30/08/2026
**వంటల్లో ఎవరెస్ట్, ఎల్జీ ‘ఇంగువ’ వాడుతున్నారా?
అయితే ఇది మీ కోసమే!**
ప్రముఖ మసాలా దినుసుల తయారీ సంస్థలైన ఎవరెస్ట్ (Everest Food Products), ఎల్జీ (Laljee Godhoo) ఇంగువ ఉత్పత్తులపై భారత ఆహార భద్రతా ప్రమాణాల సంస్థ (FSSAI) తాత్కాలిక నిషేధం విధించింది. నాణ్యతా లోపాల కారణంగా FSSAI ఈ కఠిన నిర్ణయం తీసుకుంది. మార్కెట్లో ఉన్న స్టాక్ను వెంటనే వెనక్కి తీసుకోవాలని ఆదేశించింది.
**ల్యాబ్ టెస్టుల్లో తేలిన అసలు విషయాలు**
ఒక వినియోగదారుడి ఫిర్యాదుతో మహారాష్ట్ర, గుజరాత్లలోని ఎవరెస్ట్, ఎల్జీ యూనిట్లలో FSSAI శాంపిల్స్ సేకరించి పరీక్షించగా షాకింగ్ నిజాలు బయటపడ్డాయి.
* తగ్గిన ముడి ఇంగువ: నిబంధనల ప్రకారం కాంపౌండెడ్ ఇంగువలో కనీసం 5% ఆల్కహాల్-సాల్యుబుల్ ఎక్స్ట్రాక్ట్ ఉండాలి.
కానీ FSS-2011 నిబంధనలకు విరుద్ధంగా శాంపిల్స్లో కేవలం 0-3% మాత్రమే తేలింది.
అంటే ఉండాల్సిన దానికంటే 30-40% తక్కువగా ముడి ఇంగువను వాడుతున్నారు.
* భారీగా స్టార్చ్ (పిండి పదార్థం) కల్తీ: ఎల్జీ యూనిట్ నుంచి సేకరించిన 6 రకాల ముడి ఇంగువలో స్టార్చ్ గరిష్ఠ పరిమితి కేవలం 1% మాత్రమే ఉండాల్సి ఉండగా, ఏకంగా 15-32% వరకు పిండి పదార్థం ఉన్నట్లు గుర్తించారు.
**మరో 3 రకాల ఎవరెస్ట్ మసాలాల్లోనూ లోపాలు**
ఎవరెస్ట్ సంస్థకు చెందిన ఎగ్ కర్రీ మసాలా, చికెన్ మసాలా, గరం మసాలా తయారీలోనూ ప్రమాణాలు పాటించడం లేదని FSSAI తేల్చింది. అయితే వీటి విక్రయాలపై ప్రస్తుతానికి ఎలాంటి నిషేధం విధించలేదు.
నిబంధనలు పాటించే వరకు ఇంగువపై నిషేధం అమల్లో ఉంటుందని, తప్పులను సరిదిద్దుకోకుంటే తదుపరి చర్యలు తప్పవని FSSAI స్పష్టం చేసింది.
