11/08/2026
പ്രസിദ്ധീകരണത്തിന്
11-08-2026
ആരോഗ്യ വകുപ്പ് ജീവനക്കാരിയുടെ
മരണത്തിനുത്തരവാദികളായവരുടെ പേരില് നരഹത്യയ്ക്ക് കേസെടുക്കണം
-ജോയിന്റ് കൗണ്സില്
കണ്ണൂര് ചൊക്ലി എഫ്.എച്ച്.സി യിലെ ഹെല്ത്ത് ഇന്സ്പെക്ടര് ആര്.ദീപലേഖയുടെ മരണത്തിന് ഉത്തരവാദികളായവരുടെ പേരില് നരഹത്യയ്ക്ക് കേസെടുക്കണമെന്ന് ജോയിന്റ് കൗണ്സില് ചെയര്മാന് നരേഷ്കുമാര് കുന്നിയൂരും ജനറല് സെക്രട്ടറി എസ്.സജീവും സര്ക്കാരിനോടാവശ്യപ്പെട്ടു. സംസ്ഥാനത്ത് ഭരണമാറ്റത്തെ തുടര്ന്ന് നിലവിലുള്ള നിയമങ്ങളും ചട്ടങ്ങളും മറികടന്നാണ് ആയിരക്കണക്കിന് ജീവനക്കാരെ വിവിധ വകുപ്പുകളിലായി സ്ഥലംമാറ്റിയത്. ഇരുപതിനായിരത്തോളം ജീവനക്കാരെയാണ് രണ്ട് മാസത്തിനിടയ്ക്ക് വിവിധ വകുപ്പുകളിലായി കൂട്ട സ്ഥലംമാറ്റത്തിന് വിധേയമാക്കിയത്. അടിക്കടിയുണ്ടാകുന്ന സ്ഥലംമാറ്റങ്ങള് ജീവനക്കാരില് കടുത്ത മാനസിക സമ്മര്ദ്ദമാണ് സൃഷ്ടിക്കുന്നത്.
ആരോഗ്യ വകുപ്പില് ഹെല്ത്ത് ഇന്സ്പെക്ടറായ ദീപലേഖ കണ്ണൂര് ജില്ലയില് ചൊക്ലി കുടുംബാരോഗ്യ കേന്ദ്രത്തിലേക്ക് സ്ഥലം മാറിയെത്തിയിട്ട് നാല് മാസമേ ആയിട്ടുള്ളൂ. അതിനിടയില് ഒരു വാഹന അപകടം ഉണ്ടാകുകയും കാലിന് പരിക്കു പറ്റി മൂന്ന് മാസക്കാലം ബാന്റേജ് ഇട്ട് കിടപ്പിലാകുകയും ചെയ്തു . അതിനിടയിലാണ് എല്ലാ മാനദണ്ഡങ്ങളും കാറ്റില് പറത്തി വീട്ടില് നിന്നും 80 കി.മി. അകലെയുള്ള മട്ടന്നൂരിലേക്ക് സ്ഥലംമാറ്റിയത്. ഈയൊരവസ്ഥയില് ബുദ്ധിമുട്ടിക്കരുതെന്ന് ദീപലേഖ അപേക്ഷിച്ചിട്ടും പരിഗണിച്ചില്ലെന്ന് മാത്രമല്ല രണ്ടു ദിവസത്തിനുള്ളില് മട്ടന്നൂരിന് സമാന ദൂരത്തിലേക്ക് വീണ്ടും സ്ഥലംമാറ്റപ്പെട്ടു. ചികിത്സ കഴിഞ്ഞെത്തിയ അവര് ദിവസങ്ങളുടെ വ്യത്യാസത്തില് തുടര്ച്ചയായി വ്യത്യസ്ത സ്ഥലങ്ങളിലേക്കാണ് ട്രാന്സ്ഫര് ചെയ്യപ്പെട്ടത്. മൂന്നാമത്തെ ട്രാന്സ്ഫര് ഓര്ഡര് കൂടി കിട്ടിയതോടെ അവര് മാനസികമായി ഏറെ തളര്ന്നു. പരിയാരം മെഡിക്കല് കോളേജില് സ്ഥലംമാറ്റവുമായി ബന്ധപ്പെട്ട് സംഘടനാ നേതാക്കള് ചെന്ന് ഭീഷണിപ്പെടുത്തിയതിനെ തുടര്ന്ന് സമ്മര്ദവും മാനസികപീഢനവും താങ്ങാനാവാതെ വനിതാ ഡോക്ടര് ഹൃദയത്തിന്റെ പമ്പിംഗ് നന്നേ കുറഞ്ഞ് ഐ.സി.യുവിലായി. ഇപ്പോഴും ആശുപത്രിയില് ചികിത്സയിലാണ്. എല്ലാ ജീവനക്കാര്ക്കും നീതി ലഭ്യമാക്കേണ്ട മുഖ്യമന്ത്രി തന്നെ സ്ഥലംമാറ്റങ്ങള് ഇനിയുമുണ്ടാകും കരുതിയിരുന്നോ എന്ന് പരസ്യമായി മുന്നറിയിപ്പ് നല്കിയത് ഖേദകരമാണ്. ഈ പ്രസ്താവന പ്രയോജനപ്പെടുത്തി സ്ഥലംമാറ്റ മാഫിയകള് ജീവനക്കാരെ ഭീഷണിപ്പെടുത്തുകയാണ്. ഈ സര്ക്കാര് അധികാരത്തില് വന്നശേഷം നടന്ന മാനദണ്ഡ വിരുദ്ധ സ്ഥലംമാറ്റങ്ങള്ക്ക് പിന്നില് വന്തോതില് അഴിമതിയുണ്ടെന്നും ജോയിന്റ് കൗണ്സില് പറഞ്ഞു.
എസ്.സജീവ്
(ജനറല് സെക്രട്ടറി)
