06/09/2026
സെപ്റ്റംബര് ഒന്നിന് ഡൽഹിയിൽ രാംലീലാ മൈതാനത്ത് ഒത്തുചേർന്ന് രാജ്യത്തെ ജനങ്ങൾ ഒന്നിച്ചുയർത്തിയത്, ബദലാവ് സരൂരി ഹെ — മാറ്റം അനിവാര്യം — എന്ന മുദ്രാവാക്യമാണ്. രാജ്യത്തിന്റെ എല്ലാ മേഖലകളിൽ നിന്നും ചെങ്കൊടികളുമായി ആബാലവൃദ്ധം ഡൽഹിയിലേക്ക് ഒഴുകിയെത്തുകയായിരുന്നു. ദുരിതമനുഭവിക്കുന്ന ജനത അവർക്ക് നേതൃത്വം നൽകുമെന്ന് വിശ്വാസമുള്ള കമ്മ്യൂണിസ്റ്റ് പാർട്ടിയുടെ ആഹ്വാനം ഉൾക്കൊണ്ട് ഡൽഹിയിലേക്ക് ഓഗസ്റ്റ് 30 മുതൽ തന്നെ എത്താൻ തുടങ്ങിയിരുന്നു.
രാജ്യത്ത് മാറ്റത്തിന്റെ കാഹളം ഉയർന്നു എന്നതിന്റെ പ്രഖ്യാപനമായിരുന്നു ഡൽഹിയിലെ ബഹുജന റാലി. എല്ലാ മേഖലകളിലും വേരുകളും ശക്തമായ അടിത്തറയുമുള്ള രാഷ്ട്രീയ പാർട്ടിയാണ് സിപിഐ എന്ന് പ്രഖ്യാപിക്കുന്നതായിരുന്നു റാലി. ആദിവാസികൾ, പിന്നാക്ക ജനവിഭാഗങ്ങൾ, ഗ്രാമീണരായ പട്ടിണിപ്പാവങ്ങൾ, തൊഴിലാളികൾ, കർഷകത്തൊഴിലാളികൾ ഇടത്തരക്കാർ, മാറ്റത്തിനായി ആഗ്രഹിക്കുന്ന വിവിധ തലങ്ങളിലുള്ളവർ, സർവകലാശാലകളിൽ ഉൾപ്പെടെയുള്ള അധ്യാപകർ, ബുദ്ധിജീവികൾ, കലാ — സാംസ്കാരിക രംഗത്തുള്ളവർ, ശാസ്ത്രജ്ഞർ, മാധ്യമപ്രവർത്തകർ തുടങ്ങി വിവിധ മേഖലകളിൽ സാന്നിധ്യമുള്ള നിരവധിയാളുകൾ റാലിക്ക് പിന്തുണ പ്രഖ്യാപിച്ച് രംഗത്തുണ്ടായിരുന്നു.
നൂറുകണക്കായ വിദ്യാർത്ഥികളും യുവതീയുവാക്കളും നിരവധി ദിവസക്കാലം നഗരം കേന്ദ്രീകരിച്ച് റാലി വിജയിപ്പിക്കുന്നതിനായി രാപ്പകൽ പ്രവർത്തിച്ചു. ഡൽഹിയിലെ വിവിധ സർവകലാശാലകളിലും കോളജുകളിലും മറ്റ് വിദ്യാഭ്യാസ സ്ഥാപനങ്ങളിലും പഠിക്കുന്ന വിദ്യാർത്ഥികൾ വോളണ്ടിയർമാരായി പ്രവർത്തിക്കാൻ രംഗത്തുവന്നത് ആവേശകരമായിരുന്നു. മാറ്റത്തിനായി ആഗ്രഹിക്കുന്ന ഇന്ത്യൻ ജനതയുടെ നിശ്ചയദാർഢ്യം അവരുടെ പ്രവർത്തനങ്ങളിൽ കാണാൻ കഴിഞ്ഞു. ഒരു ലക്ഷത്തിലധികം ജനങ്ങളാണ് രാജ്യതലസ്ഥാനത്തേക്ക് ഒഴുകിയെത്തിയത്. അവരെ ഉൾക്കൊള്ളാൻ കഴിയുന്ന മൂന്നു കൂറ്റൻ പന്തലുകൾ പ്രത്യേകമായി രാംലീല മൈതാനത്ത് പണിതുയർത്തിയിരുന്നു. രണ്ട് ദിവസം മുമ്പ് മുതൽ തന്നെ രാജ്യത്തിന്റെ വിവിധ ഭാഗങ്ങളിൽ നിന്നായി ജനം വന്നുതുടങ്ങി. അവർക്ക് തലചായ്ക്കാനും പ്രാഥമിക സൗകര്യങ്ങൾക്കും രാംലീലാ മൈതാനത്ത് തന്നെ പ്രത്യേക സൗകര്യം ഉണ്ടാക്കിയിരുന്നു. സംഘാടനത്തിന്റെ മികവ് എല്ലാതലങ്ങളിലും ശ്രദ്ധേയമായിരുന്നു.
മുദ്രാവാക്യം വിളികളും വിപ്ലവഗാനങ്ങളും നാടോടി നൃത്തങ്ങളും ചർച്ചകളും ഉൾപ്പെടെ ആവേശകരമായ പരിപാടികൾ ആയിരുന്നു പന്തലിൽ ഉണ്ടായിരുന്നത്. ഇന്ത്യൻ ഗ്രാമങ്ങളിൽ നിന്നും പട്ടണങ്ങളിൽ നിന്നും ജനങ്ങൾ എത്തുന്നത് തടസപ്പെടുത്താൻ കേന്ദ്രസര്ക്കാരും ബിജെപി നേത്വത്തിലുള്ള സംസ്ഥാന സര്ക്കാരുകളും നേരത്തെ തന്നെ നടപടികൾ കൈക്കൊണ്ടിരുന്നു. കേരളം, തമിഴ്നാട് ഉൾപ്പെടെ സംസ്ഥാനങ്ങളിൽ നിന്നും ബുക്ക് ചെയ്ത സ്പെഷ്യൽ ട്രെയിനുകൾ കാൻസൽ ചെയ്തു. ഡൽഹിയുടെ സമീപ സംസ്ഥാനങ്ങളായ യുപി, ഹരിയാന എന്നിവിടങ്ങളിൽ നിന്ന് പ്രവർത്തകർ എത്താതിരിക്കാൻ സിപിഐ ജില്ലാ സെക്രട്ടറിമാർ ഉൾപ്പെടെയുള്ള നേതാക്കളെയും, പ്രവർത്തകരെയും വീട്ടുതടങ്കലിലാക്കി. ഡൽഹിയിലേക്ക് വരുന്ന വാഹനങ്ങള് തടഞ്ഞുനിർത്തി പരിശോധന നടത്തി. തടസങ്ങളുണ്ടാക്കി. ചെങ്കൊടി കെട്ടിയ വാഹനങ്ങളെ വഴിതിരിച്ചുവിട്ട് പ്രയാസത്തിലാക്കി. പൊലീസിനെ ഉപയോഗിച്ച് വിവിധ സ്ഥലങ്ങളിൽ തടസങ്ങൾ സൃഷ്ടിക്കാനും ശ്രമിച്ചു. ഇതിനെയെല്ലാം തട്ടിമാറ്റിയാണ് ബദലാവ് സരൂരി ഹെ എന്ന മുദ്രാവാക്യം ഉയർത്തി ജനങ്ങൾ ഡൽഹിയിൽ കുതിച്ചെത്തിയത്.
ഇന്ത്യ കണ്ട ഏറ്റവും വലിയ ജനകീയ ഇടപെടൽ ആയിരുന്നു സെപ്റ്റംബർ ഒന്നിന് ഡൽഹിയിൽ നടന്ന റാലി. രാജ്യത്തെ എല്ലാ ദേശീയ പത്രങ്ങളും പ്രാദേശിക പത്രങ്ങളും, ദേശീയ — പ്രാദേശിക ചാനലുകളും റാലിയിലെ ജനപങ്കാളിത്തം എടുത്തുകാട്ടി. സിപിഐയുടെയും ഇന്ത്യൻ ഇടതുപക്ഷത്തിന്റെയും ശക്തിപ്രകടനമായി റാലി റിപ്പോർട്ട് ചെയ്തു. കേന്ദ്രസര്ക്കാരിന് സ്തുതി പാടുന്ന ദൃശ്യ, അച്ചടി മാധ്യമങ്ങൾക്ക് പോലും റാലിയെ തമസ്കരിക്കാന് കഴിഞ്ഞില്ല. ഡൽഹി റാലിക്ക് മുമ്പുതന്നെ ബദലാവ് സരൂരി ഹെ എന്ന മുദ്രാവാക്യം ഉയർത്തി, രാജ്യത്തുടനീളം പദയാത്രകൾ സംഘടിപ്പിച്ച് റാലിയുടെ സന്ദേശം ജനങ്ങളില് എത്തിച്ചിരുന്നു. സിപിഐ ഘടകങ്ങളുള്ള ഇന്ത്യയിലെ എല്ലാ ഗ്രാമങ്ങളിലും സമര സന്ദേശവുമായി പദയാത്രകൾ നടത്തി ജനങ്ങളുടെ പിന്തുണ അഭ്യർത്ഥിച്ചു. പദയാത്രകൾ വിജയപ്രദമായി സംഘടിപ്പിക്കുന്നതിന് രാജ്യത്തുടനീളം പാർട്ടി ഘടകങ്ങൾ ആവേശത്തോടെ മുന്നോട്ട് വന്നു.
കേരളത്തിൽ നിന്ന് രണ്ടായിരത്തോളം പാർട്ടി പ്രവർത്തകർ, റാലിയിൽ പങ്കെടുക്കാനായി 30-ാം തീയതി മുതൽ എത്തിത്തുടങ്ങി. അഡ്വാൻസ് നൽകി ബുക്ക് ചെയ്ത ട്രെയിൻ റദ്ദ് ചെയ്തിട്ടും പ്രവര്ത്തകര് ഡൽഹിയിൽ എത്തുന്നത് തടയുവാൻ ഭരണകൂടത്തിന് കഴിഞ്ഞില്ല. ചെന്നൈ, ബംഗളൂരു, നാഗർകോവിൽ, മംഗലാപുരം തുടങ്ങി കേരളത്തിന് പുറത്തുള്ള റെയിൽവേ സ്റ്റേഷനുകളിൽ നിന്നും ടിക്കറ്റ് ബുക്ക് ചെയ്തും മറ്റു മാർഗങ്ങളിലുമായി പ്രവർത്തകർ ഡൽഹിയിൽ എത്തുകയായിരുന്നു.
യാത്ര തടസപ്പെടുത്തുന്നതിന് ട്രെയിൻ കാൻസൽ ചെയ്തപ്പോൾ, സംസ്ഥാനത്തെ റെയിൽവേ സ്റ്റേഷനിലേക്ക് പാർട്ടിയുടെ നേതൃത്വത്തിൽ പ്രതിഷേധ പ്രകടനം നല്ല ജനപങ്കാളിത്തത്തോടെ സംഘടിപ്പിച്ചു. ഡൽഹി യാത്ര തടസപ്പെടുത്താൻ ശ്രമിച്ച, മറ്റ് സംസ്ഥാനങ്ങളിലും ശക്തമായ പ്രതിഷേധം നടന്നു. സെപ്റ്റംബർ രണ്ട്, മൂന്ന് തീയതികളിൽ തന്നെ പാർട്ടി കേന്ദ്ര സെക്രട്ടേറിയറ്റ്, എക്സിക്യൂട്ടീവ്, ദേശീയ കൗൺസിൽ യോഗങ്ങൾ പാർട്ടി കേന്ദ്ര ആസ്ഥാനമായ അജോയ് ഭവനിൽ ചേർന്നു. ബദലാവ് സരൂരി ഹെ എന്ന മുദ്രാവാക്യത്തിനും റാലിക്കും പിന്തുണ നൽകിയ ഇന്ത്യയിലെ ജനങ്ങളെ ദേശീയ കൗൺസിൽ അഭിനന്ദിക്കുകയും, അഭിവാദ്യം ചെയ്യുകയും ചെയ്തു. ‘മാറ്റം അനിവാര്യമാണ്’ എന്ന മുദ്രാവാക്യം ഉയർത്തി ശക്തമായ പ്രക്ഷോഭ പരിപാടികൾ തുടരാൻ പാർട്ടി ദേശീയ കൗൺസിൽ ആഹ്വാനം ചെയ്തു.
ഡിസംബർ ഒന്ന് മുതൽ മൂന്ന് വരെ ലക്ഷക്കണക്കിന് ജനങ്ങൾ അറസ്റ്റ് വരിച്ച് ജയിലിൽ പോകും. ഇന്ത്യൻ ജയിലുകൾ മാറ്റത്തിനായി പോരാടുന്ന ദേശാഭിമാനികളെക്കൊണ്ട് നിറയും. പ്രക്ഷോഭത്തിൽ പങ്കെടുക്കുന്ന വോളണ്ടിയർമാരെ റിക്രൂട്ട് ചെയ്യുന്നതിനായി സംസ്ഥാനങ്ങളിൽ വൈകാതെ തന്നെ പ്രവർത്തനങ്ങൾ ആരംഭിക്കാനും ദേശീയ കൗൺസിൽ തീരുമാനിച്ചിട്ടുണ്ട്. ഇന്ത്യൻ സ്വാതന്ത്ര്യസമരത്തിന്റെ മഹാനായ നേതാവായ മഹാത്മാ ഗാന്ധിയുടെ ജന്മദിനമാണ് ഒക്ടോബർ രണ്ട്. അന്നേദിവസം ദേശാവ്യാപകമായി മതസൗഹാർദ ദിനമായി ആചരിക്കാൻ ദേശീയ കൗൺസിൽ തീരുമാനിച്ചു. ‘ഹിന്ദു, മുസ്ലിം ഭായി ഭായി’ എന്ന മുദ്രാവാക്യം ഉയർത്തി, എല്ലാവിഭാഗം ജനങ്ങളെയും സ്വാതന്ത്ര്യസമരത്തിൽ ഒന്നിച്ച് അണിനിരത്തുന്നതിനായി നേതൃത്വം നൽകിയ മഹാത്മജിയെ, രാഷ്ട്രീയ സ്വയംസേവക സംഘിന്റെ പ്രത്യയശാസ്ത്രത്തിൽ ആകൃഷ്ടരായ ഗോഡ്സേ, സവർക്കർ അടക്കമുള്ള ഹിന്ദുത്വ തീവ്രവാദികൾ ഗൂഢാലോചന നടത്തി, വെടിയുതിർത്ത് കൊലപ്പെടുത്തുകയാണ് ചെയ്തത്.
‘ഹേറാം, റാം’ എന്ന് മന്ത്രിച്ചു കൊണ്ടാണ് മഹാത്മജി ജീവൻ വെടിഞ്ഞത്. ഒക്ടോബര് രണ്ടിന് രാജ്യത്തുടനീളം മതസൗഹാർദ ദിനം ആചരിക്കുവാനും ദേശീയ കൗൺസിൽ ആഹ്വാനം ചെയ്തിട്ടുണ്ട്. വർഗീയ ശക്തികൾക്കെതിരായി നടത്തുന്ന പോരാട്ടത്തിന്റെ ഭാഗമായാണ് പാർട്ടി ദേശീയ കൗൺസിൽ മതസൗഹാർദ ദിനത്തിന് ആഹ്വാനം ചെയ്തത്. നവംബർ ഏഴിന് ഒക്ടോബർ സോഷ്യലിസ്റ്റ് വിപ്ലവത്തിന്റെ ഓർമ്മകൾ പുതുക്കാൻ പ്രചരണങ്ങൾ സംഘടിപ്പിക്കാനും തീരുമാനിച്ചു. യുഎസ് പ്രസിഡന്റ് റൊണാൾഡ് ട്രംപ് — ഇസ്രയേലി പ്രധാനമന്ത്രി നെതന്യാഹു കൂട്ടുകെട്ട് ലോകത്തെ ഭീഷണിയിൽ ആക്കിയിരിക്കുകയാണ്. തെരഞ്ഞെടുക്കപ്പെട്ട സര്ക്കാരുകളെ അട്ടിമറിക്കുക, രാഷ്ട്ര നേതാക്കളെ അറസ്റ്റ് ചെയ്ത് ജയിലിൽ അടയ്ക്കുക എന്ന നിലയിലേക്ക് ലോകത്തെ ഏകാധിപത്യത്തിലേക്ക് മാറ്റുന്നതിനാണ് ഇവർ ശ്രമിക്കുന്നത്. ഇതിനെതിരായി ലോകത്തിന്റെ എല്ലാ ഭാഗങ്ങളിലും ശക്തമായ പ്രതിഷേധം ഉയരുന്നുണ്ട്. ലോകം നേരിടുന്ന പുതിയ വെല്ലുവിളികളുടെ അന്തരീക്ഷത്തിലാണ് ഈ വർഷത്തെ ഒക്ടോബർ സോഷ്യലിസ്റ്റ് വിപ്ലവദിനം നാം ഓർക്കുന്നത്. വരുംനാളുകളിൽ മാറ്റം അനിവാര്യം എന്ന മുദ്രാവാക്യമുയര്ത്തി നിരന്തര സമരങ്ങളാണ് രാജ്യത്ത് ഉയരുക. ഇനിയുള്ള നാളുകളിൽ ഓരോ പ്രവര്ത്തകരും ജനാധിപത്യവിശ്വാസികളും ഇതിനായി പ്രവർത്തന രംഗത്തിറങ്ങണമെന്ന് ദേശീയ കൗൺസില് ആഹ്വാനം ചെയ്തു.
