29/07/2021
इतिहासपुरुषाचे शंभरीत पदार्पण
पर्वतीचा पुरंदरे वाडा सजवायला घ्या
दारी आंब्याझेंडूचे तोरण बांधायला घ्या
पताक्यांची माळ लावायला घ्या
रांगोळीत रंग भरायला घ्या
सोनचाफ्याच्या फुलांची माळ ओवायला घ्या
सुगरणींनो सुग्रास भोजन बनवायला घ्या
देवघरातल्या देवीदेवतांचे आभार मानायला घ्या
दूधाने स्नान घालायला घ्या
उंची कापडं नेसवायला घ्या
कुंकवाचा टिळा लावायला घ्या
शंभर दिवे लावून सुवासिनींनो ओवाळायला घ्या
गोडधोड मुखी भरवायला घ्या
उधळण करण्यासाठी सुवर्णफुले हाती घ्या
काजळतीट लावत कुणीतरी नजर उतरवायला घ्या
अत्तर , गुलाबपाण्याची शिंपडण करायला घ्या
ढोल ताशे नगारे बडवायला घ्या
हाती डफ घेऊन शाहिरांनो पोवाडे गायला घ्या
कवडीमाळ घालून गोंधळ्यांनो गोंधळ घालायला घ्या
नटून थटून साऱ्यांनी वाड्यावर या
कुळवंतांनो , कलावंतांनो , मऱ्हाटमंडळीनो, सज्जनांनो
याची देही याची डोळा
इतिहासपुरुषाच्या शंभरीच्या पदार्पणाचा सोहळा पहायला अन् अनुभवायला अवघे अवघे या..
तुळजापूरच्या तुळजाईकडे, जेजुरीच्या खंडोबाकडे, मोरगावच्या मोरेश्वराकडे, शिवनेरीच्या शिवाईकडे , राजगडाच्या पद्मावतीकडे, रायगडाच्या शिर्काई , वाडेश्वर व जगदिश्वराकडे "होय मला सव्वाशे वर्षांचं आयुष्य हवंय शिवचरित्र ब्रम्हांडापल्याड नेण्यासाठी" असं मागणं मागणारे , तल्लख बुद्धी, अचाट स्मरणशक्तीचं ऐश्वर्य अन् लेखणीस सरस्वतीचा वरदहस्त लाभलेले , प्रचंड उत्साह आणि उर्जेचा स्त्रोत अंगात भिनलेले, झोपेतही शिवाजी महाराजांच्या नामाचा जप करणारे, असंख्य गडकोटांच्या कैकवेळा वाऱ्या करणारे, इतिहास संशोधनासाठी उन - वारा - पावसाची तमा न बाळगता दऱ्याखोऱ्या, इतिहासवाटा तुडवणारे, प्रतापगडावर ऐतिहासिक कागद सापडल्याचे कळताच भर पावसात चिंब भिजत पुणे ते प्रतापगड सायकलने प्रवास करणारे, शिवरायांच्या इतिहासाने झपाटलेले, शिवचरित्रासाठी गावोगाव हिंडून पुस्तक विक्री करणारे, भायखळ्याच्या मेहेर अली मार्केटमध्ये शिवचरित्रासाठी कोथिंबीर विकणारे, दादरा नगर हवेली मुक्तिसंग्रामात हिरहिरिने सहभाग घेणारे , पोर्तुगीजांविरुद्ध हेरगिरी करणारे , तात्यासाहेब सावरकरांची हुबेहूब नक्कल करणारे , दादरच्या शिवाजी पार्कात शिवसृष्टी उभारणारे असंख्य पुरस्कारांचे मानकरी ठरलेले , दिग्गज - मान्यवरांचा सहवास आणि स्नेह लाभलेले, सरदार पुरंदरे घराण्याचे वारसदार, जाणता राजा महानाट्याचे निर्माणकर्ते, शिवचरित्राचे शिवधनुष्य उचलणारे शिवचरित्रकार , आंबेगावच्या शिवसृष्टीचे शिल्पकार , रसाळ लेखणीचे कवी, कथाकार, कादंबरीकार, असंख्य व्याख्यानांतून आपल्या अमोघ वाणीने, मधाळ बोलीने श्रोत्यांच्या मनांत शिवचरित्र बिंबवणारे शिवव्याख्याते, घड्याळाच्या वेळा काटेकोरपणे पाळणारे, शिवकल्याण राजाचे निवेदक , शिवार्पणमस्तु म्हणत समाजकार्यास दान देणारे दानी , ललित पंचमीस प्रतापगडावर हाती पोत घेऊन नाचणारे जगदंबेचे भुत्ये, शंभरीच्या उंबरठ्यावरही पुस्तकांत डोके खुपसून बसणारे आणि स्वतःस इतिहासाचा विद्यार्थी मानणारे चिरतरुण इतिहासपुरुष, शिवतपस्वी, शिवसाधक, शिवबाचे गोंधळी, नकलाकार, कवी , कथाकार , साहित्यिक, कादंबरीकार, शिवचरित्रकार, निवेदक , मस्ताना जोगी, अवलिया, संशोधक, स्वातंत्र्यसेनानी, संग्राहक, श्रीमंत, शिवशाहीर, पुण्यभूषण, महाराष्ट्रभूषण, पद्मविभूषण, आ. बाबासाहेब पुरंदरे आजोबा आपणांस जन्मदिनाच्या सहृदय शुभेच्छा.
हे चंड मुंड भंडासूर खंडिनी जगदंबे
उदंड दंड महिषासुर मर्दिनी दुर्गे
महाराष्ट्रधर्मरक्षिके या इतिहासपुरुषास सव्वाशे वर्षांचं आयुष्य लाभू दे.
जन्मदिनांक - २९ जुलै १९२२
यंदा तारखेनुसार जन्मदिन - २९ जुलै २०२१
यंदा तिथीनुसार जन्मदिन - १३ आॕगस्ट २०२१. नागपंचमी.
#बाबासाहेबपुरंदरे
#शंभरी
#शिवशाहीर
#
🔸🔹🔸🔹🔸🔹🔸🔹🔸🔹🔸🔹🔸🔹🔸🔹
🔸🔹🔸🔹🔸🔹🔸🔹🔸🔹🔸🔹🔸🔹🔸🔹
You Tube :- https://www.youtube.com/c/ShauryaGatha1
नक्की फोल्लो करा आपलच आवडत Page :- Shaurya Gatha
