होय,आम्ही महाराष्ट्रीयन ख्रिस्ती

06/08/2026

दुःखद निधन
*रेव्ह.डॉ.बार्नाबस गुडे पाळक साहेब* (ख्रिश्चन कॉलनी अकोला) हे आज दुपारी ख्रिस्तामध्ये विसावा पावले आहे.
ज्यांनी अनेक वर्ष *"मुक्ती मिशन"* केडगाव येथे आपली बहुमूल्य सेवा दिली तसेच *अलायन्स* क्षेत्रात ही मूल्यवान योगदान त्यांचे आहे. जे नेहमी सर्वांच्या स्मरणात राहील.

*आलायन्स क्षेत्रात मिशन सेवा* कार्य बद्दल चा दांडगा, अभ्यासू व्यक्तीमत्व असलेले पाळक आज आपल्या मध्ये नाही राहिले.

*"जे सुयुद्ध ते मी केले आहे धाव संपली आहे विश्वास मात्र राखीला आहे."*

*अंतिम क्रियाक्रम विधी त्यांच्या राहत्या घरी ख्रिश्चन कॉलनी अकोला येथून दि.07/08/26.येथे ठीक दुपारी. 3 :00 ठेवन्यात आला आहे.*

अल्फा ओमेगा परिवाराच्या वतीने भावपुर्ण आदरांजली.

06/08/2026

Join us today

06/08/2026

मनन चिंतन:161
खरे खानदानी कोण?

मनुष्य बाह्य रूपाकडे पाहतो; परंतु परमेश्वर अंतःकरण पाहतो. (१ शमुवेल १६:७)

आज अनेकजण अभिमानाने म्हणतात, “आम्ही खानदानी लोक आहोत.” पण एक क्षण थांबून स्वतःला विचारूया…

खानदानी म्हणजे नेमके काय? मोठे आडनाव? मोठे घर? भरपूर संपत्ती? समाजातील प्रतिष्ठा?

जर तसे असते, तर येशूने गरीब मच्छीमारांना आपले शिष्य निवडले नसते आणि गोठ्यात जन्म घेतला नसता. बायबल शिकवते की, खानदानीपणा वंशातून नाही; तो अंतःकरणातून दिसतो.

आज काही लोक घराण्याचा अभिमान बाळगतात; पण आई-वडिलांशी उद्धटपणे बोलतात. चर्चमध्ये नम्र दिसतात; पण घरी पत्नी, पती किंवा मुलांचा अपमान करतात. लोकांसमोर प्रार्थना करतात; पण व्यवहारात खोटे बोलतात. स्वतःला मोठे म्हणवतात; पण चुकीचे वागणे सोडू शकत नाहीत. अशा जीवनाला देव “खानदानी” म्हणत नाही.

येशू म्हणाला,“त्यांच्या फळांवरून तुम्ही त्यांना ओळखाल.” (मत्तय ७:१६)

फळे झाडाची ओळख करून देतात. त्याचप्रमाणे आपले बोलणे, वागणे, नम्रता, प्रामाणिकपणा, प्रेम आणि क्षमा हेच आपल्या आत्मिक घराण्याची ओळख करून देतात.

बायबलमध्ये बेरीयातील लोकांना “खानदानी” म्हटले आहे. कारण त्यांच्याकडे मोठी संपत्ती नव्हती, पण मोठे मन होते. त्यांनी देवाचे वचन नम्रतेने स्वीकारले आणि सत्याचा शोध घेतला. (प्रेषितांची कृत्ये १७:११)

प्रियांनो,
तुमच्या नावापुढे कितीही मोठी पदवी असो, समाजात कितीही मान असो किंवा कितीही संपत्ती असो, जर तुमच्यात ख्रिस्ताचा स्वभाव नसेल, तर देवाच्या दृष्टीने त्या सर्व गोष्टींची किंमत शून्य आहे.

लक्षात ठेवा…
खानदानीपणा वारशाने मिळत नाही; तो प्रत्येक दिवशी आपल्या जीवनातून सिद्ध करावा लागतो.
देवाला तुमचे आडनाव महत्त्वाचे नाही; तुमचे अंतःकरण महत्त्वाचे आहे. देवाला तुमचे घर किती मोठे आहे हे महत्त्वाचे नाही; तुमच्या घरात प्रेम, शांती आणि पवित्रता आहे का, हे महत्त्वाचे आहे. देवाला तुमच्या कपड्यांचा रंग दिसत नाही; तो तुमच्या आत्म्याची स्थिती पाहतो.

आरशात स्वतःला पाहूया…
जर आज येशू आपल्या घरात पाहुणा म्हणून आला तर…

1) आपल्या बोलण्याने तो आनंदी होईल का?
2) आपल्या व्यवहारात त्याला सत्य दिसेल का?
3) आपल्या कुटुंबात त्याला प्रेम दिसेल का?
4) आपल्या जीवनात त्याला स्वतःचे प्रतिबिंब दिसेल का?

खरा खानदानी तो नाही, जो स्वतःची स्तुती करतो; खरा खानदानी तो आहे, ज्याच्या जीवनाकडे पाहून लोक म्हणतात. “याच्यात ख्रिस्त दिसतो.”

आजचे वास्तव
आज काही लोक म्हणतात…
“आम्ही खानदानी आहोत.”
पण…
1) घरात आई-वडिलांशी उद्धटपणे बोलतात.
2) पत्नी किंवा पतीचा अपमान करणे विश्वासघात करणे.
3) दिलेला शब्द पाळत नाहीत.
4) व्यवहारात फसवणूक करतात.
5) गरिबांना कमी लेखतात.
6) चर्चमध्ये भक्ती दाखवतात, पण बाहेर अन्याय करतात.

असा खानदानीपणा हा केवळ नावापुरता असतो.

बायबलनुसार खरा खानदानी कोण?

खरा खानदानी तो…
1) जो देवाचे भय बाळगतो.
2) जो सत्यासाठी उभा राहतो.
3) जो दिलेला शब्द पाळतो.
4) जो पैशापेक्षा चारित्र्याला महत्त्व देतो.
5) जो नम्र असतो.
6) जो क्षमा करतो.
7) जो गरिबांची मदत करतो.
😎 जो स्वतःचा नव्हे, तर देवाचा गौरव शोधतो.

अशा व्यक्तीचे घर मोठे असो वा लहान, ती देवाच्या दृष्टीने महान असते.

मनन चिंतनासाठी प्रश्न
1. माझा अभिमान माझ्या घराण्यावर आहे की माझ्या देवाशी असलेल्या नात्यावर?
2. माझ्या घरातील लोक माझ्याबद्दल काय साक्ष देतील?
3. माझे चारित्र्य माझ्या शब्दांपेक्षा मोठे आहे का?
4. माझ्या जीवनात ख्रिस्ताचा स्वभाव किती दिसतो?
5. आज देव माझ्या अंतःकरणात पाहील, तर त्याला “खानदानी” व्यक्ती दिसेल का?

“धन्य ते शुद्ध अंतःकरणाचे, कारण ते देवाला पाहतील.” (मत्तय ५:८)

✍️आशिष शिंदे
अल्फा ओमेगा

05/08/2026

05/08/2026

https://www.instagram.com/reel/DbqnVZHyhMI/?igsh=MWN0NDM0OTR0bHFtcg==

05/08/2026

मनन चिंतन:160
परमेश्वर मंदक्रोध आहे

परमेश्वर दयाळू व कृपाळू, मंदक्रोध आणि विपुल प्रेमळ आहे. (स्तोत्र १०३:८)

आजच्या जगात माणूस क्षुल्लक कारणांवरूनही पटकन रागावतो. एका शब्दावर, एका संदेशावर किंवा एका गैरसमजावर नाती तुटतात. पण परमेश्वराचा स्वभाव वेगळा आहे. तो न्यायी आहे, परंतु तो मंदक्रोधही आहे. तो माणसाला लगेच शिक्षा करत नाही; तर पश्चात्ताप करण्यासाठी वेळ, संधी आणि इशारे देतो.

योनाच्या पुस्तकात निनवे शहर पापाने भरलेले होते. तरीही देवाने त्यांचा त्वरित नाश केला नाही. त्याने योनाला त्यांच्याकडे पाठवले, जेणेकरून ते पश्चात्ताप करतील. लोकांनी देवाकडे वळून आपले मार्ग बदलले आणि देवाने त्यांच्यावर दया केली. (योना ३ अध्याय)

या प्रसंगातून आपण शिकतो की परमेश्वराचा विलंब हा त्याचा दुर्बलपणा नसून त्याची दया आहे. तो माणसाला बदलण्याची संधी देतो.

परंतु देवाची सहनशीलता अनंतकाळ नसते

बायबल हेही स्पष्ट शिकवते की देव अनेक संधी देतो, पण जर मनुष्य वारंवार त्याचा नकार देत राहिला, पापातच राहण्याचा हट्ट धरला आणि पश्चात्ताप केला नाही, तर शेवटी देवाचा न्याय प्रकट होतो.

फिरऔन याला देवाने वारंवार संधी दिली. अनेक संकटे आली, तरी त्याने आपले मन कठीण केले. शेवटी त्याला आणि त्याच्या सैन्याला लाल समुद्रात विनाशाला सामोरे जावे लागले.

तसेच सदोम आणि गमोरा यांनाही देवाने इशारे दिले; पण त्यांनी आपले जीवन बदलले नाही. अखेरीस देवाचा न्याय त्यांच्यावर आला.

याचा अर्थ असा नाही की देव रागीट आहे; तर त्याची दया आणि न्याय दोन्ही परिपूर्ण आहेत.
देवाची दया ही पश्चात्तापाची संधी आहे; पापात राहण्याची परवानगी नाही.

आज आपल्या जीवनासाठी महत्वाचा संदेश

कधी कधी आपण विचार करतो, “अजून काही झाले नाही, म्हणजे देवाला काही फरक पडत नाही.” पण हे चुकीचे आहे. देव शांत असतो, कारण तो आपल्याला बदलण्यासाठी वेळ देत असतो.

परंतु देवाची वेळ निघून गेल्यानंतर पश्चात्तापाची संधी संपुष्टात येऊ शकते. म्हणून बायबल म्हणते. आज जर तुम्ही त्याची वाणी ऐकत असाल, तर आपली अंतःकरणे कठीण करू नका. (इब्री ३:१५)

मनन चिंतनासाठी प्रश्न
1. देवाने मला दिलेल्या संधींचा मी योग्य उपयोग करीत आहे का?
2. ⁠माझ्या जीवनात अशी कोणती गोष्ट आहे ज्याबाबत देव वारंवार मला इशारा देत आहे?
3. मी देवाच्या सहनशीलतेचा गैरफायदा तर घेत नाही ना?
4. मी आजच पश्चात्ताप करून देवाकडे परतण्यास तयार आहे का?
5. देवाची दया अनुभवून मी इतरांशीही संयमाने आणि क्षमाशीलतेने वागतो का?

परमेश्वर आपल्या अभिवचनाबाबत विलंब करीत नाही… तर तो तुमच्याबद्दल सहनशील आहे; कोणाचाही नाश व्हावा अशी त्याची इच्छा नाही, तर सर्वांनी पश्चात्ताप करावा अशी त्याची इच्छा आहे. (२ पेत्र ३:९)

देवाचा मंदक्रोध ही त्याची कृपा आहे; पण त्याच्या कृपेचा अवमान केल्यास त्याचा न्याय अटळ आहे. म्हणून देव संधी देत असतानाच त्याच्याकडे परत फिरा. उद्या संधी मिळेलच याची खात्री कोणालाच नाही.

✍️आशिष शिंदे
अल्फा ओमेगा

04/08/2026

CNCT, Panchgani

04/08/2026

मनन चिंतन:159
डिजिटल स्क्रीनच्या गर्दीत देवाची वाणी कशी ऐकावी?

शांत व्हा आणि जाणून घ्या की मीच देव आहे.(स्तोत्र ४६:१०)

आजचा माणूस पूर्वीपेक्षा अधिक जोडला गेला आहे, पण देवापासून आणि स्वतःपासून अधिक दूर गेला आहे. मोबाईल, सोशल मीडिया, सतत येणारे संदेश, व्हिडिओ आणि बातम्या यामुळे मनाला क्षणभरही शांतता मिळत नाही. दिवसाची सुरुवात आणि शेवट अनेकदा स्क्रीनकडे पाहण्यात होतो; पण देवाच्या वचनाकडे पाहण्यासाठी वेळ उरत नाही.

बायबलमध्ये एलिया संदेष्टा मोठ्या संकटात होता. त्याने वादळ, भूकंप आणि अग्नी अनुभवला; पण परमेश्वर त्या गोंगाटात नव्हता. शेवटी मंद, शांत स्वरात देव त्याच्याशी बोलला. (१ राजे १९:११–१२)

या प्रसंगातून आपण शिकतो की देव अनेकदा कोलाहलात नव्हे, तर शांततेत बोलतो. जर आपले मन सतत डिजिटल आवाजाने भरलेले असेल, तर देवाची कोमल वाणी ऐकणे कठीण होते.

स्वतः येशू ख्रिस्तही लोकांच्या गर्दीत सेवा केल्यानंतर निर्जन ठिकाणी जाऊन प्रार्थना करत असे. (मार्क १:३५) जर देवाचा पुत्र एकांत शोधत होता, तर आपल्यालाही आत्मिक शांततेसाठी वेळ काढण्याची किती गरज आहे!

आज स्वतःला एक प्रश्न विचारूया. मी दररोज मोबाईलसाठी जितका वेळ देतो, तितका वेळ देवाबरोबर एकांतात घालवतो का?

डिजिटल साधने वाईट नाहीत; पण ती देवापेक्षा महत्त्वाची झाली, तर ती आपल्या आत्मिक जीवनासाठी अडथळा ठरतात.

देवाची वाणी ऐकायची असेल, तर कधी कधी मोबाईलचा आवाज बंद करावा लागतो, पण मन देवासाठी उघडे ठेवावे लागते.

मनन चिंतनासाठी प्रश्न
1. दिवसातील सर्वात जास्त वेळ मी स्क्रीनसोबत घालवतो की देवासोबत?
2. देवाचे वचन वाचण्यासाठी आणि प्रार्थनेसाठी मी दररोज शांत वेळ राखून ठेवतो का?
3. कोणत्या डिजिटल सवयी मला देवापासून दूर नेत आहेत?
4. आज मी किती वेळ मोबाईल बाजूला ठेवून देवाच्या उपस्थितीत बसणार आहे?
5. माझ्या जीवनात देवाची वाणी स्पष्ट ऐकण्यासाठी मी कोणता बदल करणार आहे?

तुझा शब्द माझ्या पावलांसाठी दीप आणि माझ्या मार्गासाठी प्रकाश आहे.(स्तोत्र ११९:१०५)

✍️आशिष शिंदे
अल्फा ओमेगा