22/09/2023
*চৰাইদেউত শিশুৰ বিৰুদ্ধে হিংসা, ইতিবাচক পুৰুষত্ব তথা মনো-সামাজিক সমৰ্থনৰ ওপৰত জিলা পৰ্যায়ৰ অভিসৰণ সভা সম্পন্ন*
সোণাৰি, ২২ ছেপ্তেম্বৰঃ এবিটা-ইউনিচেফৰ উদ্যোগত তথা চৰাইদেউ জিলা মহিলা আৰু শিশু উন্নয়ন বিভাগৰ সৌজন্যত আজি জিলা আয়ুক্ত কাৰ্যালয়ৰ প্ৰশিক্ষণ কক্ষত শিশুৰ বিৰুদ্ধে হিংসা, ইতিবাচক পুৰুষত্ব আৰু মনো-সামাজিক সমৰ্থন সন্দৰ্ভত এখনি জিলা পৰ্যায়ৰ অভিসৰণ সভা অনুষ্ঠিত হৈ যায়। সভাখনিৰ উদ্বোধন কৰি মহকুমাধিপতি(সদৰ) তথা ভাৰপ্ৰাপ্ত জিলা সমাজ কল্যাণ বিষয়া শ্ৰাৱণা সোনোৱালে কয় যে বৰ্তমান সমাজত শিশু আৰু মহিলাৰ বিৰুদ্ধে ভয়াৱহভাৱে বাঢ়ি অহা হিংসা প্ৰতিৰোধ কৰিবৰ বাবে প্ৰতিটো বিভাগে ঐক্যবদ্ধভাৱে কাম কৰিব লাগিব। বিশেষকৈ চাহ-বাগিছা অঞ্চলসমূহত এই সংখ্যা সৰ্বাধিক। পুৰুষৰ ভূমিকাৰ বিষয়ে উল্লেখ কৰি বিষয়াগৰাকীয়ে লগতে কয় যে তেওঁলোকে ইতিবাচক নেতৃত্বসুলভ গুণেৰে সমাজক আগুৱাই নিব লাগিব।
পোষণ অভিযানৰ জিলা সমন্বয়ক দ্বীপেন বৰুৱাই আদৰণী ভাষণ প্ৰদান কৰা সভাখনত উদ্দেশ্য ব্যাখ্যা প্ৰদান কৰে এবিটা-ইউনিচেফৰ চক্ৰ সমন্বয়ক মনোজ গগৈয়ে। সভাত চৰাইদেউ জিলা শিশু কল্যাণ সমিতিৰ অধ্যক্ষ পূৰবী নেওগেও বক্তব্য প্ৰদান কৰে। এবিটা-ইউনিচেফৰ কাৰ্যক্ৰম পৰিচালক মুক্তিকাম বৰদলৈয়ে বিস্তাৰিতভাৱে পাৱাৰপইণ্টসহ পৰ্যালোচনা আগবঢ়ায়।
আজিৰ পৰ্যালোচনা সভাখনত অভয়পুৰ, সাপেখাতী আৰু লাকুৱা প্ৰকল্পৰ বিষয়াত্ৰয় ক্ৰমে মিৰাণ্ডা সোনোৱাল, মৌচুমী গগৈ আৰু সুপ্ৰিয়া বৰদলৈ, সমল মুখ্য সেৱিকাবৃন্দ ক্ৰমে গীতাঞ্জলি গগৈ, শশী ডেকা, মৌচুমী ৰেখা গগৈ আৰু মিতালী বৰা, জিলা শিশু সুৰক্ষা কোষৰ ড° প্ৰীতিমণি গগৈ ফুকন আৰু নিৰুপম চুতীয়া প্ৰমুখ্যে সখী-একক অৱস্থান কেন্দ্ৰ, পোষণ অভিযান আৰু প্ৰধানমন্ত্ৰী মাত্ৰু বন্দনা আঁচনিৰ কৰ্মচাৰীৰ লগতে বিভাগীয় বিষয়াসকল উপস্থিত থাকে।
