानून भेटीचे फोटो मला पाठव, म्हणून मी गेली २० दिवस अजयसिंह सरांना भेटीसाठी विनंती करत होतो. मी तुमचे आभार मानण्यासाठी आलोय.”
हे ऐकून माझे डोळेही पाणावले…
विशाल हा त्या सर्व तरुणांसाठी उदाहरण आहे, जे रोजगाराच्या प्रतीक्षेत हातावर हात ठेवून बसले आहेत. विशालने धाडस केले म्हणून आज तो अर्थकारण करू शकला. अर्थकारणाशिवाय तरूणांना पर्याय नाही. इथे नोकऱ्या नाहीत आणि मिळाली तरी तुटपुंजा पगारावर काम करावे लागते. परदेशात असंख्य पगाराच्या नोकऱ्या उपलब्ध आहेत. त्यासाठी घर, गाव सोडायची तयारी ठेवली पाहिजे. विशालने ते सिद्ध करून दाखवले आहे. विशालसारखा एक तरुण जर बदलू शकतो, तर हजारो विशालही बदलू शकतात. गरज आहे फक्त धाडसाची.
परदेशात संधी आहेत, फक्त त्या ओळखण्याचं आणि त्यासाठी निघून जाण्याचं धैर्य हवं.
*संभाजी ब्रिगेड आणि “अहद ऑस्ट्रेलिया तहद कॅनडा”* या उपक्रमामुळे हे शक्य आहे. या मोहिमेच्या मदतीने जगातील जवळपास *५२ देशांमध्ये* महाराष्ट्रातील हजारो युवक नोकरी करण्यासाठी गेले आहेत.
*अजयसिंह सावंत, अनिकेत डोंगरे, उदय बदाडे, योगेश नागरे, मयुर पाटील, अक्षय चव्हाण* या तरुणांची यामध्ये महत्त्वाची भूमिका आहे.
विशालसारख्या तरुणांचा आत्मविश्वास पाहून वाटतं, हे अभियान फक्त संकल्पना नाही, ही अनेकांच्या *आयुष्याची दिशा* आहे.
*पार्टी ट्रस्ट* मित्रपरिवाराचे खूप आभार... तुमच्यामुळे माझा विचार तरुणांपर्यंत पोहोचतो आहे.
*प्रवीण गायकवाड*
प्रदेशाध्यक्ष - संभाजी ब्रिगेड, महाराष्ट्र
