02/04/2026
ചക്കകുരു
കേരളത്തിന്റെ മണ്ണിൽ നന്നായി തഴച്ചു വളരുന്ന വൃക്ഷമാണ് പ്ലാവ്. കന്നി,തുലാം,വൃശ്ചികം,മകരം എന്നീ മാസങ്ങളിലാണ് ചക്ക സാധാരണയായി കായ്ച്ചു വരുന്നത്. കാലം തെറ്റി വരുന്ന മഴയും മഞ്ഞുമെല്ലാം ചക്ക കായ്ക്കുന്ന സമയത്തിലും വ്യതിയാനമുണ്ടാക്കിയിരിക്കുന്നുവെന്ന് നമുക്കറിയാം. അപൂർവമായി കർക്കിടക മാസത്തിൽ കായ്ക്കുന്ന പ്ലാവുകളും വർഷം മുഴുവൻ കായ്ക്കുന്ന പ്ലാവുകളുമുണ്ട്. ചക്ക രണ്ടിനങ്ങളായാണ് തരംതിരിച്ചിട്ടുള്ളത്. വരിക്കയും കൂഴയും. കോഴിക്കോട് ജില്ലയിലെ മലയോരങ്ങളിലും ഉൾനാടൻ ഗ്രാമങ്ങളിലും ഉണ്ടാകുന്ന ചക്കകൾക്ക കൂടുതൽ മധുരമുണ്ടെന്നതിൽ സത്യാവസ്ഥയുണ്ടോ?
100 ഗ്രാം ചക്കക്കുരുവിൽ നിന്നും 133 കലോറി ഊർജ്ജം ലഭിക്കും. മാംസ്യം,അന്നജം, ഇരുമ്പ്, കൊഴുപ്പ്, സോഡിയം,പൊട്ടാസ്യം തുടങ്ങിയവ ചുളയിലുള്ളതിനേക്കാൾ വർദ്ധിച്ച തോതിൽ അടങ്ങിയിരിക്കുന്നു. പ്രോട്ടീൻ സമ്പുഷ്ടമായിട്ടുള്ള ചക്കക്കുരുവിൽ കൊഴുപ്പിന്റെ അംശം വളരെ കുറവാണ്.
100 ഗ്രാം ചക്കക്കുരുവിൽ അടങ്ങിയിട്ടുള്ള ഘടകങ്ങൾ
ജലാംശം- 51.6 -57.77 ഗ്രാം
പ്രോട്ടീൻ- 6.6 ഗ്രാം
കൊഴുപ്പ്- 0.4 ഗ്രാം
കാർബോഹൈഡ്രേറ്റ്സ്- 38.4 ഗ്രാം
നാര്- 1.5 ഗ്രാം
പൊട്ടാസ്യം- 1.25-1.50 ഗ്രാം
കാൽസ്യം-0.05 - 0.55 മി.ഗ്രാം
ഫോസ്ഫറസ്-0.13-0.23 മി.ഗ്രാം
അയേൺ-0.002-1.2 മിഗ്രാം
നാരുള്ള ഭക്ഷ്യപദാർത്ഥം എന്നതിലുപരി കൊളസ്ട്രോൾ തീരെയില്ലെന്നതും ചക്കയുടെ പ്രത്യേകതയാണ് . മാംസ്യം, അന്നജം, ജീവകങ്ങൾ എന്നിവയുടെ കലവറയാണ് ചക്ക. ചക്കയിലുള്ള ജീവകം ബി രക്തത്തിലെ അപകടകാരിയായ ഘടകങ്ങളുടെ അളവ് കുറയ്ക്കുന്നതിനാൽ ഹൃദ്രോഗ സാദ്ധ്യത കുറയ്ക്കുന്നു. ചക്കയിലെ ഫൈറ്റോ ന്യൂട്രിയസ് അർബുദത്തെ പ്രതിരോധിക്കും. ചക്കയിൽ ജാക്കലിൻ എന്ന ഒരു പദാർഥം അടങ്ങിയിരിക്കുന്നതായി കണ്ടുപിടിച്ചിട്ടുണ്ട്.ജാക്കലിൻ വൈറസുകളെ നശിപ്പിക്കുകയും എയ്ഡ്സിനെ പ്രതിരോധിക്കുകയും ചെയ്യുമെന്ന്കണ്ടെത്തിയിട്ടുണ്ട്.
ചക്കക്കുരുവിലെ തവിട്ടു നിറത്തിൽ ഒട്ടിപ്പിടിച്ചിരിക്കുന്ന തൊലിയിലാണ് കാൻസറിനെയും എയ്ഡ്സിനെയും ചെറുക്കുന്ന ഘടകങ്ങൾ കൂടുതലായി അടങ്ങിയിരിക്കുന്നത്. ഔഷധ മൂല്യം മനസ്സിലാക്കി കുരുവിനോട് ഒട്ടിപ്പിടിച്ച് കിടക്കുന്ന തൊലി കളയാതെ ഉപയോഗിക്കണം.
ചക്കക്കുരു വൃഷ്യവും മധുരവും ഗുരുത്വമുള്ളതുമാകുന്നു. മലബന്ധത്തെ ഉണ്ടാക്കുകയും മൂത്രത്തെ പെരുപ്പിക്കുകയും ചെയ്യും. ഗുൻമൻ, അഗ്നിമാന്ദ്യം എന്നിവയുള്ളവർ ഇത് വിശേഷിച്ചും വർജ്ജിക്കണം.
(കടപ്പാട്: പി.രജനി എഴുതിയ മുത്തശ്ശി വൈദ്യം എന്ന പുസ്തകത്തിലെ ഔഷധ സസ്യങ്ങളും നാട്ടറിവിന്റെ മാഹാത്മ്യവും എന്ന ലേഖനത്തിൽ നിന്നെടുത്തത്)
#ചക്കകുരു
