09/10/2020
#ವಿಶ್ವ_ಅಂಚೆ_ದಿನ 😍🙏
ಅದೊಂದು ಕಾಲವಿತ್ತು. 1980ರ ದಶಕ ಹಾಗೂ ಅದಕ್ಕೂ ಮುನ್ನ ಹುಟ್ಟಿದವರಿಗೆ ತುಂಬಾ ಚನ್ನಾಗಿ ಗೊತ್ತಿರುವ ಕಾಲವದು. ಆ ಕಾಲದಲ್ಲಿ ಅಂಚೆಗಿದ್ದ ಮಹತ್ವ, ಇವತ್ತಿನ ವಾಟ್ಸಪ್ಪಿಗೂ ಇಲ್ಲ! ಊರಿಗೊಂದು ಪೋಸ್ಟ್ ಆಫೀಸ್ ಇದ್ದರೆ ಅದೇ ದೊಡ್ಡ ಹೆಮ್ಮೆ. ಗೋಡೆಗೆ, ಕಂಬಕ್ಕೆ ಕಟ್ಟಿರುತ್ತಿದ್ದ ಕೆಂಪು ಡಬ್ಬಿಯೇ ಜಗತ್ತಿನ ಸಂವಹನ ಸಾಧನ! ಊರಿಗೆ ಹೊರಟು ನಿಂತವರಿಗೆ ಕಾಗದ ಬರೆಯೋದು ಮರೆಯಬೇಡ ಎಂದು ಹಿರಿಯರು ತಪ್ಪದೇ ಹೇಳುತ್ತಿದ್ದರು. ಹಿರಿಯರ ಮಾತಿಗೆ ಕಟ್ಟುಬಿದ್ದು ತೀರ್ಥರೂಪು ಸಮಾನರಾದ.. ಎಂದು ಆರಂಭಿಸಿ ಉದ್ದನೆಯ ಕಾಗದವೊಂದನ್ನು ಬರೆದೇ ಬಿಡುತ್ತಿದ್ದರು. ಆ ಕಾಗದ ಓದುತ್ತಿದ್ದರೆ, ಬರೆದವರೇ ಎದುರು ನಿಂತು ವೀಡಿಯೋ ಕಾಲ್ನಲ್ಲಿ ಮಾತನಾಡುತ್ತಿರುವಂಥಾ ದಿವ್ಯಾನುಭವ!
ಇಷ್ಟೆಲ್ಲಾ ಹಳೇ ಕಥೆ ಕೆದಕೋಕೆ ಕಾರಣ, ಇಂದು ವಿಶ್ವ ಅಂಚೆ ದಿನ. ಪ್ರತಿವರ್ಷ ಅಕ್ಟೋಬರ್ 9ರಂದು ಜಾಗತಿಕ ಅಂಚೆ ಸಂಘಟನೆಯ ವಾರ್ಷಿಕೋತ್ಸವ ಆಚರಿಸಲಾಗುತ್ತೆ. 1874ರಲ್ಲಿ ಸ್ವಿಟ್ಜರ್ಲೆಂಡ್ನಲ್ಲಿ ಆರಂಭವಾದ ಈ ಅಂಚೆ ದಿನ, ಇಂದು ವಿಶ್ವವ್ಯಾಪಿ. 1969ರಲ್ಲಿ ವಿಶ್ವಾದ್ಯಂತ ಅಂಚೆ ದಿನ ಆಚರಿಸಲು ನಿರ್ಧರಿಸಲಾಯ್ತು.
ಅಂಚೆ.. ಅಂದು.. ಇಂದು.
ಅಪ್ಪಾ.. ಇಲ್ಲಿ ನಾವು ಕೆಂಪು ಡಬ್ಬಿಗೆ ಹಾಕಿದ ಪೋಸ್ಟು ಅಲ್ಲಿ ಆ ಊರಲ್ಲಿ ತಾತನಿಗೆ ಹೇಗೆ ಸಿಗುತ್ತೆ ಎಂದು ಬೆರಗುಗಣ್ಣಿನಲ್ಲಿ ಪ್ರಶ್ನೆ ಕೇಳುತ್ತಿದ್ದ ಪುಟಾಣಿಗಳೇ ಇಂದು ಸೆಲ್ಫೋನ್ ಹಿಡಿದಿದ್ದಾರೆ. ಅದ್ಯಾವುದೋ ಮಾಯದಲ್ಲಿ ಪೋಸ್ಟ್ ಬಾಕ್ಸ್ ತೆಗೆದು ಅದರೊಳಗಿಂದ ಪತ್ರಗಳನ್ನು ತೆಗೆದುಕೊಂಡು ಹೋಗಿಬಿಡುತ್ತಿದ್ದರು! ಅಂಚೆಯಣ್ಣ ಪೋಸ್ಟ್ ಡಬ್ಬಿ ತೆಗೆಯೋದನ್ನೇ ಕಾದು ಕುಳಿತಿರುತ್ತಿದ್ದ ಪುಟಾಣಿಗಳು, ಅದರೊಳಗೇನೋ ಬ್ರಹ್ಮಾಂಡ ರಹಸ್ಯ ಇರಬಹುದೇ ಎಂದು ಇಣುಕಿ ನೋಡಿದ್ದೇ ನೋಡಿದ್ದು! ಹಳ್ಳಿಗಳಲ್ಲಿ ಊರಿಗೊಂದು, ಬೆಂಗಳೂರಿನಂಥಾ ನಗರಗಳಲ್ಲಿ ಗಲ್ಲಿಗೊಂದರಂತೆ ಇದ್ದ ಪೋಸ್ಟ್ ಡಬ್ಬಿಗಳು ಇಂದು ಕಣ್ಣಿಗೆ ಬೀಳೋದೇ ವಿರಳ. ಕೆಂಪು ಡಬ್ಬಿಗಳ ಜಾಗದಲ್ಲಿ ಹಳದಿ ಬಣ್ಣದ ಕಾಯಿನ್ ಫೋನ್ ಬೂತ್ ಬಂತು, ಇದೀಗ ಸೆಲ್ಫೋನ್ ಭರಾಟೆಯ ನಡುವೆ, ಹಳದಿ ಕಾಯಿನ್ ಬೂತ್ಗಳೂ ಮಾಸಿ ಹೋದವು.
ಪೋಸ್ಟ್, ಪೋಸ್ಟ್ ಎಂದು ಸೈಕಲ್ ಏರಿ ಅಂಚೆಯಣ್ಣ ಮನೆ ಬಾಗಿಲಿಗೆ ಬಂದರೆ ಸಾಕು ಎಷ್ಟೊಂದು ಸಂಭ್ರಮ! ಯಾರು ಪತ್ರ ಬರೆದಿರಬಹುದು? ಹೀಗೆ ಊಹೆ ಮಾಡುತ್ತಲೇ ಏಳು ತಲೆಮಾರು ಹಿಂದಿನವರೆಲ್ಲಾ ಸಡನ್ ಆಗಿ ನೆನಪಿಗೆ ಬಂದು ಬಿಡುತ್ತಿದ್ದರು! ಅಂಚೆಯಣ್ಣ ಕೊಟ್ಟುಹೋದ ಪತ್ರವನ್ನ ಓದುವಾತ ವಿದ್ಯಾವಂತನೇ ಆಗಿರಬೇಕಲ್ಲಾ! ಅದರಲ್ಲೂ ತಾತನೆದುರು ಪತ್ರ ಓದುವ ಮೊಮ್ಮಗನಿಗೆ ಎಷ್ಟೊಂದು ಗೌರವ! ಆರು ತಿಂಗಳಿಗೊಮ್ಮೆ, ಮೂರು ತಿಂಗಳಿಗೊಮ್ಮೆ ಬರುವ ಪತ್ರಗಳನ್ನು ಕೊಂಕಿಗೆ ಸಿಕ್ಕಿಸಿ ಮನೆಯ ಮಾಡಿನಲ್ಲಿರೋ ಜಂತೆಗೆ ನೇತು ಹಾಕಿ ಇಟ್ಟಿರುತ್ತಿದ್ದರು. ಆ ಕಾಲದಲ್ಲಿ ಅವುಗಳೇ ‘ಇಮೇಲ್ ಇನ್ಬಾಕ್ಸ್’! ಮೊದಲು ನೀವು ಪತ್ರ ಬರೆಯಿರಿ, ಅದನ್ನು ಓದಿ ನಾವು ಕ್ಷೇಮವಾಗಿದ್ದೇವೆ ಅಂತಾ ಪ್ರತ್ಯುತ್ತರ ಬರೆಯುತ್ತೇವೆ.. ಅಲ್ಲಿಗೆ ಉಭಯ ಕುಶಲೋಪರಿ ಸಾಂಪ್ರತ..!
ಆದರೇನಾಯ್ತು.. 80ರ ದಶಕದಿಂದಲೇ ನಿಧಾನವಾಗಿ ಪತ್ರ ವ್ಯವಹಾರ ಕಡಿಮೆಯಾಗುತ್ತಾ ಬಂತು. ಇಂಗ್ಲೆಂಡ್ ಲೆಟರ್ ಎಂದೇ ಜನಪ್ರಿಯವಾಗಿದ್ದ ಇನ್ ಲ್ಯಾಂಡ್ ಲೆಟರ್ ಕಣ್ಣಿಗೆ ಬೀಳೋದೇ ವಿರಳವಾಯ್ತು. ಪೋಸ್ಟ್ ಕಾರ್ಡ್ಗಳಂತೂ ಬ್ಯಾಂಕು, ಪತ್ತಿನ ಸಹಕಾರ ಸಂಘದ ಸೂಚನಾ ಪತ್ರಗಳಿಗೆ ಸೀಮಿತವಾಯ್ತು. ಗಾಂಧಿ ತಾತನ ಮುಖವಿದ್ದ ಅಂಚೆ ಚೀಟಿಗಳನ್ನು ಅಂಟಿಸಿಕೊಂಡು ಬರುತ್ತಿದ್ದ ಪತ್ರಗಳು ಸರ್ಕಾರಿ ಮಾಹಿತಿ ರವಾನೆಗಷ್ಟೇ ಸೀಮಿತವಾಗಿಬಿಡ್ತು. ಪತ್ರಗಳನ್ನು ಊರಿಂದೂರಿಗೆ ರವಾನಿಸುವ ರೇಲ್ವೇ ಮೇಲ್ ಸರ್ವೀಸ್ ಕೂಡಾ ಮಂಕಾಯ್ತು. ಹಾಗೆಂದ ಮಾತ್ರಕ್ಕೆ ಸಂವಹನ ನಿಲ್ಲಿಸೋಕೆ ಸಾಧ್ಯವೇ..? ಅದು ಲ್ಯಾಂಡ್ ಲೈನ್ ಯುಗ. ಟ್ರಂಕ್ ಕಾಲು, ಲೈಟ್ನಿಂಗ್ ಕಾಲುಗಳೇ ಕಾಲು ಮುರಿದು ಮೂಲೆಗೆ ಬಿದ್ದದ್ದ ಯುಗ ಅದು! ಮನೆ ಮನೆಗೂ ಲ್ಯಾಂಡ್ ಲೈನ್ ಫೋನ್ಗಳು ಬಂದವು. ಎಸ್ಟಿಡಿ, ಐಎಸ್ಡಿ ಎಂಬ ಹೊಸ ಪದಗಳು ಬಂದವು. ದೂರದಲ್ಲಿದ್ದವರನ್ನು ದೂರವಾಣಿಯಲ್ಲಿ ಜೋರಾಗಿ ಕೂಗಿ ಮಾತನಾಡುವ ತೊಂದರೆಯೂ ಇಲ್ಲವಾಯ್ತು. ಇಲ್ಲಿ ಮೆಲ್ಲಗೆ ಆಡಿದ ಮಾತೇ ಅಲ್ಲಿಯೂ ಹಿತಕರವಾಗಿ ಕೇಳಿಸುವಂತಾ ತಂತ್ರಜ್ಞಾನ ವಿಕಸನವಾಯ್ತು.
ಸ್ಥಾವರಕ್ಕಳಿವುಂಟು.. ಜಂಗಮಕ್ಕಳಿವಿಲ್ಲ!
ಹೌದು.. ವಚನಗಳ ಸಾರ ಎಷ್ಟು ಸತ್ಯ! ಸ್ಥಾವರದಂತಿದ್ದ ಲ್ಯಾಂಡ್ ಲೈನ್ ಬದಲಿಗೆ ಪೇಜರ್ ಬಂತು, ಮೊಬೈಲ್ ಬಂತು.. ಈಗ ಸೆಲ್ಫೋನ್ ಯುಗ. ಆಂಡ್ರಾಯ್ಡ್ ಜಮಾನ. ವಾಟ್ಸಪ್, ಮೆಸೆಂಜರ್, ವೀಡಿಯೋ ಕಾಲ್ ಮೇನಿಯಾದಲ್ಲಿ ಕೂಲ್ ಆಗಿಬಿಟ್ಟಿದೆ ಕಮ್ಯುನಿಕೇಷನ್ನು! ಆದ್ರೆ ಅಂಚೆ ಇಲಾಖೆ ಕಥೆ ಏನಾಯ್ತು?
ಅಂದಿನ ಅಂಚೆ ಕಚೇರಿ.. ಇಂದಿನ ಇಂಡಿಯಾ ಪೋಸ್ಟ್!
ಅಂಚೆ ಕಚೇರಿ ಅಂದ್ರೆ ಏನು? ಗಮ್ಮಿನ ಗಮಲು, ಪುಸ್ತಕ, ಹಾಳೆ, ರಸೀತಿ, ಅಂಚೆ ಚೀಟಿ. ಅದೊಂದು ಕಪ್ಪನೆಯ ಡಬ್ಬಿ! ಅದಕ್ಕೆ ಗುದ್ದೋದಕ್ಕಾಗಿಯೇ ಒಂದು ಸೀಲು! ನಾವು ನಮ್ಮವರಿಗೆ ರವಾನಿಸಿದ ಎಲ್ಲಾ ಕಾಗದಗಳ ಮೇಲೂ ವೃತ್ತಾಕಾರದ ಕಪ್ಪುಬಿಲ್ಲೆ. ಅದರೊಳಗೆ ಊರಿನ ಹೆಸರು. ಚೆಂದದ ಅಂಚೆ ಚೀಟಿಗಳಲ್ಲಿ ಮೂಡಿರುತ್ತಿದ್ದ ಚಿತ್ರಗಳ ಮೇಲೂ ಕಪ್ಪನೆಯ ಸೀಲು! ಗಾಂಧಿ ತಾತ, ಸುಭಾಷ್ ಚಂದ್ರ ಬೋಸ್ಗೂ ಸೀಲ್ ಗುದ್ದಿ ಕಳಿಸಿರುತ್ತಿದ್ದ ಅಂಚೆಯಣ್ಣ. ಆದರೆ ಇಂದು? ಈಗ ಅಂಚೆ ಇಲಾಖೆ ಬದಲಾಗಿದೆ. ಸೀಲ್ಗಳ ಬದಲಿಗೆ ಕಂಪ್ಯೂಟರ್ ಪ್ರಿಂಟ್ ಔಟ್ ಬಂದುಬಿಟ್ಟಿದೆ. ನಾವು, ನೀವು ಇಂದು ಇಮೇಲ್, ವಾಟ್ಸಪ್, ವೀಡಿಯೋ ಕಾಲ್ಗೆ ಬಂದು ನಿಂತಿರುವಾಗ ಮನೆ ಮನೆಗೆ ಪತ್ರ ಬರೆಯೋರು ಯಾರು? ಹಾಗಾಗಿಬಿಟ್ರೆ ಅಂಚೆಯಣ್ಣನಿಗೆ ಕೆಲಸವೇನು? ಗೂಗಲ್ ಪೇ, ಫೋನ್ ಪೇನಿಂದಾಗಿ ಮನಿ ಆರ್ಡರ್ ಕೂಡಾ ಮೂಲೆಗುಂಪಾಗಿದೆ. ಎಲ್ಐಸಿ, ಸರ್ಕಾರಿ ಕಾಗದ ಪತ್ರ, ಆಧಾರ್ ಕಾರ್ಡ್ ಹಂಚಲಷ್ಟೇ ಅಂಚೆ ಇಲಾಖೆ ಸೀಮಿತವೇ? ಇಲ್ಲವೇ ಇಲ್ಲ, ಇಂದು ಅಂಚೆ ಇಲಾಖೆ ಬ್ಯಾಂಕ್ ಆಗಿ ಪರಿವರ್ತನೆಯಾಗಿದೆ! ಹಿಂದೆ ಇದ್ದ ಎನ್ಎಸ್ಸಿ, ಆರ್ಡಿ, ಪಿಪಿಎಫ್ ಅಷ್ಟೇ ಅಲ್ಲ, ಸುಕನ್ಯಾ ಸಮೃದ್ದಿ ಯೋಜನೆಯಂತಾ ಸ್ಕೀಂಗಳೂ ಪೋಸ್ಟ್ ಆಫೀಸ್ನಲ್ಲಿವೆ. ಗೂಗಲ್ ಪೇಗೆ ಸಡ್ಡು ಹೊಡೆಯಬಲ್ಲ ತಂತ್ರಜ್ಞಾನವೂ ಇಂಡಿಯಾ ಪೋಸ್ಟ್ನಲ್ಲಿದೆ..
ಅಂಚೆಯಣ್ಣ ಈಗ ಹೇಗಿದ್ದಾನೆ?
ಜನರೇನೋ ಬದಲಾದರು. ಅಂಚೆಯಣ್ಣ ಬದಲಾಗುವನೇ? ಮನೆ ಮನೆಗೆ ಮೊಬೈಲು ಬಂದ ಮೇಲೆ ಪತ್ರದ ಗೊಡವೆಯೇಕೆ? ಅಂಚೆಯಣ್ಣನ ಜೊತೆ ಮಾತೇಕೆ? ಆದರೆ, ಆತ ಇಂದಿಗೂ ಇದ್ದಾನೆ. ಆಧಾರ್ ಕಾರ್ಡುಗಳು, ರಿಜಿಸ್ಟರ್ಡ್ ಪೋಸ್ಟ್ಗಳು, ಸ್ಪೀಡ್ ಪೋಸ್ಟ್ಗಳು, ಎಲ್ಐಸಿಯಂಥಾ ಸೇವೆಗಳ ಎಚ್ಚರಿಕೆ ಪತ್ರಗಳನ್ನು ಮನೆ ಮನೆಗೆ ತಲುಪಿಸುತ್ತಿದ್ದಾನೆ. ಆದ್ರೆ, ಹಿಂದೆ ಅಂಚೆಯಣ್ಣ ಬಂದಾಗ ಇರುತ್ತಿದ್ದ ಸುಗ್ಗಿ ಈಗಿಲ್ಲ....
ಶತಮಾನಗಳ ಇತಿಹಾಸವಿರುವ ಭಾರತೀಯ ಅಂಚೆ ಇಲಾಖೆ, ಆಗ ಜನಪ್ರಿಯತೆಯ ತುತ್ತ ತುದಿಯಲ್ಲಿತ್ತು. ಅಂಗಿ ಹರಿದುಕೊಂಡ ಮಗುವಿಗೆ ಪೋಸ್ಟಾಪೀಸ್ ಎಂದು ಲೇವಡಿ ಮಾಡುವಷ್ಟರ ಮಟ್ಟಿಗೆ ಮನೆಮನೆಯಲ್ಲೂ ಫೇಮಸ್ ಆಗಿತ್ತು ಅಂಚೆ ಇಲಾಖೆ! ಆದ್ರೆ, ದಿನಗಳೆದಂತೆ ಅಂಚೆ ಇಲಾಖೆ ಕಳೆಗುಂದಿದೆ. ಆದ್ರೆ, ಅಂಚೆ ಇಲಾಖೆಗೆ ಇರುವ ವಿಶ್ವಾಸಾರ್ಹತೆ ಮಾತ್ರ ಕಡಿಮೆಯಾಗಿಲ್ಲ. ಇದೇ ವಿಶ್ವಾಸಾರ್ಹತೆಯನ್ನು ಬಳಕೆ ಮಾಡಿಕೊಂಡು ಆನ್ ಲೈನ್ ಬ್ಯಾಂಕಿಂಗ್ ಸೇರಿದಂತೆ ಹತ್ತು ಹಲವು ಸೇವೆಗಳನ್ನು ಮುಂದಿನ ದಿನಗಳಲ್ಲಿ ಜನಮಾನಸಕ್ಕೆ ಪರಿಚಯಿಸಲಿ...👏🙏
ವಿಶ್ವ ಅಂಚೆ ದಿನದಂದು ಭಾರತೀಯ ಅಂಚೆ ಇಲಾಖೆಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ಎಲ್ಲರಿಗೂ ಧನ್ಯವಾದಗಳು...🙇👏🙏
