മലപ്പുറം ജില്ലയിലെ തിരൂര് താലൂക്കില് താനൂര് ബ്ളോക്കിലാണ് പൊന്മുണ്ടം ഗ്രാമപഞ്ചായത്ത് സ്ഥിതി ചെയ്യുന്നത്. പെരുമണ്ണ, പൊന്മുണ്ടം എന്നീ വില്ലേജുകളിലായി വ്യാപിച്ചുകിടക്കുന്ന പൊന്മുണ്ടം ഗ്രാമപഞ്ചായത്തിനു 9.116 ചതുരശ്രകിലോമീറ്റര് വിസ്തീര്ണ്ണമുണ്ട്. ഈ പഞ്ചായത്തിന്റെ അതിരുകള് വടക്കുഭാഗത്ത് പെരുമണ്ണ ക്ളാരി, എടരിക്കോട്, ഒഴൂര് പഞ്ചായത്തുകളും, കിഴക്കുഭാഗത്ത് എടരിക്കോട്, കല്പകഞ്ചരി, വളവന്നൂര് പഞ്ചായത്തു
കളും, തെക്കുഭാഗത്ത് ചെറിയമുണ്ടം, വളവന്നൂര്, നിറമരുതൂര് പഞ്ചായത്തുകളും, പടിഞ്ഞാറുഭാഗത്ത് ഒഴൂര്, നിറമരുതൂര് പഞ്ചായത്തുകളുമാണ്. 1955 ഡിസംബര് 31-നാണ് പൊന്മുണ്ടം പഞ്ചായത്തു നിലവില് വന്നത്. തെരഞ്ഞെടുപ്പിലൂടെ അധികാരത്തില് വന്ന ആദ്യഭരണസമിതിയുടെ പ്രസിഡന്റ് എം.ബാവമൂപ്പന് (മണ്ടായപ്പുറം) ആയിരുന്നു. തെരഞ്ഞെടുക്കപ്പെട്ട ഭരണസമിതി അധികാരത്തില് വന്നതോടെയാണ് പഞ്ചായത്തിന്റെ വികസനരംഗത്ത് മാറ്റത്തിന്റെ ശംഖൊലി കേള്ക്കാന് തുടങ്ങിയത്. പൊന്മുണ്ടം ഗ്രാമപഞ്ചായത്തിന്റെ നാല് ദിക്കുകളും ഉയര്ന്ന കുന്നുകള് അതിരിടുന്നു. ഉയര്ന്ന പാറകെട്ടുകളും, താഴ്വരകളും, സമതലപ്രദേശങ്ങളും നിറഞ്ഞ ഭൂപ്രകൃതിയാല് അനുഗ്രഹീതമാണ് ഈ പഞ്ചായത്ത്. ബംഗ്ളാകുന്ന്, മണ്ണാരകുന്ന്, തവളാംകുന്ന്, അയ്യായ കറുത്താല്, മുട്ടുത്താലകുന്ന്, ചെനമ്മല്കുന്ന്, കുറുക, കോഴിച്ചെന എന്നിവയാണ് പഞ്ചായത്തിലെ ഉയര്ന്ന കുന്നിന്പ്രദേശങ്ങള്. മലബാര് കലാപം അടിച്ചമര്ത്തുന്നതിനും കലാപകാരികളെ പിടികൂടി പീഡിപ്പിക്കുന്നതിനും സ്ഥാപിച്ചതായിരുന്നു കോഴിച്ചെന മലബാര് സ്പെഷ്യല് പോലീസ് ക്യാമ്പ്. സ്വാതന്ത്ര്യസമരം കൊടുമ്പിരിക്കൊണ്ട സമയത്ത്, ബ്രിട്ടീഷുകാരുടെ കുതിരപ്പട്ടാളം വന്ന് പെരുമണ്ണകിഴക്കിനിയകത്ത് മനയുടെ തെക്കുഭാഗത്തു വച്ച് ഒളിവില് കഴിഞ്ഞിരുന്ന ഏഴു പേരെ വെടിവെച്ച് കൊല്ലുകയുണ്ടായി. ദേശസ്നേഹികളായ ആ പോരാളികള് വെടിയേറ്റു വീണ സ്ഥലവും അവരുടെ ജഡം മറവുചെയ്ത സ്ഥലവും ഇന്നും ഈ ഗ്രാമത്തില് ദു:ഖസ്മരണകളുണര്ത്തിക്കൊണ്ട് ചരിത്രസ്മാരകമായി സംരക്ഷിക്കപ്പെടുന്നു.
