03/09/2026
ପିପିଲି ଏନ୍ଏସିର ଜଳବନ୍ଦୀ ଅଞ୍ଚଳ ପରିଦର୍ଶନ କଲେ କଂଗ୍ରେସ ନେତା ପ୍ରିୟବ୍ରତ ସାମନ୍ତରାୟ ।
ଡ୍ରେନେଜ ସମସ୍ୟାର ସ୍ଥାୟୀ ସମାଧାନ ଦାବି ।
ସେପଟେ ତୁରନ୍ତ ପଦକ୍ଷେପ ନେଉଛି ପ୍ରଶାସନ
ପିପିଲି, ତା. ୩/୯: ପିପିଲି ଏନ୍ଏସିର ବିଭିନ୍ନ ସମସ୍ୟା, ବିଶେଷକରି ଜଳବନ୍ଦୀ ଓ ଡ୍ରେନେଜ ସମସ୍ୟାର ସ୍ଥିତି ଅନୁଧ୍ୟାନ କରିଛନ୍ତି ପିପିଲି କଂଗ୍ରେସ ନେତା ପ୍ରିୟବ୍ରତ ସାମନ୍ତରାୟ। ପୂର୍ବ ବୈଠକରେ ନିଆଯାଇଥିବା ନିଷ୍ପତ୍ତି ଅନୁଯାୟୀ ଶ୍ରୀ ସାମନ୍ତରାୟଙ୍କ ନେତୃତ୍ୱରେ ଏକ ପ୍ରତିନିଧି ଦଳ ଗୁରୁବାର ପୂର୍ବାହ୍ନରେ ଏନ୍ଏସିର ୫ ଓ ୬ ନମ୍ବର ୱାର୍ଡ ପରିଦର୍ଶନ କରିଥିଲେ। ଏହି ଅବସରରେ ଜଳବନ୍ଦୀରେ ଥିବା ଲୋକଙ୍କ ନିକଟରେ ପହଞ୍ଚି ସେମାନଙ୍କ ସମସ୍ୟା ବୁଝିଥିଲେ। ସ୍ଥାନୀୟ ଲୋକଙ୍କ ଅଭିଯୋଗ ଅନୁଯାୟୀ, ପିପିଲି ଏନ୍ଏସିର ଅଧିକାଂଶ ଅଞ୍ଚଳରେ ଡ୍ରେନେଜ ବ୍ୟବସ୍ଥା ଠିକ୍ ନଥିବାରୁ ବର୍ଷାଜଳ ନିଷ୍କାସନରେ ସମସ୍ୟା ଦେଖାଦେଉଛି। ଲଗାଣ ବର୍ଷା ହେଲେ ରାସ୍ତା ଉପରେ ଦୀର୍ଘ ଦିନ ଧରି ଆଣ୍ଠୁଏ ଉଚ୍ଚର ପାଣି ଜମି ରହୁଛି। ଏଥିରେ ଡ୍ରେନେଜ ଆବର୍ଜନା ମିଶି ଦୂଷିତ ଜଳ ସୃଷ୍ଟି ହେଉଥିବାରୁ ଲୋକେ ଦୁର୍ଦ୍ଦଶା ଭୋଗୁଛନ୍ତି। ଗତ ଲଗାଣ ବର୍ଷାରେ ୫ ନମ୍ବର ୱାର୍ଡର ମହମ୍ମଦ ଆଲରଖା ଓ ବାବୁ ଖାଁଙ୍କ ଘରେ ବର୍ଷାଜଳ ପଶିଯାଇଛି। ଫଳରେ ରୋଷେଇ ଘର ଓ ଶୋଇବା ଘରେ ପାଣି ଜମି ରହିବାରୁ ପରିବାର ଲୋକେ ନାନା ସମସ୍ୟାର ସମ୍ମୁଖୀନ ହୋଉଛନ୍ତି । ସେହିପରି ୬ ନମ୍ବର ୱାର୍ଡରେ ମଧ୍ୟ ଡ୍ରେନେଜ ପୋତି ହୋଇଯାଇଥିବାରୁ ବର୍ଷାଜଳ ନିଷ୍କାସନ ହୋଇପାରୁନଥିବା ଅଭିଯୋଗ ହୋଇଛି। ଜଳବନ୍ଦୀ ସମସ୍ୟା ଯୋଗୁଁ କେତେକ ଲୋକ ନିଜ ଘର ଛାଡ଼ି ଅନ୍ୟତ୍ର ଭଡ଼ା ଘରେ ରହୁଥିବା ଶ୍ରୀ ସାମନ୍ତରାୟ କହିଛନ୍ତି। ଉଭୟ ୱାର୍ଡର ଅଙ୍ଗନବାଡ଼ି କେନ୍ଦ୍ର ଓ ବିଦ୍ୟାଳୟ ମଧ୍ୟ ବର୍ଷା ସମୟରେ ପାଣି ଘେରରେ ରହୁଥିବା ସେ ଅଭିଯୋଗ କରିଛନ୍ତି।
ଏହି ସମସ୍ୟାର ସ୍ଥାୟୀ ସମାଧାନ ଦାବି କରି ଶ୍ରୀ ସାମନ୍ତରାୟ ପିପିଲି ଏନ୍ଏସି କାର୍ଯ୍ୟନିର୍ବାହୀ ଅଧିକାରିଣୀ କାଦମ୍ବିନୀ ଜେନାଙ୍କ ସହ ଆଲୋଚନା କରିଛନ୍ତି । ଅନ୍ୟପକ୍ଷରେ ଅଭିଯୋଗ ପରେ ଜଳବନ୍ଦୀ ସମସ୍ୟାର ତୁରନ୍ତ ସମାଧାନ ପାଇଁ ଆବଶ୍ୟକ ପଦକ୍ଷେପ ନିଆଯାଉଥିବା ବେଳେ ସ୍ଥାୟୀ ସମାଧାନ ଦିଗରେ ଟେଣ୍ଡର ପ୍ରକ୍ରିୟା ମଧ୍ୟ ଆରମ୍ଭ ହୋଇଥିବା କାର୍ଯ୍ୟନିର୍ବାହୀ ଅଧିକାରିଣୀ କାଦମ୍ବିନୀ ଜେନା କହିଛନ୍ତି। ଖୁବଶୀଘ୍ର ସମସ୍ୟାର ସମାଧାନ କରାଯିବ ବୋଲି ସେ ଆଶ୍ୱାସନା ଦେଇଛନ୍ତି।
ଏହି ପରିଦର୍ଶନ ସମୟରେ ନଗର କଂଗ୍ରେସ ସଭାପତି ରଜନୀକାନ୍ତ ବସ୍ତିଆ, ଜିଲ୍ଲା କଂଗ୍ରେସ କମିଟି ଉପସଭାପତି ଗୁଣନିଧି ପ୍ରଧାନ, ବରିଷ୍ଠ ନେତା ଧୀରେନ୍ଦ୍ର ସାମନ୍ତରାୟ, ନଗର ଉପସଭାପତି ପ୍ରଦୀପ ଦାସ, ମହିଳା ନେତ୍ରୀ ରାନୁ ପାତ୍ର, ଯୁବ କଂଗ୍ରେସ ନେତା ଲାଲା ରାକେଶ ରାୟ, ନଗର କଗ୍ରେସ ଉପସଭାପତି କୁରବାନ ସା, ଜିଲ୍ଲା କଂଗ୍ରେସ କମିଟି ସମ୍ପାଦକ ଇନ୍ତାଜ ଅଲ୍ଲୀ ଖାନ , ପୂର୍ବତନ କାଉନସିଲର ଅସୀମା ଦାସ, ୫ନମ୍ବର ୱାର୍ଡ ସଭାପତି ବସିର ଖାଁ , ଖଲ୍ଲିଲୁର ରହେମାନ୍ , ୬ ନମ୍ବର ୱାର୍ଡ ସଭାପତି ମନସୂର୍ ଖାନ୍ ସମେତ ବହୁ କଂଗ୍ରେସ ନେତା ଓ କର୍ମୀ ଉପସ୍ଥିତ ଥିଲେ।
