10/08/2026
আজি পানীতোলা বৰুৱাহোলা গাঁৱৰ সফল কৃষক তথা কৃষি উদ্যোগী ৰণ্টু চেতিয়া ডাঙৰীয়াৰ বাসগৃহত তিনিচুকীয়া জিলা উন্নতি সভাৰ সভাপতি ৰাজেশ চাহু, সাধাৰণ সম্পাদক বিতু ডেকা আৰু অসম উন্নতি সভাৰ উপ-সভাপতি লক্ষীকান্ত শইকীয়া ডাঙৰীয়া সহ এটা প্ৰতিনিধি দল উপস্থিত হৈ তেখেতৰ কৃষিকৰ্ম, মীন পালন, সৰিয়হৰ তেল উৎপাদন, পশুপালন আদি বিভিন্ন কৃষিভিত্তিক কাৰ্যকলাপ পৰিদৰ্শন কৰে।
আলোচনাৰ সময়ত ৰণ্টু চেতিয়া ডাঙৰীয়াই তেখেতৰ কৃষিকৰ্মৰ অভিজ্ঞতা আৰু কৃষিৰ জৰিয়তে কেনেদৰে আত্মনিৰ্ভৰশীল হৈ উঠিছে, সেই বিষয়ে অৱগত কৰে। তেখেতে জানিবলৈ দিয়া মতে, বিভিন্ন কৃষিভিত্তিক কামৰ জৰিয়তে বছৰি প্ৰায় ১০ লাখ টকা উপাৰ্জন কৰিবলৈ সক্ষম হৈছে।
তেখেতৰ এই সফলতা আমাৰ জিলাৰ কৃষকসকলৰ বাবে এক অনুপ্ৰেৰণাদায়ক উদাহৰণ। কৃষিক কেৱল জীৱিকাৰ মাধ্যম হিচাপে নহয়, এক সফল উদ্যোগ হিচাপেও গ্ৰহণ কৰি স্বাৱলম্বী হোৱাৰ যথেষ্ট সম্ভাৱনা আছে।
ইয়াৰ লগতে তিনিচুকীয়া জিলাৰ কৃষকসকলক আগুৱাই নিয়া, কৃষিভিত্তিক উদ্যোগ বৃদ্ধি কৰা আৰু কৃষকৰ উৎপাদিত সামগ্ৰীৰ বাবে বজাৰ সৃষ্টি কৰাৰ ক্ষেত্ৰত গ্ৰহণ কৰিবলগীয়া বিভিন্ন পৰিকল্পনা আৰু সম্ভাৱনাৰ বিষয়েও এক গুৰুত্বপূৰ্ণ মত-বিনিময় কৰা হয়।
তিনিচুকীয়া জিলা উন্নতি সভা
