20/10/2025
അറിയിപ്പ് !!!
സ്വർണത്തിന്റെ വില വല്ലാതെ കൂടിക്കൊണ്ടിരിക്കുന്നു.
ഇപ്പോൾ ഒരു പവൻ ആഭരണം വാങ്ങണമെങ്കിൽ ഒരു ലക്ഷം രൂപ വേണം.
അതിനാൽ ഒരു കാര്യം പ്രത്യേകം ശ്രദ്ധിക്കുക, വെളിയിലായാലും വീട്ടിലായാലും സ്വർണം സുരക്ഷിതമല്ല; അതുപോലെ നമ്മുടെ ജീവനും.
ബാങ്കുകൾ, ധനകാര്യ സ്ഥാപനങ്ങൾ എന്നിവിടങ്ങളിൽ ഇടപാടുകൾ നടത്തി, പണവും സ്വർണവുമായി പുറത്തിറങ്ങുന്നവർ പ്രത്യേകം സൂക്ഷിക്കുക.
വലിയ തോതിലുള്ള പണം, സ്വർണാഭരണങ്ങൾ, മൂല്യമേറിയ വസ്തുക്കൾ എന്നിവ വീടുകളിൽ സൂക്ഷിക്കരുത്. അതിന് അംഗീകൃത ബാങ്ക് ലോക്കറുകളുടെ സേവനം തേടുക.
തിരക്കേറിയ ബസ്, ട്രെയിൻ തുടങ്ങിയ പൊതു വാഹനങ്ങളിൽ യാത്ര ചെയ്യുന്നവരും, തിരക്കേറിയ ബസ് സ്റ്റാൻഡുകൾ, റയിൽവേ സ്റ്റേഷനുകൾ, റോഡുകൾ, ചന്തകൾ തുടങ്ങിയ പൊതുസ്ഥലങ്ങളിൽ പോകുന്നവരും പ്രത്യേകം ജാഗ്രത പാലിക്കേണ്ടതാണ്.
ഷോപ്പിങ്ങിനും മറ്റുമായി നഗരത്തിൽ എത്തുന്ന വാഹനങ്ങൾ പാർക്ക് ചെയ്ത് പോകുമ്പോൾ നിങ്ങളുടെ പണം, സ്വർണം തുടങ്ങിയവ വാഹനങ്ങളിൽ സൂക്ഷിക്കരുത്. വാഹനങ്ങളുടെ ഗ്ലാസ് തകർത്തോ, വാതിൽ തുറന്നോ മോഷണം നടന്നേക്കാം.
കള്ളന്മാർ ഏത് വേഷത്തിലും വരാം, സൂക്ഷിച്ചാൽ ദുഖിക്കേണ്ടി വരില്ല.
അപരിചിതരെ യാതൊരു കാരണവശാലും വീട്ടിനുള്ളിൽ കയറ്റരുത്.
നമ്മൾ പുറത്ത് പോകുമ്പോഴും ആവശ്യത്തിനു മാത്രമുള്ള ആഭരണങ്ങൾ മാത്രം ധരിക്കുക.
അധികമായാൽ അമൃതും വിഷമായി മാറുന്നു എന്നത് മറക്കരുത്.
അതിരാവിലെയും സന്ധ്യക്ക് ശേഷവും നടക്കാൻ പോകുന്നവർ ആഭരണങ്ങൾ അധികം ധരിക്കാതിരിക്കുന്നതാവും ഉചിതം.
വീടുകൾ പൂട്ടിയിട്ട് ബന്ധുവീടുകളിലോ യാത്രകൾക്കോ പോകേണ്ടി വരുമ്പോൾ അയൽക്കാർക്ക് അറിയിപ്പ് നൽകുക. കൂടുതൽ ദിവസം വീടുവിട്ടു നിൽക്കേണ്ടി വന്നാൽ ബന്ധപ്പെട്ട പോലീസ് സ്റ്റേഷനിൽ അറിയിക്കുക.
രാത്രി കാലങ്ങളിൽ വീടിനു പുറത്ത് കൃഷിയുപകരണങ്ങൾ, ഏണി മുതലായവ സൂക്ഷിക്കരുത്. കുറ്റവാളികൾക്ക് ഇത് സഹായകരമായേക്കാം.
പകൽ സമയങ്ങളിൽ പ്രായമേറിയവരും കുട്ടികളും മാത്രം ഉള്ള വീടുകളിൽ പുറമേ നിന്നും വരുന്ന ആളുകളെ അത്യാവശ്യമെങ്കിൽ മാത്രമേ അകത്തു പ്രവേശിപ്പിക്കാവൂ. കോളിങ്ങ് ബെൽ അടിച്ച് മുൻവശത്തേക്ക് നമ്മൾ വരുമ്പോൾ പിൻവശത്തെ വാതിൽ അടച്ചിട്ടുണ്ടെന്ന് ഉറപ്പുവരുത്തുക.
ഈ പോസ്റ്റ് പൊതുജന താൽപ്പര്യാർത്ഥം ഷെയർ ചെയ്യുക.