22/03/2026
#क्रांतीवीर_नागनाथ_अण्णा_नायकवडी
#स्मृतीदिन_१४_वे_वर्ष
"१९९३ मध्ये "नागनाथ अण्णांनी" पाहिलेल्या स्वप्नाप्रमाणे आटपाडी तालुक्यासह १३ दुष्काळी तालुक्यातील शेतात पाणी बघणार मगच पाणी चळवळ थांबवणार"
- डॉ. भारत पाटणकर, अध्यक्ष श्रमिक मुक्ती दल.
दि.२२ मार्च २०१८ - आटपाडी जि. सांगली
१९९३ मध्ये या आटपाडी तालुक्यामध्ये पाण्याचा लढा उभा करण्यासाठी मी जेव्हा आटपाडी येथे प्रथम आलो. त्यावेळी विलास खरात यांनी मला ज्यावेळी पुढच्या वेळी याल, त्यावेळी क्रांतिवीर नागनाथ अण्णांना पाण्याचा लढा उभा करण्यासाठी घेऊन येण्यास सांगितले. मी याबाबत नागनाथ अण्णानां विनंती केली की, 'तुम्हाला पण आटपाडी येथे विलास खरात पाण्याचा लढा उभा करण्यासाठी बोलवत आहेत तुम्ही येणार का?? 'त्यावर नागनाथअण्णांनी कोणताही मागचा पुढचा विचार करता लगेच 'होकार' दिला.
त्यावेळी लगेचच त्याच महिन्यामध्ये क्रांतिवीर नागनाथ अण्णाच्या नेतृत्वाखाली आटपाडी मध्ये 'जाहीर सभेचे' आयोजन केलेले होते. या सभेस लोकांची प्रचंड अशी गर्दी गोळा झालेली होती. सभा प्रचंड जोमात आली असताना, स्टेजवर असा एक प्रसंग घडला की, क्रांतिवीर नागनाथ अण्णांनी त्या जाहीर सभेमध्ये आपल्या भाषणा मध्ये जाहीर केले की, "जो पर्यंत आटपाडी तालुक्यासह १३ दुष्काळी तालुक्यामध्ये पाणी येत नाही. तो पर्यंत आटपाडी मध्ये पाण्याच्या लढयासाठी मुक्कामचं करायचा. त्यासाठी आटपाडी मध्ये कायमस्वरूपी "मुक्कामाचा तंबू" ठोकायचा, असे नुसते बोलून नागनाथ अण्णा थांबले नाहीत तर लगेचच सभेनंतर आटपाडी मध्ये "मुक्कामाचा तंबू" माझ्या आणि अण्णाच्या देखरेखीखाली ठोकण्यात आला.
आज आटपाडी मध्ये हा 'जाहीर सत्कार' स्वीकारत असताना माझ्यासह आपण सर्वजण '२०१८' मध्ये प्रवेश करीत आहोत, 'क्रांतिवीर नागनाथ अण्णांच्या' इच्छे प्रमाणे, ११९३ मध्ये उभा करण्यात आलेला "मुक्कामाचा तंबू" २४ वर्षानंतर आटपाडी मध्ये राहिला नसला तरी, त्या "मुक्कामाच्या तंबू" इतकेच ठामपणे आम्ही श्रमिक मुक्ती दल आणि पाणी संघर्षाच्या नेतृत्वाखाली, या आटपाडी तालुक्याच्या माती मध्ये आजही 'दमदारपणे' पाय रोवून उभा आहोत, नुसते उभा नाही तर आपल्या सर्वांच्या साक्षीने आज या सभेमध्ये जाहीर करतो की, "१९९३ मध्ये क्रांतिवीर नागनाथ अण्णांनी पाहिलेल्या स्वप्नाप्रमाणे आटपाडी तालुक्यासह १३ दुष्काळी तालुक्यातील शेतात पाणी बघणार मगच पाणी चळवळ थांबवणार. आणि ही घोषणा १०० टक्के राबवल्या शिवाय आम्ही गप्प बसणार नाही." असे वचन मी डॉ.भारत पाटणकर आपणा सर्वाना देऊ इच्छितो.
आटपाडी तालुक्यासह १३ दुष्काळी तालुक्यातील 'आजचा प्रत्येक माणूस म्हणजेच क्रांतिवीर नागनाथ अण्णांच्या स्वप्ना मधील एक "मुक्कामाचा तंबू" आहे. आणि हा "मुक्कामाचा तंबू" आता पूर्वी सारखा आटपाडी मध्ये एका ठिकाणी नसला तरी आटपाडी तालुक्यासह १३ दुष्काळी तालुक्यातील प्रत्येक माणसाच्या मनामध्ये आजही जिवंत आहे. त्या स्वप्ना प्रमाणे १९९३ पासून आजपर्यंतच्या २५ वर्षा मध्ये आपण जे यश संपादन केले ते यश असच पुढे ठेवून "क्रांतिवीर नागनाथ अण्णांनी '१९९३' मध्ये आटपाडी तालुक्यासह १३ दुष्काळी तालुके "कायमस्वरूपी दुष्काळमुक्त" करणेचे पाहिलेलं स्वप्न पूर्ण करण्यासाठी पुन्हा एकदा नव्या जोमाने उभा राहूया, लढत राहूया, संघर्ष करत करत विजयी पताका उभा करूया........."
जय हिंद....
- डॉ. भारत पाटणकर.
(नागनाथ अण्णांच्या " ०६ स्मृतीदिनी" (दि.22 मार्च २०१८) आटपाडी जि. सांगली येथे समन्यायी पाणी वाटप आणि पाणी संघर्ष चळवळीच्या वतीने धरणग्रस्त आणि दुष्काळग्रस्त जनतेची ऐतिहासिक एकजूट व संघर्षाचा भव्य विजयी मेळावा आणि जाहीर नागरी सत्कारा वेळी चळवळी चे नेते डॉ. भारत पाटणकर, अध्यक्ष श्रमिक मुक्ती दल, यांनी केलेल्या जाहीर भाषणामध्ये वरील उदगार काढले)
शब्दांची जुळवाजुळव - सुधीर नलवडे, तासगाव जि. सांगली.
